1. Fa Yehovah e firi te wan fu den anbegiman fu en di ben tapu fu dini en e bigin dini en baka?

SOLEKI fa wi si na ini na artikel na fesi, dan Yehovah e agersi ensrefi nanga wan bun skapuman di e sorgu bun gi ala den skapu fu en èn di e suku den skapu fu en di lasi. Yehovah ben taigi den Israelsma di no ben dini en moro: „Efu unu drai kon baka na mi, dan mi o drai kon baka na unu.” Wi sabi taki te now ete a e firi so fu di a taki: „Mi no kenki” (Mal. 3:6, 7). Yesus taki dati Yehovah nanga den engel e prisiri srefisrefi te wan fu den anbegiman fu en di ben lasi drai kon baka na en.​—Luk. 15:10, 32.

2. San wi o luku na ini na artikel disi?

² Wi o luku dri agersitori fu Yesus di e sori fa wi kan yepi den wan di no e dini Yehovah moro. Wi o luku tu sortu fasi wi musu abi fu yepi den lasi skapu disi fu drai kon baka na Yehovah. Èn wi o si taki a o gi wi furu prisiri te wi e du tranga muiti fu yepi den fu dini Yehovah baka.

3-4. Fu san ede na uma di kari na ini Lukas 15:8-10 e du so furu muiti fu feni a solfru moni?

³ Wi musu du tranga muiti fu feni den wan di wani drai kon baka na Yehovah. Na ini wan agersitori di skrifi na ini Lukas, Yesus e taki fu wan uma di e suku wan solfru moni di a ben lasi. A moni disi ben abi furu waarde gi en. Na agersitori e sori o furu muiti na uma du fu feni a moni baka.​—Leisi Lukas 15:8-10.

⁴ Yesus e sori fa na uma e firi te a feni a solfru moni di a ben lasi. Na ini a ten fu Yesus, son mama ben gi den umapikin tin solfru moni te den ben trow. Kande na uma na ini na agersitori ben lasi wan fu den tin solfru moni di en mama ben gi en. Na uma e denki taki a moni fadon na  tapu a gron. Dati meki a e leti wan lampu èn a e luku efu a kan feni en. Ma a no e si noti. Kande a lampu fu en no e gi nofo leti fu si a pikin solfru moni. Te fu kaba a e sibi a heri oso. Te a e du dati a e feni a solfru moni fu en. A breiti taki a feni en. A e kari den mati fu en nanga den birtisma fu prisiri makandra nanga en.

5. Fu san ede wi musu du tranga muiti fu feni den wan di no e kon na den konmakandra moro?

⁵ Na agersitori disi fu Yesus e leri wi taki wi musu du tranga muiti fu feni wan sani di lasi. Na so a de tu taki wi musu wroko tranga fu feni den wan di no e kon na den konmakandra moro. Kande den gowe omeni yari kaba. A kan taki den froisi go na wan tra presi pe den brada nanga sisa no sabi den. Ma now sonwan fu den wani drai kon baka na Yehovah. Den wani kon dini Yehovah baka makandra nanga den tra brada nanga sisa, ma den abi wi yepi fanowdu.

6. Fa ala sma na ini a gemeente kan yepi fu feni den sma di no e kon na den konmakandra moro?

⁶ Suma kan yepi fu feni den wan di no e kon na den konmakandra moro? Wi alamala kan du dati. Owruman, pionier, famiri, nanga preikiman kan yepi fu feni den sma disi. Yu abi wan mati noso wan famiriman di no e kon na den konmakandra moro? Yu miti wan fu den brada noso sisa disi di yu ben preiki oso fu oso noso nanga a bukuwagi? Taigi a sma taki efu a wani taki wan sma kon luku en, dan yu kan gi den owruman en adres nanga en telefon nomru.

7. San yu e leri fu den sani di wan owruman di nen Thomas taki?

⁷ San owruman kan du fu feni den sma di wani drai kon baka na Yehovah? Luku san wan owruman di nen Thomas * e taki. A e libi na ini Spanyorokondre èn a yepi moro leki 40 Kotoigi fu dini Yehovah baka. Thomas e taki: „A fosi sani di mi e du na taki mi e aksi brada nanga sisa efu den sabi pe den wan di no e kon na den konmakandra moro e tan. Noso mi e aksi den efu den sabi sma di no e kon na den konmakandra moro. Furu fu den breiti taki den kan yepi fu feni den sma disi. Bakaten, te mi e go luku den wan di tapu fu dini Yehovah, dan mi e aksi den fa a e go nanga den pikin fu den èn nanga tra famiriman fu den. Sonwan fu den ben tyari den pikin kon na den konmakandra èn kande den pikin disi ben de preikiman fosi. Wi kan yepi den pikin disi tu fu drai kon baka na Yehovah.”

