San na Gado Kownukondre?

SAN na a moro prenspari sani di Yesus ben preiki? Soleki fa Yesus srefi taki, dati ben de a Kownukondre fu Gado (Lukas 4:43). Te Yesus ben taki nanga sma, dan nofo tron a ben taki fu a Kownukondre. A de so taki den sma no ben sabi fu san Yesus ben taki? Den ben aksi en san na a Kownukondre disi? Nôno. Den Evangelietori no e taki dati sma ben aksi so wan sani. We, den sma dati ben sabi san na Gado Kownukondre?

Fu taki en leti, den owruten buku di den Dyu ben si leki santa buku, ben taki fu a Kownukondre leki wan trutru sani. Boiti dati, den ben taki tu san na a Kownukondre èn san a sa du. Neleki fa den Dyu ben kon sabi moro fu a Kownukondre, na so wi na ini a ten disi kan leri moro fu a Kownukondre te wi e go ondrosuku Bijbel. Meki wi go luku seibi tru tori di Bijbel e leri wi fu a Kownukondre. Den Dyu fu a ten fu Yesus èn sma bifo a ten dati, ben sabi den fosi dri tru tori kaba. Krestes noso den apostel fu en fu a fosi yarihondro ben tyari kon na krin san ben de den tra dri tru tori di abi fu du nanga a Kownukondre. A lasti tru tori kon na krin na ini a ten fu wi.

1. Gado Kownukondre na wan trutru tirimakti di sa tan fu têgo. A fosi profeititori fu Bijbel ben sori taki Gado ben o seni wan sma fu frulusu getrow libisma. A Sma disi di Bijbel e kari a „pikin”, o puru ala den problema di libisma kisi, fu di Adam, Eva nanga Satan opo densrefi teige Gado (Genesis 3:15). Bakaten a getrow Kownu David ben kisi fu yere wan tumusi moi sani fu a „pikin” disi, noso a Mesias. A  Mesias disi ben o tiri wan Kownukondre. A Kownukondre disi ben o difrenti fu ala trawan. A ben o tan fu têgo.—2 Samuel 7:12-14.

2. Gado Kownukondre o tyari wan kaba kon na ala libisma tirimakti. A profeiti Danièl ben kisi wan fisyun pe a ben si den difrenti tirimakti di ben o kon baka makandra, teleki a wan di ben o tiri na ini a ten fu wi. Luku sortu span sani pasa na a kaba fu a fisyun dati: „Na ini den dei fu den kownu dati [di ben o de fu a lasti tirimakti], a Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi èn a sa tyari wan kaba kon na den, èn ensrefi sa tan te ten di no skotu.” Sobun ala den kownukondre, noso tirimakti fu a grontapu disi di e meki taki orloku de, di e kwinsi sma, èn di kruka, sa kisi pori fu têgo. Soleki fa a profeititori fu Danièl e sori, dan heri esi Gado Kownukondre sa tiri heri grontapu (Danièl 2:44, 45). Boiti taki a Kownukondre disi na wan trutru tirimakti, a sa tan de a wan-enkri tirimakti di o tiri heri grontapu. *

3. Gado Kownukondre sa tyari wan kaba kon na orloku, siki, angriten, èn dede srefi. Den span Bijbel profeititori e sori san Gado Kownukondre sa du dyaso na grontapu. A Kownukondre dati sa du san nowan enkri libisma tirimakti ben man du na ini a ten di pasa, noso na ini a ten di e kon. Denki a tori, noiti moro wan feti sani o de! „A e meki feti kon na wan kaba te na a moro farawe presi fu grontapu” (Psalm 46:9). Nowan enkri datra o abi fu de moro, nowan ati-oso èn nowan enkri siki o de moro. „Nowan sma di e libi drape sa taki: ’Mi siki’” (Yesaya 33:24). Angriten no o de moro, nyanyan no sa mankeri, nofo gosontu nyanyan sa de, èn sma no o dede fu angri. „Aleisi sa de bogobogo na grontapu” (Psalm 72:16). Nowan beri nanga dede-oso o hori moro. Nowan beripe o de, èn nowan sma o sari fu di wan sma fu den dede. Dede, na ogri-ati feanti fu wi, no sa de moro. Gado „sa swari dede trutru fu têgo, èn a Moro Hei Masra Yehovah trutru sa figi den watra-ai puru fu ala den fesi”.—Yesaya 25:8.

