Aksi fu leisiman
Fa wi musu ferstan Psalm 12:7?
Soleki fa den tra vers e sori, dan a pisi disi abi fu du nanga sma.
Na Psalm 12:1-4, wi e leisi taki „sma di e du san yu taki no de fu feni moro na mindri libisma”. Èn na Psalm 12:5-7, a e taki:
„’Sma e pina den mofinawan
èn den pôti sma e geme.
Dati meki mi o opo du wan sani’, na so Yehovah taki.
’Mi o ferlusu den fu den sma di e wiswasi den.’
Den sani di Yehovah e taki de soifri.
Den soifri leki solfru di sma bron seibi leisi na ini wan onfu di meki fu klei.
Yehovah, na yu o kibri den mofinawan.
Yu o kibri ibriwan fu den, so taki den ogrisma no pina den noiti moro.”
Vers 5 e taki san Gado o du gi den mofinawan. A o ferlusu den.
Vers 6 e taki tu dati „den sani di Yehovah e taki de soifri”, „den soifri leki solfru di sma bron”. A sani disi e sori fa wi leki Kresten e denki fu a wortu fu Yehovah.—Ps. 18:30; 119:140.
Na ini son Bijbel vertaling, Psalm 12:7 vertaal so: „Yehovah, na yu o kibri den.” Èn fu di „den sani di Yehovah e taki” skrifi na ini a vers na fesi, meki son sma e taki dati Gado e „kibri” den sani di a e taki. Wi sabi taki Gado kibri Bijbel te nanga a dei fu tide, awinsi omeni muiti gensman meki fu pori Bijbel èn fu tapu sma fu leisi en.—Yes. 40:8; 1 Petr. 1:25.
Ma Yehovah e kibri sma tu soleki fa vers 5 e sori. Neleki fa a ben du na ini a ten di psa, na so a o tan yepi èn kibri „den mofinawan” èn den sma „di de na ini banawtu”.—Yob 36:15; Ps. 6:4; 31:1, 2; 54:7; 145:20.
Sobun, na en pipel noso a wortu fu en, Yehovah e kibri soleki fa vers 7 e taki?
Te wi e luku a psalm disi moro fini, dan a de krin taki a pisi disi abi fu du nanga a pipel fu en.
Na a bigin fu Psalm 12, David e taki fa ogrisma e lei gi den getrow futuboi fu Yehovah. Dan na ini vers 3, wi e si taki Yehovah o du wan sani nanga den sma di e taki soso ogri nanga den tongo. A psalm disi e gi wi a dyaranti taki Gado o du wan sani fu yepi en pipel fu di den sani di a e taki de soifri.
Sobun, den sma di Yehovah o kibri, soleki fa vers 7 e taki, na den sma di den ogriwan e pina.
Ma dan fu san ede son sma e ferstan a vers disi tra fasi? Fu di den owru kopi fu den Hebrew Buku fu Bijbel ben gebroiki wan wortu di ben kan abi fu du nanga sma noso a wortu fu Yehovah. Ma na ini a Griki Septuaginta skrifi tu leisi: „A o kibri wi.” Sobun, disi e sori go baka na den getrow futuboi fu Gado di den ogriwan e pina. Vers 7 e taki dati a o kibri „ibriwan fu den” getrow futuboi disi „so taki den ogrisma no pina den noiti moro” (Ps. 12:7, 8). Na Arameisitongo vertaling fu den Hebrew buku fu Bijbel e taki na a bigin fu vers 7: „Na yu, MASRA, o kibri den ret’atisma, iya, yu o kibri den fu den ogrisma fu ala ten.” A sani disi e sori krin tu taki Psalm 12:7 no abi fu du nanga den sani di Gado taki.
Fu dati ede, a de krin taki a vers disi e gi a getrow pipel fu Gado a howpu taki a o du wan sani gi den.
