1. Sortu grani owruman abi soleki fa 1 Petrus 5:2 e sori?

 KRESTEN owruman abi a frantwortu fu sorgu gi Yehovah en skapu di a lobi so te. Den getrow man disi e warderi a grani di den abi fu dini den brada nanga sisa fu den èn den e du ala san den man fu de „skapuman di [Gado] feni bun” (Yer. 3:15; leisi 1 Petrus 5:2). Wi de nanga tangi trutru taki wi abi den sortu man disi na ini den gemeente fu wi!

2. Sortu tesi kan miti son owruman?

² Owruman e kisi fu du nanga furu problema te den e tyari den frantwortu fu den. Den musu wroko tranga fu sorgu gi a gemeente. Tony, wan owruman na Amerkankondre, ben musu leri fu no teki tumusi furu wroko na en tapu. A ben musu hori na prakseri san a man èn san a no man. A e taki: „Na a bigin, di a COVID-19 siki panya, dan mi ben e teki moro nanga moro wroko na mi tapu fu orga den konmakandra nanga a preikiwroko. Ma awinsi o furu mi ben e du, toku moro wroko ben de fu du. Te fu kaba, mi no ben abi nofo ten moro fu leisi Bijbel, fu studeri èn fu begi.” Ilir, wan owruman na ini Kosofo, ben abi wan tra problema. Di a ben e dini na ini wan kontren pe feti ben de, a ben feni en muilek fu gi yesi na den rai fu na organisâsi. A e taki: „A ben muilek gi mi fu sori deki-ati di a bijkantoro seni mi fu go yepi den brada nanga sisa na ini wan kontren pe ogri ben kan miti mi. Mi ben frede èn mi no ben denki taki a ben de wan koni sani fu go drape.” Tim, wan zendeling na ini Asia, ben feni en muilek fu du ala den sani di a ben musu du ibri dei. A e taki: „Son leisi mi ben weri so te taki mi no ben abi krakti fu sorgu gi den brada nanga sisa.” San kan yepi owruman di e kisi fu du nanga den sortu problema disi?

3. San wi alamala kan leri fu na eksempre fu Krutuman Gideon?

 ³ Owruman kan leri fu na eksempre fu Krutuman Gideon (Hebr. 6:12; 11:32). A ben e kibri a pipel fu Gado èn a ben e tiri den (Krut. 2:16; 1 Kron. 17:6). Neleki Gideon, owruman kisi a frantwortu fu sorgu gi a pipel fu Gado na ini wan muilek ten (Tori 20:28; 2 Tim. 3:1). Gideon ben sabi san a man èn san a no man, a ben abi sakafasi, èn a ben e gi yesi na Gado. Wi kan leri furu fu na eksempre fu en. Di a ben e du den wroko di Gado ben gi en, dan a ben muilek gi en son leisi fu tan du san Gado ben aksi fu en. Awinsi wi a no owruman, toku wi kan leri fu de nanga tangi gi den owruman fu wi. Wi kan horibaka gi den man disi di lobi Gado èn di e wroko tranga.​—Hebr. 13:17.

4. Fa Gideon sori taki a no ben e denki tumusi furu fu ensrefi èn taki a ben abi sakafasi?

⁴ Gideon ben de wan man di ben abi sakafasi èn a ben sabi san a man èn san a no man. b Di na engel fu Yehovah taigi Gideon taki Gado ben teki en fu frulusu Israel fu den tranga Midiansma, dan a taki: „Mi famiri a no wan prenspari famiri na ini a lo fu Manase. Mi na a moro pikinwan na ini na osofamiri fu mi papa” (Krut. 6:15). A ben feni taki a no ben o man du san Yehovah aksi fu en, ma Yehovah ben sabi taki a ben o man. Yehovah horibaka gi Gideon èn a ben abi bun bakapisi.

5. San kan meki en muilek gi wan owruman fu sori sakafasi?

⁵ Ala ten owruman e du muiti fu sori sakafasi (Mika 6:8; Tori 20:18, 19). Den no e meki bigi èn den no e krutu densrefi tumusi hebi te den meki fowtu. Toku a kan muilek son leisi gi owruman fu sori sakafasi. Kande a e teki tumusi furu frantwortu na en tapu, aladi a no man tyari ala den frantwortu dati. Noso kande sma e krutu en fu a fasi fa a du wan sani noso sma e prèise en fu a fasi fa a du wan tra sani. San owruman kan leri fu Gideon te den de na ini den sortu situwâsi disi?

