1. Fu san ede wi musu gi yesi na a warskow fu Yesus?

DI YESUS ben taki fu den lasti dei, a gi a warskow disi: „Luku bun . . . taki unu no broko un ede nanga na aladei libi, so taki un ati kon hebi” (Luk. 21:34). Fu san ede wi musu gi yesi na a warskow disi? Fu di na ini a ten disi, wi e kisi den srefi problema di ala sma e kisi.

2. Sortu problema brada nanga sisa fu wi kisi?

² Son leisi wi e kisi difrenti problema na a srefi ten. Luku den eksempre disi. Wan Kotoigi di nen John * abi wan siki di kan meki a kon lan. Wan tra sari sani di miti a brada disi, na taki en wefi gowe libi en aladi den ben trow 19 yari kaba. Baka dati den tu umapikin fu en tapu fu dini Yehovah. Wan trowpaar di nen Bob nanga Linda kisi tra sortu tesi. Den ala tu lasi den wroko èn den lasi den oso. Boiti dati, datra taigi Linda taki a abi wan siki na en ati di ben kan kiri en èn a ben abi wan tra siki di nen reuma. A siki disi ben meki taki den skrufu fu en skin ben e hati en srefisrefi.

3. San Filipisma 4:6, 7 e taigi wi fu Yehovah?

³ Wi kan de seiker taki Yehovah, wi Mekiman nanga wi lobi-ati Papa, e frustan fa wi e firi te wi abi broko-ede èn a wani yepi wi. (Leisi Filipisma 4:6, 7.) Gado Wortu abi furu tori na ini di e sori sortu tesi den anbegiman fu en ben kisi. Bijbel e sori tu fa Yehovah yepi den na ini den muilek ten dati. Meki wi luku wan tu fu den eksempre disi.

4. Sortu tesi Elia ben kisi èn fa a pasa den tesi disi?

⁴ Elia ben e dini Yehovah na ini wan muilek ten èn a kisi hebi tesi. Kownu Akab, wan fu den ogri kownu fu Israel, ben trow nanga Iseibel, wan ogri-ati uma di ben e anbegi Bâal. Den tu sma disi meki taki bun furu sma na ini a kondre bigin anbegi Bâal èn den kiri furu profeiti fu Yehovah. Ma Elia ben man lowe gi den. Wan bigi angriten ben de na ini a kondre tu, ma Elia tan na libi fu di a ben e frutrow tapu Yehovah (1 Kow. 17:2-4, 14-16). Boiti dati, di Elia ben de nanga den profeiti nanga den anbegiman fu Bâal na tapu Karmel-bergi, dan a ben e frutrow tapu Yehovah. A gi den Israelsma deki-ati fu dini Yehovah (1 Kow. 18:21-24, 36-38). Elia si furu leisi taki Yehovah ben e yepi en na ini a muilek ten dati.

5-6. Fa 1 Kownu 19:1-4 e sori fa Elia ben e firi, èn fa Yehovah sori en taki a lobi en?

⁵ Leisi 1 Kownu 19:1-4. Ma Elia ben kon frede di Kownu-uma Iseibel taki dati a o kiri en. Dati meki a lowe go na Berseiba. A ben lasi-ati so te taki a „aksi Gado fu dede”. Fu san ede a ben e firi so? Elia ben de wan sondusma, „wan man di ben abi den srefi firi leki wi” (Yak. 5:17). Kande a ben hebi tumusi gi en èn kande a ben weri tu. A kan taki Elia ben e denki taki na fu soso a ben e gi sma deki-ati  fu dini Yehovah, taki sani no ben kon moro bun na ini Israel èn taki na en wawan ben e dini Yehovah ete (1 Kow. 18:3, 4, 13; 19:10, 14). Kande wi no ben o denki taki wan profeiti di ben abi so wan tranga bribi, ben kan firi so. Ma Yehovah ben frustan fa Elia ben e firi.

⁶ Yehovah ati no bron nanga Elia di a taki fa a e firi. Na presi fu dati, a yepi Elia fu kisi krakti baka (1 Kow. 19:5-7). Bakaten Yehovah yepi Elia na wan switi fasi fu kenki en denki. Yehovah sori en o furu makti a abi. Yehovah sori en tu taki 7000 sma ben de ete na ini Israel di ben weigri fu anbegi Bâal (1 Kow. 19:11-18). Na a fasi disi Yehovah sori Elia taki a lobi en.

