1. San e yepi a pipel fu Yehovah fu tan anbegi en awinsi den e kisi fu du nanga problema?

 BIJBEL e taki dati wi e libi na ini muilek ten di tranga fu psa (2 Tim. 3:1). A pipel fu Yehovah e ondrofeni den srefi problema di e miti tra sma na ini a ogri grontapu disi fu Satan. Boiti dati, sma e ferfolgu wi èn den e gens wi fu di wi e dini Yehovah. Fa a du kon taki wi man tan anbegi Yehovah aladi wi e kisi den sortu problema disi? Wan reide, na fu di wi kon sabi Yehovah leki „a libilibi Gado”.​—Yer. 10:10; 2 Tim. 1:12.

 2. Fa wi musu si Yehovah èn fu san ede?

² Yehovah e si ala den tesi di e miti wi èn ala ten a wani yepi wi (2 Kron. 16:9; Ps. 23:4). Te wi e si Yehovah leki a libilibi Gado, dan dati kan yepi wi fu hordoro, awinsi sortu tesi e miti wi. Na so Kownu David ben e si Yehovah.

 3. Di David taki: „Yehovah na wan libilibi Gado”, dan san a ben wani taki nanga dati?

³ David ben sabi Yehovah èn a ben e fertrow na en tapu. Di den feanti fu en nanga Kownu Saul ben e suku fu kiri en, dan David begi Yehovah fu yepi en (Ps. 18:6). Di Gado piki a begi fu David èn di a ferlusu en, dan David taki: „Yehovah na wan libilibi Gado!” (Ps. 18:46) San David ben wani taki nanga den wortu disi? Soleki fa wan buku e taki, dan David ben e sori krin taki Yehovah na a tru Gado di ala ten o yepi den futuboi fu en. David ben sabi taki a Gado fu en ben sabi san ben e miti en èn taki a ben de klarklari fu yepi en. A sani dati gi David dek’ati fu tan dini Yehovah go doro èn fu prèise en.​—Ps. 18:28, 29, 49.

 4. Sortu wini wi e kisi te wi e si Yehovah leki a libilibi Gado?

 ⁴ Te wi e bribi taki Yehovah na a libilibi Gado, dan dati kan yepi wi fu tan dini en fayafaya. Wi o man hordoro te tesi miti wi èn wi o tan dini en fayafaya. Boiti dati, wi o du ala san wi man fu tan krosbei fu Yehovah.

A LIBILIBI GADO O TRANGA YU

 5. San kan gi wi dek’ati te wi e kisi fu du nanga tesi? (Filipisma 4:13)

⁵ Wi o man psa iniwan tesi, bigiwan noso pkinwan, te wi e tan hori na prakseri taki Yehovah na wan libilibi Gado èn taki ala ten a man yepi wi. Yehovah kan yepi wi fu psa iniwan tesi, fu di nowan problema bigi tumsi gi en. En na a Almakti Gado èn a kan gi wi a krakti di wi abi fanowdu fu hordoro. (Leisi Filipisma 4:13.) A sani disi e yepi wi fu no frede te tesi e miti wi. Te wi e si taki Yehovah e yepi wi fu hordoro te wi e kisi pkin tesi, dan wi kan de seiker taki a o yepi wi tu te wi e kisi moro bigi tesi.

 6. San David ondrofeni di a ben yongu èn fa den sani dati yepi en fu fertrow moro tapu Yehovah?

⁶ Meki wi poti prakseri now na tu sani di David ben ondrofeni èn di ben yepi en fu fertrow moro tapu Yehovah. Di David ben e luku den skapu fu en p’pa di a ben moro yongu, dan wan leisi wan beer tyari wan fu den skapu gwe èn wan tra leisi wan lew du a srefi sani dati. Na ala tu okasi David sori dek’ati. A lon baka den ogri meti disi èn a puru a skapu na den mofo. Ma David no ben denki taki a ben kiri den meti disi nanga en eigi krakti. A ben sabi taki na Yehovah ben gi en a krakti fu du dati (1 Sam. 17:34-37). David noiti no fergiti den sani disi di a ben ondrofeni. Fu di a ben e denki dipi fu den sani disi, meki a kon abi a fertrow taki a libilibi Gado ben o yepi en tu na ini a ten di e kon.