6. Fa na eksempre fu Gideon kan leri owruman fu no denki tumusi furu fu densrefi? (Luku a prenki.)

⁶ Aksi yepi. Wan sma di abi sakafasi, sabi san a man èn san a no man. Gideon ben sori taki a no ben e denki tumusi furu  fu ensrefi. A ben de klariklari fu aksi trawan fu yepi en (Krut. 6:27, 35; 7:24). Koni owruman e du dati tu. Tony, di wi ben kari kaba, e taki: „Mi ben gwenti teki moro wroko na mi tapu leki san mi ben man du, fu di na so mi kweki. Mi ben musu leri fu no denki tumusi furu fu mi srefi. Dati meki mi bosroiti fu studeri a tori dati na a Osofamiri Anbegi èn mi aksi mi wefi san a ben e denki fu mi. Boiti dati, mi luku a felem Gi trawan leri, frutrow den èn gi den frantwortu neleki fa Yesus du dati, tapu jw.org.” Tony bigin aksi tra sma fu yepi en nanga den wroko di a ben musu du. Fa sani waka? Tony e taki: „A wroko na ini a gemeente e du bun, èn mi abi moro ten fu tranga a matifasi di mi abi nanga Yehovah.”

7. Fa owruman kan teki na eksempre fu Gideon te sma e krutu den? (Yakobus 3:13)

⁷ No atibron efu sma e krutu yu. Wan tra sani di kan meki en muilek gi owruman fu sori sakafasi, na te sma e krutu den. Na eksempre fu Gideon kan yepi den tu na ini a situwâsi dati. Fu di Gideon ben sabi taki a ben abi swakifasi tu, meki a hori ensrefi di den Efrayimsma ben e krutu en (Krut. 8:1-3). Gideon no piki den nanga ati bron. Fu di a ben abi sakafasi, meki a arki san den ben abi fu taki èn a taki switi nanga den. A sani disi meki taki den no atibron moro. Neleki Gideon, owruman e arki bun èn den no e atibron te sma e krutu den. (Leisi Yakobus 3:13.) Na so den e yepi fu meki freide tan na ini a gemeente.

8. San owruman kan taki te sma e prèise den? Gi wan eksempre.

⁸ Gi Yehovah ala grani. Di sma ben e prèise Gideon fu di a ben wini Midian, dan a gi Yehovah ala grani (Krut. 8:22, 23). Fa owruman kan teki na eksempre fu Gideon? Den kan gi Yehovah grani fu den sani di den ben man du (1 Kor. 4:6, 7). Efu sma e prèise wan owruman fu di a e gi bun leri, dan a kan taigi den taki den leri dati e komoto fu Gado Wortu èn taki wi alamala e kisi leri fu Yehovah en organisâsi. Son leisi a bun te owruman e luku efu den e gi leri na wan fasi di e gi grani na Yehovah, noso efu na prèise den wani taki sma prèise den. Luku san ben pasa nanga wan owruman di nen Timothy. Di Timothy bigin dini leki owruman, a ben lobi hori lezing. A e taki: „Mi ben e kon nanga ala sortu kefalek inleiding nanga agersitori. Sma ben lobi prèise mi gi a sani dati. Ma disi ben e meki taki sma ben e poti prakseri na mi na presi fu poti prakseri na Bijbel noso na Yehovah.” Te fu kaba Timothy kon si taki a ben musu kenki a fasi fa a ben e gi leri so taki sma no ben e poti tumusi furu prakseri na en (Odo 27:21). San ben de a bakapisi? A e taki: „Difrenti brada nanga sisa e taki fa a lezing fu mi yepi den nanga wan problema, fa a yepi den fu pasa wan tesi, noso fu tron moro bun mati fu Yehovah. Te sma e taigi mi den sani dati, dan mi e firi moro prisiri leki fosi.”

