1-2. Sortu kari Yehovah e gi den getrow anbegiman fu en?

 EFU wan sma ben o aksi yu: „Fa yu e si Yehovah?” dan san yu ben o piki? Kande yu ben o piki: „Yehovah na mi P’pa, mi Gado, èn mi Mati.” Kande tra fasi de tu fa yu ben o kari Yehovah. Ma yu e si Yehovah tu leki a Sma di gi yu wan kari fu kon na ini a tenti fu en?

² Kownu David ben agersi Yehovah nanga wan sma di e gi trawan a kari fu kon na ini a tenti fu en èn a e agersi den getrow anbegiman fu en nanga sma di kisi a kari disi. David ben aksi: „Yehovah, suma kan kon tan nanga yu na ini yu tenti? Suma kan kon tan na tapu yu santa bergi?” (Ps. 15:1). Den wortu disi di skrifi nanga yepi fu santa yeye e sori taki Yehovah kan gi wi a kari fu kon na ini a tenti fu en, èn dati wani taki dati wi kan tron wan mati fu en. Disi na wan bigi grani, a no so?

YEHOVAH WANI TAKI WI KON NA INI A TENTI FU EN

 3. Suma ben de a fosi sma di kisi a kari fu kon na ini a tenti fu Yehovah, èn fa Yehovah nanga a sma dati ben feni en fu de nanga makandra?

³ Fosi Yehovah ben meki ala sani, a ben de en w’wan. Ma baka wan pisi ten a gi en fosi Manpkin a kari fu kon na ini a tenti fu en. Yehovah ben breiti srefsrefi fu du dati. Bijbel e taki dati Yehovah en Manpkin „ben e gi en bigi prisiri”. Èn en Manpkin ben taki dati a ’ben breiti ala ten fu di a ben den nanga Yehovah’.​—Odo 8:30.

 4. Suma moro ben kisi a kari fu kon na ini a tenti fu Yehovah?

⁴ Bakaten, Yehovah meki engel èn a gi den wan kari tu  fu kon na ini a tenti fu en. Bijbel e kari den engel „manpikin fu Gado” èn Bijbel e sori tu taki den breiti srefsrefi fu de makandra nanga Yehovah (Yob 38:7; Dan. 7:10). Fu wan heri pisi ten, na soso den engel ben e libi makandra nanga Yehovah na hemel. Ma bakaten, Yehovah meki libisma èn a gi den a kari tu fu kon na ini a tenti fu en. Wan tu fu den sma disi ben de Heinok, Noa, Abraham, nanga Yob. Bijbel e kari den tru anbegiman disi mati fu Gado noso den wan di „ben e waka nanga a tru Gado.”​—Gen. 5:24; 6:9; Yob 29:4; Yes. 41:8.

 5. San wi kan leri fu a profeititori di de fu feni na ini Esekièl 37:26, 27?

⁵ Na ini den hondrohondro yari di psa, Yehovah tan gi moro mati fu en a kari fu kon na ini a tenti fu en. (Leisi Esekièl 37:26, 27.) Fu eksempre, a profeititori fu Esekièl e leri wi taki Yehovah e angri fu abi wan bun matifasi nanga den getrow anbegiman fu en. A e pramisi taki a „o meki wan frubontu fu freide nanga den”. A profeititori dati e taki fu wan ten te den wan di abi a howpu fu libi na hemel èn den wan di abi a howpu fu libi na grontapu, o de makandra na ini a tenti fu Yehovah leki „wán ipi” (Yoh. 10:16). Na dati e psa now.

GADO E SORGU GI WI AWINSI PE WI DE

 6. Fa wan sma kan kisi a kari fu kon na ini a tenti fu Yehovah, èn pe a tenti fu en de?

⁶ Na ini Bijbel ten, wan sma ben kan rostu na ini wan tenti èn a ben kan kibri drape gi son nanga alen. Wan sma di ben kisi a kari fu kon na ini a tenti fu wan trawan, ben e ferwakti taki a sma dati ben o sorgu bun gi en. Te wi gi wisrefi abra na Yehovah, dan na agersi fasi wi e kon na ini a tenti fu en (Ps. 61:4). Wi e kisi ala san wi abi fanowdu fu man tan bun mati fu Yehovah èn fu den tra sma di de mati fu en tu. Sma fu ala kondre kan kon na ini a tenti fu Yehovah. Kande yu ben man go na wan tra kondre gi wan spesrutu kongres pe yu miti tra sma di breiti tu fu de na ini a tenti fu Yehovah. A tenti fu Yehovah de na iniwan presi pe den getrow futuboi fu en de.​—Openb. 21:3.

