Mi feni frulekti fu den broko-ede di mi ben abi leki yonguwan

Soleki fa Eusebio Morcillo fruteri

Na ini september fu a yari 1993, mi go na wan strafu-oso pe wan lo sani ben seti fu sorgu taki sma no ben man lowe makriki. Mi ben go drape fu di wan strafuman ben o teki dopu. A strafuman dati ben de mi pikin sisa Mariví. Sonwan fu den strafuman nanga den sma di ben abi frantwortu na ini a strafu-oso, ben e luku na wan lespeki fasi fa mi ben e dopu mi sisa. Fosi mi fruteri unu fa a du kon taki mi go dopu mi sisa drape, mi sa taigi unu fa wi libi ben de fosi.

MI GEBORE tapu 5 mei 1954, na ini Spanyorokondre. Mi na a fosiwan fu aiti pikin. Mariví na a di fu dri pikin. Mi granmama kweki wi leki fayafaya Lomsusma, èn mi kan memre ete o switi a ben de fu de makandra nanga en di mi ben yongu, fu di wi ben gwenti fu poti prakseri na sani di abi fu du nanga Gado. Ma wi no ben e du nowan fu den sani disi na a oso fu mi papa nanga mama. Mi papa ben gwenti fu fon wi nanga wi mama. Ala sma na oso ben e frede mi papa èn a ben e hati mi srefisrefi fu si fa mi mama ben e pina.

Na skoro moro sani ben e miti mi di ben e meki mi firi brokosaka. Wan fu den leriman na skoro, namku wan priester, ben e naki wi ede na a skotu fu a klas te wi no ben gi a yoisti piki tapu wan aksi. Wan tra priester ben e fasifasi den pikin te a ben e luku den skorowroko makandra nanga den. Boiti dati, den leri fu a Lomsu Kerki, soleki a leri fu helfaya, ben e bruya mi èn den ben e meki mi frede. Fosi yu denki, mi no ben e poti prakseri moro na sani di abi fu du nanga Gado.

Mi bigin libi wan bruya libi

Fu di nowan sma ben e yepi mi fu libi soleki fa Gado wani, meki mi bigin waka nanga sma di ben e libi wan yayolibi èn di ben lobi feti na dansi-oso. Nofo tron den ben e feti nanga nefi, isri keti, grasi, nanga sturu. Aladi misrefi no ben e feti, toku wan leisi den naki mi flaw.

Te fu kaba, mi no ben wani go moro na den sortu dansi-oso dati èn mi bigin go na den wan pe dyugudyugu no ben e pasa. Srefi na den presi dati sma ben gwenti fu gebroiki drugs. Den drugs no ben e meki mi firi koloku èn den no ben e gi mi wan korostu firi, ma na presi fu dati den ben e bruya mi frustan èn den ben e gi mi broko-ede.

Aladi mi no ben de koloku nanga a fasi fa mi  ben e libi, toku mi hari José Luis, wan fu den pikin brada fu mi, èn sosrefi Miguel, wan bun mati fu mi, go na ini a srefi libi dati. Na a ten dati, wi nanga furu tra yonguwan na ini Spanyorokondre ben e libi wan takru libi, èn wi no ben sabi fa fu komoto na ini a libi dati. Mi ben e du pikinmoro iniwan sani, soso fu feni moni fu bai drugs. Mi no ben abi nowan lespeki gi misrefi moro.

Yehovah e yepi mi

Na a ten dati, mi ben gwenti fu aksi misrefi efu wan Gado de èn san na a marki fu a libi. Mi taki wan tu leisi fu den tori disi nanga den mati fu mi. Fu di mi ben wani sabi moro fu Gado, meki mi bigin suku wan sma di mi ben kan fruteri fa mi ben e firi. Mi ben si taki Francisco, wan fu den man na mi wrokope, ben de heri tra fasi leki den tra wrokoman. Soleki fa a ben sori, a ben de koloku, a ben de opregti, èn a ben abi switifasi. Fu dati ede, mi bosroiti fu fruteri en ala san ben de na tapu mi ati. Francisco ben de wan Yehovah Kotoigi, èn a gi mi wan Waktitoren di ben abi wan artikel na ini di ben e taki fu drugs.

