A tekst disi e taki fu neigi fasi: „Den fasi di a yeye e meki sma kisi na lobi, prisiri, freide, langa pasensi, switifasi, bun-ati, bribi, safri-ati, a dwengi di wan sma man dwengi ensrefi.” Ma disi no wani taki dati na den neigi fasi disi wawan Gado santa yeye e yepi wi fu kisi.

Fa wi du sabi dati? Luku san na apostel Paulus e taki na ini den vers na fesi: „Den sani di a sondu skin e du . . . na hurudu, fasi fu libi di no krin, ogri di sma e du sondro fu syen, na anbegi fu falsi gado, afkodrei, feantifasi, kesekese, dyarusu, faya-ati, trobi, pratifasi, falsi leri, bigi-ai, a drungu di sma e drungu, bradyari fesa, èn tra sani leki den sortu sani disi” (Gal. 5:19-21). Sobun, Paulus ben kan taki fu tra sani di ’a sondu skin kan meki wi du’ soleki fa skrifi na Kolosesma 3:5. Na so a de tu nanga den neigi bun fasi di Paulus kari na ini Galasiasma 5:22, 23. Paulus no kari ala den fasi di a yeye e meki sma kisi.

Wi kan frustan a sani disi moro bun te wi e luku san Paulus ben taigi Timoteyus. A ben gi en deki-ati fu „meki muiti fu du san reti, fu dini Gado fayafaya, fu abi bribi, fu sori lobi, fu horidoro èn fu abi safri-ati” (1 Tim. 6:11). Dyaso Paulus e taki fu siksi fasi, ma na dri fu den nomo (bribi, lobi, nanga safri-ati) kari na ini Galasiasma 5:22, 23. Ma Timoteyus ben musu du den dri tra sani tu: A ben musu du san reti, a ben musu dini Gado fayafaya èn a ben musu horidoro. A no de fu taki dati a ben o abi a santa yeye fanowdu fu man du den sani disi.​—Luku Kolosesma 3:12; 2 Petrus 1:5-7.

Sobun, Galasiasma 5:22, 23 no e taki fu ala den fasi di wan Kresten musu abi. Gado santa yeye kan yepi wi fu kon kisi den neigi fasi di kari na ini a tekst disi. Ma tra fasi de tu di wi musu abi fu tron moro lepi Kresten. Iya, wi musu „kisi nyun fasi fu tron sma di de leki fa Gado wani, sobun, reti-ati sma di e gi yesi na Gado ala ten”.​—Ef. 4:24.