 7. Suma David ben e prakseri, èn fa a sani dati yepi en fu feti nanga Goliat?

⁷ Bakaten, kande di David ben de wan yonguman ete, dan a go na a legrekampu fu Israel. Drape a si taki den srudati ben e frede srefsrefi fu di a bigiskin Filisteaman Goliat ben wani si ’suma fu a legre fu Israel ben o prefuru fu kon feti nanga en’ (1 Sam. 17:10, 11). Den srudati fu Israel ben e frede fu di den ben e poti prakseri na a bigi skin fu Goliat èn na den sani di a ben e taigi den (1 Sam. 17:24, 25). Ma David ben e poti prakseri na wan tra sani. David ben sabi taki Goliat no ben e spotu a legre fu Israel, ma a ben e spotu „a legre fu a libilibi Gado” (1 Sam. 17:26). David ben e prakseri Yehovah. A ben abi a fertrow taki a Gado di ben yepi en di a ben de wan skapuman, ben o yepi en baka na ini a situwâsi disi. Fu di David ben de seiker taki Yehovah ben o horbaka gi en, meki a go feti nanga Goliat, èn a wini en.​—1 Sam. 17:45-51.

 8. San o yepi wi fu tan fertrow tapu Yehovah te tesi e miti wi? (Luku a prenki.)

⁸ Wi srefi kan psa iniwan tesi te wi e hori na prakseri taki a libilibi Gado de klarklari fu yepi wi (Ps. 118:6). Wi kan kon abi moro fertrow taki Yehovah o yepi wi te wi e prakseri san a du na ini a ten di psa. Wan fu den sani di yu kan du, na fu leisi Bijbel tori di e memre yu fa Yehovah ferlusu den anbegiman fu en (Yes. 37:17, 33-37). Boiti dati, yu kan leisi noso luku nyunsu tapu jw.org, a website fu wi, fu kon sabi fa Yehovah e horbaka gi den brada nanga sisa fu wi na ini a  ten disi. Wan tra sani di yu kan du, na fu prakseri ala den leisi di Yehovah yepi yu. No broko yu ede efu yu no man memre wan spesrutu okasi di Yehovah du wan kfalek bigi sani gi yu, soleki fu gi yu a krakti fu feti nanga wan beer, noso wan lew. Ma san prenspari, na taki Yehovah du bun furu sani gi yu. A hari yu kon na en èn now yu de wan mati fu en (Yoh. 6:44). Fu taki en leti, na fu di a yepi yu, meki yu e dini en ete. Sobun, aksi en fu yepi yu fu memre den okasi di a piki den begi fu yu, di a gi yu soifri san yu ben abi fanowdu na a yoisti ten, noso di a yepi yu fu psa wan muilek situwâsi. Te wi e prakseri den sani dati, dan wi o abi moro fertrow taki Yehovah o tan yepi wi.

 9. San wi musu hori na prakseri te tesi e miti wi? (Odo 27:11)

⁹ Te tesi e miti wi, dan wi musu tan hori na prakseri san na a moro prenspari sani. Didibri taki dati wi o gwe libi Yehovah te tesi e miti wi. Sobun, a fasi fa wi e tyari wisrefi te wi e kisi tesi kan meki Yehovah firi sari, noso a kan meki Yehovah prisiri. (Yob 1:10, 11; leisi Odo 27:11.) Te wi e tai hori na Yehovah awinsi wi e kisi tesi, dan wi e sori taki wi lobi en èn wi e sori tu taki Satan na wan leiman. Kande a regering na ini a kondre pe yu e tan e ferfolgu Gado en pipel, kande yu abi moni problema, kande den sma di yu e preiki gi no wani arki a bun nyunsu, noso kande wan tra tesi e miti yu. Efu dati de so, dan hori na prakseri taki a situwâsi fu yu e gi yu na okasi fu meki Yehovah en ati prisiri. No fergiti tu taki Yehovah no o meki yu kisi tesi di hebi moro leki san yu man tyari (1 Kor. 10:13). A o gi yu a krakti di yu abi fanowdu fu hordoro.

