1. San bun furu sma na ini a fosi yarihondro ben musu du?

 BUN furu man nanga uma ben kon na Yerusalem. Den ben de fu difrenti kondre èn den ben e taki difrenti tongo. Wan kefalek sani pasa a dei dati. Wantronso wan tu Dyu ben man taki nanga den sma disi na ini den eigi tongo! Disi ben de wan wondru. Ma san ben moro bigi srefi, na den sani di den Dyu nanga na apostel Petrus ben taigi den. Den sma ben kon sabi taki den ben o man kisi frulusu efu den ben o sori bribi na ini Yesus Krestes. A boskopu disi naki na ati fu furu sma. Fu taki en leti, a ben de so wan bigi sani gi den, taki den aksi: „San wi musu du?” Petrus taigi den: „Ibriwan fu unu musu dopu.”​—Tori 2:37, 38.

2. San wi o luku na ini na artikel disi? (Luku a fowtow na tapu a kafti.)

² San pasa baka dati? Sowan 3000 sma dopu tapu a dei dati èn na so den tron disipel fu Krestes. Dati ben de wan kefalek sani! Disi ben de a bigin fu a bigi wroko di Yesus ben taigi den bakaman fu en fu du fu meki disipel. Te na a dei fu tide, den bakaman fu Yesus e du a wroko dati. Ma na ini a ten disi wi no e taki nanga wan sma fu wan tu yuru nomo, dan a kan dopu kaba. A kan teki wan tu mun, noso wán yari, noso moro langa gi wan studenti fu doro a marki dati. Efu yu e studeri Bijbel nanga wan sma, dan yu sabi taki yu musu meki furu muiti fu meki a tron wan disipel fu Krestes. Na ini na artikel disi wi o luku san yu kan du so taki yu kan yepi yu Bijbelstudenti fu tron wan dopu disipel.

3. Soleki fa Mateyus 28:19, 20 e taki, dan san wan Bijbelstudenti musu du fu man teki dopu?

³ Fosi wan Bijbelstudenti dopu, a musu du den sani di Bijbel e leri. (Leisi Mateyus 28:19, 20.) Te wan studenti e du san a e leri, dan a e kon de leki a „koni man” na ini Yesus agersitori di ben diki go dipi na ini a gron fu poti wan fondamenti na tapu ston-gron pe a bow en oso (Mat. 7:24, 25; Luk. 6:47, 48). Fa wi kan yepi wan studenti fu du san a e leri? Kon meki wi go luku dri sani.

4. Fa wi kan yepi wi studenti fu tan wroko na ensrefi so taki a kan dopu? (Luku a faki tu „ Yepi yu studenti fu poti marki èn fu doro den”.)

⁴ Yepi yu studenti fu poti marki. Fu san ede yu musu du dati? Luku wan eksempre. Efu yu ben o teki yu wagi rèi go na wan farawe presi, dan kande yu ben o stop na son pisi fu a pasi fu luku moi presi. Te yu du disi, dan a pasi no o sori so langa moro. Na so a de tu taki te wan Bijbelstudenti e poti marki di a man doro na ini wan syatu pisi ten, dan a o kon si taki a kan doro a marki fu dopu. Gebroiki a pisi „Yu kan du a sani disi” na ini a Koloku fu têgo!-buku fu yepi yu studenti fu go na fesi. Na a kaba fu ibri les yu kan sori en fa a marki di a poti kan yepi en fu du san a leri. Efu yu abi wan tra marki na prakseri gi yu studenti, dan skrifi dati na a pisi „Tra sani di yu kan du”. Gebroiki den pisi disi fu a buku fu taki nanga yu studenti fu den marki di a kan poti na ini wan syatu pisi ten èn na ini wan langa pisi ten.

