Mi papa nanga mama gwe libi Estkondre na a ten fu a Di Fu Tu Grontapufeti èn den go na Doisrikondre, pe mi gebore. Na a ten dati den bigin seti sani fu froisi go na Kanada. A fosi oso pe wi ben tan, ben de krosibei fu Ottawa, Kanada. A ben de wan pikin oso pe fowru ben e tan tu. Wi ben pôti srefisrefi ma toku wi ben kan nyan eksi ibri mamanten.

Wan dei, Yehovah Kotoigi leisi Openbaring 21:3, 4 gi mi mama. A sani di mi mama leisi naki en ati so te taki a bigin krei. Mi papa nanga mama studeri Bijbel èn baka wan syatu pisi ten den go na fesi fu teki dopu.

Mi papa nanga mama no ben e taki Ingrisitongo bun, ma toku den ben de fayafaya fu dini Yehovah. Mi papa ben wroko na wan fabriek na ini Sudbury, Ontario pe den ben smèlter nikkel. Bijna ibri satra, baka di a ben wroko heri neti, a ben tyari mi nanga mi pikin sisa Sylvia go na ini a preikiwroko. Ibri wiki wi ben studeri A Waktitoren leki osofamiri. Mi papa nanga mama leri mi fu lobi Gado. Dati meki mi bosroiti fu gi mi libi abra na Yehovah na ini 1956 di mi ben abi tin yari. Ala leisi te mi e denki fa den ben lobi Yehovah, a e gi mi deki-ati fu tan dini Yehovah go doro.

Di mi klari middelbaar skoro, mi no ben e poti so furu prakseri moro na diniwroko fu Yehovah. Mi ben denki taki efu mi ben o tron wan pionier, dan noiti mi ben o meki nofo moni fu go nanga plane na tra kondre. Mi ben feni wroko leki DJ na wan radio station èn mi ben lobi a wroko dati. Ma fu di mi ben e wroko na neti, meki mi ben misi furu konmakandra èn mi ben de furu nanga sma di no ben lobi Gado. Te fu kaba, mi konsensi bigin naki mi èn mi tyari kenki kon na ini mi libi.

Mi froisi go na Oshawa, Ontario. Drape mi miti Ray Norman nanga en sisa Lesli èn tra pionier. Den alamala ben meki mi firi bun drape. Di mi si fa den ben de koloku, mi go denki baka san mi ben wani du nanga mi libi. Den gi mi deki-ati fu pionier èn na ini september 1966 mi bigin pionier. Mi ben de koloku èn mi ben lobi fa mi libi ben de. Ma wan tu sani pasa di mi no ben fruwakti èn den kenki mi heri libi.

Di mi ben de na middelbaar skoro, mi vul wan formulier fu go na Betel na ini Toronto, Kanada. Bakaten di mi ben e pionier, mi kisi a kari fu  dini fo yari na Betel. Ma fu di mi ben lobi Lesli, mi ben frede taki efu mi go na Betel mi no ben o si en noiti moro. Mi begi Yehovah fayafaya fu a tori disi. Te fu kaba mi teki a kari fu go na Betel, ma mi ben sari fu di mi no ben o si Lesli moro.

Mi ben e wroko na a wasserij na Betel èn bakaten mi ben wroko leki sekretaris. Na a ten dati, Lesli ben tron spesrutu pionier na ini Gatineau, Kibek. Furu leisi mi ben aksi mi srefi fa sani ben waka gi en èn efu mi ben teki a yoisti bosroiti. Ne a moro moi sani pasa di mi no ben fruwakti. Ray, a brada fu Lesli, kon na Betel èn a kon tan nanga mi na ini a srefi kamra. Disi meki taki mi ben kan meki kontakti baka nanga Lesli. Mi nanga Lesli trow tapu 27 februari 1971, a lasti dei fu a toewijzing fu mi di ben teki fo yari.