A LIBILIBI GADO O BLESI YU

10. San a libilibi Gado o du gi den wan di e anbegi en?

¹⁰ Yehovah ala ten e blesi den wan di e anbegi en (Hebr. 11:6). A e yepi wi fu abi  wan korostu firi èn fu de koloku nownow kba, èn a o gi wi têgo libi na ini a ten di e kon. Wi abi a fertrow taki Yehovah wani blesi wi èn taki a man du dati. Dati meki wi wani tan dini en fayafaya, neleki fa den getrow futuboi fu en ben e du na ini owruten. Wan fu den getrow futuboi dati ben de Timoteyus.​—Hebr. 6:10-12.

11. Fu san ede Timoteyus ben e wroko tranga na ini a gemeente? (1 Timoteyus 4:10)

¹¹ Leisi 1 Timoteyus 4:10. Timoteyus ben abi a fertrow taki Gado ben o blesi en. Dati meki a ben e wroko tranga gi Yehovah èn a ben e du ala san a man fu yepi trawan. Fa a du dati? Na apostel Paulus ben gi en dek’ati fu tron wan moro bun leriman na ini a preikiwroko èn na ini a gemeente. Boiti dati, Paulus ben taigi en tu fu de wan bun eksempre gi den brada nanga sisa na ini a gemeente, yonguwan nanga owruwan. Son leisi a ben e kisi toewijzing tu di no ben makelek. A ben musu gi sma rai te dati ben fanowdu, ma a ben musu du dati na wan lob’ati fasi (1 Tim. 4:11-16; 2 Tim. 4:1-5). A no ala ten sma ben si a wroko di Timoteyus ben e du èn son leisi den no ben e warderi san a ben du. Ma Timoteyus ben de seiker taki Yehovah ben o blesi en.​—Rom. 2:6, 7.

12. Fu san ede owruman e tan wroko tranga na ini a gemeente? (Luku a prenki.)

¹² Na ini ten disi, owruman kan de seiker tu taki Yehovah e si a tranga wroko di den e du èn taki a e warderi dati. Boiti taki den owruman e gi leri, e preiki, èn e go luku den brada nanga sisa fu gi den dek’ati, furu fu den e yepi nanga a bow-wroko fu na organisâsi èn den e yepi sma tu te wan rampu psa. Tra owruman de na ini a Fisiti Grupu gi Sikisma noso na ini na Ati-oso Kontakti Komte. Den owruman sabi taki a no libisma abi a gemeente, ma taki a gemeente na fu Yehovah. Dati meki den e du a wroko fu den nanga den heri  ati èn den de seiker taki Gado o blesi den gi a wroko di den e du.​—Kol. 3:23, 24.

13. Fa Yehovah e si den sani di wi e du gi en?

¹³ A no ala sma kan de owruman. Ma wi alamala kan gi Yehovah wan sani. A Gado fu wi breiti srefsrefi te wi e du ala san wi man fu dini en. A e si den bijdrage di wi e gi fu horbaka gi a wroko di e du na heri grontapu, srefi te wi no man gi so furu. A e warderi en te wi e opo wi anu fu gi wan piki na den konmakandra, awinsi wi e syensyen. Boiti dati, a e prisiri te wi e gi den sma pardon di ben du wan hati sani nanga wi. Awinsi yu feni taki yu no man du furu gi Yehovah leki san yu o ben wani, tòg yu kan de seiker taki Yehovah e warderi san yu man du gi en. A lobi yu fu di yu e meki muiti èn a o blesi yu.​—Luk. 21:1-4.

