Kon krosibei na Gado

A moro bun Papa di de

Mateyus 3:16, 17

FURU wortu no de di e naki sma ati so te, leki a wortu „papa”. Wan papa di trutru lobi en pikin e yepi den fu gro kon tron bun sma. Fu dati ede, a fiti taki Bijbel e kari Yehovah Gado „Tata” (Mateyus 6:9). Sortu Papa Yehovah de? Fu man piki na aksi dati, meki wi go luku fosi san Yehovah ben taigi Yesus di a teki dopu. Te yu e luku en bun, dan a fasi fa wan papa e taki nanga en pikin e sori sortu papa a de.

Na wan pisi ten fu oktober na ini a yari 29, Yesus go na Yordan-liba fu teki dopu. Bijbel e taki san ben pasa: „Di Yesus dopu, dan wantewante a opo komoto fu a watra; ne hemel opo èn Yohanes si Gado en yeye e saka kon na Yesus tapu leki wan doifi. Luku! Wan sten komoto fu hemel tu, èn a taki: ’Disi na mi Manpikin, a lobiwan di mi feni bun’” (Mateyus 3:16, 17). * Den moi wortu dati di Yehovah srefi ben taki na wan switi fasi, e sori wi krin sortu Papa a de. Luku dri sani di Yehovah ben taigi en Manpikin.

A fosi sani di Yehovah taki, na „disi na mi Manpikin”. Fu taki en leti Yehovah ben taki dyaso: ’A e prisiri mi ati trutru fu de yu Papa.’ Wan koni papa e prèise en pikin èn a e poti prakseri na den, fu di a sabi taki den pikin abi dati fanowdu trutru. Pikin musu kisi a dyaranti taki ibriwan fu den de warti memre fu na osofamiri. Aladi Yesus ben bigi kaba, toku yu kan frustan fa a ben firi di en Papa sori taki a e warderi en leki en manpikin!

A di fu tu sani di Yehovah taigi en Manpikin, na taki Yesus na „a lobiwan”. Na so Yehovah meki ala sma kon sabi taki a lobi Yesus. Te yu e luku en bun, dan a Papa fu en ben taki: ’Mi lobi yu.’ Wan bun papa e taigi en pikin taki a lobi den trutru. Te wan papa e taki den sortu wortu dati, èn te a e sori na wan fasi di fiti taki a lobi en pikin, dan dati e yepi den pikin fu gro kon tron bun sma. A ben musu fu naki Yesus en ati di a yere a sten fu en Papa di ben taki dati a lobi en!

A di fu dri sani, na taki Yehovah taigi en Manpikin: „Na yu mi feni bun.” A ben de neleki Yehovah ben taki: ’Mi boi, mi feni den sani di yu du, bun.’ Wan lobi-ati papa e suku okasi fu taigi en pikin taki den bun sani di den taki noso di den du, a e feni bun. Pikin e kisi krakti baka èn den e kisi deki-ati te den papa nanga mama e taigi den taki den du bun. A no de fu taki dati Yesus ben kisi deki-ati di a yere taki en Papa feni en bun!

Iya, Yehovah na a moro bun Papa di de. Yu e angri fu abi so wan papa? Efu dati de so, dan yu sa kisi trowstu fu sabi taki Yehovah kan de leki yu Papa. Efu yu e poti bribi na ini den sani di yu e leri fu en èn efu yu e pruberi trutru fu du a wani fu en, dan a sa tron yu Papa. Bijbel e taki: „Kon krosibei na Gado, èn a sa kon krosibei na unu” (Yakobus 4:8). Yu no e agri taki nowan tra sani de di kan gi yu a firi taki sani sa waka bun, leki a krosibei matifasi di yu abi nanga Yehovah Gado, a moro bun Papa di de?

[Futuwortu]