Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

San na fo sani di kan yepi wi fu singi moro bun?

Wi musu tanapu bun èn wi musu hori wi singibuku na wi fesi. Wi musu bro bun. Te wi e opo wi mofo bradi èn wi e singi nanga wan krakti sten, dan wi o man singi moro tranga.​—w17.11, blz. 5, 6.

San de so aparti te wi e luku pe den loweman-foto ben de na ini Israel èn fa den pasi go na den foto disi ben de?

Den siksi loweman-foto ben prati na ini a heri kondre, so taki a ben makelek gi wan loweman fu doro na den èn den pasi go na den loweman-foto ben bun. Na a fasi disi wan loweman ben o man lon go drape makelek èn esi-esi.​—w17.11, blz. 14.

Gado gi Yesus leki wan lusu-paiman. Fu san ede disi na a moro bun kado di wi kisi?

A e meki taki wi kan libi fu têgo èn a e yepi wi fu kon fri fu sondu nanga dede. Fu di Gado lobi den bakapikin fu Adam, meki a seni Yesus kon dede gi wi aladi wi ben de sondusma.​—wp17.6, blz. 6, 7.

Fu san ede wi kan taki dati Psalm 118:22 e taki fu na opobaka fu Yesus?

Den Dyu ben weigri fu si Yesus leki a Mesias èn dati meki den kiri en. Efu a ben musu tron „a moro prenspari ukuston”, dan a ben musu kisi wan opobaka.​—w17.12, blz. 9, 10.

A de so taki na soso den fosi manpikin ben kan tron afo fu a Mesias?

Son leisi wan fosi manpikin ben e tron wan afo fu a Mesias, ma dati no ben de so ala ten. David no ben de a fosi manpikin fu Isai, ma toku a tron wan afo fu a Mesias.​—w17.12, blz. 14, 15.

Na sortu wet na ini Bijbel, datra e hori densrefi now?

A Wet di Gado ben gi den Israelsma ben taki dati sma di ben abi spesrutu siki ben musu tan aparti fu tra sma. Sma ben musu wasi den anu baka te den fasi wan dedeskin. A Wet ben e sori tu taki den Israelsma ben musu beri a pupe fu den èn den no ben mag pupe pe sma e libi. Wan boi ben musu besnèi na tapu a di fu aiti dei baka te a gebore. Disi ben de wan koni sani fu di na a ten dati wan beibi no e lasi tumusi furu brudu moro efu a kisi wan koti.​—wp18.1, blz. 7.

Fu san ede a no fowtu taki wan Kresten lobi ensrefi?

Bijbel e taki dati wi musu lobi tra sma leki fa wi lobi wisrefi (Mark. 12:31). Masra musu „lobi den wefi leki den eigi skin” (Ef. 5:28). Ma toku wan sma musu luku bun taki a no bigin lobi ensrefi tumusi.​—w18.01, blz. 23.

San wi kan du fu tron wan moro lepi Kresten?

Wi musu studeri Gado Wortu, wi musu denki dipi fu san wi e leisi èn wi musu du san wi e leri. Boiti dati, wi musu meki a santa yeye tiri wi na ini ala san wi e du. Wi musu teki a yepi di trawan e gi wi èn wi musu warderi a yepi di wi e kisi.​—w18.02, blz. 26.

Fu san ede lukuman nanga sma di e luku den stari no man sabi san o pasa na ini a ten di en kon?

Difrenti reide de, ma a moro prenspari reide na taki Bijbel e krutu den tu sani disi.​—wp18.2, blz. 4, 5.

Fa wi musu tyari wisrefi te sma kari wi kon na den oso?

Efu wan sma kari wi kon na en oso èn wi taigi en taki wi o kon, dan wi musu meki muiti fu du san wi pramisi (Ps. 15:4). Wi no musu meki pikinpikin sani tapu wi fu no go. A sma du furu muiti fu sreka sani gi wi.​—w18.03, blz. 18.

San owruman nanga dinari ini a diniwroko kan leri fu Timoteyus?

Timoteyus ben broko en ede nanga sma èn a ben poti a preikiwroko na a fosi presi. A ben wroko tranga gi Yehovah èn a ben du san a ben e leri. A ben tan du muiti fu go na fesi èn a ben frutrow tapu a yeye fu Yehovah. Owruman nanga tra sma kan leri furu fu na eksempre fu en.​—w18.04, blz. 13, 14.