TAN KROSBEI FU A LIBILIBI GADO

14. Te wi e tan krosbei fu Yehovah, dan fa dati e yepi wi fu tan gi yesi na en? (Luku a prenki.)

¹⁴ Efu wi abi wan bun matifasi nanga Yehovah, dan a o moro makelek gi wi fu tan gi yesi na en. Na so a ben de nanga Yosef. A ben weigri fu du hurudu, fu di a ben sabi taki a sani dati ben o hati Yehovah èn a no ben wani taki dati psa (Gen. 39:9). Efu wi wani de bun mati fu Yehovah, dan wi musu meki ten fu begi èn fu studeri a Wortu fu en. Te wi e du dati, dan wi o tron moro bun mati fu en. Te wi abi wan bun matifasi nanga Yehovah, dan neleki Yosef, wi no o wani du nowan sani di a no feni bun.​—Yak. 4:8.

15. Te wi e luku san psa nanga den Israelsma di den ben de na ini a sabana, dan san wi e leri? (Hebrewsma 3:12)

¹⁵ Te sma no e fertrow moro tapu Yehovah, dan a kan psa makelek taki den e bigin du sani di a no feni bun. Luku san ben psa nanga den Israelsma di den ben de na ini a sabana. Den ben sabi taki Yehovah ben de trutru, ma tòg den ben e aksi densrefi efu a ben o sorgu gi den. Den ben aksi srefi: „Yehovah de na wi mindri trutru?” (Eks. 17:2, 7) A sani disi  meki taki den bigin opo densrefi teige Gado. A no de fu taki dati wi no wani teki a takru eksempre fu den sma dati.​—Leisi Hebrewsma 3:12.

16. San kan meki en muilek gi wi fu tan abi wan tranga bribi?

¹⁶ A grontapu disi e meki en muilek gi wi fu tan krosbei fu Yehovah. Furu sma no wani bribi taki Gado de trutru. Nofo tron a gersi leki den sma di no e gi yesi na Gado abi wan bun libi. Te wi e si dati, dan dati kan meki en muilek gi wi fu tan abi wan tranga bribi. Aladi wi sabi taki Gado de trutru, tòg wi ben kan bigin aksi wisrefi efu a o yepi wi te wi abi en fanowdu. A skrifiman fu Psalm 73 ben e aksi ensrefi a sani dati tu. A ben si taki den sma di no ben e gi yesi na den wet fu Gado ben abi wan bun libi. Dati meki a bigin aksi ensrefi efu na fu soso a ben e dini Gado.​—Ps. 73:11-13.

17. San o yepi wi fu tan krosbei fu Yehovah?

¹⁷ San yepi a psalm skrifiman fu kenki a fasi fa a ben e denki? A prakseri san ben o psa nanga den sma di no ben e fertrow moro tapu Yehovah (Ps. 73:18, 19, 27). A prakseri tu sortu wini a abi fu dini Gado (Ps. 73:24). Wi srefi kan prakseri ala den fasi fa Yehovah blesi wi. Prakseri fa wi libi ben o de efu wi no ben e dini en. Te wi e prakseri fu san ede a bun gi wi fu dini Yehovah, dan dati o yepi wi fu tan gi yesi na Gado. Èn neleki a psalm skrifiman, wi o taki: „A bun gi mi fu kon krosbei na Gado.”​—Ps. 73:28.

18. Fu san ede wi no abi fu frede gi san o psa na ini ten di e kon?

¹⁸ Wi kan psa iniwan tesi di e miti wi na ini den lasti dei disi, fu di wi e „dini wan tru èn libilibi Gado leki srafu” (1 Tes. 1:9). A Gado fu wi e sorgu gi wi èn a o yepi wi ala ten. A sori taki a ben de nanga den futuboi fu en na ini a ten di psa èn a de nanga wi tu na ini a ten disi. Heri esi wan bigi banawtu o de na grontapu. Ma wi no o de wi w’wan fu di Yehovah o de nanga wi (Yes. 41:10). Meki wi alamala abi dek’ati èn meki wi taki: „Yehovah na mi yepiman. Mi no o frede.”​—Hebr. 13:5, 6.