1. San wi musu du efu wi wani pasa a dei fu Yehovah libilibi?

 TE BIJBEL e taki fu „a dei fu Yehovah”, dan a e taki fu a ten te Yehovah o krutu den feanti fu en èn frulusu en pipel. Na ini owruten, Yehovah ben strafu wan tu pipel (Yes. 13:1, 6; Esek. 13:5; Sef. 1:8). Na ini a ten disi „a dei fu Yehovah” e bigin te den politiek tiriman o pori Babilon a Bigiwan èn a e kaba nanga a feti fu Armagedon. Wi musu sreka nownow fu man pasa a „dei” dati libilibi. Fu taki en leti, Yesus ben leri taki wi „musu de srekasreka” ala ten gi a „bigi banawtu”.​—Mat. 24:21; Luk. 12:40.

2. Fa 1 Tesalonikasma e yepi wi?

² Na ini a fosi brifi di na apostel Paulus ben skrifi gi den Tesalonikasma, a gebroiki difrenti agersitori fu yepi Kresten fu de srekasreka gi a bigi krutudei fu Yehovah. Paulus ben sabi taki a dei fu Yehovah no ben o kon na a ten dati (2 Tes. 2:1-3). Toku a gi den brada nanga sisa fu en deki-ati fu sreka gi a dei dati neleki a ben o kon tamara. Wi kan fiti a rai fu en tu. Meki wi go luku san a e taki fu den sani disi: (1) fa a dei fu Yehovah ben o kon, (2) suma no ben o pasa a dei dati libilibi, èn (3) fa wi kan sreka fu pasa a dei dati libilibi.

3. Fa a dei fu Yehovah o kon leki wan fufuruman na neti? (Luku a prenki.)

³ „Leki wan fufuruman na neti” (1 Tes. 5:2). Disi na a fosiwan fu den dri agersitori di Paulus e gebroiki fu sori fa a dei fu Yehovah o kon. Nofo tron fufuruman e kon fufuru na neti te sma no e fruwakti dati èn den e du sani esi-esi. A dei fu Yehovah o kon wantronso tu te furu sma no  e fruwakti dati. Srefi tru Kresten kan fruwondru fu si o esi sani e pasa. Ma tra fasi leki den ogri sma, wi no o kisi pori.

4. Fa a dei fu Yehovah de leki a hebi pen di wan uma e kisi te a de fu meki wan pikin?

⁴ „Neleki fa a hebi pen fu wan uma di de fu meki wan pikin, e kon na en tapu wantronso” (1 Tes. 5:3). Wan mama di de fu meki wan pikin no sabi soifri o ten a o kisi a pikin. Ma a no e tweifri taki a o kisi en. Te a ten doro fu kisi a pikin, dan wantronso a o kisi hebi pen èn noti no o man tapu a pikin fu kon. Na so a de tu taki wi no sabi na sortu dei noso yuru a dei fu Yehovah o kon. Toku wi sabi seiker taki a dei dati e kon èn taki den ogrisma no o man lowe te Yehovah o strafu den wantronso.

5. Fa a bigi banawtu de leki deiten di e kon?

⁵ Leki fa deiten e kon. A di fu dri agersitori di Paulus e gebroiki e taki baka fu fufuruman di e kon na neti. Ma disi leisi a sori leki Paulus e agersi a dei fu Yehovah nanga a fasi fa deiten e kon miti wan fufuruman wantronso (1 Tes. 5:4). Son leisi fufuruman di e kon fufuru na neti no e si taki a ten e lon. A leti fu wan nyun dei kan meki taki sma kisi den. Na a srefi fasi a bigi banawtu o tyari kon na krin suma na den sma di de leki fufuruman èn di e tan du sani di Gado no feni bun. Tra fasi leki den ogrisma dati, wi kan sori taki wi de srekasreka te wi e weigri fu du sani di Yehovah no feni bun èn te wi e sori taki wi lobi „ala sortu bun, retidu, nanga sani di tru” (Ef. 5:8-12). Baka dati, Paulus e gebroiki tu agersitori di abi fu du nanga makandra èn di e taki fu den wan di no o pasa a dei fu Yehovah libilibi.