Mi nanga Lesli kisi a toewijzing fu go dini na ini wan Fransitongo gemeente na ini Kibek. Baka wan tu yari, mi skreki fu kisi a toewijzing fu dini leki kring-owruman aladi mi ben abi 28 yari. Mi ben feni taki mi ben yongu tumusi èn taki mi no ben abi nofo ondrofeni. Den wortu na ini Yeremia 1:7, 8 gi mi furu deki-ati. Ma Lesli ben meki wan tu aanrijding èn a no ben man sribi so bun te neti. Dati meki wi ben denki taki a ben o muilek srefisrefi gi wi fu du a kringwroko. Toku Lesli taki: „Efu Yehovah e gi wi a kari fu du wan sani, dan wi no musu pruberi fu du en?” Wi teki a toewijzing èn wi ben prisiri fu du a kringwroko 17 yari langa.

Mi ben abi furu fu du na ini a kringwroko èn a no ala ten mi ben abi ten gi Lesli. Mi ben abi fu leri wan tra sani. Wan leisi, frukufruku munde mamanten, wan sma schel na wi doro. Di mi opo a doro, nowan sma ben de drape ma wan manki ben de na fesi a doro di ben abi wan tafraduku, froktu, kasi, baget, wan batra win, nanga grasi na ini. Wan karta ben de tu, di ben taki: „Tyari yu frow go na wan presi fu sidon nyan.” A weer ben moi èn a son ben e skèin. Ma mi taigi Lesli taki mi no ben o man go fu di mi ben musu sreka wan tu lezing. A ben sari pikinso ma a ben frustan. Di mi go sidon fu sreka, mi konsensi bigin naki mi. Mi prakseri Efeisesma 5:25, 28. A gersi leki na Yehovah ben e memre mi fu poti prakseri na den firi fu mi wefi. Baka di mi begi, mi taigi Lesli: „Kow gwe.” A ben breiti srefisrefi. Wi rèi go na wan moi presi sei wan liba, wi bradi a tafraduku tapu a gron èn wi ben abi wan moi dei makandra. Èn mi ben abi ten ete fu sreka den lezing fu mi.

A kringwroko ben gi wi furu prisiri èn wi go dini na furu presi, fu British Columbia te go miti Newfoundland. Now mi dren kon tru, mi ben man go na ala sortu presi. Mi ben prakseri fu go na Gileadskoro ma mi no ben wani go na wan tra kondre. Mi ben feni taki mi no ben bun nofo fu tron wan zendeling. Boiti dati, mi ben frede taki den ben o seni wi go na wan kondre na ini Afrika pe siki nanga feti lai. Mi ben bun pe mi ben de.

Na ini 1992, Yehovah Kotoigi ben mag preiki fri baka na ini sonwan fu den kondre di ben de wan pisi fu Sovyet-Unie fosi. Dati meki den brada aksi wi efu wi wani froisi go na Estkondre èn dini leki zendeling. Wi no ben fruwakti dati srefisrefi, ma wi begi fu a tori. Wi ben denki baka: ’Efu Yehovah e gi wi a kari fu du wan sani, dan wi no musu pruberi fu du en?’ Sobun wi teki a kari èn mi prakseri na misrefi: ’Awinsi fa a no fa, a no Afrika wi e go.’

Wantewante wi bigin leri Estitongo. Baka wan tu mun di wi ben de na ini a kondre, den aksi wi fu du kringwroko. Wi ben musu go na sowan 46 gemeente nanga grupu na ini den dri Baltis kondre: Estkondre, Latfia nanga Litonia. Wi ben musu go tu na Kaliningrad, na ini Rosiakondre. Disi ben wani taki dati wi ben musu pruberi fu leri wan tu sani na ini Latfiatongo, Litoniatongo nanga Rosiatongo. A no ben makriki fu du dati. Toku den brada nanga sisa ben breiti taki wi ben meki muiti fu leri a tongo fu den èn den yepi wi. Na ini 1999, wan bijkantoro opo na ini Estkondre èn mi kisi a toewijzing fu dini na ini a Bijkantoro Komte makandra nanga Toomas Edur, Lembit Reile, nanga Tommi Kauko.

Wi kon sabi furu Kotoigi di sma ben seni go na Siberia fosi. Den ben poti den brada nanga sisa disi na strafu-oso èn den no ben si den famiri fu wan langa pisi ten. Ma toku den no kisi bita-ati aladi sma ben du so furu ogri nanga den. Den tan de nanga prisiri èn den tan de nanga faya gi a diniwroko. Disi yepi wi fu si taki wi kan horidoro tu èn wi kan de nanga prisiri awinsi wi de na ini muilek situwâsi.