 7. Fu san ede wi kan taki dati den getrow futuboi fu Yehovah di dede kba de ete na ini a tenti fu en? (Luku a prenki.)

⁷ Fa a de nanga den getrow futuboi fu Yehovah di dede kba? De den de ete na ini a tenti fu en? Iya! Fu san ede wi kan  taki dati? Fu di Yehovah no fergiti den sma disi. Yesus ben taki: „Na ini a tori fu Moses nanga a makabusi, Moses srefi ben sori taki dede sma o kisi wan opobaka. Drape a e kari Yehovah ’a Gado fu Abraham, a Gado fu Isak, èn a Gado fu Yakob.’ A no de wan Gado fu den dede sma, ma wan Gado fu den wan di de na libi, bika gi en den alamala e libi.”​—Luk. 20:37, 38.

DEN WINI DI WI E KISI ÈN DEN SANI DI WI MUSU DU

 8. Sortu wini wi e kisi fu di wi de na ini a tenti fu Yehovah?

⁸ Neleki fa wan sma kan rostu èn kan feni kibri na ini wan trutru tenti, na so a tenti fu Yehovah e kibri wi gi iniwan sani di kan pori a matifasi di wi abi nanga en. Boiti dati, a tenti fu en e gi wi wan trutru howpu gi a ten di e kon. Te wi e tan krosbei fu Yehovah, dan Satan no o man du ogri nanga wi fu ala ten (Ps. 31:23; 1 Yoh. 3:8). Na ini a nyun grontapu, Yehovah o sorgu taki a bribi fu den getrow mati fu en tan tranga, èn a o kibri den tu gi dede.​—Openb. 21:4.

 9. San Yehovah e ferwakti fu den wan di de na ini a tenti fu en?

⁹ A de wan bigi grani taki wi mag de na ini a tenti fu Yehovah èn taki wi kan tan abi wan bun matifasi nanga en. San wi musu du efu wi wani tan na ini a tenti fu Yehovah? Efu wan sma gi yu wani kari fu kon na ini en oso, dan a no de fu taki dati yu ben o wani sabi san a sma e ferwakti fu yu. Kande a sma e ferwakti taki yu e puru yu susu fosi yu kon na insei, èn seiker yu ben o du dati. Na so a de tu taki wi ben o wani sabi san Yehovah e ferwakti fu den wan di wani tan na ini a tenti fu en. Fu di wi lobi Yehovah, meki wi wani du ala san wi man fu „tan prisiri en dorodoro” (Kol. 1:10). A tru taki Yehovah na wi Mati, ma a de sosrefi wi Gado nanga wi P’pa di warti taki wi sori lespeki gi en (Ps. 25:14). Wi no musu fergiti dati noiti èn ala ten wi musu abi dipi lespeki gi en. Te wi abi lespeki gi en, dan disi o yepi wi fu no du sani di ben o hati en èn a o yepi wi tu fu ’abi sakafasi aladi wi e waka’ nanga a Gado fu wi.​—Mika 6:8.

YEHOVAH SORI LOBI GI ALA DEN ISRAELSMA

10-11. San e sori taki Yehovah no ben lobi a wan Israelsma moro a trawan di den ben de na ini Sinai-sabana?

¹⁰ Yehovah lobi ala den mati fu en di a gi wan kari fu kon na ini a tenti fu en (Rom. 2:11). Wi kan si dati te wi e luku fa a ben libi nanga den Israelsma di den ben de na ini Sinai-sabana.

¹¹ Baka di Yehovah ben puru a pipel fu en na ini katibo na Egepte, dan a poti priester fu dini na ini a tabernakel. Den Leifisma ben kisi a frantwortu fu du tra wroko na ini a tabernakel. A de so taki Yehovah ben sori moro lobi gi den Israelsma di ben e dini na ini a tabernakel, noso gi den wan di ben seti kampu krosbei fu a santa presi disi? Nôno! Yehovah no lobi a wan sma moro a trawan.

12. Sortu sani di Yehovah ben seti e yepi wi fu si taki a no ben lobi a wan Israelsma moro a trawan? (Eksodes 40:38) (Luku a prenki.)

