„A wet kon tron wi leriman”
„A wet kon tron wi leriman”
SORTU pikin feni taki wet nanga trangaleri na prenspari sani? Furu pikin no e feni dati. Den feni taki wet fruferi. Ma sma di abi a frantwortu fu luku pikin, sabi taki a de tranga fanowdu taki pikin e leri fa fu tyari densrefi na wan fasi di fiti. Èn te den pikin e gro kon bigi, furu fu den kande e kon frustan o prenspari a de taki den kisi a leri dati. Na apostel Paulus ben gebroiki na eksempre fu wan man di ben musu kibri pikin, fu agersi a fasi fa Yehovah Gado leri a pipel fu en fa fu tyari densrefi na wan fasi di fiti.
Sonwan fu den fosi yarihondro Kresten na ini a distrikt Galasia di ben de na ondro a tiri fu Rome, ben feni taki Gado lobi soso den sma di e gi yesi na a Wet di Gado gi den Israelsma nanga Tori fu den Apostel 15:12). Sobun, Paulus gebroiki wan agersitori fu sori taki a denki disi fowtu. Na ini wan brifi di Paulus seni gi den Kresten fu Galasia, a ben skrifi: „A Wet kon tron wi leriman di e tyari wi go na Krestes” (Galasiasma 3:24). Wan sabiman e taki dati wan leriman na „wan sma di abi wan prenspari wroko, èn a sani disi de so langa ten kaba”. Te wi e frustan san a leriman disi ben musu du, dan wi sa man frustan san na apostel Paulus ben tyari kon na krin.
yepi fu Moses. Na apostel Paulus ben sabi taki disi no tru, fu di Gado ben gi santa yeye na sma di no ben hori densrefi noiti na den wet fu den Dyu (A leriman nanga den frantwortu di a ben abi
Na ini gudu osofamiri fu Grikisma, Romesma, èn kande na ini gudu Dyu osofamiri sosrefi, yu ben abi leriman di ben musu leri den pikin fu den sma disi fa fu tyari densrefi na wan fasi di fiti. A leriman ben musu du disi sensi a ten te a pikin ben yongu ete, te go miti a ten te a tron wan tini. Nofo tron a leriman ben de wan owru, getrow srafu di ben musu sorgu taki ogri no miti a pikin, èn a ben musu sorgu taki den marki di a papa wani a pikin fu doro, pasa trutru. Heri dei a leriman ben de nanga a pikin na ala presi pe a ben go. A ben sorgu taki a pikin tan krin, a ben tyari en go na skoro, son tron a ben tyari den buku nanga tra sani gi a pikin, èn a ben luku taki a pikin du en skorowroko.
Nofo tron a leriman no ben de wan skoromeester. Na presi taki a leriman ben gi a pikin skoroleri, a ben du san a pikin en papa ben taigi en fu du, fu di a ben abi a frantwortu fu luku a pikin. Ma toku a leriman ben e leri a pikin wan tu sani di a papa nanga mama fu a pikin ben e taigi en fu leri a pikin, èn a ben gi a pikin trangaleri tu. A ben leri a pikin maniri, a ben piri-ai gi en, èn a ben fon a pikin srefi te a no ben tyari ensrefi bun. Ma a no de fu taki dati a pikin en papa nanga en mama ben de den moro prenspari sma di ben gi a pikin leri. Ma te wan boi ben gro kon bigi, dan te a pikin ben waka na tapu strati, a leriman ben leri en fa fu waka leti-opo èn na wan fasi di fiti. A ben leri en tu taki a ben musu weri en dyakti, a ben leri en fa fu sidon bun, èn fa fu nyan na wan fasi di fiti. A leriman ben e leri en sosrefi taki a musu opo gi bigisma te den kon na
inisei, taki a musu lobi en papa nanga mama, èn a ben e leri en tra sani tu.A Griki filosofiaman Plato (428-348 b.G.T) ben feni taki pikin no kan du san den wani. A ben skrifi: „Neleki fa skapu noso tra meti di e nyan grasi no man libi sondro wan sma di e luku den, na so pikin no man libi sondro wan leriman èn srafu no man libi sondro wan masra.” Aladi a kan gersi leki a sani disi de tumusi seryusu, toku dati ben de a fasi fa Plato ben denki fu sani.
Fu di den leriman ben de doronomo nanga den pikin, meki den pikin ben e si den leriman leki waktiman di e dwengi den fu du ala sortu sani, èn leki sma di e gi hebi strafu. Gi den pikin, leriman ben de leki sma di e krutu den gi ala sortu pikinpikin sani, èn di e weri den ede nanga ala sortu sani di den pikin no ben e du bun. Aladi sonwan fu den leriman ben de so, toku wan leriman ben e kibri a pikin gi sani di ben kan abi takru krakti tapu a pikin, èn gi ogri di ben kan miti a pikin. A Griki historia skrifiman Appianus, di ben e libi na ini a di fu fo yarihondro G.T., fruteri wan tori fu wan leriman di ben de na pasi fu tyari a pikin di a ben musu luku, go na skoro. Na ini a tori, a leriman brasa a pikin hori fu kibri en gi sma ben wani kiri a pikin. Di a leriman weigri fu gi den sma a pikin, dan den kiri a leriman nanga a pikin.
