„A e tyari mi na tapu den pasi fu regtfardikifasi”

Soleki fa Olga Campbell fruteri

„Wan sma di de wan bun eksempre gi trawan de leki wan dyendyen di e loi fu kari sma kon”, na so mi sisa Emily ben taki. „Yu loi a dyendyen, èn mi kon.” Disi na san a ben skrifi fu fristeri mi gi den 60 yari di mi de na ini a furuten diniwroko. Meki mi fruteri yu fa a ben de di mi ben yongu, èn fa mi bigin du muiti fu du a wroko disi mi heri libi langa.

MI GEBORE tapu 19 yanuari 1927, na ini wan osofamiri di komoto fu Ukraini. Wi ben e du gronwroko krosibei fu a foto Wakaw, na ini Saskatchewan, na a westsei fu Kanada. Mi nanga Bill, a twelengi brada fu mi, ben de a di fu siksi nanga seibi pikin na ini wi osofamiri di ben abi aiti pikin. Wi leki pikinwan na ini na osofamiri, ben yepi wi papa di ben e wroko tranga na a gron fu wi. Na ini a pikin oso fu wi, mi mama sorgu bun gi wi, aladi a ben abi a siki rheuma, di ben meki taki a abi furu pen na den bonyo fu en. Te fu kaba a siki disi meki taki a dede. A ben abi 37 yari nomo di a dede, èn mi ben abi 4 yari nomo.

Siksi mun baka di mi mama dede, mi papa trow baka. Syatu baka dati, di mi papa meki ete feifi pikin nanga a wefi fu en, dan sani no ben e waka bun na oso fu di wi ben e feti furu nanga makandra. Mi pruberi fu sori lespeki gi a wefi fu mi papa, ma a ben de moro muilek gi mi bigi brada John fu du dati.

Na ini den yari fosi 1940, mi nanga Bill go na lagiskoro, èn na so wi no ben abi fu de so furu na oso pe wi ben ondrofeni fruferi sani. Syatu bifo a di fu Tu Grontapufeti bigin, moro nanga moro sma ben e sori lobi gi a kondre fu den. A nyun skoromisi fu wi meki wi taki a fraga odi, ma wan meisje weigri fu du dati. Den studenti bigin spotu en. Ma mi ben feni en wan kefalek sani taki a meisje ben abi so furu deki-ati, èn fu dati ede mi aksi en fu san ede a no taki a fraga odi. A ben taki dati a de wan fu den Bijbel Ondrosukuman, soleki fa sma ben kari Yehovah Kotoigi son leisi, èn a taki dati a e gi yesi na Gado wawan.—Exodus 20:2, 3; Tori fu den Apostel 5:29.

Mi e gowe libi oso

Na ini 1943, mi bigin wroko na ini a foto Prince Albert, pe mi ben e poti lai na ini a baki fu truck, èn mi ben e tyari baki nanga soft gi sma. Fu di mi ben wani taki Gado tiri mi na ini mi libi, meki mi bai wan Bijbel, ma a ben de so muilek gi mi fu frustan, taki mi bigin krei. A Wi Tata begi ben de a wan-enkri sani di mi ben sabi fu Bijbel.—Mateyus 6:9-13.

Na uma di abi na oso pe mi ben e tan ben gwenti fu go na kerki, èn tapu wan sonde a fruteri mi so fayafaya taki a yagi wan „Bijbel frow” gowe di ben kon na a oso. Mi ben aksi misrefi fa a ben kan du so grofu. Wan tu wiki baka dati, mi no ben firi bun, èn fu dati ede mi no go na kerki tapu a sonde dati. A dei dati a „Bijbel frow”, kon baka.

„Yu e begi?”, na so a aksi mi.

 „Mi e begi a Wi Tata begi”, mi piki en.

Mi ben e arki bun di a fruteri san den wortu fu Yesus wani taki. A pramisi fu kon baka tapu a dridewroko di ben o kon.

Di na uma pe mi ben e tan kon na oso, dan mi ben breiti fu fruteri en taki a „Bijbel frow” kon baka. A „Bijbel frow” disi ben de wan Yehovah Kotoigi. Mi sari di na uma pe mi ben e tan tapu skreki gi mi, di a taki: „Efu na uma kon baka tapu dridewroko, mi o skopu un ala tu komoto na ini na oso.”

