Salomo, a papa fu Rehabeyam ben de kownu fu Israel 40 yari langa (1 Kow. 11:42). Salomo dede na ini 997 Fosi Krestes. Baka dati, Rehabeyam komoto na Yerusalem go na Sikem pe den salfu en leki kownu (2 Kron. 10:1). Yu denki taki a ben frede fu tron a nyun kownu? Salomo ben koni srefisrefi. Heri esi Rehabeyam ben o abi fu sori efu a ben koni nofo fu lusu wan muilek problema.

Den Israelsma ben feni taki Salomo ben e pina den èn den seni sma fu go taki nanga Rehabeyam fu a tori. Den taki: „Yu papa poti wan hebi tyatyari na wi tapu. Dati meki wi wani aksi yu fu no meki wi wroko so tranga leki fa wi ben wroko gi yu papa. Meki a hebi tyatyari di a poti na wi tapu, kon moro lekti, dan wi o dini yu.”​—2 Kron. 10:3, 4.

Rehabeyam ben musu teki wan muilek bosroiti. Efu a ben o du san a pipel wani, dan en, en famiri nanga den sma di ben e tan na ini kownu-oso no ben o man libi so bigi moro leki fa den ben gwenti. Ma efu a no ben du san a pipel wani, dan den ben kan opo densrefi teige en. San a ben o du? A nyun kownu go suku rai fosi na den owru man di ben e wroko gi en papa. Ma baka dati, Rehabeyam go suku rai na den yongu man di ben de en speri. A teki a rai fu den man dati èn a bosroiti fu pina a pipel moro. A taigi den: „Mi o meki un tyatyari kon moro hebi. Ai, mi o hebi en srefisrefi gi unu. Mi papa ben fon unu nanga wipi. Ma mi o fon unu nanga wipi di abi maka.”​—2 Kron. 10:6-14.

San yu kan leri fu disi? Na ini a ten disi wi abi furu owruwan di dini Yehovah furu yari langa èn di kan yepi wi fu teki bun bosroiti. A de wan koni sani fu arki den.​—Yob 12:12.

Di Rehabeyam si taki a pipel opo densrefi teige en, a tyari a legre fu en kon na wán fu go feti  nanga den. Ma Yehovah seni a profeiti Semaya fu taigi Rehabeyam: „Un no musu go feti nanga un brada, di de bakapikin fu Israel tu. Drai go baka na un oso! Na fu di mi ben wani en so, meki ala den sani disi pasa.”​—1 Kow. 12:21-24. *

A ben makelek gi Rehabeyam fu gi yesi na Yehovah? San sma ben o denki fu a nyun kownu? A ben taki dati a ben o fon a pipel nanga „wipi di abi maka”, ma now di den opo densrefi teige en a no du noti nanga den. (Luku 2 Kroniki 13:7.) Awinsi san a pipel ben o denki fu en, a kownu nanga a legre fu en „gi yesi na Yehovah èn den drai go baka na den oso, soleki fa Yehovah taki”.

San wi kan leri fu a tori disi? Ala ten a bun fu gi yesi na Gado awinsi sma o spotu wi. Te wi e gi yesi na Gado, dan a o feni wi bun èn a o blesi wi.​—Deut. 28:2.

Yehovah blesi Rehabeyam fu di a gi yesi na en? Iya, Rehabeyam tan dini leki kownu fu Yuda nanga Benyamin. A bosroiti fu meki nyun foto tu. A ben meki son foto „kon tranga srefisrefi” (2 Kron. 11:5-12). San moro prenspari, na taki fu wan pisi ten a ben e gi yesi na den wet fu Yehovah. Fu di den sma fu a tin-lo kownukondre bigin anbegi falsi gado, meki den wan di ben wani dini a tru Gado go na Yerusalem. Na so Rehabeyam ben abi furu sma di ben horibaka gi en (2 Kron. 11:16, 17). Sobun, fu di Rehabeyam ben e gi yesi na Yehovah, meki a kownukondre fu en ben kon moro tranga.