5. Soleki fa Markus 10:17-22 e sori, dan san Yesus ben taigi wan guduman fu du èn fu san ede?

⁵ Yepi yu studenti fu tyari kenki kon. (Leisi Markus 10:17-22.) Yesus ben sabi taki a ben o muilek gi wan guduman fu  seri ala den gudu fu en (Mark. 10:23). Ma toku Yesus taigi a man fu tyari a bigi kenki disi kon na ini en libi. Fu san ede? Fu di Yesus ben lobi a man disi. Son leisi wi kan draidrai fu taigi wi studenti fu du wan sani di a leri fu di wi feni taki a no kaba ete fu tyari a kenki dati kon. A kan teki ten gi sma fu tapu nanga den owru gwenti di den abi èn fu tron nyun sma di kisi nyun fasi (Kol. 3:9, 10). Ma efu yu no e draidrai fu taki krin nanga yu studenti fu den sani disi, dan yu o man yepi en moro esi fu tyari kenki kon. Te yu e taki nanga yu studenti fu den sortu sani disi, dan dati e sori taki yu lobi en.​—Ps. 141:5; Odo 27:17.

6. Fu san ede wi musu aksi wi studenti fa a e denki fu wan tori?

⁶ A prenspari taki wi e aksi wi studenti fa a e denki fu wan tori. Te yu e poti den sortu aksi disi, dan yu o man si fa yu studenti e denki fu wan tori èn san a e bribi. Efu yu gwenti du a sani disi, a o moro makelek gi yu fu taki nanga en fu sani di muilek gi en fu bribi. Na ini a Koloku fu têgo!-buku yu abi furu fu den sortu aksi disi. Fu eksempre, na aksi fu les 04 na: „Fa yu denki taki Yehovah e firi te yu e gebroiki en nen?” Èn na aksi fu les 09, na: „Fu sortu sani yu ben o wani begi?” Na a bigin a kan muilek gi yu studenti fu piki den sortu aksi disi. Ma yu kan yepi en, te yu e leri en fu si san den Bijbeltekst nanga den prenki abi fu du nanga a tori di unu e studeri.

7. Fa wi kan gebroiki ondrofenitori fu yepi wi Bijbelstudenti?

⁷ Te a studenti fu yu frustan kaba san a musu du, dan yu kan gebroiki ondrofenitori fu sma fu gi en deki-ati. Fu eksempre, efu a studenti fu yu no e kon na ala den konmakandra, dan yu kan sori en a felem Yehovah broko en ede nanga mi trutru na a pisi „Tra sani di yu kan luku” na les 14. Furu fu den les na ini a Koloku fu têgo!-buku abi den sortu ondrofenitori disi. Yu kan feni den na „Sortu tra sani yu kan leri?” noso na „Tra sani di yu kan luku”. * Luku bun taki yu no e teki yu studenti gersi nanga wan tra sma. No taigi a studenti: „Efu a sma dati ben kan du en, dan yu kan du en tu.” Meki a studenti srefi denki fu a tori èn meki a luku san a kan leri. Wan tra sani di yu kan du na fu taki nanga en fu prenspari sani di yepi a sma na ini a felem fu du san Bijbel e taki. Kande yu kan sori en wan prenspari Bijbeltekst noso tra prenspari penti di yepi a sma. Efu a kan, sori a studenti fa Yehovah yepi a sma dati.

8. Fa wi kan yepi wi studenti fu kon lobi Yehovah?

⁸ Yepi yu studenti fu kon lobi Yehovah. Fa yu kan du dati? Suku okasi fu poti prakseri na den moi fasi fu Yehovah. Yepi yu studenti fu si Yehovah leki a koloku Gado di e horibaka gi den sma di lobi en (1 Tim. 1:11; Hebr. 11:6). Sori a studenti taki a o kisi wini te a e du den sani di a e leri èn fruteri en taki na a fasi disi Yehovah e sori taki a lobi en (Yes. 48:17, 18). O moro a studenti fu yu o kon lobi Yehovah, o moro a o wani tyari kenki kon na ini en libi.​—1 Yoh. 5:3.

9. Soleki fa Markus 10:29, 30 e taki, san kan yepi wan sma fu libi son sani na baka fu tron wan dopu disipel fu Yesus?

⁹ Wan Bijbelstudenti o abi fu libi son sani na baka fu man go na fesi èn teki dopu.  Neleki a guduman di wi ben taki fu en kaba, son studenti di gudu o abi fu libi den sani dati na baka. Efu den e du wan wroko di no bun soleki fa Bijbel gronprakseri e sori, dan den o abi fu suku wan tra wroko. Tra studenti o lasi mati, fu di den mati dati no lobi Yehovah. Trawan o lasi famiriman fu di den no lobi Yehovah Kotoigi. Yesus ben sabi taki a no ben o makelek gi son sma fu du den sani dati. Ma a pramisi den sma di e tron bakaman fu en taki den o kisi wan bigi blesi. A pipel fu Yehovah o kon de leki wan bigi famiri gi den di lobi den trutru. (Leisi Markus 10:29, 30.) Fa yu kan yepi yu Bijbelstudenti fu kisi wini fu a moi kado disi di Yehovah gi wi?

