Leisiman e aksi

Gado Kownukondre de na ini yu ati?

Furu sma na ini a ten disi e bribi taki Gado Kownukondre de na ini wi ati. Fu eksempre, wan buku e taki: „A kownukondre fu Gado wani taki . . . a fasi fa Gado e tiri wi ati” (The Catholic Encyclopedia). Nofo tron den kerki fesiman e leri sma a sani dati. Bijbel e leri wi trutru taki Gado Kownukondre de na ini libisma ati?

Son sma e denki taki na Yesus srefi ben kon nanga a denki disi, taki Gado Kownukondre de na ini libisma ati. A tru taki Yesus ben taki: „A kownukondre fu Gado de na un mindri” (Lukas 17:21). Son bijbelvertaling e taki dyaso: „A kownukondre fu Gado de na un ini”, noso a „de inisei fu unu”. A de so taki den wortu dati di Yesus taki, vertaal na wan yoisti fasi na ini den Bijbel disi? Yesus ben wani taki trutru dati Gado Kownukondre de na ini libisma ati?

Meki wi go luku fosi san na a libisma ati. Te Bijbel e taki fu libisma ati, dan dati no abi fu du nanga a trutru ati, ma nanga a fasi fa wan sma de na inisei, namku a fasi fu denki, a fasi fa a e tyari ensrefi, èn den firi fu en. A kan gersi wan moi sani fu bribi taki so wan kefalek sani leki a Kownukondre fu Gado de na ini libisma ati. Fu eksempre, sma e bribi taki a Kownukondre e kenki a fasi fa den de, èn a e meki den tron wan moro bun sma. Ma buweisi de di e sori taki a sani disi tru?

Bijbel e taigi wi: „Na ati e kori sma moro leki iniwan tra sani èn a pori srefisrefi” (Yeremia 17:9). Yesus srefi ben taki: „Takru prakseri e komopo na inisei fu wan sma, iya, na ini en ati; den sani dati na hurudu, fufuru, kiri, sutadu, bigi-ai, ogridu” (Markus 7:20-22). Prakseri a sani disi: A no de so taki ala pina di wi e si na ini a grontapu disi, e kon fu di a sondu ati fu libisma e meki den du a sani disi? Dan fa a kan taki Gado Kownukondre di bun dorodoro, e kon fu libisma ati? Fu taki en leti, neleki fa figa no man kon fu wan makabon, na so Gado Kownukondre no man kon fu libisma ati.—Mateyus 7:16.

A di fu tu sani di wi o luku, na den arkiman di Yesus ben taki nanga den, di a ben taki den wortu na ini Lukas 17:21. Na ini a vers na fesi skrifi: „Di den Fariseiman aksi en o ten a kownukondre fu Gado ben o kon, a piki den” (Lukas 17:20). Den Fariseiman ben de Yesus en feanti. Yesus ben taki dati den hoigriman dati no ben o go na ini Gado Kownukondre (Mateyus 23:13). We, efu den Fariseiman no ben o go na ini Gado Kownukondre, dan a kan de so taki a Kownukondre ben de na ini na ati fu den? Nôno, dati no kan kwetikweti! San Yesus ben wani taki dan nanga den wortu dati?

Na ini wan tu soifri bijbelvertaling, den wortu disi fu Yesus vertaal na a srefi fasi leki fa a skrifi na ini a Nyun Grontapu-vertaling. Sonwan fu den vertaling dati e taki dati a Kownukondre de „na mindri unu”, noso taki a „de na un mindri”. Fa Gado Kownukondre ben de na mindri den sma fu a ten dati, èn sosrefi na mindri den Fariseiman? We, Yesus na a sma di Yehovah Gado poti fu tron Kownu fu a Kownukondre. Yesus, a Sma di ben o tron Kownu, ben de leti na mindri den sma dati. A ben leri sma fu Gado Kownukondre èn a ben du wondru srefi di ben sori den san a Kownukondre dati o du na ini a ten di e kon. Sobun, fu taki en leti a Kownukondre ben de na mindri den.

A de krin fu si taki Bijbel no e horibaka gi a bribi di furu sma abi, taki Gado Kownukondre de na ini libisma ati. Na presi fu dati, Gado Kownukondre na wan trutru tirimakti di o tyari bigi kenki kon na grontapu, soleki fa den profeiti ben taki na fesi.—Yesaya 9:6, 7; Danièl 2:44.