1. San kownu Salomo leri wi na Preikiman 7:20?

 KOWNU Salomo ben skrifi: „Nowan reti-ati sma no de na grontapu, di e du bun ala ten èn di no e sondu” (Preik. 7:20). A sani dati tru! Wi alamala na sondu sma (1 Yoh. 1:8). Dati meki wi alamala musu kisi pardon fu Gado èn fu tra sma te wi du wan sondu teige den.

2. Fa yu ben firi di wan bun mati fu yu gi yu pardon?

² Wi alamala man memre wan ten pe wi du wan sani di hati wan bun mati fu wi. A no de fu taki dati bakaten yu ben wani meki en bun baka nanga yu mati, dati meki yu aksi en fu gi yu pardon. Fa yu ben firi di yu mati gi yu pardon? Yu ben firi moro bun? A no de fu taki dati dati de so èn seiker yu ben breiti tu.

3. San wi o luku na ini a artikel disi?

³ Wi alamala wani taki Yehovah de wi moro bun mati, ma son leisi wi e taki noso du sani di e hati en. Fu san ede wi kan de seiker taki Yehovah de klariklari fu gi wi pardon? Fa a fasi fa Yehovah e gi pardon e difrenti fu a fasi fa wi e gi trawan pardon? Èn suma Yehovah e gi pardon?

4. Fu san ede wi kan de seiker taki Yehovah de klariklari fu gi pardon?

⁴ Gado Wortu e gi wi a dyaranti taki Yehovah de klariklari fu gi pardon. Di Yehovah sori ensrefi na Moses na Sinai bergi, dan A meki wan engel taigi en: „Yehovah, Yehovah, wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki. A e du bun gi dusundusun sma, èn a e gi sma pardon te den meki fowtu, te den du ogri, èn te den  du sondu” (Eks. 34:6, 7). Yehovah na wan Gado di abi sari-ati nanga switifasi èn ala ten a de klariklari fu gi sma pardon te den abi trutru berow fu den sondu fu den.​—Neh. 9:17; Ps. 86:15.

5. Soleki fa Psalm 103:13, 14 e sori dan san Yehovah e du fu di a sabi fa libisma de?

⁵ Fu di Yehovah na wi Mekiman, meki a sabi ala sani fu wi. A no wan moi sani taki Yehovah sabi ala sani fu ibri sma di de dyaso na grontapu (Ps. 139:15-17). Sobun a man si fa wi de trutru èn a sabi ala den swakifasi fu wi. Boiti dati a sabi tu san pasa na ini a libi fu wi èn fa wi kon de a sma di wi de now. San Yehovah e du fu di a sabi wi heri bun? Yehovah e sori sari-ati gi wi.​—Ps. 78:39; leisi Psalm 103:13, 14.

6. Fa Yehovah sori krin taki a de klariklari fu gi wi pardon?

⁶ Yehovah sori wi krin taki a de klariklari fu gi pardon. Yehovah sabi taki fu di a fosi man, Adam, sondu meki wi alamala tron sondusma èn te fu kaba wi e dede (Rom. 5:12). Nowan fu wi kan frulusu wisrefi noso wan trawan fu sondu nanga dede (Ps. 49:7-9). Ma wi lobi-ati Gado sori sari-ati gi wi èn a seti sani fu meki wi kon fri. San a du? Yohanes 3:16 e fruteri wi taki Yehovah seni en wan-enkri Manpikin kon fu dede gi wi (Mat. 20:28; Rom. 5:19). Yesus dede èn a pai gi den sondu fu wi so taki wi ben kan kon fri. Ala den wan di poti bribi na ini en o kisi wini fu a lusu-paiman (Hebr. 2:9). A ben hati Yehovah srefisrefi taki en lobi Manpikin ben musu dede na so wan ogri-ati èn syen fasi. A no de fu taki dati efu Yehovah no ben wani gi wi pardon, dan a no ben o meki en Manpikin dede gi wi.