Furu sma na ini a Griki libimakandra ben e libi wan yayo libi. Pikin-nengre, pikin boi spesrutu, ben musu kisi kibri fu di sma ben de di ben wani abi seks nanga den. Fu dati ede, den leriman ben musu go makandra nanga den pikin na skoro, fu di den no ben e frutrow furu fu den skoromeester. A Griki takiman Libanius fu a di fu fo yarihondro G.T., ben taki srefi dati leriman ben musu de leki „waktiman fu kibri den yongu pikin”. Den ben musu „tapu sma di ben wani abi seks nanga den boi fu no kon krosibei, èn den ben musu yagi den sortu sma dati, so taki den no tron mati fu den boi”. Furu pikin ben lespeki den leriman di ben kibri den. Srefi te den pikin disi ben kon bigi kaba, den ben abi furu warderi nanga lobi ete gi den leriman. Disi de fu si na den difrenti monumenti di sma ben poti fu memre den leriman fu den di dede.
A Wet de leki wan leriman
Fu san ede na apostel Paulus ben taki dati a Wet di Gado gi Moses de leki wan leriman? Fu san ede na agersitori disi fiti?
Wan reide fu san ede disi de so, na fu di a Wet ben kibri sma. Paulus ben taki dati den Dyu ben de „leki strafuman na ondro a tiri fu a wet”. A ben de neleki den Dyu ben abi wan leriman di ben kibri den (Galasiasma 3:23). A Wet ben abi krakti tapu ibri sani di den ben du na ini den libi. A Wet ben leri den fa fu basi den takru lostu fu den, nanga den lostu fu a skin. A ben sori den tu fa fu tyari densrefi na wan fasi di fiti èn a ben tan sori den tapu den swakifasi fu den. Na so fasi ibri Israelsma ben kon sabi san na en eigi swakifasi.
A Wet ben kibri den Israelsma sosrefi gi den sani di ben kan abi takru krakti na den tapu, soleki a morsu fasi fa den tra pipel lontu Israel ben e libi èn a fasi fa den ben anbegi falsi gado. Fu eksempre, Gado ben taigi den Israelsma taki den no ben musu trow nanga sma di no e anbegi en. A wet disi ben de tumusi prenspari efu den ben wani tan abi wan bun matifasi nanga Gado (Deuteronomium 7:3, 4). Den sortu wet disi ben meki taki na anbegi fu a pipel fu Gado no ben kon doti, èn den wet ben yepi den tu fu frustan suma na a Mesias. Den sani disi ben de trutru lobi-ati seti fu Gado. Moses ben memre den Israelsma: „Yehovah un Gado ben e gi unu trangaleri neleki fa wan papa e gi en pikin trangaleri.”—Deuteronomium 8:5.
Ma wan prenspari pisi fu na agersitori fu na apostel Paulus, ben abi fu du nanga a syatu pisi ten di a leriman ben abi a frantwortu fu luku a pikin. Te a pikin ben tron wan bigi sma kaba, dan a no ben abi fu du moro san a leriman fu en ben taigi en. A Griki historia skrifiman Senofon (431-352 b.G.T.) ben skrifi: „Te wan boi no de wan pikin-nengre moro èn a te a e kon tron wan yonkuman, dan en papa nanga mama èn sosrefi tra sma, e puru a frantwortu fu en [leriman] nanga en [skoromeester]. A boi no abi fu du moro san den taki, ma a kan du san ensrefi wani.”
Na so a ben de tu nanga a Wet di Gado gi Moses. Sma ben abi fu hori densrefi na a Wet fu wan syatu pisi ten nomo, „fu tyari sondu kon na krin, teleki a pikin [Yesus Krestes] di kisi a pramisi ben o doro”. Na apostel Paulus ben fruklari taki gi den Dyu, a Wet ben de leki wan ’leriman di e tyari den go na Krestes’. Efu den Dyu fu a ten fu Paulus ben wani taki Gado feni den bun, dan den ben musu frustan taki Gado gebroiki Yesus fu meki a wani fu en kon tru. Te den ben o frustan dati, dan a leriman ben du en wroko kaba, namku taki a meki Galasiasma 3:19, 24, 25.