Baka di mi leisi na artikel, mi begi Yehovah fu yepi mi. Mi taki: „Masra, mi sabi taki yu de èn mi wani kon sabi yu so taki mi kan du a wani fu yu. Grantangi yepi mi!” Francisco nanga tra Kotoigi gi mi deki-ati nanga yepi fu Bijbel, èn den gi mi wan tu Bijbel publikâsi fu leisi. Mi kon si taki den ben gi mi a yepi di mi ben aksi Gado. Syatu baka dati mi bigin fruteri José Luis nanga den mati fu mi san mi ben e leri.

Wan dei di mi ben komoto na wan poku-show nanga wan tu mati, dan mi go tanapu aparti fu den. Mi luku den wan pisi ten, èn mi kon si taki wi no ben e tyari wisrefi bun kwetikweti, fu di wi ben e gebroiki drugs. Na a momenti dati, mi bosroiti fu tapu nanga a libi dati, èn fu tron wan Yehovah Kotoigi.

Mi aksi Francisco wan Bijbel èn a gi mi wan, makandra nanga a buku De waarheid die tot eeuwig leven leidt. * Di mi leisi taki Gado pramisi taki a o figi ala watra puru na sma ai èn taki dede srefi no o de moro, dan mi no ben e tweifri moro. Mi ben sabi taki mi feni a waarheid di kan meki a libisma famiri kon fri (Yohanes 8:32; Openbaring 21:4). Bakaten, mi go na wan konmakandra na a Kownukondre zaal fu Yehovah Kotoigi. A naki mi ati trutru fu si fa den sma drape ben e sori switifasi nanga lobi gi makandra.

Fu di mi ben e angri fu fruteri trawan san mi ben ondrofeni na a Kownukondre zaal, meki wantewante mi kari José Luis nanga den mati fu mi kon, èn mi fruteri den ala sani. Wan tu dei baka dati, wi alamala go na wan konmakandra. Wan yongu uma di ben sidon na wi fesi, drai luku wi, èn a drai en fesi esi-esi baka. A no de fu taki dati a ben skreki fu si wan tu man nanga langa wiwiri di ben e weri syabisyabi krosi, èn a sorgu taki a no drai luku wi moro. A ben musu fu fruwondru di a si wi baka na a Kownukondre zaal a wiki baka dati, fu di wi ben e weri paki nanga das disi leisi.

Syatu baka dati, mi nanga Miguel go na wan kring konmakandra fu Yehovah Kotoigi. Noiti ete wi ben ondrofeni so wan sani, namku taki yonguwan nanga owruwan ben de makandra leki brada nanga sisa di lobi makandra trutru. Èn a sani di ben de so aparti, na taki a konmakandra  disi ben e hori na a srefi presi wi ben go na a poku-show no so langa pasa. Ma disi leisi, a fasi fa den sma ben e tyari densrefi èn a poku di wi ben yere, meki wi firi koloku.

Ala den bun mati fu mi bigin studeri Bijbel. Sowan aiti mun baka dati, tapu 26 yuli 1974, mi nanga Miguel teki dopu. Wi ala tu ben abi 20 yari. Fo fu den tra mati fu mi teki dopu wan tu mun baka dati. A leri di mi ben kisi fu Bijbel meki taki mi bigin du wroko na oso fu yepi mi mama di ben abi langa pasensi èn mi bigin fruteri en den nyun sani di mi leri fu Bijbel. Baka wan pisi ten wi ben man feni en heri bun nanga makandra. Mi ben e gebroiki furu ten sosrefi fu yepi den brada nanga sisa fu mi.

