O ten Gado Kownukondre o kon?
O ten Gado Kownukondre o kon?
„MASRA, yu o seti a kownukondre baka gi Israel na ini a ten disi?” (Tori fu den Apostel 1:6) Den apostel trutru ben wani kon sabi o ten Yesus ben o seti a Kownukondre fu en. Na ini a ten disi, sowan 2000 yari baka dati, sma wani kon sabi ete o ten Gado Kownukondre o kon.
Fu di a Kownukondre ben de a moro prenspari sani di Yesus ben preiki, meki yu e fruwakti kande dati a ben taki fu na aksi disi. We, a ben taki fu a sani disi trutru! A ben taki furu fu wan spesrutu pisi ten di a ben kari a „denoya” fu en (Mateyus 24:37). A denoya dati abi furu fu du nanga a seti fu a Mesias Kownukondre. San na a denoya disi? Meki wi go luku fo tru tori na ini Bijbel di abi fu du nanga a denoya fu Krestes.
1. A denoya fu Krestes ben o bigin wan langa pisi ten baka a dede fu en. Yesus ben gi wan agersitori pe a ben agersi ensrefi nanga wan man di „ben go na wan farawe kondre fu tron kownu” (Lukas 19:12). Fa na agersitori disi di de wan profeititori tu, kon tru? We, Yesus dede èn a kisi wan opobaka. Baka dati, a go na wan „farawe kondre”, èn dati na hemel. Soleki fa Yesus ben taki na fesi na ini wan srefi sortu agersitori, dan „baka wan heri pisi ten” a ben o drai kon baka leki Kownu.—Mateyus 25:19.
Wan tu yari baka di Yesus opo go na hemel, na apostel Paulus skrifi: „A man disi [Yesus] tyari wan srakti-ofrandi gi sondu wán leisi nomo fu ala ten, èn a go sidon na a reti-anusei fu Gado. Sensi a ten dati, a e wakti teleki Gado meki den feanti fu en tron leki wan bangi gi en futu” (Hebrewsma 10:12, 13). Sobun baka di Yesus go na hemel, a ben o wakti wan langa pisi ten. Te fu kaba a no ben o abi fu wakti moro, bika Yehovah Gado meki en Manpikin tron Kownu fu a Mesias Kownukondre di A ben pramisi langa ten na fesi kaba. Dati ben de a ten di Krestes en denoya bigin. Libisma na grontapu ben o si a prenspari sani disi di ben o pasa?
2. Libisma no man si a denoya fu Krestes nanga den trutru ai. Hori na prakseri, taki Yesus ben taki fu a marki fu en denoya (Mateyus 24:3). Libisma ben o abi wan marki fanowdu efu den ben o man si en denoya nanga den trutru ai? Fu eksempre, kon meki wi taki dati yu e rèi nanga yu wagi go na wan bigi liba di de farawe. Kande yu e si furu bord na seipasi di e sori yu fa fu doro na a bigi liba. Ma te yu doro te fu kaba na a syoro fu a liba, dan yu e fruwakti fu si wan bord di e sori taki disi na a bigi liba? Nôno, kwetikweti. Yu no o abi wan bord fanowdu fu sori yu taki dati na a liba, fu di yu kan si dati krin kaba, a no so?
A marki di Yesus ben gi no ben de wan marki gi wan sani di libisma ben o man si nanga den trutru ai, ma a ben gi a marki di ben musu yepi den frustan san ben o pasa na hemel. Fu dati ede Yesus taki: „A kownukondre fu Gado no o kon na so wan aparti fasi taki sma o si en krinkrin” (Lukas 17:20). Ma fa a marki ben o sori sma na grontapu taki a denoya fu Krestes bigin?
3. Wan marki di e sori taki a denoya fu Yesus bigin, na te bun furu problema ben o pasa na grontapu. Yesus ben taki dati te orloku, angriten, gronseki, takru siki di e kiri ipi-ipi sma, nanga kefalek ogri sani ben o pasa na grontapu, dan dati na a marki di e sori taki en denoya leki Kownu na hemel bigin (Mateyus 24:7-12; Lukas 21:10, 11). San ben o meki taki ala den problema disi pasa? Bijbel e taki dati Satan, „a tiriman fu a grontapu disi”, abi bigi atibron, fu di a sabi taki en ten syatu now di Krestes en denoya leki Kownu bigin (Yohanes 12:31; Openbaring 12:9, 12). Na ini a ten disi wi kan si bun furu buweisi di e sori krin taki Satan abi bigi atibron èn taki Krestes en denoya bigin. Spesrutu sensi 1914, noiti ete so furu problema ben de na heri grontapu, èn historia sabiman srefi e taki dati na ini a yari dati bigi kenki kon na grontapu.