7. Gi wan tu eksempre fu sma na ini bijbel di Yehovah ben de klariklari fu gi pardon.

⁷ Bijbel abi furu eksempre fu sma di kisi pardon fu Yehovah (Ef. 4:32). Suma yu e prakseri? Kande yu e prakseri Kownu Manase. A ogri-ati man disi du bigi sondu di Yehovah no ben feni bun srefisrefi. A man disi ben e anbegi falsi gado èn a ben gi sma deki-ati fu du a srefi. A tyari en eigi pikin leki ofrandi gi falsi gado. A man disi ben abi a deki-ati srefi  fu poti wan popki fu wan falsi gado na ini a santa tempel fu Yehovah. Bijbel e taki fu en: „A du bun furu sani di Yehovah no feni bun, so taki Gado ati kon bron nanga en” (2 Kron. 33:2-7). Ma toku Yehovah ben de klariklari fu gi Manase pardon fu di a ben sori trutru berow. Gado meki a tiri leki kownu baka srefi (2 Kron. 33:12, 13). Ma kande yu prakseri Kownu David di ben du seryusu sondu. Wan tu fu den seryusu sondu di David ben du, na taki a ben kiri wan man di no ben du ogri èn a ben du hurudu. Ma David taki krin taki a sondu èn a sori trutru berow fu dati ede Yehovah ben de klariklari fu gi en pardon tu (2 Sam. 12:9, 10, 13, 14). Iya, wi kan de seiker taki Yehovah de klariklari fu gi sma pardon. Èn soleki fa wi o si, a fasi fa Yehovah e gi pardon e difrenti fu a fasi fa wi leki libisma e gi trawan pardon.

8. Fu san ede Yehovah na a moro bun Krutuman di de?

⁸ Yehovah na „A sma di e krutu heri grontapu” (Gen. 18:25). Wan bun krutuman musu frustan a wet heri bun. Èn na so de nanga Yehovah. Yehovah na wi Krutuman èn a sma di e gi wi wet (Yes. 33:22). Yehovah na a wan enkri sma di sabi san bun èn san no bun trutru. San wan bun krutuman musu sabi tu? Wan bun krutuman musu sabi ala sani fu wan afersi fosi a teki wan bosroiti. Èn fu di Yehovah sabi ala sani, meki en de a moro bun Krutuman di de.

9. Sortu sani Yehovah sabi fu wan sma te a o bosroiti fu gi wan sma pardon?

⁹ Tra fasi leki krutuman na grontapu, Yehovah sabi ala sani fu wan afersi di a musu krutu (Gen. 18:20, 21; Ps. 90:8). Yehovah no e luku nomo san a ai e si noso san a yesi e yere, ma a e hori moro sani na prakseri. A sabi den bun fasi nanga den swakifasi fu wi, a sabi sortu skoroleri wi kisi, pe wi kweki èn fa a gosontu fu wi de. A sabi tu fa den sani disi abi krakti tapu den sani di wi e du. Boiti dati, Yehovah sabi tu san de ini wi ati. A e frustan heri bun fu san ede meki sma e du son sani. Nowan sani kibri gi Yehovah (Hebr. 4:13). Sobun, fu di Yehovah sabi ala sani fu wi meki a sabi efu a musu gi wi pardon.

10. Fu san ede wi kan taki dati te Yehovah e krutu wan tori dan ala ten a e du san reti? (Deuteronomium 32:4)

¹⁰ Yehovah ala ten e krutu sma na wan reti fasi. A no lobi a wan sma moro a trawan. Te Yehovah e bosroiti fu gi wan sma pardon, dan a no e luku efu a gudu, pôti, koni noso moi (1 Sam. 16:7; Yak. 2:1-4). Nowan sma kan dwengi Yehovah noso pai en tyuku (2 Kron. 19:7). Yehovah no e strafu soso fu di a no sabi moro san fu du noso fu di en ati e bron, èn a no e gi sma di no abi berow pardon soso fu di a e firi sari gi den (Eks. 34:7). A de krin taki Yehovah na a moro bun Krutuman di de, fu di a sabi ala sani di abi fu du nanga wi situwâsi.​—Leisi Deuteronomium 32:4.