8. San a papa na ini na agersitori na ini Lukas 15:17-24 e du gi en manpikin di ben drai kon baka na oso?

⁸ Sortu fasi wi musu abi efu wi wani yepi den sma di wani drai kon baka na Yehovah? Luku san wi kan leri fu na agersitori fu a lasi manpikin. (Leisi Lukas 15:17-24.) Yesus e fruteri fa a manpikin disi ben kisi ensrefi èn fa a ben drai kon baka na oso. A papa lon go miti a boi fu en èn a brasa en fu sori taki a lobi en ete. A manpikin abi konsensi fonfon èn a feni taki a no warti taki en papa si en leki en manpikin. A papa ben abi sari-ati nanga a boi fu en di ben taigi en fa a ben firi. A papa du muiti fu sori a boi fu en taki a breiti taki a ben drai kon baka na oso. A sori en taki a no ben si en leki wan  futuboi, ma leki en manpikin di a lobi. Dati meki a orga wan fesa èn a gi a boi fu en di ben abi berow moi krosi fu weri.

9. Sortu fasi wi musu abi efu wi wani yepi sma fu drai kon baka na Yehovah? (Luku a faki „ Fa fu yepi den sma di wani drai kon baka na Yehovah”.)

⁹ Yehovah de leki a papa na ini na agersitori disi. A wani taki den brada nanga sisa di no e kon na den konmakandra moro, drai kon baka na en fu di a lobi den. Wi kan teki na eksempre fu Yehovah èn wi kan yepi den fu drai kon baka. Ma wi musu abi pasensi, sari-ati nanga lobi fu man du disi. Fu san ede wi musu abi den fasi disi èn fa wi kan sori taki wi abi den fasi disi?

10. Fu san ede wi abi pasensi fanowdu fu yepi wan sma fu dini Yehovah baka?

¹⁰ Wi musu abi pasensi fu di a e teki ten fosi wan sma kon dini Yehovah baka. Furu fu den sma di ben tapu fu dini Yehovah e taki dati owruman nanga tra sma na ini a gemeente ben kon luku den furu leisi fosi den kon na a gemeente baka. Wan sisa fu Asia di nen Nancy e taki: „Wan bun mati fu mi na ini a gemeente yepi mi furu. A ben si mi leki en bigi sisa èn a ben lobi mi. A ben memre mi na den bun ten di wi ben abi makandra. A ben arki nanga pasensi te mi ben taigi en fa mi ben firi èn a no ben frede fu gi mi rai. A ben de wan trutru mati èn ala ten a ben de klariklari fu yepi mi.”

11. Fu san ede wi musu abi sari-ati nanga wan sma di e mandi?

¹¹ Te yu e sori sari-ati gi wan sma, dan a de neleki yu e poti wan dresi tapu wan  soro. Te wi e sori sari-ati, dan wi kan yepi wan sma di e mandi fu firi moro bun. Son sma no e kon na den konmakandra moro fu di wan sma du wan hati sani nanga den furu yari pasa èn den e atibron ete. Dati meki den no drai kon baka na Yehovah. Kande den abi a firi taki sma no libi bun nanga den. Den abi wan sma fanowdu di o arki den èn di o frustan fa den e firi (Yak. 1:19). María di no ben go na den konmakandra wan pisi ten e taki: „Mi ben abi wan sma fanowdu di ben o arki mi, di ben o trowstu mi, di ben o yepi mi èn di ben o gi mi bun rai.”

12. Gi wan eksempre di e sori fa a lobi fu Yehovah de leki wan titei.

¹² Bijbel e agersi a lobi di Yehovah abi gi en pipel nanga wan titei. Fa a lobi fu Gado de leki wan titei? Kon meki wi taki dati yu fadon na ini se. Den skwala hei èn a watra kowru. Yu e feti fu no sungu, dan wan sma na ini wan boto e trowe wan zwemvest gi yu. A no de fu taki dati yu o breiti. Ma dati wawan no sari fu hori yu na libi. Yu musu komoto na ini a watra. Den sma na ini a boto musu trowe wan titei gi yu èn den musu hari yu kon na ini a boto. Yehovah ben taki fu den Israelsma di no ben dini en moro: „Nanga titei fu lobi mi ben e tyari mi pipel” (Hos. 11:4). Yehovah e firi a srefi fasi gi den sma di no e dini en moro na ini a ten disi èn di e sungu na ini den problema fu den. A wani taki den sabi taki a lobi den èn taki a wani yepi den fu drai kon baka na en. Yehovah kan gebroiki wi fu sori den sma disi taki a lobi den.

