1, 2. (a) San Yesus ben aksi Gado a lasti leisi di a begi nanga den apostel fu en? (b) Fu san ede Yesus ben feni en fanowdu fu taki fu wánfasi nanga den apostel fu en?

A LASTI neti di Yesus ben de nanga den apostel fu en, a ben wani yepi den fu abi wánfasi. Di a ben e begi nanga den, a aksi en Tata efu den disipel ben kan de wán neleki fa en nanga en Tata de wán. (Leisi Yohanes 17:20, 21.) Efu den disipel fu Yesus ben abi wánfasi, dan disi ben o sori tra sma taki na Yehovah ben seni Yesus kon na grontapu. Tru Kresten ben o sori lobi gi makandra èn disi ben o yepi den fu abi wánfasi.​—Yoh. 13:34, 35.

² A srefi neti dati di Yesus ben e nyan nanga den apostel fu en, a si taki den ben meki trobi „suma fu den ben de a moro bigiwan”. Disi no ben de a fosi leisi taki den meki trobi fu a sani disi (Luk. 22:24-27; Mark. 9:33, 34). Fu di Yesus ben sabi taki a sani disi ben kan pori a wánfasi fu den apostel, meki a neti dati a ben e taki furu fu a tori disi. Wan tra leisi Yakobus  nanga Yohanes ben aksi Yesus fu gi den prenspari posisi na ini a Kownukondre, leti na en sei.​—Mark. 10:35-40.

3. Sortu sani ben kan meki taki den disipel fu Krestes no ben abi wánfasi èn sortu aksi wi o luku?

³ A feti di den disipel ben feti fu kisi hei posisi no ben de a wan-enkri sani di ben kan pori a wánfasi fu den. Den sma na ini a ten fu Yesus no ben abi wánfasi fu di den no ben lobi tra sma èn fu di den ben e desko makandra. Den disipel fu Yesus ben musu leri fu no denki so moro. Na ini na artikel disi wi o poti prakseri na den aksi disi: San Yesus ben e du te sma ben e desko en? Fa a yepi den bakaman fu en fu no desko trawan, ma fu abi wánfasi? Fa den leri fu Yesus kan yepi wi fu abi wánfasi?

4. Gi wan tu eksempre di e sori taki sma ben e desko Yesus.

⁴ Srefi Yesus sma ben e desko. Di Filipus taigi Natanael taki a feni a Mesias, Natanael taki: „Wan bun sani kan komopo fu Nasaret?” (Yoh. 1:46) Natanael ben sabi taki a Mesias ben o gebore na ini Betlehem, soleki fa a profeititori na Mika 5:2 e taki. Kande a ben e denki taki Nasaret no ben prenspari nofo taki a Mesias ben o komoto fu drape. Son kerki fesiman fu Yudea ben e wisiwasi Yesus fu di a ben de fu Galilea (Yoh. 7:52). Furu sma fu Yudea ben feni taki den ben bun moro den sma fu Galilea. Tra Dyu ben kari Yesus wan Samariasma fu spotu en (Yoh. 8:48). Den Samariasma ben de fu wan tra kontren èn a bribi fu den ben difrenti fu a di fu den Dyu. Den Yudeasma nanga den Galileasma no ben abi lespeki gi den Samariasma èn den no ben wani bumui nanga den.​—Yoh. 4:9.

5. Fa sma ben e desko den disipel fu Yesus?

⁵ Den Dyu kerki fesiman ben e spotu den disipel fu Yesus tu. Den Fariseiman ben e kari den „frufruktu sma” (Yoh. 7:47-49). Iya, den ben e wisiwasi iniwan sma di no ben go na den skoro fu den rabi noso di no ben hori densrefi na den gwenti fu den (Tori 4:13). Sma ben e desko Yesus nanga den disipel fu en fu di den ben feni taki a bribi nanga a ras fu den ben moro bun èn fu di den ben abi hei posisi. Den disipel ben kon abi a srefi denki disi. Efu den ben wani abi wánfasi, dan den ben o abi fu denki tra fasi leki den sma fu a ten dati.

