PIKINMORO 2000 yari pasa, wan man di no ben du nowan ogri dede so taki trawan ben kan kisi libi. A sani disi pasa na a Dyu Paskafesa fu a yari 33. Suma ben de a man dati? Dati ben de Yesus fu Nasaret. Èn suma na den sma di kan kisi wini fu a tumusi bun sani disi di a du? A heri libisma famiri. Wan bijbeltekst di furu sma sabi e taki syatu fa na ofrandi dati kan meki sma kisi libi. A tekst e taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:16.

Aladi furu sma sabi a tekst disi, toku furu fu den no sabi san a wani taki trutru. Den e aksi densrefi: ’Fu san ede wi abi a srakti-ofrandi fu Krestes fanowdu? Fa a dede fu wán man nomo kan sorgu taki libisma no dede fu têgo?’ Bijbel e gi krin èn bun piki tapu den aksi disi.

Son sma e bribi taki Gado meki libisma fu libi wan syatu pisi ten na grontapu, fu kisi tesi, fu prisiri pikinso, èn fu dede te fu kaba so taki den kan go na wan moro bun presi. Te yu e poti prakseri na a denki dati, dan a gersi leki na Gado wani taki libisma e dede. Ma Bijbel e sori taki wan tra reide de fu san ede libisma e dede. A e taki: „Wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu” (Romesma 5:12). A vers disi e sori taki libisma e dede fu di den abi sondu. Ma suma na a „wán man” di meki taki libisma kisi sondu, so taki den e dede?

Wan buku e sori taki furu sabiman e bribi taki ala libisma na bakapikin fu wán sma, èn Bijbel e sori krin suma na a „wán man” dati (The World Book Encyclopedia). Na Genesis 1:27 wi e leisi: „Gado meki libisma leki wan prenki fu ensrefi. Soleki fa Gado de, na so a meki libisma. A meki wan man nanga wan uma.” Na so Bijbel e sori taki den fosi tu libisma ben de den moro prenspari sani di na Almakti Gado ben meki na grontapu.

A buku Genesis e fruteri tra finifini tori di e sori moro fara fa sani waka nanga libisma, baka di Yehovah Gado meki a fosi libisma. San moi fu si, na taki na ini a heri tori fu Genesis, Gado taki fu dede wán leisi nomo, èn dati na di a taigi a fosi libisma san ben o pasa nanga en te a no ben o gi yesi na a Gado fu en (Genesis 2:16, 17). Gado ben wani taki libisma musu libi na ini  wan moi paradijs na grontapu, pe den ben o de koloku èn gosontu fu têgo. A no ben wani taki den ben musu kon owru, fu dede te fu kaba. Ma fa a du kon taki libisma de na ondro a makti fu dede?

Genesis kapitel 3 e sori taki den fosi libisma ben sabi san den ben e du di den teki a bosroiti fu trangayesi Yehovah Gado, a Sma di gi den libi. Fu dati ede, Gado strafu den soleki fa a ben taigi den na fesi kaba. A taigi a man: „Na fu doti yu meki, èn na doti yu o tron baka” (Genesis 3:19). Soleki fa Gado ben taki, den tu sma di ben trangayesi en, dede te fu kaba.

Ma a no den tu libisma dati wawan ondrofeni den takru bakapisi fu a sani di den du. Fu di den ben trangayesi Gado, meki den bakapikin fu den no ben o de volmaakti. Yehovah sori san a ben abi na prakseri gi den bakapikin disi, di a taigi Adam nanga Eva a sani disi: „Meki pikin èn kon furu, teleki unu kon lai na grontapu, èn basi ala sani na grontapu. Basi den fisi na ini se, den meti di man frei na loktu, nanga ibri sortu meti di e kroipi na gron” (Genesis 1:28). Baka wan pisi ten, heri grontapu ben o lai nanga libisma di ben o de koloku trutru èn di no ben o dede. Ma Adam, a fositen tata fu den, noso a „wán man”, seri den leki srafu fu sondu, èn a no de fu taki dati den ben o dede te fu kaba. Na apostel Paulus, wan bakapikin fu a fosi man disi, ben skrifi: „Mi e du sani soleki fa a sondu skin wani, iya, mi de leki wan srafu di seri na sondu.”​—Romesma 7:14.