Te fu kaba, mi mama nanga ala den brada nanga sisa fu mi, boiti wan fu den brada fu mi, kon sabi den tru tori fu Bijbel èn den teki dopu leki Yehovah Kotoigi. Na ini 1977, mi trow nanga Soledad. Na en ben de a yongu uma di ben skreki fu si wi di wi ben go fu a fosi leisi na a Kownukondre zaal. Baka wan tu mun, mi nanga en tron pionier, soleki fa Yehovah Kotoigi e kari den furuten preikiman fu a bun nyunsu.

Wan lobiwan e kon fri

Di mi pikin sisa Mariví ben yongu, dan sma ben e dwengi en fu abi seks nanga den, èn a takru sani dati di a ben ondrofeni ben abi furu krakti na en tapu bakaten. Di a ben de wan tini ete, dan a bigin libi wan yayolibi fu di a ben e gebroiki drugs, a ben e fufuru, èn a ben abi seks nanga sma gi moni. Di a ben abi 23 yari, dan a ben musu go na strafu-oso, pe a go doro nanga a yayolibi fu en.

Na a ten dati, mi ben e dini leki kring-opziener, namku wan brada di e go luku den difrenti gemeente fu Yehovah Kotoigi. Na ini 1989, mi nanga Soledad ben go dini na ini a kontren pe Mariví ben de na strafu-oso. No so langa na fesi, den sma di ben abi a frantwortu na ini a strafu-oso ben puru a boi fu en na en anu, èn a sani dati meki taki a lasi ala prisiri na ini a libi. Wan dei mi go luku en. Mi aksi en efu mi ben kan studeri Bijbel nanga en, èn a ben feni en bun. Baka di wi studeri wán mun, dan a tapu fu gebroiki drugs nanga tabaka. Mi ben e prisiri fu si fa Yehovah gi en a krakti fu tyari ala den kenki disi kon na ini en libi.—Hebrewsma 4:12.

Syatu baka di Mariví bigin studeri, a bigin fruteri den tra strafuman nanga den sma di ben abi a frantwortu na ini a strafu-oso den tru tori fu Bijbel. Aladi den ben e froisi en fu a wan strafu-oso go na a trawan, toku a ben e tan fruteri sma den tru tori fu Bijbel. Na ini wan fu den strafu-oso, a ben e go na ala den strafu-oso kamra fu gi kotoigi. Na ini den yari baka dati, Mariví studeri Bijbel nanga difrenti strafuman na ini difrenti strafu-oso.

Wan dei Mariví taigi mi taki a ben wani gi en libi abra na Yehovah èn teki dopu. Ma a no kisi primisi fu gowe libi a strafu-oso, èn nowan sma ben mag go dopu en drape. A tan horidoro ete fo yari na ini a strafu-oso dati pe sma ben e du wan lo kruka sani. San ben yepi Mariví fu tan abi wan tranga bribi? Na a srefi ten di wan gemeente na ini a birti drape ben e hori wan konmakandra, Mariví ben e poti prakseri na den srefi sani dati na ini en strafu-oso kamra. Boiti dati, a ben e studeri Bijbel doronomo èn a ben e begi Yehovah sosrefi.

Baka wan pisi ten, den froisi Mariví go na wan strafu-oso pe wan lo sani ben seti so fu sorgu taki strafuman no man lowe makriki, èn a strafu-oso disi ben abi wan presi fu swen. Mariví ben howpu taki a ben o kisi na okasi now fu teki dopu. Èn na so a pasa taki Mariví kisi primisi te fu kaba fu teki dopu. Mi kisi a grani fu hori a dopu lezing fu en. Mi ben de nanga en na a moro prenspari momenti fu en libi.

A libi di Mariví ben libi fosi, meki taki a kisi AIDS. Ma a bun fasi fa a ben tyari ensrefi na strafu-oso, meki taki den lusu en moro fruku. Dati  ben de na ini maart 1994. A go libi nanga mi mama, èn a tan teki prati na a Kresten diniwroko te leki a dede tu yari baka dati.