11. Fa a fasi fa Yehovah e gi pardon e difrenti fu a fasi fa libisma e gi trawan pardon?

¹¹ Den skrifiman fu den Hebrew Buku fu Bijbel ben frustan taki Yehovah e gi pardon na a moro bun fasi. Son leisi den ben e gebroiki wan spesrutu Hebrew wortu gi pardon. Den no ben e gebroiki a wortu disi te wan sma ben gi wan trawan  pardon, ma soso te Gado ben gi wan sma pardon. Yehovah na a wan-enkri sma di abi a makti fu gi wan sma pardon dorodoro te a abi trutru berow fu en sondu. Fa wi e firi te Yehovah gi wi pardon?

12-13. (a) Fa wan sma e firi te Yehovah gi en pardon? (b) Te Yehovah gi wi pardon, dan san a no e du noiti?

¹² Te wi e bribi taki Yehovah gi wi pardon, dan dati e gi wi krakti, wi o firi korostu èn wi o abi wan krin konsensi. Wi kan firi so soso te Yehovah srefi gi wi pardon (Tori 3:19). Te Yehovah gi wi pardon, dan a de leki noiti wi ben sondu èn a e gi wi na okasi fu tron mati nanga en baka.

¹³ Te Yehovah gi wi pardon dan noiti a e strafu noso krutu wi fu a sondu dati moro (Yes. 43:25; Yer. 31:34). Yehovah e poti den sondu fu wi „so fara leki son-opo de fu sondongo” * (Ps. 103:12). Te wi e prakseri a fasi fa Yehovah e gi wi pardon dan wi e kisi moro warderi nanga lespeki gi en (Ps. 130:4). Ma suma Yehovah e gi pardon?

14. San wi leri te nanga now fu Yehovah te a musu bosroiti efu a o gi wan sma pardon?

¹⁴ Soleki fa wi si, Yehovah no e luku efu a sondu fu wi bigi noso pikin te a o bosroiti fu gi wi pardon. Wi leri tu taki Yehovah e gebroiki a sabi di a abi leki Mekiman, Krutuman, nanga a sma di e gi wi wet, fu bosroiti efu a o gi wi pardon. Sortu sani Yehovah e luku te a musu bosroiti efu a o gi wi pardon?

15. Soleki fa Lukas 12:47, 48 e taki, dan san na wán sani di Yehovah e luku?

¹⁵ Wan sani di Yehovah e luku, na efu a sma di sondu ben sabi taki a sani di a ben du no bun. Yesus ben sori dati krin, soleki fa skrifi na Lukas 12:47, 48. (Leisi en.) Wan sma di e prakseri fu du wan ogri èn di e du e tu, aladi a sabi taki a sani di a e du na wan sani di Yehovah no feni bun kwetikweti e du wan seryusu sondu. Yehovah kan bosroiti fu no gi so wan sma pardon (Mark. 3:29; Yoh.  9:41). Ma fu de eerlijk wi alamala sabi taki son leisi wi du wan sani di no ben bun. Wi o kisi pardon fu dati? Iya! Èn disi e tyari wi go na wan tra sani di Yehovah e luku te a musu bosroiti efu a musu gi wan sma pardon.

