„FA YU TAN? Fa a e go nanga yu tide?”

A no de fu taki dati yu gi sma odi furu leisi na a fasi disi. Kande yu e seki wan sma anu noso yu e brasa en te yu e gi en odi. Ibri kondre abi en eigi fasi fa sma e gi trawan odi. Fu taki en leti, te wi no e gi sma odi, dan sma kan feni taki wi no e sori lobi noso taki wi no abi maniri.

Ma a no ala sma lobi gi trawan odi. Son sma no e gi odi fu di den e syen. Trawan abi a firi taki den no warti noti èn dati meki a muilek gi den fu gi sma odi. Tra sma feni en muilek fu gi trawan odi fu di den de fu wan tra ras, wan tra kulturu, noso fu tra sani ede. Ma te wi e gi sma odi, awinsi wi no e taki langa nanga den, dan dati kan du furu kaba.

Aksi yusrefi: ’San wan odi kan du? San Gado Wortu kan leri mi fu odi?’

Di na apostel Petrus yepi Kornelius, di no ben de wan Dyu, fu tron wan Kresten, a taki: „Gado no lobi a wan sma moro a trawan” (Tori 10:34). Bakaten Petrus skrifi taki Gado „wani taki ala sma musu kisi na okasi fu sori berow” (2 Petr. 3:9). Kande wi e denki taki den tekst disi abi fu du soso nanga sma di e studeri Bijbel. Ma Petrus ben gi Kresten a rai disi tu: „Gi grani na ala sortu sma, lobi ala brada” (1 Petr. 2:17). Dati meki a bun fu gi tra sma odi awinsi den de fu wan tra ras noso kulturu èn awinsi den kweki tra fasi. Na so wi e gi den grani èn wi e sori lobi gi den.

Na apostel Paulus ben gi den brada nanga sisa a rai disi: „Teki makandra nanga prisiri neleki fa Krestes ben teki wi nanga prisiri” (Rom. 15:7). Paulus ben de nanga tangi taki den brada ben „trowstu” en. Na ini a ten disi den brada nanga sisa fu wi abi moro trowstu fanowdu fu di Satan e meki moro muiti fu du ogri nanga den.​—Kol. 4:11; Openb. 12:12, 17.

Eksempre na ini Bijbel e sori taki te wi e gi trawan odi, dan wi no e meki sma firi bun nomo, ma wi e gi den deki-ati èn wi sori lobi gi den.

Di a ten ben doro taki a Manpikin fu Gado ben o gebore na grontapu, dan Yehovah seni wan engel fu kon taki nanga Maria. Na engel bigin nanga den wortu disi: „Odi, uma di kisi wan bigi grani, Yehovah de nanga yu.” Maria „skreki srefisrefi di a yere disi” èn a ben aksi ensrefi fu san ede wan engel ben taki nanga en. Di na engel si disi a taigi en: „No frede Maria, bika Gado feni yu bun.” A fruteri en taki Gado wani taki a tron a mama fu a Mesias. Now Maria no ben bruya moro, ma nanga lespeki a piki: „Luku, mi na a umasrafu fu Yehovah! Meki sani pasa nanga mi soleki fa yu taki.”​—Luk. 1:26-38.

A ben de wan grani gi na engel fu tyari a boskopu disi fu Yehovah. Toku a no ben si en leki wan lagi sani fu taki nanga wan sondu libisma. A fosi sani di a du, na taki a gi en odi. San wi kan leri fu na eksempre disi? Ala ten wi musu gi trawan odi èn wi musu gi den deki-ati. Nanga wan tu wortu nomo wi kan gi trawan deki-ati èn wi kan gi den a firi taki den na wi brada nanga sisa tu.

