FURU yari langa den Israelsma ben gwenti fu pai moni fu horibaka gi a tru anbegi. Ma na ini a ten fu Yesus den Dyu ben musu pai ala sortu belasting èn dati ben meki a libi hebi gi den.

Fu horibaka gi na anbegi na a tabernakel èn bakaten na a tempel, ala Dyu mansma ben musu pai wan afu sikkel (noso tu drakmo) ibri yari. Na ini a fosi yarihondro, den ben gebroiki a moni dati fu horibaka gi a wroko di ben du na ini a tempel di Herodes ben bow. Son Dyu ben aksi Petrus fa Yesus ben denki fu a tori dati èn Krestes no taki dati a fowtu fu pai belasting-moni. Fu taki en leti, a ben sori Petrus pe a ben kan feni a solfru sensi fu pai a belasting dati.​—Mat. 17:24-27.

Na ini a ten dati, Gado pipel ben musu pai a di fu tin pisi fu den sani di den ben prani èn fu a moni di den ben meki (Lef. 27:30-32; Num. 18:26-28). Den kerki fesiman ben e luku finifini taki sma ben pai a di fu tin pisi èn den ben wani srefi taki sma ben musu pai a di fu tin pisi fu pikinpikin sani di den ben prani soleki menti-wiwiri, dille-wiwiri nanga dyira. Yesus no ben taki dati a fowtu fu pai a di fu tin pisi, ma a ben krutu a hoigrifasi fa den leriman fu Wet nanga den Fariseiman ben hori a wet disi.​—Mat. 23:23.

Boiti dati, den Dyu ben musu pai difrenti sortu belasting tu na den Romesma di ben e tiri den. Wan fu den belasting dati den ben musu pai te den ben abi gron èn den ben kan pai en nanga moni noso nanga sani di den ben prani na tapu a gron. Sma e denki taki a belasting dati ben de 20 te go miti 25 procent fu den sani di ben e gro tapu a gron fu a sma. Boiti dati yu ben abi wan belasting di ibri Dyu ben musu pai. Den Fariseiman ben seni sma fu aksi Yesus efu a fiti fu pai a belasting dati. Yesus sori fa wi musu si belasting, di a taki: „Pai Grankownu san na fu Grankownu, ma pai Gado san na fu Gado.”​—Mat. 22:15-22.

Sma ben musu pai belasting tu te den ben tyari sani kon na ini wan distrikt noso te den ben seni sani go na wan tra distrikt. Den ben musu pai a belasting dati na presi pe sipi ben kon, na broki, na son pasi, noso na den portu fu foto noso wowoyo.

A belasting di den sma ben musu pai den Romesma, ben hebi kefalek. A historia skrifiman Tacitus, ben taki dati na a ten di Grankownu Tiberius ben tiri èn Yesus ben de na grontapu, dan Siria nanga Yudea ben begi a Grankownu fu no pai so furu belasting moro fu di a ben kon hebi gi den.

A fasi fa sma ben e piki belasting-moni ben meki a libi kon moro hebi gi a pipel. Sortu sma ben kisi a wroko fu piki belasting-moni? Na den sma di ben pai a moro hei prijs fu kisi a wroko dati. A sma di ben feni a wroko disi ben poti tra sma fu go piki a belasting-moni èn den sma disi ben suku fu meki moni tapu a pipel tu. Soleki fa a sori Sakeyus ben abi sma di ben e du a wroko disi gi en (Luk. 19:1, 2). Wi kan frustan fa a pipel ben teige a sani disi èn den no ben lobi den sma srefisrefi di ben piki a belasting-moni na den.