Di Rehabeyam kisi moro makti, a du wan sani di sma no ben fruwakti. A no gi yesi moro na den wet fu Yehovah èn a bigin anbegi falsi gado. Fu san ede a du dati? En mama no ben de wan Israelsma, ma wan Amonsma (1 Kow. 14:21). Sobun, na en mama ben meki a du dati? Wi no sabi, ma a pipel waka na en baka. Dati meki Yehovah gi pasi taki Kownu Sisak fu Egepte teki wan lo foto na ini Yudea abra aladi Rehabeyam ben meki den foto disi kon tranga srefisrefi!​—1 Kow. 14:22-24; 2 Kron. 12:1-4.

Sani ben kon moro ogri di Sisak nanga a legre fu en kon feti nanga Yerusalem, pe Rehabeyam ben e tiri. Di dati pasa, Gado seni a profeiti Semaya fu gi Rehabeyam nanga den granman fu en a boskopu disi: „Fu di unu gowe libi mi, meki mi libi unu gi Sisak.” San Rehabeyam du di a yere a boskopu disi? Bijbel e taki: „Ne den granman fu Israel nanga a kownu sori sakafasi èn den taki: ’Yehovah e du san reti.’” Dati meki Yehovah frulusu Rehabeyam èn a sorgu taki Yerusalem no kisi pori.​—2 Kron. 12:5-7, 12.

Baka dati Rehabeyam tan tiri leki kownu fu Yuda. Fosi a dede, a gi den manpikin fu en furu kado. Kande a ben wani sorgu taki den no ben o opo densrefi teige den brada Abia, di ben o tron a nyun kownu (2 Kron. 11:21-23). Disi leisi Rehabeyam teki wan moro koni bosroiti leki di a ben yongu.

Aladi Rehabeyam pruberi fu du wan tu bun sani, toku Bijbel e taki: ’A du ogri.’ Fu san ede? Fu di „Rehabeyam no ben sreka en ati fu du a wani fu Yehovah dorodoro”.​—2 Kron. 12:14.

San wi kan leri fu a libi fu Rehabeyam? Rehabeyam gi yesi na Gado son leisi. Èn a du wan tu bun sani gi a pipel fu Yehovah. Ma a no ben abi wan bun matifasi nanga Yehovah èn a no ben abi na angri fu plisi En. Dati meki a du sani di no bun èn a go anbegi falsi gado. Kande yu e aksi yusrefi: ’Fu san ede Rehabeyam gi yesi na Gado? Na fu di a ben abi berow trutru fu den fowtu fu en èn fu di a ben wani prisiri Gado? Noso fu di tra sma taigi en san a ben musu du?’ (2 Kron. 11:3, 4; 12:6) Bakaten a go du ogri baka. A ben de heri tra fasi leki en granpapa Kownu David. A tru taki David meki fowtu, ma a ben abi berow trutru fu den sondu fu en. A ben lobi Yehovah nanga a tru anbegi en heri libi langa.​—1 Kow. 14:8; Ps. 51:1, 17; 63:1.

 Wi kan leri furu fu a tori fu Rehabeyam. A bun taki wi e sorgu gi wi osofamiri èn taki wi e du bun sani gi sma. Ma dati no sari. Efu wi wani taki Yehovah feni wi bun, dan wi musu anbegi en na a fasi di a feni bun èn wi musu abi wan bun matifasi nanga en.

Wi o man du disi efu wi lobi Yehovah nanga wi heri ati. Neleki fa wi musu poti udu gi wan faya fu meki a tan bron, na so wi musu du sani fu tan lobi Gado. Wi musu studeri en Wortu doronomo, wi musu denki dipi fu en èn wi musu begi (Ps. 1:2; Rom. 12:12). Te wi lobi Yehovah, dan wi o wani du ala san a e aksi fu wi. Èn te wi e meki fowtu, dan lobi gi Yehovah o yepi wi fu sori berow. Wi no o de leki Rehabeyam, ma wi o tan dini a tru Gado.​—Yud. 20, 21.