Mi go suku a Kotoigi dati na ini a heri birti, èn mi ben kon sabi taki a ben de Misi Rampel. Di mi feni en, mi fruteri en na ini sortu problema mi de, èn mi aksi en fu fruteri mi ala sani san a man fu Bijbel. A ben gersi leki wi taki fu Genesis te go miti Openbaring! A ben agersi a ten fu wi nanga a ten fu Noa, di Gado tyari wan kaba kon na wan onregtfardiki grontapu èn di A frulusu Noa nanga en osofamiri. Na so den sma dati ben e libi na ini wan grontapu pe onregtfardikifasi no ben de moro.—Mateyus 24:37-39; 2 Petrus 2:5; 3:5-7, 12.

„Mi kan si taki yu teki den Bijbel leri disi leki a tru bribi”, na so Misi Rampel taki baka a langa takimakandra di wi ben abi. „Baka tu wiki wan bigi konmakandra fu Yehovah Kotoigi o de, èn yu musu teki dopu.” A neti dati mi no ben man sribi fu di mi ben prakseri ala den sani di mi leri. A ben gersi wan seryusu sani trutru fu teki dopu. Ma toku, mi ben wani dini Gado! Aladi mi no ben sabi furu fu Bijbel, toku mi teki dopu di mi ben abi 16 yari, èn dati ben de tapu 15 oktober 1943.

Mi froisi fu westsei go na owstusei fu Kanada

Na ini november, mi brada Fred aksi mi fu kon wroko na a oso pe a ben tan. Mi ben musu krin na oso disi di ben abi dri sodro, èn na oso ben de na ini a foto Toronto, na a owstusei fu Kanada. Mi teki a wroko disi, fu di mi ben howpu taki drape sma no ben o tapu mi fu dini Yehovah. Fosi mi go drape, mi go luku mi sisa Ann, di ben libi ete krosibei fu Saskatchewan. A ben abi wan moi sani fu fruteri mi, namku taki en nanga wan tra sisa fu mi, Doris, ben e studeri Bijbel nanga Yehovah Kotoigi. A gi mi a deki-ati fu du dati tu. Ne mi fruteri en wan sani di mi no fruteri nowan sma ete, namku taki mi na wan dopu Kotoigi kaba.

Mi nanga mi pikin sisa Emily go nanga loko te na Toronto. Bill kon miti wi na a loko station èn a tyari wi go na a oso pe en, Fred, nanga John ben e libi. Mi aksi Fred efu tra sma ben e libi drape tu. A taigi mi: „Yu no o bribi suma e libi drape. Yu sabi Alex Reed ete di ben e tan fosi na ini a srefi foto leki wi? A e tan na sodro. Yu kan bribi taki so wan man e studeri nanga den Bijbel Ondrosukuman?” Mi ben breiti srefisrefi fu yere dati.

Mi waka go safrisafri na sondro fu miti Alex èn mi seti sani fu go na wan konmakandra nanga en a srefi neti dati. Mi ben wani go wantewante, so taki den brada fu mi no ben o man tapu mi fu go na den konmakandra. Syatu baka dati, mi go na ini a preikiwroko fu a fosi leisi, aladi noiti wan sma studeri Bijbel nanga mi. Mi ben lobi fu taki nanga den furu Ukrainisma di mi ben miti, èn na so mi ben taki a tongo di mi leri di mi ben pikin.

Bill ben lobi fu leisi A Waktitoren, di mi ben gwenti fu poti na ini en kamra. Baka di a froisi go na British Columbia, na a westsei fu Kanada, dan mi seni wan abonnement fu A Waktitoren gi en, so taki a ben kan kisi den doronomo. Aladi Bill no lobi fu taki furu, toku a skrifi wan brifi fu tin bladzijde gi mi, pe a gi mi tangi taki mi seni a sani disi gi en. Baka wan pisi ten, a gi en libi abra na  Yehovah èn a tron wan fayafaya Kresten owruman. Mi breiti srefisrefi fu si taki feifi fu mi brada nanga sisa, namku Bill, Ann, Fred, Doris, nanga Emily, gi den libi abra na Yehovah èn tron anbegiman fu En!