7. Te wi e luku fa Yehovah yepi Elia, dan fa dati e trowstu wi?

⁷ Yu abi broko-ede tu? A e gi wi furu trowstu fu sabi taki Yehovah ben frustan fa Elia ben e firi! Disi e sori wi taki a e frustan tu fa wi e firi te wi abi problema èn te wi lasi-ati. A sabi san wi man du èn san wi no man du èn a sabi srefi san wi e prakseri (Ps. 103:14; 139:3, 4). Efu wi e frutrow na tapu Yehovah neleki Elia, dan a o yepi wi nanga den problema fu wi di e meki taki wi e stress.​—Ps. 55:22.

8. Fa Yehovah o yepi yu te yu abi problema?

⁸ Te yu abi stress, dan yu kan bigin denki taki a situwâsi fu yu no o kenki noiti èn dati kan meki yu lasi-ati. Efu dati e pasa nanga yu, dan hori na prakseri taki Yehovah o yepi yu. Fa a o du dati? A wani taki yu fruteri en sortu problema yu abi èn fa yu e firi. A o piki den begi fu yu (Ps. 5:3; 1 Petr. 5:7). Sobun, begi Yehovah furu te yu abi problema. A no o taki nanga yu neleki fa a ben taki nanga Elia, ma a o taki nanga yu nanga yepi fu en Wortu Bijbel èn nanga yepi fu en organisâsi. Den tori di yu e leisi na ini Bijbel kan gi yu trowstu nanga howpu. Boiti dati, den brada nanga sisa fu a gemeente o gi yu deki-ati tu.​—Rom. 15:4; Hebr. 10:24, 25.

9. Fa wan bun mati kan yepi wi?

⁹ Yehovah taigi Elia fu meki Elisa yepi en nanga den wroko fu en. Na a fasi disi Yehovah gi Elia wan bun mati di ben kan yepi en te a ben firi brokosaka. Na so a de tu taki, te wi e fruteri wan bun mati fa wi e firi, dan a kan gi wi deki-ati (2 Kow. 2:2; Odo 17:17). Efu yu feni taki yu no abi nowan sma nanga suma yu kan taki, dan begi Yehovah fu yepi yu fu feni wan lepi Kresten di kan gi yu deki-ati.

10. Fa a tori fu Elia e gi wi howpu, èn fa a pramisi na ini Yesaya 40:28, 29 kan yepi wi?

¹⁰ Yehovah yepi Elia di a ben abi broko-ede èn a yepi en tu fu tan dini en furu yari langa. A tori fu Elia e gi wi howpu. Son leisi wi kan kisi so furu broko-ede, taki wi e kon weri èn wi kan firi leki wi no man moro. Ma efu wi e frutrow tapu Yehovah, dan a o gi wi a krakti fu tan dini en.​—Leisi Yesaya 40:28, 29.

11-13. Sortu broko-ede dri anbegiman fu Yehovah ben abi èn fa den ben e firi?

¹¹ Tra sma na ini Bijbel ben abi furu broko-ede tu. Fu eksempre, Hana ben lasi-ati srefisrefi fu di a no ben abi pikin èn a tra wefi fu en masra ben tanteri en doronomo (1 Sam. 1:2, 6). A sani disi ben meki taki Hana ben sari so te,  taki a ben e krei èn a no ben wani nyan.​—1 Sam. 1:7, 10.

¹² Son leisi Kownu David ben lai broko-ede. Luku sortu tesi a ben kisi. A ben abi konsensi fonfon fu di a ben meki furu fowtu (Ps. 40:12). Absalom, en manpikin di a ben lobi so te, opo ensrefi teige en èn te fu kaba Absalom dede (2 Sam. 15:13, 14; 18:33). Èn wan fu den moro bun mati fu David tori en (2 Sam. 16:23–17:2; Ps. 55:12-14). Furu fu den psalm di David skrifi e sori fa a ben lasi-ati. Ma den e sori tu o furu a ben e frutrow tapu Yehovah.​—Ps. 38:5-10; 94:17-19.