6. Na sortu fasi furu sma na ini a ten disi e sribi? (1 Tesalonikasma 5:6, 7)

⁶ „Den sma di e sribi.” (Leisi 1 Tesalonikasma 5:6, 7.) Paulus ben agersi den sma di no o pasa a dei fu Yehovah libilibi nanga sma di e sribi. Den no sabi san e pasa na den lontu èn den no e si taki a ten e lon. Dati meki den no man si taki prenspari sani e pasa èn den no man du noti. Furu sma na ini a ten disi e sribi na yeye fasi (Rom. 11:8). Den no e bribi den buweisi di e sori taki wi e libi na ini „den lasti dei” èn taki a bigi banawtu o kon heri esi. Te bigi kenki o pasa na grontapu, dan son sma o wiki èn den o wani sabi a Kownukondre boskopu fu wi. Toku furu sma no o tan na ai, ma den o fadon na sribi baka. Srefi sonwan fu den sma di e bribi taki wan krutudei o kon o denki taki a dei dati fara ete (2 Petr. 3:3, 4). Ma dei fu dei wi e si taki a prenspari fu tan na ai.

7. Fa den sma di Gado o strafu de leki drungu sma?

⁷ „Den sma di e kon drungu.” Na apostel Paulus ben agersi den sma di Gado o strafu nanga sma di drungu. Sma di drungu no man du wan sani wantewante te sani e pasa na den lontu èn den e teki don bosroiti. Na so a de tu nanga den ogrisma di no e gi yesi na den warskow fu Gado. Den e bosroiti fu libi wan libi di o tyari pori kon gi den. Ma Kresten e kisi a rai fu tan na ai èn fu denki krin (1 Tes. 5:6). Wan Bijbel sabiman e taki dati wan sma di e denki krin no e bruya ma a e tan rustig. Fu di a e denki krin, meki a man teki a yoisti bosroiti. Fu san ede wi no musu bruya èn de rustig? Fu di dati o yepi wi fu teki a yoisti bosroiti so taki wi no bumui na ini den politiek afersi nanga den problema fu a ten disi. O moro a dei fu Yehovah e kon krosibei, o moro sma o dwengi wi fu teki sei na ini den sortu afersi disi. Toku wi no musu broko wi ede nanga san wi o du. A yeye fu Gado kan yepi wi fu no bruya èn fu teki bun bosroiti.​—Luk. 12:11, 12.

8. San o yepi wi fu de srekasreka, soleki fa 1 Tesalonikasma 5:8 e sori? (Luku a prenki.)

⁸ Weri a sani di e kibri a borsu fu wi èn weri a helm. Paulus e agersi wi nanga srudati di de srekasreka fu go feti. (Leisi 1 Tesalonikasma 5:8.) Wan srudati di de na ini a legre musu de srekasreka ala ten fu go feti. Na so a de tu nanga wi. Wi de srekasreka ala ten gi a dei fu Yehovah te a bribi nanga a lobi fu wi de leki wan sani di e kibri wi borsu èn te a howpu fu wi de leki wan helm. Den sani disi o yepi wi furu.

9. Fa a bribi fu wi e kibri wi?

⁹ Wan srudati ben e weri wan sani fu kibri a borsu fu en so taki peiri no doro en ati. Bribi nanga lobi e kibri wi agersi ati. Den fasi disi o yepi wi fu tan dini Gado èn fu tan waka baka Yesus. Bribi e gi wi a dyaranti taki Yehovah o blesi wi te wi e suku en nanga wi heri ati (Hebr. 11:6). Te wi abi bribi, wi o tan gi yesi na wi Fesiman, Yesus, awinsi problema e miti wi. Wi bribi kan kon moro tranga te wi e luku den ondrofenitori fu sma na ini a ten disi di tai hori na Gado di sma frufolgu den noso di den ben abi moni problema. Èn wi no o feti baka gudu te wi e teki na eksempre fu den sma di kenki den libi  èn di poti a Kownukondre na a fosi presi na ini den libi. b