Tapu 22 mei 1945, a tirimakti fu Kanada taki dati a wroko fu Yehovah Kotoigi no tapu moro. * Fu taki en leti, di mi yere a nyunsu dati, dan fosi mi ben sabi taki a wroko fu wi ben tapu. Mi nanga mi mati Judy Lukus bosroiti fu go na ini a furuten diniwroko leki pionier. Wi ben go moro fara na a owstusei fu a kondre, na a kontren pe sma e taki Fransitongo na ini Quebec. Di mi sisa Doris nanga Emily yere san wi ben o du, dan den bosroiti fu go pionier na ini Vancouver, na British Columbia, di de na a tra sei fu Kanada.

Den kerkisma na ini Quebec no lobi Yehovah Kotoigi

Di mi froisi go na Quebec, dan a no a presi wawan ben de tra fasi gi mi. Sma trutru ben e gens a preikiwroko fu den Kotoigi drape. * Wi ben breiti taki wi ben kan prati a traktaat di nen Quebec’s Burning Hate for God and Christ and Freedom Is the Shame of All Canada. A krin boskopu na ini a traktaat disi ben e sori taki sma fu tra kerki ben e gens den Kotoigi.

Tinasiksi dei langa, wi ben bigin tu yuru mamanten fu poti den traktaat na ondro a doro fu sma sondro taki den yere dati. Na wán fu den oso, wi yere taki skowtu de na pasi fu kon grabu wi. Ma den no ben man feni wi, fu di wi ben go kibri na ini wan pikin pasi. A dei baka dati, wi ben go baka na strati fu prati A Waktitoren nanga Ontwaakt! Baka wan tu mun, den skowtu ben grabu wi someni leisi kaba taki wi no ben e teri moro omeni leisi den du dati. Fu di mi ben fruwakti taki iniwan momenti den ben kan poti mi na strafu-oso, meki ala ten mi ben e waka nanga mi tifibosro èn nanga mi oogpotlood fu moi mi ai.

Na ini november 1946, Nathan Knorr, di ben e teki fesi na ini a wroko di Kotoigi e du na heri grontapu, ben kon fu Brooklyn, New York, fu fisiti wi. A ben gi 64 pionier fu Quebec, a kari fu go na a di fu neigi klas fu a Waktitoren Bijbelskoro Gilead na ini South Lansing, na New York. Mi ben de na ini a grupu dati tu. Na a skoro disi, wi kisi furu leri fu Bijbel feifi mun langa. Baka di wi klari a skoro na ini augustus 1947, den seni wi go na difrenti foto na ini Quebec fu seti nyun gemeente.

Mi kisi blesi na ini a diniwroko

Ala nanga ala, wi ben de nanga fo yongu Kresten sisa, di ben musu go preiki na ini a foto Sherbrooke. Wi ben oefen furu fu taki Fransitongo. Dati meki wi ben e taki den wortu ibri tron baka te wi ben e waka go na a kontren pe wi ben o preiki èn te wi ben e waka go na oso baka. Son leisi te wi no ben abi moni fu bai nyanyan na brekten, dan wi ben e go na oso fu studeri. Kay Lindhorst, a Kresten sisa di ben wroko makandra nanga mi na ini a preikiwroko, ben sabi heri bun fa fu gebroiki den wortu na a yoisti fasi. A ben leri mi fa fu gebroiki wortu na ini Ingrisitongo na wan yoisti fasi, èn baka dati a leri mi fu du dati na ini Fransitongo so taki mi ben kan frustan a tongo dati.

A moro moi pisi fu a preikiwroko di mi ben e du doronomo, ben de di mi ben e wroko na ini a foto Victoriaville, pe 15.000 sma ben e libi na ini a pisi ten dati. Pikinmoro nowan sma drape ben taki Ingrisitongo, èn disi ben meki taki wi ben man oefen a Fransitongo moro bun. A fosi wiki di wi ben de drape, ben de wan span wiki. Ala sei pe wi ben go, sma ben e teki den publikâsi fu wi. Ma di wi ben go baka na den sma, dan den ben tapu den doro nanga den fensre fu den. Fu san ede den ben du dati?