Wi wroko bun tranga furu yari langa èn wi no ben teki furu ten fu rostu. Dati meki Lesli ben kon weri srefisrefi. Wi no ben frustan ete taki a fasi fa a ben e firi ben abi fu du nanga wan siki (fibromyalgie) di e meki wan sma firi weri srefisrefi. Disi ben de wan seryusu sani èn wi ben prakseri fu drai go baka na Kanada. Di wi kisi a kari fu go na a Skoro gi brada fu a Bijkantoro Komte nanga den wefi na ini Patterson, New York, Amerkankondre, dan mi no ben denki taki wi ben o man go. Ma di wi begi fayafaya fu a tori, wi go na a skoro. Yehovah blesi a bosroiti di wi teki. Di wi ben de na a skoro, dan Lesli feni a datrayepi di a ben abi tranga fanowdu. Na so wi ben man go doro nanga den sani di wi ben e du.

Wan dei na ini 2008 di wi ben de baka na ini Estkondre, den brada fu na edekantoro bel mi fu aksi efu wi ben o wani go na Kongo. Mi skreki srefisrefi, spesrutu fu di mi ben musu piki den a tra dei kaba. Mi no ben taigi Lesli wantewante fu di mi ben sabi taki a no ben o sribi a heri neti. Ma na mi no sribi heri neti fu di mi ben e begi Yehovah fu den broko-ede di mi ben abi fu go na Afrika.

A tra dei fu en, mi taigi Lesli san pasa èn wi taki: „Yehovah e gi wi a kari fu go na Afrika. Efu wi no e pruberi fosi, dan wi no o sabi efu wi o man du en, toch?” Sobun, baka 16 yari na ini Estkondre, wi  teki plane frei go na Kinsyasa, Kongo. A bijkantoro ben abi wan moi dyari èn a presi ben rustig. Wan fu den fosi sani di Lesli anga na ini a kamra fu wi, na wan karta di a ben abi sensi di a gwe libi Kanada. Na tapu a karta skrifi: „De nanga prisiri awinsi pe yu de.” Di wi miti den brada nanga sisa drape, di wi hori Bijbelstudie nanga sma èn di wi ondrofeni fa a e gi prisiri fu du a zendelingwroko, wi kon de moro koloku na ini a diniwroko fu Yehovah. Baka wan pisi ten, wi kisi a grani fu fisiti den bijkantoro na ini sowan 13 tra Afrikan kondre. Na so wi kon miti so furu difrenti sma. Mi no ben e broko mi ede moro èn wi taki Yehovah tangi taki a seni wi go na Afrika.

Na ini Kongo, den gi wi ala sortu sani fu nyan, soleki insekt. Mi ben denki taki wi no ben o man nyan den sortu sani dati. Ma di wi si fa den brada nanga sisa ben lobi nyan den sortu sani dati, dan wi pruberi en tu. Èn wi ben lobi en.

Wi ben go na a owstusei fu a kondre fu gi den brada nanga sisa fu wi deki-ati èn fu tyari sani gi den di den ben abi fanowdu. Na den presi dati, den guerrilla srudati ben broko go na ini den dropu èn den ben du ogri nanga den umasma nanga pikin. Furu fu den brada nanga sisa ben pôti. Ma den ben abi wan tranga bribi na ini na opobaka, den ben abi lobi gi Yehovah, èn den ben tai hori na a organisâsi fu en. Den sani disi naki wi ati trutru èn a gi wi deki-ati. Na eksempre fu den meki wi go denki fu san ede wi e dini Yehovah èn a tranga wi bribi. Sonwan fu den brada nanga sisa ben lasi den oso nanga den nyanyan sani di den ben prani. Disi memre wi taki a kan pasa makelek taki wi lasi ala den sani di wi abi. Dati meki a matifasi di wi abi nanga Yehovah na a moro prenspari sani. Aladi den brada nanga sisa ben abi en muilek, toku den no ben kragi. A sani disi gi wi deki-ati fu go doro awinsi wi e kisi problema èn awinsi wi e kon siki.