6. Fruteri wan tu eksempre di e sori taki wi srefi musu leri fu no desko sma.

⁶ Na ini a ten disi furu sma e desko trawan. Kande sma e desko wi noso kande wi no e denki bun fu son sma. Wan sisa di e pionier na ini Australia e taki: „Fu di den wetiman ben du furu ogri nanga den Aboriginsma, meki mi ben teige den. Mi no ben lobi den kwetikweti fu di den ben du ogri nanga mi tu.” Wan brada fu Kanada taki: „Mi ben feni taki sma di e taki Fransitongo ben bun moro ala tra sma.” Dati meki a no ben lobi sma di e taki Ingrisitongo.

7. Fa Yesus ben e libi nanga sma aladi den sma fu a ten dati ben e desko trawan?

⁷ Neleki fa a ben de na ini a ten fu Yesus, a muilek gi sma na ini a ten disi fu no desko trawan. San yepi Yesus fu no desko sma? Na a fosi presi a no ben feni taki a wan sma bun moro a trawan. A ben e preiki gi gudusma nanga pôtisma, gi Fariseiman nanga Samariasma, èn srefi gi sma di ben libi wan sondu libi èn gi den man di ben e teki belasting-moni gi lanti. A di fu tu sani na taki a ben e leri den disipel fu en taki den no ben musu denki takru fu trawan èn den no ben musu desko sma. Boiti dati, a ben de wan bun eksempre gi den.

8. Sortu prenspari sani di Yesus leri wi, e yepi wi fu abi wánfasi? Fruklari disi.

⁸ Yesus leri den disipel fu en wan prenspari sani di e yepi wi fu abi wánfasi. A taigi den: „Un alamala na brada.” (Leisi Mateyus 23:8, 9.) Fu taki en leti, wi alamala na brada fu di wi alamala na pikin fu Adam (Tori 17:26). Yesus ben taigi den disipel tu taki den ben de brada nanga sisa fu makandra fu di den ben e si Yehovah leki den Papa na hemel (Mat. 12:50). Boiti dati, den kon na ini a famiri fu Gado pe alamala sma abi a srefi bribi èn pe ala sma lobi makandra. Dati meki na ini den brifi di den apostel ben skrifi, den ben kari den tra Kresten brada nanga sisa.​—Rom. 1:13; 1 Petr. 2:17; 1 Yoh. 3:13. *

9, 10. (a) Fu san ede den Dyu no ben abi nowan reide fu denki taki den bun moro tra pipel? (b) Fa Yesus leri sma taki a fowtu fu desko sma fu tra ras? (Luku a fosi prenki na a bigin fu na artikel.)

⁹ Baka di Yesus taigi den disipel taki den musu si makandra leki brada nanga sisa, a sori den o prenspari a de fu abi sakafasi. (Leisi Mateyus 23:11, 12.) Leki fa wi ben si kaba, dan heimemre ben meki taki den apostel ben e meki trobi son leisi. Na ini a ten fu Yesus furu sma ben feni taki den ben bun moro sma fu tra ras. Furu Dyu ben feni taki den ben bun moro trawan fu di den ben de bakapikin fu Abraham. Ma Yohanes a Dopuman taigi den: „Gado abi a makti fu meki pikin gi Abraham fu den ston disi.”​—Luk. 3:8.

¹⁰ Yesus leri den disipel fu en taki a ben fowtu fu denki taki a ras fu den moro bun. A ben leri den disi, di wan leriman fu Wet ben aksi en: „Suma na den tra sma di mi musu lobi?” Yesus fruteri a man disi wan agersitori fu wan Samariaman di ben sorgu gi wan Dyu di fufuruman ben fon. Den Dyu di ben si a man disi na pasi waka pasa, ma a Samariaman ben abi sari-ati nanga en. Na a kaba Yesus taigi a leriman taki a ben musu de neleki a Samariaman dati (Luk. 10:25-37). Yesus sori taki den Dyu ben kan leri wan sani fu a Samariaman disi di ben lobi ala sortu sma.

