WI ALAMALA e bribi taki Yehovah e tiri en pipel èn taki a e gi den leri di e yepi den fu tan krosibei na en na ini den „lasti dei” disi (2 Tim. 3:1). Ma wi alamala musu gi yesi na Yehovah. A situwâsi fu wi de leki a di fu den Israelsma na ini a sabana. Den ben musu gi yesi te den ben yere a babari fu den trompeti.

Yehovah ben taigi Moses fu meki tu trompeti fu solfru „fu kari a pipel kon makandra èn fu meki a pipel sabi o ten den musu gowe” (Num. 10:2). Den priester ben musu bro den trompeti na difrenti fasi fu sori a pipel san den ben musu du (Num. 10:3-8). Na ini a ten disi a pipel fu Gado e kisi leri na difrenti fasi tu. Na ini na artikel disi wi o taki fu dri fasi fa wi e kisi leri. Wi kan agersi den nanga den trompeti di den Israelsma ben yere. Gado pipel e kisi a kari fu go na den bigi konmakandra, owruman e kisi leri na den skoro fu na organisâsi èn son leisi den brada di e teki fesi na ini na organisâsi e tyari kenki kon.

Te Yehovah ben wani taki a heri pipel ben musu kon makandra na a mofodoro fu a tabernakel di ben de na owstusei, dan den priester ben musu bro ala tu trompeti (Num. 10:3). Ala den lo, di ben seti kampu lontu a tabernakel, ben yere den trompeti. Den lo di ben de krosibei fu a mofodoro fu a tabernakel ben doro drape na ini wan tu miniti nomo. Den tra lo di ben de moro fara ben abi moro ten fanowdu fu doro drape èn den ben musu meki moro muiti. Awinsi pe den ben de, Yehovah ben wani taki ala sma ben musu kon na wán fu yere san a ben abi fu taigi den.

Na ini a ten disi wi no e kon makandra na wan tabernakel. Ma leki a pipel fu Gado wi e kisi a kari fu kon makandra tu. Wi e go na den kongres nanga tra bigi konmakandra pe wi e kisi prenspari leri. Na ini kondre na heri grontapu a pipel fu Yehovah e kisi a srefi leri na den konmakandra disi. Ala sma di e go na den konmakandra e prisiri fu de nanga ala den brada nanga sisa drape. Son sma musu teki wan moro langa pasi fu doro. Toku ala sma di e go sabi taki a muiti di den meki fu doro a no fu soso.

Fa a de nanga den sma di e libi farawe fu pe den bigi konmakandra e hori? Den srefi man kisi wini fu a srefi programa èn den kan abi a firi leki den de makandra nanga den brada nanga sisa na a bigi konmakandra. Fu eksempre, wan brada di e teki presi gi na edekantoro ben go luku a bijkantoro na ini Benin. A bijkantoro ben seti sani so taki den brada nanga sisa na ini a foto Arlit ben kan luku a programa tu. A foto disi de  na ini a kondre Niger, na ini a Sahara-sabana. Tutenti na wán brada nanga sisa nanga tra sma di ben wani sabi moro ben kon makandra fu luku a programa. Aladi den ben de so fara, toku den ben firi leki den ben de makandra nanga den tra 44.131 brada nanga sisa di ben de na a bigi konmakandra. Wan brada ben skrifi: „Mi wani taki unu tangi nanga mi heri ati taki wi ben kan luku a programa tu. Disi e sori taki unu lobi wi trutru.”

Te wan priester fu Israel ben bro wán trompeti nomo, dan soso „den edeman fu den dusun sma fu Israel” ben musu kon makandra na a tabernakel (Num. 10:4). Drape den ben kisi leri fu Moses. Disi ben o yepi den fu tyari den frantwortu moro bun leki edeman fu den lo. Efu yu ben de wan fu den edeman dati, yu ben o du ala san yu man fu go na a konmakandra èn fu kisi leri?

Na ini a ten disi gemeente owruman a no „edeman” èn den no e prei basi tu gi den skapu fu Gado (1 Petr. 5:1-3). Ma den e du ala san den man fu sorgu bun gi den skapu. Dati meki den de klariklari fu kisi moro leri na den skoro fu na organisâsi, soleki a Kownukondre Diniwroko-skoro. Na den skoro disi owruman e leri fa den kan sorgu moro bun gi a gemeente. A leri disi e meki taki den owruman nanga den tra sma fu den gemeente e kon moro krosibei na Yehovah. Awinsi yu no go na wan fu den skoro dati, toku yu kan leri furu fu den tra owruman di go.

Son leisi te den priester ben bro tapu den trompeti, dan a babari fu den trompeti ben kenki doronomo. Disi ben sori den taki Yehovah ben wani taki a pipel ben musu hari gowe (Num. 10:5, 6). Te a heri kampu ben hari gowe, den ben e du dati na wan orga fasi. Ma a ben e teki furu wroko. A kan taki son leisi son Israelsma ben feni en muilek fu gi yesi. Fu san ede?

Kande sonwan fu den ben feni taki den ben musu froisi tumusi furu noso den ben musu froisi na wan ten di den no ben fruwakti. Bijbel e taki: ’Efu a wolku ben tan na tapu a tabernakel, dan den Israelsma ben e tan pe den ben de. Te a wolku ben opo gowe, dan den ben e gowe tu.’ Ma „son leisi a wolku ben e tan na a srefi presi fu neti teleki mamanten” wawan. Tra leisi a wolku „ben tan tu dei, noso wán mun, noso moro langa” (Num. 9:21, 22). Omeni leisi den Israelsma ben musu froisi? Numeri kapitel 33 e taki fu 40 presi pe den Israelsma ben seti kampu.

Son leisi den Israelsma ben seti kampu na wan presi pe skaduw ben de. Dati ben musu fu switi gi den fu di den ben de na ini wan ’sabana di ben bigi srefisrefi èn di ben meki sma frede’ (Deut. 1:19). Sobun, te den ben musu froisi gowe, den ben kan frede taki den ben o go na wan presi di no ben bun so.

Te den priester ben bro den trompeti fu sori den Israelsma taki den ben musu hari gowe, dan ala den lo ben yere den trompeti. Ma a no ala sma ben kan gowe na a srefi ten. Kande son sma ben feni en muilek fu wakti. Te den priester ben bro den trompeti a fosi leisi, dan den lo di ben de na a owstusei ben musu hari gowe. Dati na den lo Yuda, Isaskar nanga Seibulon (Num. 2:3-7; 10:5, 6). Te den lo dati ben gowe, den priester ben bro den trompeti a di fu tu leisi. Dan den dri lo di ben de na a zuidsei ben hari gowe. Den priester ben tan du disi teleki a heri kampu ben hari gowe.

Kande a ben muilek gi yu di den brada tyari wan tu kenki kon na ini na organisâsi. Kande yu ben feni taki den kenki ben furu tumusi. Noso kande yu ben lobi a fasi fa sani ben de kaba èn yu no ben wani taki sani kenki. A kan taki a teki wan langa ten fosi yu kon gwenti a kenki. Ma te wi e gi yesi, dan Yehovah o breiti nanga wi èn te fu kaba wi o si taki a kenki bun gi wi.

Na ini a ten fu Moses Yehovah tyari milyunmilyun man, uma nanga pikin pasa na ini a sabana. Sondro Yehovah den no ben o tan na libi. Yehovah e gi wi leri tu fu pasa den muilek lasti dei disi. A e yepi wi fu tan krosibei na en èn fu abi wan tranga bribi. Fu dati ede wi wani du ala san wi man fu gi yesi na den trompeti neleki fa den Israelsma ben du dati.