¹² Ibri Israelsma ben kan de wan bun mati fu Yehovah, awinsi a no ben e dini na ini a tabernakel noso awinsi a tenti fu en no ben de krosbei fu a tabernakel. Fu eksempre, Yehovah ben sorgu taki a heri pipel fu en ben man si a wolku nanga a  faya di ben de na tapsei fu a tabernakel. (Leisi Eksodes 40:38.) Te a wolku ben bigin opo go na wan tra presi, dan srefi den wan di ben seti a tenti fu den bun fara fu a tabernakel, ben man si dati. Den ben man tyari den sani fu den kon na wan, den ben man broko den tenti fu den puru, èn den ben man gwe makandra nanga a heri pipel (Num. 9:15-23). Ala sma ben man yere a b’bari fu den tu solfru trompeti di ben e meki a pipel kon sabi taki den ben musu bigin hari gwe (Num. 10:2). A de krin taki te wan sma ben e libi krosbei fu a tabernakel, dan dati no ben wani taki dati a ben abi wan moro bun matifasi nanga Yehovah. Na presi fu dati, ibri Israelsma ben kan de na ini na agersi tenti fu Yehovah èn a ben kan de seiker taki Yehovah ben o tiri en èn kibri en. Na so a de tu na ini a ten disi, taki awinsi pe fu grontapu wi e libi, tòg Yehovah lobi wi, a e sorgu gi wi, èn a e kibri wi.

NA INI A TEN DISI YEHOVAH NO LOBI A WAN SMA MORO TRAWAN

13. Fu san ede wi kan taki dati Yehovah no lobi a wan sma moro a trawan na ini a ten disi?

¹³ Na ini a ten disi, sonwan fu den anbegiman fu Yehovah e libi krosbei fu na edekantoro fu Yehovah Kotoigi noso fu wan bijkantoro. Tra futuboi fu Yehovah e dini srefi na den presi disi. Dati meki den sma disi kan teki prati na furu fu den sani di e psa na den presi disi èn den kan abi demakandra nanga den brada di e teki fesi. Son futuboi fu Yehovah e dini leki kring-owruman noso den e du wan tra sortu spesrutu furuten diniwroko. Efu yu na wan fu den someni futuboi fu Yehovah di no abi den grani disi, dan yu kan de seiker taki wi Gado Yehovah lobi ala den sma di de na ini a tenti fu en. Boiti dati, en srefi e sorgu gi den alamala (1 Petr. 5:7). Yehovah e gi ibriwan fu den futuboi fu en yeye n’nyan, a e tiri den, èn a e kibri den.

14. San na wan tra fasi fa Yehovah e sori taki a no lobi a wan sma moro a trawan?

 ¹⁴ Wan tra fasi fa Yehovah e sori taki a no lobi a wan sma moro a trawan, na taki a e sorgu taki sma na heri grontapu kan leisi Bijbel. Biginbigin, den Santa Buku fu Bijbel ben skrifi na ini dri tongo: Hebrewtongo, Arameisitongo, nanga Grikitongo. A de so taki den sma di man leisi den tongo disi abi wan moro bun matifasi nanga Yehovah leki den sma di no man leisi den? Nôno, dati no de so.​—Mat. 11:25.

15. Sortu tra sani di abi fu du nanga Bijbel e sori de taki Yehovah no lobi a wan sma moro a trawan? (Luku a prenki.)

¹⁵ A no soso te wi kisi heiskoro-leri noso te wi man taki difrenti tongo, dan Yehovah o feni wi bun. Yehovah e gi ala sma na heri grontapu na okasi fu kisi a koni fu en, awinsi den no kisi heiskoro-leri. Gado en Wortu, Bijbel, vertaal na ini dusundusun tongo, sobun, sma na heri grontapu kan kisi wini fu den leri na ini èn den kan kon sabi san den musu du fu kan tron en mati.​—2 Tim. 3:16, 17.

TAN WAN SMA DI YEHOVAH ’FENI BUN’

16. Soleki fa Tori fu den apostel 10:34, 35 e sori, dan fa wi kan tan wan sma di Yehovah feni bun?

¹⁶ A de wan bigi grani taki Yehovah e gi wi a kari fu kon na ini a na agersi tenti fu en. Nowan sma abi moro swit’fasi nanga lobi leki Yehovah. Boiti dati, a no lobi a wan sma moro a trawan. A e gi ibriwan fu wi a kari fu kon na ini a tenti fu en, awinsi pe wi e tan, awinsi fa wi kweki, awinsi sortu skoroleri wi kisi, awinsi fu sortu ras noso lo wi de, awinsi omeni yari wi abi, èn awinsi wi na wan man noso wan uma. Tòg a de so taki na soso den wan di e gi yesi na den wet fu Yehovah mag kon na ini a tenti fu en.​—Leisi Tori fu den apostel 10:34, 35.

17. San wi o luku na ini a tra artikel?

¹⁷ Soleki fa Psalm 15:1 e sori, dan David ben poti den aksi disi: „Yehovah, suma kan kon tan nanga yu na ini yu tenti? Suma kan kon tan na tapu yu santa bergi?” A santa yeye ben meki a psalm skrifiman piki den aksi dati. Na ini na artikel di e kon, wi o luku san na wan tu fu den sani di wi musu du fu man tan sma di Yehovah feni bun.