10. Fa lobi gi Gado èn gi trawan e yepi wi fu tan du a preikiwroko?

¹⁰ Efu wi wani tan na ai, dan a prenspari tu fu abi lobi (Mat. 22:37-39). Lobi gi Gado e yepi wi fu tan preiki awinsi wi e kisi problema (2 Tim. 1:7, 8). Fu di wi lobi den sma tu di no e anbegi Yehovah, meki wi e tan preiki na ini a kontren fu wi. Wi e bel sma èn wi e skrifi brifi gi den. Wi no e lasi howpu taki wan dei den birtisma fu wi o kenki den libi èn o bigin du san bun.​—Esek. 18:27, 28.

11. Fa a lobi di wi abi gi wi Kresten brada nanga sisa e yepi wi? (1 Tesalonikasma 5:11)

¹¹ Wi lobi wi Kresten brada nanga sisa tu. Dati meki wi e „tan gi makandra deki-ati èn [wi e] tan yepi makandra”. (Leisi 1 Tesalonikasma 5:11.) Wi e gi makandra deki-ati neleki srudati di e feti sei nanga sei. Son leisi a kan pasa taki wan srudati gi wan tra srudati fu a legre fu en mankeri na ini a feti, ma noiti a ben o du dati fu espresi. Na so a de tu taki wi no ben o wani du wan hati sani fu espresi nanga wi brada nanga sisa, noso pai den ogri fu ogri (1 Tes. 5:13, 15). Wan tra fasi fa wi e sori a lobi fu wi, na taki wi e lespeki den brada di e teki fesi na ini a gemeente (1 Tes. 5:12). Di Paulus ben skrifi a brifi disi, dan a gemeente na ini Tesalonika no ben de wán yari ete. A kan taki den brada di ben e teki fesi drape no ben abi so furu ondrofeni èn kande den meki fowtu. Toku den brada nanga sisa ben musu sori lespeki gi den. Now di a bigi banawtu e kon moro krosibei, wi o abi fu frutrow moro tapu den rai fu den gemeente owruman di o sori wi san fu du. Kande den rai fu den brada na a edekantoro èn na a bijkantoro no o man doro wi. Dati meki a prenspari taki nownow kaba wi e leri fu lobi èn fu lespeki den owruman fu wi. Awinsi san e pasa, meki wi tan denki krin. Meki wi no tan luku  den fowtu fu den, ma meki wi tan hori na prakseri taki Yehovah e tiri den reti-ati man disi nanga yepi fu Krestes.

12. Fa a howpu di wi abi e kibri wi frustan?

¹² Neleki fa wan helm ben e kibri na ede fu wan srudati, na so a howpu di wi abi fu kisi frulusu e kibri wi frustan. Fu di wi abi wan tranga howpu, meki wi man si taki den sani di a grontapu disi wani gi wi na soso sani (Fil. 3:8). A howpu fu wi e yepi wi fu no bruya. Na so a ben de nanga Wallace nanga Laurinda, di e dini na ini Afrika. Na ini wan pisi ten fu dri wiki, wan fu den lasi en papa èn a trawan lasi en mama. Fu di a COVID-19 siki ben panya na ala sei, meki den no ben man drai go baka na a kondre fu den fu trowstu den famiriman fu den. Wallace e skrifi: „Te mi e prakseri den, dan na opobaka howpu e yepi mi fu si den na a fasi fa den o de na a bigin fu a nyun grontapu. Mi no e si den leki fa den ben de syatu fosi den dede. A howpu disi e trowstu mi te mi e sari fu di den no de moro nanga wi.”

