Kon krosibei na Gado

A Sma di man gi libi baka

Lukas 7:11-15

OITI yu lasi wan famiri noso mati na ini dede? Efu dati de so, dan yu ben ondrofeni wan fu den moro hati sani na ini libi. A Mekiman fu wi e frustan fa yu e firi. Ma a no dati wawan, bika a man meki den sma di dede, kon na libi baka. Na ini Bijbel wi e leisi fu sma di kisi wan opobaka, èn den sani disi e sori wi taki Yehovah a no soso a Sma di e gi libi, ma sosrefi a Sma di man gi libi baka. Meki wi go luku san ben pasa di a ben gi en Manpikin, Yesus Krestes, a makti fu gi wan sma wan opobaka. A wondru disi skrifi na ini Lukas 7:11-15.

A ben de na ini a yari 31 G.T. Yesus ben waka go na a foto Nain, na ini Galilea (vers  11). A kan taki a ben de mofoneti kaba di a ben doro a lanki fu a foto. Bijbel e taki: „Di a doro krosibei fu a portu fu a foto, dan sma ben e tyari wan dede man kon na dorosei; a ben de a wan-enkri manpikin fu en mama. Boiti dati, a masra fu na uma disi ben dede kaba. Wan lo sma fu a foto ben de tu nanga na uma” (vers 12). Yu man prakseri fa na uma disi di lasi en masra na ini dede ben firi kande? Di a wan-enkri boi fu en dede, dan fu a di fu tu leisi a lasi wan sma di ben e sorgu gi en èn di ben kibri en.

Yesus ben poti en prakseri na a mama di ben e sari èn di ben e waka kande na sei a dragi di ben e tyari a dede skin fu en boi. A tori e taki: „Di Masra si na uma, a firi sari gi en, èn a taigi na uma: ’No krei moro’” (vers 13). Yesus ben firi sari srefisrefi di a ben si na ini sortu situwâsi na uma ben de. Kande a ben e denki en eigi mama. A kan taki en mama ben lasi en masra na ini dede na a pisi ten dati, èn heri esi a ben o row gi Yesus.

Dan Yesus kon moro krosibei. Ma a no go fu go moksi ensrefi nanga a grupu fu sma. Dan a „fasi a dragi” èn nanga wan gebaar a meki den sma di ben tyari a dragi tan tanapu. Dan a taki: „Yonkuman, mi e taigi yu: Opo!” „Ne a dede man opo sidon, dan a bigin taki, èn Yesus gi en baka na en mama” (vers 14, 15). A yonkuman dati no ben de fu en mama moro di a dede. Sobun, di Yesus „gi en baka na en mama,” dan den ben tron wan osofamiri baka. Sobun na uma di ben lasi en masra na ini dede no ben sari moro, ma a ben e prisiri srefisrefi.

Yu wani firi a prisiri disi tu? Yu wani a prisiri fu miti baka nanga den lobiwan fu yu di dede? Yu kan de seiker taki Gado sabi fa yu e firi. A firi di Yesus ben firi sari gi na uma di ben lasi en masra na ini dede e sori wi fa Gado srefi e firi, fu di Yesus abi den srefi fasi fu en Tata (Yohanes 14:9). Bijbel e leri wi taki Gado e angri fu tyari den dedewan, di de na ini en prakseri, kon na libi baka (Yob 14:14, 15). En Wortu, Bijbel, e gi wi wan moi howpu, namku, a howpu fu libi na ini wan paradijs na grontapu èn fu si fa den lobiwan fu wi di dede e kisi wan opobaka (Lukas 23:43; Yohanes 5:28, 29). Wi e gi yu a deki-ati fu leri moro fu a Sma di man gi libi baka. Nanga dati yusrefi kan abi a howpu taki den lobiwan fu yu di dede, sa kisi wan opobaka.

[Prenki na tapu bladzijde 23]

„Ne a dede man opo sidon, dan a bigin taki, èn Yesus gi en baka na en mama”