den kon sabi suma na a Krestes.—A Wet di Gado gi den Israelsma ben bun dorodoro. A Wet ben du soifri san Gado ben seti en fu du, namku fu kibri en pipel èn fu meki den frustan den hei markitiki fu en (Romesma 7:7-14). A Wet ben de wan bun leriman. Ma gi son sma di ben musu hori densrefi na a Wet fu man kisi kibri, a Wet ben de wan hebi. Fu dati ede, Paulus ben skrifi taki te a reti ten fu Gado doro, ’Krestes ben o bai wi puru na ondro a fluku fu a Wet’. A Wet ben de wan „fluku”, fu di den Dyu di ben de sondusma, ben musu gi yesi na markitiki di den no ben man hori densrefi dorodoro na den. Den Dyu ben musu hori densrefi finifini na ala den sani di a Wet ben taki. Te wan Dyu ben erken taki a frulusu-ofrandi fu Yesus bun moro leki a Wet, dan a no ben abi fu hori ensrefi moro na den wet fu a leriman.—Galasiasma 3:13; 4:9, 10.
Fu dati ede, di Paulus ben taki dati a Wet di Gado gi Moses de leki wan leriman, dan a ben wani tyari kon na krin taki a Wet ben leri den Dyu fa fu tyari densrefi, èn taki den ben abi fu hori densrefi fu wan syatu pisi ten nomo na a Wet. A no te wan sma e hori ensrefi na a Wet, Yehovah e feni en bun. Ma Yehovah e feni wan sma bun te a e erken Yesus èn te a e poti bribi na ini en.—Galasiasma 2:16; 3:11.
[Faki/Prenki na tapu bladzijde 21]
„DEN SMA DI ABI A FRANTWORTU FU LUKU DEN PIKIN” NANGA „DEN FUTUBOI DI ABI A FRANTWORTU FU NA OSO”
Boiti taki na apostel Paulus ben skrifi fu a leriman, a ben gebroiki na agersitori tu fu „den sma di abi a frantwortu fu luku den pikin”, nanga „den futuboi di abi a frantwortu fu na oso”. Na ini Galasiasma 4:1, 2 wi e leisi: „Solanga a sma di musu kisi wan gudu, na wan pikin-nengre ete, a no e difrenti kwetikweti fu wan srafu, awansi en na masra fu ala sani; ma a de na ondro den sma di abi a frantwortu fu luku den pikin èn na ondro den futuboi di abi a frantwortu fu na oso, teleki a dei doro di en papa ben abi na prakseri.” A wroko fu „den sma di abi a frantwortu fu luku den pikin” nanga a di fu „den futuboi di abi a frantwortu fu na oso”, ben e difrenti fu a wroko fu wan leriman. Ma a tori di Paulus ben wani tyari kon na krin, ben de a srefi.
Soleki fa a wet fu Rome ben taki, dan lanti ben gi ’wan sma di abi a frantwortu fu luku pikin’, a wroko fu sorgu gi wan pikin di no abi papa nanga mama, èn fu luku den moni afersi fu a pikin teleki a kon bigi. Soleki fa Paulus e taki, dan aladi a pikin ben de „masra” fu a famirigudu fu en, toku solanga a ben de wan pikin ete, a ben de leki wan srafu di no abi reti tapu a famirigudu.
Na a tra sei, wan „futuboi di abi a frantwortu fu na oso” ben de wan sma di ben abi a frantwortu fu luku den moni afersi fu na osofamiri. A Dyu historia skrifiman Flavius Josephus ben taki dati wan yonkuman di nen Hyrkanus, ben aksi en papa fu seni wan brifi gi a futuboi di abi a frantwortu fu na oso. Na ini a brifi dati a futuboi ben o kisi primisi fu gi Hyrkanus moni so taki a ben kan bai ala sani di a ben abi fanowdu.
Neleki fa wan pikin di no ben tron wan bigisma ete, no ben man du san a wani te wan leriman ben abi a frantwortu fu en, na so a ben de tu nanga wan pikin te ’wan sma de di abi a frantwortu fu luku en’, noso te wan „futuboi di abi a frantwortu fu na oso” ben e luku en. Tra sma ben taigi a pikin san a ben musu du, teleki a dei doro te a papa feni taki a pikin bigi kaba.
[Prenki na tapu bladzijde 19]
Wan prenki fu wan leriman nanga en tiki, na tapu wan Griki prapi fu owruten
[Sma di abi a reti fu a prenki]
National Archaeological Museum, Athens
[Prenki na tapu bladzijde 19]
Wan kan fu a di fu feifi yarihondro b.G.T. pe wan prenki de na tapu fu wan leriman (nanga en tiki) di e luku fa a pikin di a abi a frantwortu fu en, e kisi leri di abi fu du nanga puwema èn nanga poku
[Sma di abi a reti fu a prenki]
Bildarchiv Preussischer Kulturbesitz/Art Resource, NY