Ala den sani disi kan gersi takru nyunsu, ma dati no de so. Den sani disi di e pasa, e sori taki a Mesias Kownukondre e tiri now na hemel. Heri esi, a Mesias Kownukondre sa tiri heri grontapu. Ma fa sma ben o sabi moro fu a Kownukondre dati, so taki den kan saka densrefi na ondro a tirimakti disi èn den kan tron borgu fu en?
4. Wan marki di e sori taki Yesus en denoya bigin, na a preikiwroko di e du na heri grontapu. Yesus ben taki dati a denoya fu en ben o de neleki „a ten fu Noa” (Mateyus 24:37-39). * Noa no ben e bow wan ark nomo, ma a ben de „wan preikiman fu regtfardikifasi” tu (2 Petrus 2:5). Noa ben warskow sma taki a krutu fu Gado ben de heri krosibei. Yesus ben taki dati na a ten fu en denoya, den bakaman fu en na grontapu ben o du wan srefi sortu sani, namku fu warskow sma. A ben taki na fesi: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”—Mateyus 24:14.
Soleki fa wi si na ini na artikel na fesi, dan Gado Kownukondre sa pori ala den tirimakti fu a grontapu disi. A preikiwroko di e du, e warskow sma taki a hemel tirimakti disi sa handri heri esi. Fu di a preikiwroko e du, meki taki ala sma e kisi na okasi fu tan na libi te a pori kon èn den e kisi na okasi fu tron borgu fu a Kownukondre dati. We, a prenspari aksi di e opo kon now na: San yu o du?
A kon fu Gado Kownukondre sa de bun nyunsu gi yu?
A boskopu di Yesus ben preiki na a moro moi howpu di de. Baka di sma opo densrefi teige Yehovah Gado na ini Eden dusundusun yari pasa, dan Gado ben abi na prakseri fu seti wan tirimakti di ben o meki ala sani kon bun baka. A tirimakti dati ben o meki getrow libisma libi baka soleki fa Gado ben abi na prakseri na a bigin di a meki libisma, namku taki den libi fu têgo na ini wan paradijs dyaso na grontapu. Nowan tra sani kan de moro moi leki fu sabi taki a tirimakti di Gado pramisi langa ten kaba, e tiri now na hemel, a no so? Iya, a tirimakti dati a no wan sani di wi no man frustan, ma a de wan trutru tirimakti!
A Kownu di Gado poti, e tiri now na mindri den feanti fu en (Psalm 110:2). Na ini na ogri grontapu disi pe sma no sabi Gado, a Mesias e meki a wani fu en Tata pasa, namku taki a e suku ala den sma di wani kon sabi fa Gado de trutru èn di wani anbegi en „nanga yeye èn nanga waarheid” (Yohanes 4:24). A howpu fu libi fu têgo na ondro a tiri fu Gado Kownukondre, de gi sma fu ala ras, gi owruwan nanga yonguwan, èn gi gudusma nanga pôtisma (Tori fu den Apostel 10:34, 35). Wi e gi yu a deki-ati fu teki a tumusi moi okasi di yu e kisi. Leri moro fu Gado Kownukondre now, so taki yu kan abi a prisiri fu libi na ondro a regtfardiki tirimakti disi fu têgo!—1 Yohanes 2:17.
[Futuwortu]
^ paragraaf 10 A sani disi di Yesus ben taki, e yepi wi fu kon si taki son bijbelvertaling no vertaal a wortu „denoya” na a yoisti fasi. Son Bijbel e vertaal en leki te „a kon”, te „a doro”, noso te „a kon baka”, ma den wortu disi abi fu du nanga wan syatu momenti nomo. Luku taki Yesus no ben agersi en denoya nanga a Frudu fu a ten fu Noa, fu di dati na wán sani nomo di ben pasa na ini a ten dati. Na presi fu dati a ben agersi en denoya nanga „a ten fu Noa”, fu di a ben abi fu du nanga ala den sani di ben e pasa na ini a pisi ten dati teleki a Frudu kon. Neleki fa a ben de na ini a pisi ten dati, na so Krestes en denoya ben o de wan pisi ten te sma ben o poti so furu prakseri na den aladei afersi fu a libi, taki den no ben o arki a warskow.
[Prenki na tapu bladzijde 8, 9]
Den takru nyunsu di wi e yere ibri dei e sori taki bun sani o pasa heri esi
[Sma di abi a reti fu a prenki]
Antiaircraft gun: U.S. Army photo