9. San ben meki en muilek gi Gideon fu gi yesi èn fu sori deki-ati? (Luku a prenki na tapu a kafti.)

⁹ Baka di Gideon tron krutuman, a kisi tesi di ben meki en muilek gi en fu gi yesi na Yehovah èn fu sori deki-ati. Gado gi en wan wroko di ben kan meki a lasi en libi. A ben musu broko na altari di en papa ben meki fu anbegi Bâal (Krut. 6:25, 26).  Gideon tyari wan legre kon na wán, ma Yehovah taigi en tu leisi taki a ben musu puru wan tu srudati fu di a legre ben bigi tumusi (Krut. 7:2-7). Te fu kaba Gado taigi en fu go feti nanga a feanti na mindri neti.​—Krut. 7:9-11.

10. San kan meki en muilek gi wan owruman fu gi yesi?

¹⁰ Owruman musu „de klariklari fu gi yesi” (Yak. 3:17). Wan owruman di e gi yesi de klariklari fu du san Bijbel e taki èn fu gi yesi na a organisâsi. Na so a de wan bun eksempre gi trawan. Toku a kan muilek gi en son leisi fu gi yesi. Te a e yere ibri tron baka taki sani musu du tra fasi, dan a kan muilek gi en fu gi yesi. Kande a e aksi ensrefi son leisi efu a de wan koni sani fu du sani na a fasi dati. Noso kande a e kisi wan toewijzing di kan meki taki skowtu grabu en. Fa owruman kan gi yesi neleki Gideon na ini den sortu situwâsi dati?

11. San kan yepi owruman fu gi yesi?

¹¹ Arki bun èn du sani soifri soleki fa Gado wani. Gado ben taigi Gideon fa a ben musu pori na altari fu en papa, pe a ben musu bow wan nyun altari gi Yehovah, èn sortu meti a ben musu tyari leki ofrandi. Gideon no ben aksi ensrefi efu den sani dati ben de fanowdu, ma a du soifri san Yehovah ben taigi en fu du. Na ini a ten disi, Yehovah en organisâsi e taigi owruman tu san den musu du. Nofo tron den e seni brifi gi den, den e meki sani bekènti, noso den e taigi den brada san den musu du so taki ogri no miti wi èn so taki wi kan tan abi wan tranga bribi. Wi lobi den owruman fu wi fu di den e gi yesi na Gado nanga den heri ati. A heri gemeente e kisi wini fu dati.​—Ps. 119:112.

12. Fa owruman kan fiti a rai na Hebrewsma 13:17 te na organisâsi e taigi den fu du sani tra fasi?

¹² De klariklari fu fiti yusrefi. Memre taki Gideon ben seni bijna ala den srudati fu en gwe di Yehovah aksi en fu du dati (Krut. 7:8). Kande a ben e denki: ’A de fanowdu trutru fu du dati? A sani disi o wroko?’ Toku Gideon gi yesi. Neleki Gideon, owruman na ini a ten disi e gi yesi te na organisâsi e taigi den fu du sani tra fasi. (Leisi Hebrewsma 13:17.) Luku na eksempre disi: Na ini 2014, a Tiri Skin kenki a fasi fa gemeente e pai fu bow Kownukondre zaal nanga kongreshal (2 Kor. 8:12-14). Gemeente no abi fu leni moni moro na a organisâsi fu bow Kownukondre zaal. Na presi fu dati, na organisâsi e gebroiki bijdrage fu ala gemeente na heri grontapu fu bow zaal nanga kongreshal na iniwan presi pe dati de fanowdu, awinsi den gemeente na ini a kondre dati no abi furu moni. Di José kon sabi fu a kenki disi, dan a ben  e tweifri efu a sani disi ben o wroko. A ben e denki: ’Srefi wán Kownukondre zaal den no o man bow. A no so sma e du sani na ini a kondre dyaso.’ San yepi José fu horibaka gi a seti disi? A e taki: „Den wortu fu Odo 3:5, 6 memre mi fu frutrow tapu Yehovah. Èn dati yepi mi trutru. Now wi e bow moro Kownukondre zaal èn a fasi fa na organisâsi e gebroiki den bijdrage fu wi now e yepi den gemeente di no abi so furu.”

13. (a) San Gideon ben sabi seiker? (b) Fa owruman kan teki na eksempre fu en? (Luku a prenki.)