10. San yu e leri fu na ondrofenitori fu Manuel?

¹⁰ Tron wan mati fu yu studenti. A prenspari taki yu e sori yu studenti taki yu e broko yu ede nanga en. Fu san ede? Luku san Manuel di e libi na ini Meksikow, e taki. Te a e prakseri a ten di a ben de wan Bijbelstudenti ete, a e taki: „Ibri leisi fosi wi bigin nanga a studie, a brada di ben studeri nanga mi ben aksi mi fa a e go nanga mi. A fasi fa a ben taki nanga mi, meki taki mi ben man fruteri en san de tapu mi ati. Mi ben man firi taki a e broko en ede trutru nanga mi.”

11. Fa a Bijbelstudenti fu wi kan kisi wini te wi e du tra sani makandra nanga en?

¹¹ Du tra sani makandra nanga yu studenti, neleki fa Yesus ben du tra sani makandra nanga den bakaman fu en (Yoh. 3:22). Efu yu Bijbelstudenti e go na fesi èn a e tyari kenki kon na ini en libi, yu kan aksi en kande fu kon na yu oso fu kon dringi wan sani, fu kon nyan wan sani, noso fu luku a Broadcasting makandra. A studenti o warderi en te yu kari en kon na yu oso, spesrutu tapu fesadei te a e misi den famiri nanga mati fu en. Kazibwe, di e libi na ini Uganda e taki: „Neleki fa mi leri furu na a Bijbelstudie fu mi, na so mi leri furu fu Yehovah di mi ben e du tra  sani makandra nanga a brada di ben e studeri nanga mi. Mi ben si fa Yehovah e broko en ede nanga en pipel èn fa den de koloku trutru. Na a sani dati mi ben wani na ini mi eigi libi.”

12. Fu san ede wi musu tyari tra preikiman go na wan Bijbelstudie?

¹² Kari tra preikiman kon na a Bijbelstudie. Son leisi wi kan feni taki a moro makelek fu go wi wawan noso fu tyari a srefi preikiman kon na a studie. Aladi dati moro makelek gi wi, toku a o moro bun gi a Bijbelstudenti fu wi efu son leisi wi e tyari tra preikiman nanga wi. Dmitrii, di e libi na ini Moldafia e taki: „Ala den tra preikiman di ben kon na a studie fu mi ben fruklari sani na wan moi fasi. A sani dati yepi mi fu si na sortu tra fasi mi ben man du den sani di mi ben e leri. Disi yepi mi tu fu no syen so furu di mi go na mi fosi konmakandra fu di mi ben miti furu fu den brada nanga sisa kaba.”

13. Fu san ede wi musu yepi wi studenti fu kon na den konmakandra?

¹³ Yepi yu studenti fu kon na den gemeente konmakandra. Fu san ede? Fu di Yehovah taigi den sma di e anbegi en fu kon makandra. A sani disi na wan pisi fu wi anbegi (Hebr. 10:24, 25). Boiti dati, den brada nanga sisa na ini a gemeente o kon de leki famiri gi wi. Te wi de na den konmakandra nanga den, dan a de neleki wi e nyan wan switi nyanyan makandra. Te yu e yepi yu studenti fu kon na den konmakandra, dan fu taki en leti yu e yepi en fu du wan tumusi prenspari sani di o meki taki a kan teki dopu. Ma a kan muilek gi en fu bigin go na den konmakandra. Efu wan sani de di e tapu yu studenti fu kon na den konmakandra, dan fa a Koloku fu têgo!-buku kan yepi en?