Neleki fa ogri-ati sma pori diridiri skedrei no so langa pasa, na so a sondu di Adam du tyari pori kon gi libisma, den tumusi moi sani di Gado meki. Den pikin fu Adam ben kisi den eigi pikin, bakaten den pikin dati kisi pikin, èn so moro fara. Ibri tron te tra libisma ben e gebore, den ben e gro kon bigi, den ben e meki pikin, èn den ben e dede te fu kaba. Fu san ede ala den sma dati dede na ini a ten di pasa? Bika den alamala na bakapikin fu Adam. Bijbel e taki: „A sondu fu wán sma meki taki furu sma dede” (Romesma 5:15). Fu di Adam du na ogri sani disi nanga en eigi bakapikin, meki den e ondrofeni takru bakapisi. Iya, den e kon siki, den e kon owru, den abi a firi fu du ogri, èn den e dede srefi. Èn den bakapikin dati, na wi alamala.

Na ini a brifi di na apostel Paulus ben skrifi gi den Kresten na ini Rome, a ben taki fu a sari situwâsi di en nanga ala tra sondu libisma de na ini, èn fu a hebi strei di wi musu strei fu man kakafutu gi den takru bakapisi di sondu tyari  kon. A ben bari: „Ke, pôti fu mi! Suma sa frulusu mi fu a skin di e dede na a fasi disi?” Dati na wan moi aksi, a no so? Suma ben o puru Paulus na ini katibo fu sondu nanga dede? Èn suma ben o puru ala den tra sma di ben e angri fu komoto na ini a katibo dati? Paulus srefi gi a piki: „Mi e taki Gado tangi nanga yepi fu wi Masra Yesus Krestes!” (Romesma 7:14-25) Iya, wi Mekiman seti sani nanga yepi fu en Manpikin, Yesus Krestes, so taki wi kan kisi frulusu.

Yesus ben sori sortu frantwortu a abi fu puru libisma na ini katibo fu sondu di e tyari dede kon. A taki: ’A Manpikin fu libisma kon fu gi en libi leki wan lusu-paiman fu frulusu furu sma’ (Mateyus 20:28, futuwortu). Fa a libi fu Yesus de leki wan lusu-paiman? Fa a dede fu en e tyari wini kon gi wi?

Bijbel e taki dati Yesus „no ben abi sondu” èn taki a ’no ben abi sondu leki den sondari’. En heri libi langa, Yesus du finifini san a Wet fu Gado ben e taki (Hebrewsma 4:15; 7:26). Fu dati ede, Yesus no dede fu di a ben abi sondu noso fu di a ben trangayesi Gado neleki Adam (Esekièl 18:4). Na presi fu dati, Yesus ben de klariklari fu dede, aladi a no ben frudini dati. A du disi so taki libisma kan kisi frulusu fu sondu nanga dede, soleki fa en Tata wani. Soleki fa wi ben taki kaba, Yesus ben de klariklari fu kon na grontapu fu „gi en libi leki wan lusu-paiman”. Fu di Yesus ben abi lobi, meki a ben de klariklari fu „dede gi ala sma”, èn noiti ete wan sma sori a lobi disi.—Hebrewsma 2:9.

A libi di Yesus gi leki ofrandi ben warti a srefi leki a libi di Adam lasi di a sondu. San ben de a bakapisi fu a dede fu Yesus? Yehovah teki na ofrandi dati leki ’wan lusu-paiman gi ala sma’ (1 Timoteyus 2:6). Dati meki Gado gebroiki a waarde fu a libi fu Yesus fu bai libisma puru na ini katibo fu sondu nanga dede.

Ibri tron baka Bijbel e taki fu a prenspari sani disi di wi Mekiman du fu di a lobi libisma. Paulus ben memre Kresten taki Gado ’bai den fu di A pai gi den’ (1 Korentesma 6:20; 7:23). Petrus ben skrifi taki Gado no gebroiki gowtu noso solfru fu frulusu Kresten fu wan libi di e tyari dede kon, ma a gebroiki a brudu fu en Manpikin fu du dati (1 Petrus 1:18, 19). Nanga yepi fu a frulusu-ofrandi fu Krestes, Jehovah seti sani fu frulusu libisma fu têgo dede.