13. Fruteri wan ondrofenitori di e sori taki a lobi di wi e sori gi trawan kan yepi den fu drai kon baka na Yehovah.

 ¹³ A prenspari fu tan taigi den wan di no e kon na den konmakandra moro taki Yehovah lobi den èn taki wi lobi den tu. Pablo di wi kari na ini na artikel na fesi no ben go na den konmakandra 30 yari langa. A e taki: „Wan mamanten di mi ben komoto fu oso, mi miti wan owru sisa èn a taki na wan switi fasi nanga mi. Mi bigin krei leki wan pikin-nengre. Mi taigi en taki a ben gersi leki na Yehovah ben seni en fu taki nanga mi. Na a momenti dati mi bosroiti fu dini Yehovah baka.”

14. San a skapuman na ini na agersitori na ini Lukas 15:4, 5 du di a feni a lasi skapu?

¹⁴ Te wi feni sma di no ben dini Yehovah moro, dan wi musu tan yepi den èn wi musu tan gi den deki-ati. Neleki a lasi manpikin den miti furu sani èn a o teki ten fu kisi densrefi. Boiti dati, a matifasi fu den nanga Yehovah kon swaki fu di den ben de na ini a grontapu fu Satan. Wi musu yepi den fu tranga den bribi. Na ini na agersitori fu a lasi skapu Yesus e fruteri fa a skapuman poti a skapu na tapu en skowru èn fa a e tyari en go baka na a ipi. A skapuman ben du furu muiti fu suku a skapu. Ma te a feni en a e frustan taki a o abi fu syow en go baka na a ipi, fu di a skapu no abi a krakti fu waka go baka.​—Leisi Lukas 15:4, 5.

15. Fa wi kan yepi den wan di drai kon baka na Yehovah? (Luku a faki „ Wan bun wrokosani”.)

¹⁵ Wi musu du furu muiti fu yepi wan sma nanga wan problema di e meki en muilek gi en fu kon dini Yehovah baka. Ma nanga yepi fu a santa yeye, Bijbel nanga den buku fu na organisâsi wi kan yepi en fu kon bun baka nanga Yehovah (Rom. 15:1). Fa wi kan du disi? Wan  owruman di abi furu ondrofeni e taki: „Furu sma di e bosroiti fu kon dini Yehovah baka musu kisi Bijbelstudie.” * Efu wan owruman e aksi yu fu studeri nanga wan sma di kon dini Yehovah baka, dan a bun fu du dati. Na owruman e taki tu: „A preikiman di e studeri nanga a sma disi musu tron wan bun mati fu en. Na so a sma o frutrow en èn a o taigi en fa a e firi.”

16. Fa wi du sabi taki den engel e yepi wi?

¹⁶ Furu ondrofenitori e sori taki den engel e yepi wi fu feni den sma di wani drai kon baka na Yehovah (Openb. 14:6). Fu eksempre, Silvio fu Ekwador ben begi Yehovah fu seni wan sma fu yepi en fu drai kon baka na en. Di a ben begi ete, tu owruman naki na a doro fu en. Den brada disi ben breiti fu man gi en a yepi di a ben abi fanowdu.

17. Fa wi o firi te wi e yepi sma fu drai kon baka na Yehovah?

¹⁷ A o gi wi furu prisiri te wi e yepi den wan di no e dini Yehovah moro fu drai kon baka na en. Luku san wan brada di e pionier e taki. A brada disi e du furu muiti fu yepi den wan di no e dini Yehovah moro. A e taki: „Te mi e prakseri den sma di e drai kon baka na Yehovah, dan mi musu hori misrefi fu no krei. Mi breiti taki mi ben man wroko makandra nanga Yehovah fu yepi wan fu den lasi skapu fu en fu komoto na ini a grontapu fu Satan èn fu kon baka na a gemeente.”​—Tori 20:35.

18. San yu no musu frigiti efu yu no e kon na den konmakandra moro?

¹⁸ Efu yu no e kon na den konmakandra moro, no frigiti taki Yehovah lobi yu. A wani taki yu drai kon baka na en. Yu o abi fu meki muiti fu du disi. Ma neleki a papa na ini na agersitori fu Yesus, Yehovah e wakti a dei te yu o drai kon baka èn a o breiti taki yu kon na oso baka.