14. Fa wi kan gi wi studenti deki-ati fu kon na den konmakandra?

¹⁴ Gebroiki les 10 fu a Koloku fu têgo!-buku fu gi yu studenti deki-ati. Fosi a buku disi ben kon na doro, wan tu preikiman ben gebroiki a les disi fu studeri nanga den Bijbelstudenti. Den preikiman ben taki dati a les ben de heri bun èn a yepi den studenti fu kon na den konmakandra. A no de fu taki dati yu no abi fu wakti teleki yu doro na les 10 fu kari a studenti fu yu fu kon na den konmakandra. Gi en wan kari so esi leki a kan èn tan du disi doronomo. Ibri Bijbelstudenti abi en eigi problema. Fu dati ede, poti prakseri na san yu studenti abi fanowdu èn luku fa yu kan yepi en. No lasi-ati efu a e teki ten fosi a studenti kon na den konmakandra. Abi pasensi ma tan gi en a kari fu kon.

15. San kan meki a Bijbelstudenti fu wi frede?

¹⁵ Yu ben frede pikinso di yu ben o tron wan Kotoigi fu Yehovah? Kande yu ben feni taki yu no ben o man preiki oso-fu-oso. Noso yu ben frede taki yu famiri noso mati ben o gens yu. Efu dati de so, dan yu kan frustan fa yu Bijbelstudenti e firi. Aladi Yesus ben sabi taki son sani ben o meki den bakaman fu en frede, toku a taigi den fu no meki den sani dati tapu den fu dini Yehovah (Mat. 10:16, 17, 27, 28). Fa Yesus yepi den bakaman fu en fu no frede? Èn fa yu kan teki na eksempre fu Yesus?

16. Fa wi kan yepi wi Bijbelstudenti fu fruteri trawan san a e leri?

¹⁶ Yepi yu studenti fu fruteri trawan san a e leri. Kande den disipel fu Yesus ben senwesenwe pikinso di a seni den fu go preiki. Ma Yesus yepi den fu di a taigi den  gi suma den ben musu preiki èn san den ben musu taki (Mat. 10:5-7). Fa yu kan teki na eksempre fu Yesus? Yepi yu studenti fu sabi gi suma a kan preiki. Fu eksempre, aksi en efu a sabi wan sma di a kan yepi fu kon sabi wan sani di a leri fu Bijbel. Yepi en na wan makelek fasi fu sreka ensrefi so taki a sabi san a musu taki te a o fruteri a sma fu a Bijbel leri dati. Efu a de fanowdu yu kan oefen nanga en èn yu kan gebroiki den faki „Son sma e taki” èn „Wan sma kan aksi yu” na ini a Koloku fu têgo!-buku. Te yu e du dati, dan yu e leri yu studenti fu gebroiki Bijbel fu gi wan makelek piki èn fu du dati na wan fasi di fiti.

17. Fa wi kan gebroiki Mateyus 10:19, 20, 29-31, fu yepi wi studenti fu frutrow tapu Yehovah?

¹⁷ Yepi yu studenti fu frutrow tapu Yehovah. Yesus ben taigi den disipel fu en taki Yehovah ben o yepi den fu di A lobi den. (Leisi Mateyus 10:19, 20, 29-31.) Taigi yu studenti taki Yehovah o yepi en tu. Yu kan yepi en fu frutrow tapu Yehovah te yu e taki fu den marki fu en te unu e begi makandra. Franciszek, di e libi na ini Polen e taki: „A brada di ben studeri Bijbel nanga mi ben gwenti taki fu den marki fu mi te wi ben e begi. Di mi si taki Yehovah piki den begi fu en, dan mi no draidrai fu begi tu. Di mi ben abi wan nyun wroko, dan mi ben musu aksi verlof fu go na den konmakandra èn na a kongres. Mi ben firi taki Yehovah ben yepi mi trutru na a momenti dati.”

18. Fa Yehovah e si a wroko di Kresten e du fu gi trawan leri?

¹⁸ Yehovah lobi den Bijbelstudenti fu wi trutru. A e warderi a tranga wroko di Kresten e du fu yepi tra sma fu kon krosibei na en èn a lobi den Kresten disi (Yes. 52:7). Awinsi yu no abi wan Bijbelstudie now, toku yu kan yepi tra Bijbelstudenti fu go na fesi èn teki dopu. Fa yu kan du dati? Na te yu e go nanga tra preikiman na den studie.