Fu san ede Bijbel musu tiri wi libi?
San Bijbel e taki fu a tori
Fu san ede Bijbel musu tiri wi libi?
„Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti.”—2 Timoteyus 3:16.
PE YU e suku rai di kan yepi yu na ini yu libi? Na ini a ten disi bun furu rai de fu feni fu iniwan tori di yu wani kon sabi. Ma toku, furu sma e suku rai na ini Bijbel, di skrifi sensi owruten.
Ma moro furu sma no e si Bijbel leki wan prenspari buku, spesrutu na ini a ten disi pe sma kan kon sabi furu difrenti tori èn pe den kan feni ala sortu nyun-modo wrokosani. Son lespeki leriman nanga sabidensiman e feni taki den rai di skrifi na ini Bijbel no e fiti moro na ini a ten disi. Den sma disi abi leti? Te wi e luku ala den difrenti sortu rai di wi kan feni na ini a ten disi, dan a de fanowdu ete taki wi e suku rai na ini Bijbel?
Bijbel na wan buku fu tru tori
Wan leisi Yesus Krestes ben e rostu na wan watrapeti èn a ben abi wan takimakandra nanga wan Samaria uma. A ben taigi na uma: „Gado na wan Yeye èn den sma di e anbegi en, musu anbegi en nanga yeye èn nanga waarheid” (Yohanes 4:24). Den wortu disi e sori taki wan fasi fu anbegi de di Gado feni bun. Efu wi wani taki wi e anbegi Gado nanga waarheid, dan na anbegi fu wi musu kruderi nanga Bijbel, a buku pe Gado tyari kon na krin suma na en. Na ini Gado Wortu, a waarheid skrifi.—Yohanes 17:17.
Ma furu kerki de di e taki dati den e bribi na ini Bijbel, èn soleki fa a sori ibriwan fu den e Mateyus 7:21-23.
leri difrenti sani. Leki bakapisi fu dati, sma e bruya fu di den no sabi san Bijbel e leri trutru. Yesus na Gado, noso a de a Manpikin fu Gado? Sma e libi go doro baka te den dede, noso den no e libi go doro? Hel na wan trutru presi pe sma e kisi skin-ati, baka te den dede? Satan na wan trutru sma? San a wani taki fu de wan Kresten? A de prenspari gi Gado san wi e du èn san wi e denki? A fowtu te sma di lobi makandra trutru, abi seks fosi den trow? A fowtu fu dringi sopi? Difrenti kerki e taki dati den e leri sma tru tori te a abi fu du nanga den afersi disi. Ma nofo tron den difrenti kerkileri no e kruderi nanga makandra. A no kan de so taki ala den leri disi tru.—Ma fa yu kan kon sabi den tru tori di abi fu du nanga Gado èn nanga a fasi fu anbegi di a feni bun? Kon meki wi taki dati yu musu du wan oparâsi fu di yu abi wan seryusu siki. San yu ben o du? Efu yu kan, dan yu ben o du tranga muiti fu feni a moro bun datra di kan du na oparâsi disi. Yu ben o ondrosuku efu a sabi du en wroko bun èn efu a abi ondrofeni. Baka dati yu ben o suku fu miti en, èn yu ben o taki nanga en. Te fu kaba, te yu abi na overtoigi taki a datra bun fu di yu abi den buweisi gi dati, dan yu ben o poti yu frutrow tapu en, èn yu ben o meki a koti yu. Kande tra sma e feni taki a datra no bun. Ma fu di yu abi ala den buweisi, meki yu e bribi taki a datra disi bun.
Na so a de tu nanga Bijbel. Efu yu e ondrosuku den buweisi na ini finifini èn yu e du dati nanga wan opregti ati, dan yu kan kisi wan moro tranga bribi na ini Gado èn na ini Bijbel (Odo 2:1-4). Efu yu wani kon sabi sortu anbegi Gado e feni bun, dan yu musu bosroiti san yu o du. Yu kan suku fu kisi tiri fu di yu o poti prakseri na den difrenti leri fu libisma di no e kruderi nanga makandra, noso yu kan suku fu kisi tiri fu di yu o poti prakseri na den sani di Bijbel e taki.
Bijbel soifri èn a e gi bun rai
Te yu o ondrosuku Bijbel finifini, dan yu o kisi furu buweisi di e sori taki ’Gado srefi ben meki sma skrifi ala den sani di de na ini Gado Buku; èn den sani disi bun’ (2 Timoteyus 3:16, 17). Fu eksempre, Bijbel abi furu profeititori na ini di e taki finifini fa sani ben o waka. Historia e sori taki den profeititori disi kon tru (Yesaya 13:19, 20; Danièl 8:3-8, 20-22; Mika 5:2). Aladi Bijbel a no wan sabidensi buku, toku a e taki soifri fu sani di abi fu du nanga sabidensi tori. Bijbel abi tori na ini di e taki fu a naturu èn fu a fasi fa libisma kan tan gosontu. Den sani disi skrifi dusundusun yari bifo sabidensiman ben sabi den sani dati.—Lefitikus 11:27, 28, 32, 33; Yesaya 40:22.
Boiti dati, Bijbel e yepi wi tu fu teki koni bosroiti. Na ini Bijbel wi kan feni furu bun rai di abi fu du nanga na osofamiri libi, a gosontu fu libisma, a fasi fa sma kan firi bun, a fasi fa sma kan du bisnis, nanga tra afersi fu na aladei libi. Odo 2:6, 7 e taki: „Yehovah srefi e gi koni; na en e gi sabi nanga a koni fu man si sani krin. Èn gi den opregtisma a sa kibri koni leki wan gudu.” Te yu e suku rai na ini Bijbel fu tiri yu na ini yu libi, dan yu o man gebroiki yu frustan fu man si sani krin, so taki yu „kan sabi san bun èn san no bun”.—Hebrewsma 5:14.
Gado Wortu e yepi wi tu fu kon frustan san na a marki fu a libi (Yohanes 17:3; Tori fu den Apostel 17:26, 27). Bijbel e taki fu san ede a situwâsi na grontapu de so (Mateyus 24:3, 7, 8, 14; 2 Timoteyus 3:1-5). Na ini Bijbel, Gado e sori wi fa a sa puru ogridu na a grontapu disi. Boiti dati, a e sori wi fa A sa meki libisma de gosontu dorodoro èn fa den sa libi fu têgo.—Yesaya 33:24; Danièl 2:44; Openbaring 21:3, 4.
Milyunmilyun sma ondrofeni kaba taki Bijbel na trutru wan buku di bun èn di e gi koni rai. Yu kan kon sabi moro fu den buweisi disi na ini A Waktitoren di e sori taki Bijbel na a moro bun buku di kan gi wi rai na ini wi libi.