Baka wan pisi ten wi kisi wan tra toewijzing di wi no ben fruwakti. Den brada ben aksi wi fu froisi go na a bijkantoro na ini Hong Kong. Noiti wi ben denki taki wi ben o libi na ini Asia. Ma fu di wi ben ondrofeni fa Yehovah yepi wi na ini ala den tra toewijzing, meki wi teki a kari èn wi go drape. Na  ini 2013, wi krei di wi gwe libi den lobi mati fu wi èn a moi kontren fu Afrika, aladi wi no ben sabi fa sani ben o waka.

Hong Kong na wan bigi foto pe bun furu sma fu ala sei fu grontapu e libi. A ben de wan bigi kenki gi wi fu froisi go drape. A ben muilek fu leri Kantoneestongo. Ma den brada nanga sisa gi wi wan switikon èn wi ben lobi a nyanyan. Moro nanga moro wroko ben kon de fu du na a bijkantoro. Ma na ini wan syatu pisi ten a prijs fu gebow kren esi. Dati meki a Tiri Skin teki a koni bosroiti fu seri furu fu den gebow fu a bijkantoro. Syatu baka dati, na ini 2015, wi ben musu froisi go na Zuid-Korea, pe wi e dini te now ete. Dyaso wi ben musu leri wan tra muilek tongo. Ma aladi wi no man taki en so bun ete, toku den brada nanga sisa e gi wi deki-ati fu di den e taki dati wi e go na fesi.

A no makelek ala ten fu meki mati, ma wi kon si taki efu wi e meki muiti fu kari sma kon na wi oso, dan wi kan leri sabi den moro gaw. Wi kon si taki den brada nanga sisa fu wi de a srefi èn taki Yehovah meki wi na so wan moi fasi taki wi kan opo wi ati gi den èn na so wi kan kon abi furu mati di wi lobi srefisrefi.​—2 Kor. 6:11.

Wi kon si taki a prenspari fu si sma soleki fa Yehovah e si den èn fu du muiti fu si den buweisi di e sori taki Yehovah lobi wi èn taki a e tiri wi. Te wi ben lasi-ati noso te wi ben aksi wisrefi efu den brada nanga sisa lobi wi, dan wi ben leisi den moi karta nanga brifi fu den mati fu wi baka. Yehovah trutru piki den begi fu wi, a gi wi a dyaranti taki a lobi wi èn a gi wi krakti fu go doro.

Na ini den yari di pasa, mi nanga Lesli leri o prenspari a de fu meki ten gi makandra, awinsi o druk wi abi en. Wi kon frustan tu wi no musu span tumusi te wi meki wan fowtu spesrutu te wi e pruberi fu taki wan tra tongo. Ibri neti wi e pruberi fu denki wan sani di wi ben lobi a dei dati so taki wi kan taki Yehovah tangi gi dati.

Eigenlijk, mi no ben denki taki mi ben o man de wan zendeling èn taki mi ben o man libi na ini tra kondre. Ma mi e prisiri now fu di mi ondrofeni taki wi man du ala sani te Yehovah e horibaka gi wi. Mi e prakseri den wortu fu Yeremia: „Yu kori mi Yehovah” (Yer. 20:7). Iya, Yehovah gi wi furu moi sani di wi no ben fruwakti èn a blesi wi na fasi di wi no ben denki. Srefi a dren di mi ben abi fu frei nanga plane go na difrenti presi, kon tru. Wi frei nanga plane go na moro presi leki san mi ben denki di mi ben de wan pikin boi, fu di mi go fisiti difrenti bijkantoro na heri grontapu. Mi de nanga tangi trutru taki Lesli ben de klariklari fu horibaka gi mi na ini ala den toewijzing disi.

Ala ten wi e pruberi fu hori na prakseri taki ala san wi e du, na fu di wi lobi Yehovah. Den blesi di wi e kisi now, na fu sori wi fa têgo libi o switi na a ten te Yehovah o ’opo en anu èn a o gi ala libisani san den e angri fu kisi’.​—Ps. 145:16.