16. San a wani taki fu abi berow èn fu san ede wi musu abi berow efu wi wani taki Yehovah gi wi pardon?

¹⁶ Wan tra sani di Yehovah e luku, na efu a sma di sondu abi trutru berow. San a wani taki fu abi berow? Fu abi berow wani taki wan sma e kenki en denki, a fasi fa a e tyari ensrefi, noso den sani di a wani du. A wani taki dati a e hati wan sma èn a e sari srefisrefi fu di a du sani di no bun, noso fu di a no du den yoisti sani di a ben musu du. Wan sma di abi trutru berow no e sari wawan fu di a du wan sondu, ma a e sari tu fu di a sabi taki na fu di a no ben abi wan bun matifasi nanga Yehovah meki taki a du a sondu dati. Yu kan memre ete taki Kownu Manase nanga David ben du seryusu sondu, ma toku Yehovah gi den pardon fu di den ben sori trutru berow (1 Kow. 14:8). Iya, Yehovah musu si krin buweisi di e sori taki wi abi trutru berow te a o bosroiti efu a musu gi wi pardon. Ma a no nofo fu firi sari wawan fu wan sondu di wi du. Wi musu de klariklari fu du wan sani. * Dati e tyari wi go na wan tra sani di Yehovah e luku.

17. San a wani taki dati wan sma e drai en libi èn fu san ede dati prenspari? (Yesaya 55:7)

¹⁷ Wan tra prenspari sani di Yehovah e luku, na efu wan sma drai en libi. Te wan sma drai en libi dan san dati wani taki? A wani taki dati wan sma musu tapu nanga den ogri sani di a e du èn a musu du sani di Yehovah feni bun. (Leisi Yesaya 55:7.) So wan sma musu kenki a fasi fa a e denki so taki a kan denki soleki fa Yehovah e denki (Rom. 12:2; Ef. 4:23). A musu de klariklari fu no prakseri noso du sani moro di no bun (Kol. 3:7-10). A no de fu taki dati na a bribi san wi  abi na ini a frulusu-ofrandi fu Krestes e meki taki Yehovah e gi wi pardon fu wi sondu èn a e wasi wi kon krin. Yehovah o gi wi pardon nanga yepi fu a frulusu-ofrandi fu Krestes efu a man si krin taki wi e meki muiti fu kenki a fasi fa wi e tyari wisrefi.​—1 Yoh. 1:7.

18. San wi leri fu fasi fa Yehovah gi pardon?

¹⁸ Meki wi luku wan tu prenspari sani di wi leri syatu baka. Yehovah na a wan-enkri sma di man gi wan sma pardon dorodoro. Fu san ede wi kan taki dati? A fosi reide, na taki Yehovah de klariklari fu gi pardon. A di fu tu, na taki Yehovah sabi ala sani fu wi èn fu di a sabi dati meki en na a moro bun sma di kan sabi efu wi abi trutru berow. A di fu dri, na taki te Yehovah gi wi pardon dan a de neleki noiti wi ben du wan sondu. Disi o meki taki wi abi wan bun konsensi èn a o feni wi bun.

19. Fu san ede wi kan de nanga prisiri aladi wi na sondusma di o tan du sondu?

¹⁹ A no de fu taki dati fu di wi na sondu sma meki wi o tan du sondu. Ma aladi dati de so, wi e kisi deki-ati fu di Yehovah na wan Gado di abi sari-ati èn a sabi taki wi na sondu sma. Sobun, wi no musu firi sari doronomo fu di wi na sondusma èn fu di wi e meki fowtu (Ps. 103:8-14; 130:3). Efu wi e du ala san wi man fu libi soleki fa Yehovah wani dan wi kan de nanga prisiri (Fil. 4:4-6; 1 Yoh. 3:19-22; Luku Inzicht in de Schrift Deel 1, bladzijde 285). Disi e gi wi trutru deki-ati.

20. San wi o luku na ini a tra artikel?

²⁰ Wi de nanga tangi taki Yehovah de klariklari fu gi wi pardon te wi abi trutru berow fu den sondu di wi du. Fa wi kan teki na eksempre fu Yehovah te wi e gi sma pardon? Na sortu fasi wi e gi pardon neleki Yehovah? Ma fa a fasi fa wi e gi pardon e difrenti fu a fasi fa Yehovah e gi sma pardon? Fu san ede a prenspari fu sabi a difrenti? Na ini a tra artikel wi o piki den aksi dati.