A Lomsu priester fu a presi dati ben warskow den sma fu no arki wi. Fu dati ede, te wi ben go oso fu oso, wan tu pikin ben kon na wi baka èn den ben trowe ston nanga snewbal na wi tapu. Ma toku, furu sma ben wani yere a Bijbel boskopu. Biginbigin, na neti wawan wi ben kan go baka na den sma dati. Ma di den kisi moro sabi fu Bijbel,  den no ben frede fu studeri moro na wan ten te birtisma ben kan si den.

Na ini den yari baka 1950, mi nanga den sisa fu mi go fisiti den sma na ini Wakaw. Na wan gemeente konmakandra, wi fruteri wan tu sani di wi ondrofeni na ini a preikiwroko. Baka dati, wan owruman taigi wi: „Te yu mama o kisi wan opobaka, a o breiti srefisrefi fu si taki den pikin fu en tron Kotoigi fu Yehovah!” Na owruman ben fruteri wi taki wi mama ben e studeri Bijbel nanga wan Kotoigi fosi a dede. Wi ai ben furu nanga watra di wi ben yere taki wi mama ben e leri den tru tori fu Bijbel, èn a no de fu taki dati a ben o fruteri wi den sani dati efu a no ben dede so fruku.

Mi trow èn mi du a diniwroko makandra nanga mi masra

Na ini 1956, mi miti Merton Campbell, wan Kotoigi di ben de 27 mun na strafu-oso na a ten fu a di fu Tu Grontapufeti, fu di leki Kresten a no teki sei na politiek afersi. A ben e dini pikinmoro tin yari kaba na a edekantoro fu Yehovah Kotoigi na ini Brooklyn. Merton ben abi bun fasi fu di a ben studeri Bijbel, èn mi ben si taki a ben o de wan bun masra. Wan tu mun langa wi skrifi brifi gi makandra, èn na so wi ben e kon kisi moro lespeki gi makandra èn wi ben kon lobi makandra moro.

Mi nanga Merton trow tapu 24 september 1960. A de wan trutru blesi taki mi trow 47 yari kaba nanga a man disi di e fiti den Bijbel gronprakseri na ini en libi! Merton wroko 58 yari na a dienstafdeling kaba. Na a afdeling disi den brada e yepi èn e tiri den gemeente fu Yehovah Kotoigi na ini Amerkankondre. Moro leki 30 yari, mi ben e wroko na Brooklyn Bethel pe mi ben seti den kamra moi gi fisitiman, èn bakaten mi ben du dati tu na den bigi Kongreshal na ini a kontren fu New York City. Baka dati, na ini 1995, mi nanga Merton ben musu froisi go na a Waktitoren Skoro Centrum na ini Patterson, di de sowan 110 kilometer na noordsei fu New York City.

Di mi gowe libi oso, di mi ben abi 12 yari, dan noiti mi ben denki taki wan dei mi ben o abi so furu Kresten brada nanga sisa, èn sosrefi mi eigi brada nanga sisa lontu mi. Mi e angri fu de na ini a nyun grontapu fu Gado, te mi nanga den brada nanga sisa fu mi o miti wi mama baka èn te wi o fruteri en san pasa nanga wi na a ten di a ben e wakti fu kisi wan opobaka. Wi o fruteri en spesrutu fa Yehovah Gado sorgu na wan lobi-ati fasi taki den pikin fu en kon leri sabi En. Wi breiti srefisrefi taki Yehovah tyari wi „na tapu den pasi fu regtfardikifasi”!—Psalm 23:3.

[Futuwortu]

[Prenki na tapu bladzijde 27]

Mi papa nanga mama èn na oso pe wi ben tan makandra nanga den seibi brada nanga sisa fu mi

[Prenki na tapu bladzijde 29]

Mi nanga den tra Kresten sisa na ini a preikiwroko na Ottawa, ini a yari 1952

[Prenki na tapu bladzijde 29]

Mi nanga den brada nanga sisa fu mi (fu a kruktu-anusei go na a reti-anusei) Ann, Mary, Fred, Doris, John, mi, Bill, nanga Emily

[Prenki na tapu bladzijde 29]

Mi nanga Merton na ini a ten disi