4. Gado Kownukondre abi wan Tiriman di Gado poti. A Mesias no poti ensrefi leki tiriman, èn a no sondu libisma poti en fu tiri. Na Yehovah Gado srefi poti en fu tiri. Den wortu Mesias nanga Krestes e sori kaba taki na Gado poti en fu tiri. Den tu wortu disi wani taki „Salfuwan”. Sobun, na Yehovah salfu a Kownu disi, noso a poti en fu du a spesrutu wroko disi. Gado e taki fu en: „Luku! Mi futuboi, di mi e hori steifi! A wan di mi frukisi, di mi sili feni bun! Mi poti mi yeye na ini en. Retidu a sa tyari gi den nâsi” (Yesaya 42:1; Mateyus 12:17, 18). Wi Mekiman na a moro bun Sma di sabi sortu Tiriman wi abi fanowdu, a no so?

5. A Tiriman fu Gado Kownukondre sori ala sma taki en na wan bun Tiriman. A kon na krin taki Yesus fu Nasaret na a Mesias di Gado pramisi. A gebore na ini a famiri pe a Mesias ben o komoto, soleki fa Gado ben wani dati (Genesis 22:18; 1 Kroniki 17:11; Mateyus 1:1). Furu profeititori di abi fu du nanga a Mesias èn di ben skrifi hondrohondro yari na fesi, kon tru na ini Yesus di a ben de na grontapu. Wan sten fu hemel ben taki tu dati en na a Mesias. Fa dati ben pasa? We, Gado ben taki komoto fu hemel taki Yesus na en eigi Manpikin. Boiti dati, engel ben taki dati Yesus na a Mesias di Gado ben pramisi. Hondrohondro noso dusundusun sma ben si den wondru di Yesus du, èn dati e sori krin taki Gado ben gi en a krakti fu du den sani dati. * Yesus ben sori ibri tron baka sortu Tiriman a ben o de. A no ben abi a krakti wawan fu yepi sma, ma a ben wani du dati trutru (Mateyus 8:1-3). A no ben prakseri ensrefi, a ben abi sari-ati, a ben abi deki-ati, èn a ben abi sakafasi. Ala den sani di a ben du di a ben de na grontapu, skrifi na ini Bijbel gi ala sma fu leisi.

6. Na ini Gado Kownukondre 144.000 sma o tiri makandra nanga Krestes. Yesus ben  taki dati tra sma, sosrefi den apostel fu en, ben o tiri makandra nanga en na ini hemel. A ben kari a grupu disi a „pikin ipi” (Lukas 12:32). Bakaten, na apostel Yohanes yere taki a pikin ipi disi ben o de ala nanga ala 144.000 sma. Den ben o abi wan moi wroko fu du na ini hemel, namku fu tiri leki kownu èn fu dini leki priester makandra nanga Krestes.—Openbaring 5:9, 10; 14:1, 3.

7. Gado Kownukondre di e tiri nownow kaba na ini hemel, de srekasreka fu bigin tiri heri grontapu. A lasti tru tori disi na wan fu den moro moiwan di wi kan leri. Bijbel e gi furu buweisi taki Yesus kisi a makti fu tiri leki Kownu na ini hemel. Now na ini a ten fu wi a e tiri na ini hemel. Heri esi a sa tiri grontapu èn a sa meki den moi profeititori di wi ben luku kaba, kon tru. Ma fa wi du sabi taki Gado Kownukondre e tiri now? Èn o ten a sa bigin tiri grontapu?

[Futuwortu]