Disi na san na apostel Yohanes ben skrifi fu a frulusu-ofrandi fu Krestes di e tyari bun furu wini kon gi wi: „[Yesus Krestes] na wan ofrandi di e tapu den sondu fu wi èn di e meki wi kon bun baka nanga Gado, ma a no wan ofrandi gi den sondu fu wi wawan, ma sosrefi gi den sondu fu heri grontapu” (1 Yohanes 2:2). Iya, ala libisma kan kisi wini fu a frulusu-ofrandi fu Krestes. Disi wani taki dati ala sma sa kisi wini fu a warti seti disi, sondro taki den abi fu du wan sani? Nôno. Prakseri den neigi man na ini  a fosi artikel. Den sma di ben e suku fu yepi den man disi di ben fasi na ondrogron, saka wan koi go gi den fu puru den drape, ma ibriwan fu den man disi ben musu go na ini a koi. Na so a de tu taki, te sma wani kisi wini fu a frulusu-ofrandi fu Krestes, dan den no kan sidon wakti nomo fu kisi blesi fu Gado. Den musu du wan sani.

San Gado wani taki den musu du? Yohanes 3:36 e taki: „A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu.” Gado wani taki wi musu bribi na ini na ofrandi fu Krestes. Ma wi musu du moro. „Te wi e tan hori wisrefi na den komando fu en, dan wi sabi taki wi kon sabi en” (1 Yohanes 2:3). Sobun, a de krin taki efu wi wani kisi frulusu fu sondu nanga dede, dan a de tumusi prenspari taki wi e bribi na ini a frulusu-ofrandi fu Krestes, èn taki wi e hori wisrefi na den komando fu en.

Wan prenspari fasi fa wi kan sori taki wi e bribi na ini a frulusu-ofrandi fu Krestes, na te wi e memre a dede fu en, soleki fa a komanderi wi. Na so fasi wi e sori warderi gi san Yesus du gi wi. Bifo Yesus dede, a nyan wan spesrutu nyanyan nanga den getrow apostel fu en, èn a nyanyan dati e prenki wan sani. Na a okasi dati Yesus ben taigi den: „Tan du disi fu memre mi” (Lukas 22:19). Yehovah Kotoigi trutru e warderi a matifasi di den abi nanga a Manpikin fu Gado, èn den e gi yesi na a komando di Yesus gi den. A yari disi, a Memrefesa fu a dede fu Yesus Krestes sa hori tapu satra 22 maart, te son dongo. Wi e gi yu wan switi kari fu kon na a spesrutu konmakandra dati di wi e hori fu di wi wani gi yesi na a komando fu Yesus. Yehovah Kotoigi na ini a birti fu yu kan fruteri yu o lati èn pe a konmakandra dati sa hori. Na a Memrefesa yu sa kon sabi san yu musu du moro fara so taki a frulusu-ofrandi fu Krestes kan frulusu yu fu a sondu fu Adam di e tyari dede kon gi wi.

Na ini a ten disi, wan pikin grupu sma nomo e frustan èn e warderi a bigi sani di den Mekiman nanga a Manpikin fu En du fu frulusu den, so taki den no kisi pori. Den sma di e bribi na ini na ofrandi fu Krestes de koloku trutru. Na apostel Petrus ben skrifi disi fu den Kresten brada nanga sisa fu en: „Unu e bribi na ini [Yesus], èn unu breiti srefisrefi, iya, unu e prisiri pasa marki, bika te fu kaba a bribi fu unu sa meki unu kisi frulusu” (1 Petrus 1:8, 9). Te yu e kisi lobi gi Yesus Krestes, èn te yu e kon bribi na ini a frulusu-ofrandi fu en, dan yu sa de koloku trutru nownowde èn yu sa abi a howpu fu kisi frulusu fu sondu nanga dede.