Paulus ben kon sabi furu brada nanga sisa na ini den gemeente fu Pikin Asia nanga Europa. Na ini den brifi fu en a gi furu sma odi. Wi kan si disi na ini Romesma kapitel 16. Paulus ben seni odi gi furu  Kresten brada nanga sisa. A kari Feibe „wi sisa” èn a taigi den brada fu „teki en nanga prisiri leki wan futuboi fu Masra, soleki fa a fiti den santawan”. Den ben musu „yepi en nanga ala sani di a ben sa abi fanowdu”. Di Paulus seni odi gi Preska nanga Akwila, a taki: „A no mi wawan e taigi den tangi, ma sosrefi ala den gemeente na ini den tra kondre.” A gi son sma odi di wi no sabi furu fu den. A gi odi na Eipeinetus di a kari „mi lobiwan”. A gi odi tu na ’Trifeina nanga Trifosa, uma di wroko tranga gi Masra’. Iya, Paulus ben lobi gi en brada nanga sisa odi.​—Rom. 16:1-16.

Prakseri fa den brada nanga sisa dati ben breiti fu sabi taki Paulus no frigiti den. A no de fu taki dati den ben kon abi moro lobi gi Paulus èn gi makandra! Te den tra Kresten ben yere den odi fu Paulus, dan dati ben gi den deki-ati èn a ben yepi den fu tan abi wan tranga bribi. Iya, te wi e gi sma odi fu di wi e broko wi ede trutru nanga den èn te wi e prèise den, dan wi e tron moro bun mati fu den èn a e yepi wi fu tan abi wánfasi.

Di Paulus ben de na pasi fu go na Rome, a doro na a lanpe fu Puteyoli. Drape wan tu Kresten komoto na zuidsei fu kon miti en. Di Paulus si den e kon, „a taki Gado tangi èn a kisi deki-ati” (Tori 28:13-15). Son leisi, a wan-enkri sani di wi kan du na fu lafu nanga wan sma noso fu wai anu gi en. Toku a sani dati wawan kan meki wan sma di lasi-ati noso di e sari firi bun.

A disipel Yakobus ben musu gi son Kresten piri-ai. Den Kresten disi ben tron mati fu grontapu (Yak. 4:4). Ma luku fa Yakobus bigin a brifi fu en:

„Mi, Yakobus, wan srafu fu Gado èn fu Masra Yesus Krestes, e skrifi den twarfu lo di panya na ala presi: Odi!” (Yak. 1:1) A no de fu taki dati a ben moro makriki gi den brada nanga sisa fu teki a rai fu Yakobus di a taigi den taki en na wan srafu fu Gado, neleki den. Iya, Yakobus ben abi sakafasi. Te wi e gi odi na a srefi fasi, dan dati kan meki en makriki gi wi fu taki fu seryusu tori nanga sma.

Awinsi na odi fu wi no langa, wi musu sori sma taki wi lobi den trutru. So wan odi o abi furu krakti awinsi a gersi leki a sma no yere taki wi gi en odi (Mat. 22:39). Wan leisi wan sisa na ini Ierland ben kon na ini a Kownukondre zaal leti fa a konmakandra ben o bigin. A ben hasti fu go sidon, ne wan brada drai luku en, a lafu, dan a taki: „Fa a e go? Mi breiti fu si yu.” A sisa go sidon, ma a no piki a brada.

Wan tu wiki baka dati, a go na a brada èn a taigi en taki wan heri pisi ten a situwâsi fu en na oso ben e gi en stress. A sisa taki: „A neti dati mi ben sari so te, taki bijna mi no kon na zaal. Mi no man memre furu fu a konmakandra dati, ma mi sabi taki yu gi mi odo. A ben meki mi firi bun trutru. Grantangi.”

A brada no ben sabi taki na odi fu en ben gi a sisa so furu deki-ati. A brada taki: „Di a sisa taigi mi taki na odi fu mi gi en furu deki-ati, dan mi ben breiti taki mi du muiti fu gi en odi. A meki mi firi bun tu.”

Salomo ben taki: „Trowe yu brede go na tapu a watra, bika baka wan heri pisi ten yu o feni en baka” (Preik. 11:1). Te wi lobi gi sma odi, spesrutu wi Kresten brada nanga sisa, dan wi e gi den deki-ati èn wi srefi e firi bun tu. Sobun, meki wi tan hori na prakseri taki wan odi kan du furu.