Wi musu abi bribi efu wi wani taki Yehovah feni wi bun. Ma Bijbel e taki dati „a no ala sma abi bribi” (2 Tes. 3:2). Di na apostel Paulus ben taki disi, dan a ben e taki fu den ’takru-ati sma nanga den ogri sma’ di ben e ferfolgu en. Ma a sani di Paulus ben taki abi fu du tu nanga tra sma. Son sma no wani bribi den krinkrin beweisi di e sori taki wan Gado de di meki ala sani (Rom. 1:20). Kande tra sma e taki dati den e bribi na ini wan sani noso wan sma di makti moro den. Ma dati a no trutru bribi.

Wi musu de seiker taki Yehovah de trutru èn taki „a e pai” den wan di e bribi tranga na ini en (Hebr. 11:6). Bribi na wan fu den fasi di santa yeye e meki sma kisi. Èn efu wi wani kisi santa yeye, dan wi musu begi Yehovah fu gi wi dati (Luk. 11:9, 10, 13). Wan prenspari sani di o yepi wi fu kisi a yeye dati, na te wi e leisi a Wortu fu Gado di skrifi nanga yepi fu santa yeye. Baka dati wi kan denki dipi fu den sani di wi leisi èn wi musu pruberi fu du san wi leri. Dan a yeye fu Yehovah o abi krakti tapu wi libi, èn a o yepi wi fu sori a bribi di Gado feni bun.