13. San wi kan du fu kisi santa yeye?

¹³ „No tapu a yeye fu Gado fu a wroko na ini unu” (1 Tes. 5:19). Paulus ben taki dati a santa yeye e wroko na ini wi. Te wi no e tapu a yeye fu wroko na ini wi, dan wi o de fayafaya, wi o prisiri fu du san bun èn wi o de klariklari fu wroko tranga gi Yehovah (Rom. 12:11). San wi kan du fu kisi santa yeye? Wi kan begi fu kisi en, wi kan studeri a Wortu fu Gado di skrifi nanga yepi fu santa yeye èn wi kan horibaka gi na organisâsi fu en di a santa yeye e tiri. Te wi e du den sani disi, dan dati o yepi wi fu kon abi „den fasi di a yeye e meki sma kisi”.​—Gal. 5:22, 23.

14. San wi no musu du efu wi wani kisi a yeye fu Gado? (Luku a prenki.)

¹⁴ Te Gado gi wi en santa yeye, dan wi musu luku bun taki wi „no tapu a yeye fu Gado fu wroko na ini wi”. Gado e gi sma a yeye fu en soso te den e prakseri sani di  krin èn te den e tyari densrefi na wan krin fasi. A no o gi wi en yeye moro efu wi e prakseri sani di no krin èn efu wi e du den sani dati (1 Tes. 4:7, 8). Efu wi wani tan kisi a yeye fu Gado, dan wi no musu „si den profeititori leki soso sani” (1 Tes. 5:20). Dyaso a wortu „profeititori” abi fu du nanga den boskopu di Gado e gi wi nanga yepi fu en santa yeye. Wan tu fu den boskopu disi abi fu du nanga a dei fu Yehovah èn a kaba fu a grontapu disi di de krosibei. Wi no e denki taki a dei fu Yehovah, noso Armagedon, no o kon na ini a ten disi. Na presi fu dati, wi e fruwakti taki a dei dati o kon heri esi èn wi e tan hori en na prakseri. Dati meki wi e tan tyari wisrefi na wan fasi di fiti èn ibri dei wi e ’du sani di e sori taki wi e dini Gado fayafaya’.​—2 Petr. 3:11, 12.

15. Fa wi kan sorgu taki boskopu di e komoto fu ogri yeye no e kori wi? (1 Tesalonikasma 5:21)

¹⁵ Heri esi, den feanti fu Gado o taki: „Freide de èn ala sani e waka bun!” (1 Tes. 5:3) Boskopu di e komoto fu den ogri yeye o panya na heri grontapu èn den o kori furu sma (Openb. 16:13, 14). Fa a de nanga wi? Didibri no o man kori wi efu wi e „ondrosuku ala sani fu luku efu den tru”. (Leisi 1 Tesalonikasma 5:21.) A Griki wortu di vertaal nanga „ondrosuku ala sani” abi fu du nanga a fasi fa sma ben e luku efu wan sani ben meki fu soifri gowtu noso solfru. Dati meki wi musu luku tu efu wan sani di wi e yere noso leisi soifri. Na dati den Tesalonikasma ben musu du. Wi o abi fu du dati tu o moro a bigi banawtu e kon krosibei. Wi no musu bribi iniwan sani di sma e taki, ma wi musu gebroiki wi frustan fu luku efu den sani di wi e leisi noso e yere e kruderi nanga san Bijbel nanga Yehovah en organisâsi e taki. Te wi e du dati, dan nowan enkri sani di e komoto fu ogri yeye o man kori wi.​—Odo 14:15; 1 Tim. 4:1.

16. Sortu moi howpu wi abi èn san wi o du?

¹⁶ Wi sabi taki a pipel fu Yehovah o pasa a bigi banawtu libilibi. Ma ibriwan fu wi aparti no sabi san tamara o tyari kon (Yak. 4:14). Awinsi wi pasa a bigi banawtu libilibi noso awinsi wi dede fosi a ten dati, toku wi o kisi têgo libi efu wi e tan gi yesi na Gado. Den salfuwan o de na hemel makandra nanga Krestes èn den tra skapu o libi na ini wan paradijs na grontapu. Meki wi alamala tan poti prakseri na a moi howpu di wi abi èn meki wi de srekasreka gi a dei fu Yehovah!