11. Fu san ede den disipel fu Krestes no ben musu denki takru fu tra sma èn fa Yesus yepi den fu frustan disi?

¹¹ Fosi Yesus go na hemel, a taigi den disipel fu en fu preiki „na ini heri Yudea nanga Samaria, èn te na den moro farawe presi fu grontapu” (Tori 1:8). Ma fu man du disi, den ben musu kon abi sakafasi èn den no ben musu desko sma moro. Furu tron Yesus taki fu den bun fasi di trakondre sma ben abi èn disi ben o yepi den disipel fu man preiki gi sma fu ala kondre. Fu eksempre, a ben prèise wan legre-ofsiri fu wan tra kondre fu di a ben abi wan tranga bribi (Mat. 8:5-10). Di Yesus ben de na ini Nasaret, a presi pe a kweki, a taki fa Yehovah ben yepi sma fu tra kondre, soleki na uma fu Sarfat nanga a Siriaman Naman, di ben abi gwasi (Luk. 4:25-27). Yesus ben e preiki tu gi wan Samaria uma èn a tan tu dei na ini wan foto fu Samaria fu di den sma drape ben wani sabi moro fu a boskopu fu en.​—Yoh. 4:21-24, 40.

12, 13. (a) Fa den apostel ben feni en taki Yesus ben gi leri na wan Samaria uma? (Luku a di fu tu prenki na a bigin fu na artikel.) (b) Fu san ede wi kan taki dati Yakobus nanga Yohanes no ben frustan san Yesus ben wani leri den?

¹² A no ben makelek gi den apostel fu no desko trawan. Den ben skreki di den si taki  Yesus ben e gi leri na wan Samaria uma (Yoh. 4:9, 27). Den Dyu kerki fesiman no ben e taki nanga umasma na presi pe furu sma ben de. Sobun, noiti den ben o taki nanga wan Samaria uma di no ben e libi wan krin libi. Di den apostel doro, den kari Yesus fu kon nyan. Ma Yesus ben lobi a takimakandra di a ben abi nanga na uma disi so te, taki a no ben e prakseri fu go nyan srefi. Gado ben wani taki a ben musu preiki gi sma èn a no ben abi trobi efu a ben musu preiki gi wan Samaria uma. Gi en a wroko dati ben de leki nyanyan.​—Yoh. 4:31-34.

¹³ Yakobus nanga Yohanes no ben e frustan san Yesus ben wani leri den. Wan leisi di Yesus nanga den apostel fu en ben e pasa na ini Samaria, den ben e suku wan presi fu sribi na ini wan fu den dorpu fu den Samariasma. Den Samariasma no ben wani gi den wan presi fu sribi èn dati meki Yakobus nanga Yohanes atibron. Den ben wani meki faya fu hemel saka kon fu bron a heri dorpu. Ma Yesus piri-ai gi den (Luk. 9:51-56). Kande Yakobus nanga Yohanes no ben o atibron so efu a sani disi ben pasa na ini Galilea, a kontren pe den ben e tan. Ma den ben e atibron fu di den ben e denki takru fu den Samariasma. Bakaten di Yohanes ben preiki gi den Samariasma, furu fu den arki a boskopu. Kande a ben firi syen te a ben e prakseri fa a ben e denki fu den fosi.​—Tori 8:14, 25.

14. Fa den apostel lusu wan problema di ben de na ini a gemeente?

¹⁴ Syatu baka a Pinksterfesa fu a yari 33, wan problema ben de na ini a gemeente. Den Dyu di ben e taki Grikitongo ben feni taki den sisa fu den di no ben abi masra moro no ben e kisi a nyanyan di ben e prati (Tori 6:1). Kande a problema disi ben de fu di son Dyu ben e taki Grikitongo èn trawan ben e taki Hebrewtongo. Fu lusu a problema disi, den apostel poti lepi brada fu prati a nyanyan. Ala den lepi brada disi ben abi Griki nen. Kande disi ben de wan trowstu gi den uma di ben e taki Grikitongo.

15. Fa Petrus leri fu no desko trawan moro? (Luku a di fu dri prenki na a bigin fu na artikel.)

¹⁵ Na ini a yari 36, den disipel bigin preiki na tra kondre. Na apostel Petrus ben gwenti bumui soso nanga den Dyu. Ma di Gado sori en krin taki Kresten no musu desko trawan, Petrus go preiki gi Kornelius wan Rome srudati. (Leisi Tori fu den apostel 10:28, 34, 35.) Baka dati Petrus bigin moksi nanga Kresten di no ben de Dyu èn a ben e nyan makandra nanga den. Ma baka wan tu yari di Petrus ben de na ini a foto Antiokia, a no ben wani nyan moro nanga Kresten di no ben de Dyu (Gal. 2:11-14). Dati meki Paulus piri-ai gi Petrus èn Petrus teki a piri-ai. Fa wi du sabi dati? Di Petrus skrifi en fosi brifi gi den Dyu Kresten nanga den tra Kresten na ini Pikin Asia, a taki dati a prenspari fu lobi ala brada nanga sisa.​—1 Petr. 1:1; 2:17.

