Bijbel no e taki dati. Ma a e fruteri wi wan tu moi sani di e fruklari fu san ede den no du dati.

Wan engel ben taigi Maria taki a ben o kon de nanga bere èn kisi wan pikin. Di na engel tyari a boskopu disi gi en, dan Maria nanga Yosef ben e libi na ini Nasaret, wan foto na ini Galilea (Luk. 1:26-31; 2:4). Bakaten di den komoto na Egepte, den go libi baka na Nasaret. Na drape Yesus gro kon bigi èn dati meki a ben de wan Nasaretsma (Mat. 2:19-23). Dati meki te wi e taki fu Yesus, Yosef, nanga Maria, dan wi e prakseri Nasaret.

Maria ben abi wan famiriman di nen Elisabet èn a ben e libi na ini Yuda. Elisabet ben de a wefi fu priester Sakaria èn a tron a mama fu Yohanes a Dopuman (Luk. 1:5, 9, 13, 36). Maria ben go luku Elisabet na ini Yuda èn a tan dri mun nanga en. Baka dati Maria drai go baka na Nasaret (Luk. 1:39, 40, 56). Na so a du kon taki Maria ben sabi a kontren fu Yuda pikinso.

Bakaten, Yosef gowe libi Nasaret èn a go na Betlehem fu di den Romesma ben meki wan wet taki ala sma ben musu go na „en eigi foto” fu „skrifi den nen na lantibuku”. Boiti dati, Betlehem ben de a presi pe a Mesias ben o gebore soleki fa profeititori ben sori (Luk. 2:3, 4; 1 Sam. 17:15; 20:6; Mika 5:2). Baka di Maria meki Yesus drape, dan Yosef no meki Maria teki a langa pasi go baka na Nasaret nanga a beibi fu den. Den tan na Betlehem di ben de sowan neigi kilometer fu Yerusalem. A ben o makelek gi den fu tyari a beibi fu den go na a tempel drape fu tyari na ofrandi di den ben musu tyari soleki fa a Wet ben taki.​—Lef. 12:2, 6-8; Luk. 2:22-24.

Fosi Yesus gebore, na engel fu Gado ben taigi Maria taki en manpikin ben o kisi „a kownusturu fu en papa David” èn taki a ben o „tiri fu têgo leki Kownu”. A kan taki Yosef nanga Maria ben feni en prenspari taki Yesus gebore na ini a foto fu David (Luk. 1:32, 33; 2:11, 17). Kande den ben denki taki a ben o de wan koni sani fu tan drape èn wakti teleki den kon sabi san Gado ben o wani taki den du.

Wi no sabi o langa den ben de na ini Betlehem di wan tu lukuman ben doro drape. Ma na a ten dati na osofamiri ben e libi na ini wan oso èn a manpikin fu den no ben de wan beibi moro, ma a ben de wan „yongu pikin” kaba (Mat. 2:11). Soleki fa a sori, den no drai go baka na Nasaret, ma den tan na ini Betlehem wan moi pisi ten èn drape den seti den libi.

Herodes ben „seni sma go na Betlehem . . . fu kiri ala den boi di no ben pasa tu yari ete” (Mat. 2:16). Ma fu di wan engel ben warskow Yosef gi a sani dati, meki Yosef nanga Maria lowe go na Egepte nanga Yesus èn den tan drape teleki Herodes dede. Bakaten, Yosef tyari en osofamiri go na Nasaret. Fu san ede den no drai go baka na Betlehem? Fu di na a ten dati a manpikin fu Herodes, Arkelayus ben de na ini Yudea èn a ben de wan ogri-ati man. Boiti dati, wan engel ben warskow Yosef baka fu no go drape. Na ini Nasaret, Yosef ben o man kweki Yesus bun leki wan tru anbegiman fu Gado fu di ogri no ben o miti den so makelek drape.​—Mat. 2:19-22; 13:55; Luk. 2:39, 52.

Soleki fa a sori, dan Yosef dede fosi Yesus opo a pasi gi trawan fu go na hemel. Sobun, Yosef o kisi wan opobaka dyaso na grontapu. Furu sma o man miti en èn den o man kon sabi fu san ede en nanga Maria ben tan na ini Betlehem baka di Yesus gebore.