Mi e basi takru firi

Mi srefi e ondrofeni wan tu takru bakapisi ete fu a libi di mi ben abi fosi. A takru fasi fa mi papa ben handri nanga mi, èn a fasi fa mi ben e libi di mi ben de wan tini, abi krakti ete tapu den fasi fu mi. Di mi kon moro owru, mi ben gwenti fu kisi konsensi fonfon èn mi ben e firi taki mi no warti nofo. Son leisi mi e firi brokosaka srefisrefi. Ma a Wortu fu Gado yepi mi trutru fu basi den takru firi disi. Fu di mi e prakseri dipi fu den tekst soleki Yesaya 1:18 nanga Psalm 103:8-13, meki mi no e kisi den takru firi disi so furu moro.

Wan tra sani di e yepi mi fu no denki taki mi no warti nofo, na den begi fu mi. Nofo tron te mi e begi Yehovah, dan mi ai e furu nanga watra. Ma den wortu na ini 1 Yohanes 3:19, 20 e gi mi deki-ati. Drape skrifi: „Na so wi o sabi taki wi kon fu a waarheid, èn wi kan de seiker na ini wi ati taki a lobi wi, awansi na sortu fasi wi ati e krutu wi. Bika Gado bigi moro wi ati èn a sabi ala sani.”

Fu di mi e begi Gado na wan getrow fasi èn nanga wan ati „di broko èn di masi”, meki mi sabi taki mi no takru so leki fa mi ben e denki fosi. Bijbel e gi ala den wan di e suku Yehovah a dyaranti taki a no e tegu gi den wan di abi berow fu a fasi fa den ben libi fosi, èn di drai den libi fu du a wani fu en.—Psalm 51:17.

Iniwan leisi te mi e bigin denki takru fu misrefi, dan mi e pruberi fu prakseri soso bun sani, iya, den sortu sani di kari na ini Filipisma 4:8. Mi sabi Psalm 23 nanga a Bergitaki na ede. Te mi e bigin denki takru, dan mi e taki den bijbeltekst disi gi misrefi. A sani disi e yepi mi fu puru takru denki na mi ede, spesrutu te mi no man sribi te neti.

Wan tra sani di e yepi mi, na den sani di mi wefi nanga tra lepi Kresten e taigi mi fu gi mi deki-ati. A ben muilek gi mi na ini a bigin fu bribi den sani di den ben e taigi mi, ma Bijbel yepi mi fu frustan taki lobi „e bribi ala sani” (1 Korentesma 13:7). Èn fu taki en leti, safrisafri mi kisi a sakafasi fu leri libi nanga den swakifasi fu mi.

Ma a feti di mi e feti nanga den takru firi fu mi, abi en bun sei tu, fu di a yepi mi fu de wan kring-opziener di e hori den firi fu trawan na prakseri. Mi nanga mi wefi e dini sowan 30 yari kaba leki furuten preikiman fu a bun nyunsu. A prisiri di mi e kisi fu di mi e dini trawan, e meki taki safrisafri den takru firi nanga den takru denki di abi fu du nanga den sani di mi ben ondrofeni, no e trobi mi moro.

Now te mi e prakseri ala den blesi di Yehovah gi mi, dan mi wani taki a srefi sani di a psalm skrifiman ben taki nanga wan tranga sten. A ben taki: „Blesi Yehovah, . . . en di e gi yu pardon fu ala den fowtu fu yu, di e dresi ala den siki fu yu, di e frulusu yu libi fu a peti srefi, di e gi yu lobi bun-ati nanga sari-ati leki wan kownu-ati.”—Psalm 103:1-4.

[Futuwortu]

[Prenspari pisi na tapu bladzijde 30]

Mi ben gwenti fu kisi konsensi fonfon èn mi ben e firi taki mi no warti nofo. Toku Gado Wortu e yepi mi fu basi den takru firi disi

[Prenki na tapu bladzijde 27]

Mi brada José Luis, nanga mi mati Miguel teki a takru eksempre nanga a bun eksempre fu mi

[Prenki na tapu bladzijde 28, 29]

A famiri Morcillo na ini 1973

[Prenki na tapu bladzijde 29]

Mariví, di a ben de na strafu-oso

[Prenki na tapu bladzijde 30]

Mi nanga mi wefi Soledad