¹³ Bakaten wan psalm skrifiman bigin dyarusu tapu a libi fu den ogrisma. Kande a psalm skrifiman disi ben e dini na „a gran santa presi fu Gado” èn a kan taki a ben de wan bakapikin fu a Leifisma Asaf. A psalm skrifiman disi ben abi so furu stress, taki a no ben de koloku moro èn a no ben de tevrede nanga san a ben abi. A bigin denki srefi taki den blesi di a ben e kisi fu di a ben dini Yehovah no ben nofo.​—Ps. 73:2-5, 7, 12-14, 16, 17, 21.

14-15. San wi e leri fu den dri eksempre na ini Bijbel?

¹⁴ Den dri anbegiman disi fu Yehovah ben e frutrow na en tapu. Den ben e begi fayafaya èn den ben fruteri en fa den ben e firi. Den no ben frede fu taigi en san ben gi den broko-ede. Èn den tan go na a presi pe sma ben e anbegi Yehovah.​—1 Sam. 1:9, 10; Ps. 55:22; 73:17; 122:1.

¹⁵ Yehovah sori sari-ati èn a yepi ibriwan fu den. Hana no ben e sari moro  (1 Sam. 1:18). David ben skrifi: „A reti-ati sma abi furu problema, ma Yehovah e lusu den alamala gi en” (Ps. 34:19). Èn bakaten a psalm skrifiman ben taki dati Yehovah ’grabu en hori na en reti-anu’. Sobun, Yehovah ben gi en rai na wan switi fasi. A psalm skrifiman ben singi: „A bun gi mi fu kon krosibei na Gado. Na a Moro Hei Masra Yehovah mi e si leki mi kibripe” (Ps. 73:23, 24, 28). San den eksempre disi e leri wi? Son leisi wi o kisi bigi problema di o meki wi stress. Ma wi o man horidoro te wi e prakseri fa Yehovah yepi tra sma, te wi e frutrow na en tapu, te wi e begi en èn te wi e du san a e aksi fu wi.​—Ps. 143:1, 4-8.

16-17. (a) Fu san ede wi no musu pruberi fu de wi wawan te wi e stress? (b) San kan gi wi krakti?

¹⁶ Den dri eksempre di wi luku didyonsro e leri wi wan tra prenspari sani. Wi musu tan suku yepi na Yehovah èn wi musu tan moksi nanga en pipel (Odo 18:1). Nancy ben lasi-ati srefisrefi di en masra gowe libi en. A taki: „Furu leisi mi no ben wani si tra sma èn mi no ben wani  taki nanga den. Ma o moro mi ben de mi wawan, o moro mi ben e sari.” Ma Nancy ben e firi moro bun di a ben pruberi fu yepi tra sma di ben abi problema. A taki: „Mi ben e arki te tra sma ben e fruteri mi sortu broko-ede den abi. Mi si taki te mi ben e pruberi fu yepi den, mi no ben e denki den problema fu mi moro.”

¹⁷ Wi kan kisi krakti tu te wi e go na den gemeente konmakandra. Te wi de na den konmakandra, wi e gi Yehovah na okasi fu ’yepi wi èn fu trowstu wi’ (Ps. 86:17). Drape a e gi wi krakti nanga yepi fu en santa yeye, en Wortu nanga en pipel. Na den konmakandra wi man „gi makandra deki-ati” (Rom. 1:11, 12). Wan sisa di nen Sophia e taki: „Yehovah èn den brada nanga sisa yepi mi fu horidoro. Den gemeente konmakandra yepi mi furu. Mi si taki te mi e wroko tranga na ini a preikiwroko èn na ini a gemeente, dan dati e yepi mi fu no stress tumusi.”

18. Efu wi e firi brokosaka, dan san Yehovah kan gi wi?

¹⁸ Te wi e firi brokosaka, dan wi musu hori na prakseri taki Yehovah pramisi taki wan dei a o puru ala den problema fu wi. Ma nownow kaba a e yepi wi nanga den broko-ede di wi abi. Te wi e firi brokosaka èn te wi e firi leki wi no man moro, dan Yehovah o yepi wi fu no gi abra èn a o gi wi „a krakti” fu horidoro.​—Fil. 2:13.

19. San Romesma 8:37-39 e pramisi wi?

¹⁹ Leisi Romesma 8:37-39. Na apostel Paulus e gi wi a dyaranti taki nowan sani no man prati wi fu a lobi fu Gado. Fa wi kan yepi wi brada nanga sisa di abi broko-ede? Na ini a tra artikel wi o luku fa wi kan sori sari-ati neleki Yehovah èn fa wi kan yepi wi brada nanga sisa te den abi problema.