16. Fa sma ben sabi den fosi Kresten?

¹⁶ A de krin taki na eksempre fu Yesus leri den apostel fu lobi „ala sortu sma” (Yoh. 12:32; 1 Tim. 4:10). Aladi a teki ten, toku te fu kaba den kenki a denki fu den. Sma ben sabi den fosi Kresten leki sma di ben lobi makandra. Sowan 200 yari Baka Krestes, Tertullianus skrifi a sani disi fu den Kresten: „Den lobi makandra . . . Den de klariklari fu dede gi makandra.” Fu di den fosi Kresten ben tron nyun sma di „kisi nyun fasi”, meki den ben kon si taki gi Gado ala sma na a srefi.​—Kol. 3:10, 11.

17. San kan yepi wi fu no desko nowan sma? Gi wan tu eksempre.

¹⁷ Na ini a ten disi, wisrefi e leri fu no  desko nowan sma. A sani disi kan teki ten. Wan sisa na ini Fransikondre e fruteri fa a ben muilek gi en. A e taki: „Yehovah leri mi san na lobi, a leri mi fu prati sani nanga trawan èn fu lobi ala sortu sma. Ma toku mi e feti ete fu no desko trawan èn a sani disi no makelek. Dati meki mi e tan begi Gado fu yepi mi.” Wan sisa fu Spanyorokondre abi a srefi problema. A e taki: „Mi feni en muilek fu lobi wan spesrutu ras. Mi e tan meki muiti fu no denki takru fu den èn mi si taki a e go. Ma mi sabi taki mi musu tan feti. Mi breiti taki Yehovah tyari mi kon na ini wan bigi famiri di abi wánfasi.” Ibriwan fu wi musu ondrosuku wisrefi. Kande wi srefi musu meki tranga muiti fu no desko tra sma.

18, 19. (a) Sortu reide wi abi fu teki trawan nanga prisiri? (b) Fa wi kan du disi?

¹⁸ Wi no musu frigiti taki fosi, wi ben de leki „trakondre sma” gi Gado fu di wi no ben de mati fu en (Ef. 2:12). Ma Yehovah hari wi kon na en „nanga titei fu lobi” (Hos. 11:4; Yoh. 6:44). Èn Krestes teki wi nanga prisiri. A opo a doro gi wi so taki wi kan kon na ini na osofamiri fu Gado. (Leisi Romesma 15:7.) Efu Yesus teki wi nanga prisiri aladi wi na sondusma, dan suma na wi fu desko tra sma?

¹⁹ Fu di a kaba fu a grontapu disi e kon moro krosibei, meki furu sma e desko trawan, furu pratifasi de èn furu sma de feanti fu trawan (Gal. 5:19-21; 2 Tim. 3:13). Ma wi leki futuboi fu Yehovah e suku a koni fu Gado. Dati meki wi no e desko trawan èn wi e suku freide (Yak. 3:17, 18). Wi lobi meki mati nanga sma fu tra kondre, wi lobi leri fu tra kulturu èn wi lobi leri tra tongo srefi. Disi e meki taki a freide fu wi „de leki wan liba” èn retidu „de leki den skwala fu se”.​—Yes. 48:17, 18.

20. San e pasa te lobi e kenki a fasi fa wi e denki èn fa wi e firi?

²⁰ Di a sisa fu Australia studeri Bijbel, dan safrisafri a leri fu no desko trawan moro èn fu no denki takru fu sma. Lobi ben kenki a fasi fa a ben e denki èn fa a ben e firi. A brada fu Kanada di e taki Fransitongo, taki dati „sma e desko trawan fu di den no sabi den”. A leri taki „a no a presi pe yu gebore e bepaal san yu man du”. A trow srefi nanga wan sisa di e taki Ingrisitongo. Den eksempre disi e sori taki lobi e yepi Kresten fu no desko trawan moro. A e meki taki wi kon de wán!​—Kol. 3:14.