¹³ Sori deki-ati èn du san Yehovah wani. Gideon gi yesi na Yehovah srefi di a ben e frede èn ogri ben kan miti en (Krut. 9:17). Baka di Yehovah pramisi en taki a ben o horibaka gi en, Gideon ben de seiker taki Gado ben o yepi en fu kibri a pipel fu en. Owruman di e libi na ini kontren pe lanti tapu a wroko, e teki na eksempre fu Gideon. Nanga deki-ati den e teki fesi na den konmakandra èn na ini a preikiwroko, awinsi skowtu grabu den noso poti wan lo aksi gi den, awinsi den lasi den wroko, noso awinsi sma wani du ogri nanga den. c Na a ten fu a bigi banawtu, owruman o abi deki-ati fanowdu fu gi yesi na san na organisâsi e taigi den fu du, srefi efu den sani dati kan meki ogri miti den. Kande na organisâsi o taigi den fa wi musu preiki a seryusu krutuboskopu èn fa wi musu sorgu taki wi no lasi wi libi te Gok fu Magok o kon feti nanga wi.​—Esek. 38:18; Openb. 16:21.

14. San ben meki en muilek gi Gideon fu horidoro?

¹⁴ Leki krutuman, Gideon ben musu wroko tranga. Di den ben e feti na neti, dan den Midiansma lowe gwe èn Gideon lon go na den baka fu a lagipresi fu Yisreyel te na Yordan-liba pe furu bon ben de (Krut. 7:22). A de so taki Gideon stop na Yordan-liba? Nôno! Aladi a ben weri,  toku en nanga den 300 man fu en abra a liba èn den tan lon baka den Midiansma. Te fu kaba den kisi den èn den kiri den.​—Krut. 8:4-12.

15. O ten a kan muilek gi wan owruman fu horidoro?

¹⁵ Son leisi wan owruman kan weri srefisrefi fu di a musu sorgu gi a gemeente èn gi en osofamiri. Fa den owruman kan teki na eksempre fu Gideon na ini den situwâsi disi?

16-17. San yepi Gideon fu horidoro èn fu sortu sani den owruman kan de seiker? (Yesaya 40:28-31) (Luku a prenki.)

¹⁶ Abi a frutrow taki Yehovah o gi yu krakti. Gideon ben abi a frutrow taki Yehovah ben o gi en krakti èn na dati pasa tu (Krut. 6:14, 34). Wan leisi, Gideon nanga den man fu en ben e lon baka tu kownu fu Midian di ben e rèi kameili kande (Krut. 8:12, 21). Ma Gado yepi den Israelsma fu kisi den èn fu kiri den. Na so owruman kan frutrow tu tapu Yehovah, a sma di ’noiti e weri èn noiti e lasi krakti’. A o gi den krakti te den abi dati fanowdu.​—Leisi Yesaya 40:28-31.

¹⁷ Luku na ondrofenitori fu Matthew, wan memre fu na Ati-oso Kontakti Komte. San e yepi en fu horidoro? Matthew e taki: „Mi ondrofeni taki a sani di skrifi na Filipisma 4:13 na wan tru tori. Furu leisi te mi ben weri srefisrefi, dan mi begi Gado fayafaya fu gi mi krakti nanga koni fu yepi den brada nanga sisa fu mi. Na den momenti dati, mi firi fa a yeye fu Yehovah gi mi krakti èn fa a yepi mi fu horidoro.” Neleki Gideon, den owruman fu wi e wroko bun tranga fu sorgu a pipel fu Yehovah, aladi dati no makelek ala ten. A no de fu taki dati den musu hori na prakseri taki a no ala ten den man du ala den sani di den ben o wani du. Ma den kan abi a frutrow taki Yehovah o yere den begi fu den èn a o gi den a krakti fu horidoro.​—Ps. 116:1; Fil. 2:13.

18. Fa owruman kan teki na eksempre fu Gideon?

¹⁸ Owruman kan leri furu fu na eksempre fu Gideon. Owruman musu hori na prakseri taki den no musu teki tumusi furu wroko na den tapu èn den musu sori sakafasi te trawan e krutu noso prèise den. Den musu gi yesi na a organisâsi èn den musu sori deki-ati, spesrutu fu di a kaba fu a sistema disi e kon krosibei. Boiti dati, den musu abi a frutrow taki awinsi sortu problema miti den, Gado o gi den krakti. A no de fu taki dati wi e warderi den owruman di e wroko tranga èn wi e „tan lespeki den sortu brada dati”.​—Fil. 2:29.