Wan brifi fu a Dominikan Republiek

„Noiti ete sma sori so furu lobi gi mi”

A WIKI disi Niurka ben hori wan Bijbel takimakandra fu a fosi leisi na ini wi gemeente. A ben sreka ensrefi, fu di a ben skrifi san a ben o taki na ini Braille (wan spesrutu fasi fu skrifi di e meki taki brenisma man leisi en nanga den finga). Baka dati a ben leri den sani di a ben skrifi na ede. Mi ben de nanga en na tapu a podium èn mi ben du neleki mi na wan sma di wani sabi moro fu den tru tori fu Bijbel. Mi ben e taki na ini wan mikrofon èn fu di a ben poti wan sani na en yesi, meki a ben man yere mi sten. Di wi kaba nanga a takimakandra, dan a publiki naki anu so tranga taki Niurka ben man yere den, èn na so den sori warderi gi a muiti di Niurka du. Na a lafu fu en, yu ben man si taki a ben prisiri èn a ben firi bun. Misrefi ben breiti tu. Iya, a zendelingwroko na wan wroko di e tyari blesi kon trutru!

Mi e memre a fosi leisi ete di mi miti Niurka. Dati ben de tu yari pasa. Baka di wi ben rèi wan afu yuru na tapu wan tu santi pasi, dan mi si en fu a fosi leisi. A ben sidon na tapu a balkon fu a pikin udu oso di ben abi wan frustu sinki daki. Yu ben man yere èn smeri den krabita, den konikoni nanga den dagu. Niurka ben sidon so brokoskin, èn a ben saka en ede. Yu ben kan si taki a ben firi taki nowan sma ben e broko en ede nanga en. Na a ten dati a ben abi 34 yari, ma a gersi leki a ben de moro owru.

Mi fasi en safri na en skowru èn a opo en ede luku wi, aladi a breni 11 yari kaba. Mi bari na ini en yesi fu taigi en suma na mi èn a tra sma di ben preiki makandra nanga mi. Bakaten, wi kon sabi taki Niurka abi a siki di nen syndroom van Marfan, di e meki taki a abi furu pen. Niurka abi hebi sukrusiki di e meki taki a musu luku furu tron o hei a sukru fu en de.

Di mi poti wan Bijbel na ini en anu, dan a ben sabi san na en èn a taki dati a ben lobi leisi Bijbel bifo a kon breni. Ma fa mi ben o man leri a mofina uma disi di de en wawan èn di siki, fu kon sabi den moi tru tori fu Gado Wortu di e trowstu sma? Fu di Niurka sabi den letter fu na alfabet, meki mi bigin leri en fa fu firi nanga en anu san na den letter. Mi ben du dati nanga yepi fu plastik letter di mi ben poti na ini en anu. Heri esi a ben sabi den letter. Baka dati, a ben hori mi anu èn na so fasi a ben e firi sortu letter mi ben e meki nanga mi anu na ini a Dofusma-tongo fu Amerkankondre. Safrisafri a ben leri moro fu a Dofusma-tongo. Fu di mi srefi ben bigin leri a tongo dati no so langa ete, meki ibri leisi te mi ben o studeri nanga en, a ben teki furu yuru langa fu sreka misrefi na fesi. Fu di mi nanga Niurka ben wani leri a tongo disi trutru, meki wi ben leri en gaw.

Niurka ben man go na fesi moro di wan organisâsi di e yepi sma, gi en wan wrokosani fu  meki a yere moro bun. Aladi a no ben de wan kefalek wrokosani, toku a ben yepi en furu. Fu di a ben breni èn a no ben man yere so bun, meki a no ben abi demakandra nanga sma. Ma Yehovah en santa yeye ben abi krakti tapu en frustan nanga en ati, fu di a ben kisi sabi, howpu nanga lobi. A no langa baka dati, Niurka gebroiki wan wakatiki so taki a ben man waka na ini a birti fu en fu fruteri trawan den tru tori fu Bijbel.

Niurka e studeri Bijbel nanga wan tanta fu en èn nanga tu tra famiriman fu en. A e sreka ensrefi bun fu di a e leri ibri les na ede. Den studenti fu en e leisi wan paragraaf èn baka dati Niurka e leisi na aksi na ini a Braille buku fu en. A sma di e go makandra nanga en fu preiki, e meki Niurka kon sabi san a studenti piki fu di a e taki tranga na ini en yesi, noso fu di Niurka e firi nanga en anu san a sma e taki na ini Dofusma-tongo.

A heri gemeente e yepi Niurka èn den e gi en deki-ati. Wan tu fu den Kresten brada e yepi en fu kon na den gemeente konmakandra èn den bigi konmakandra. Tra Kresten brada nanga sisa e go makandra nanga en na ini a preikiwroko. No so langa pasa Niurka taigi mi: „Noiti ete sma sori so furu lobi gi mi.” Niurka wani teki dopu na a distrikt kongres fu wi di e kon.

Wan dei di wi ben rèi go na ini a pasi pe Niurka e libi, wi ben si en sidon na ini a son na tapu a balkon. A no ben e saka en ede moro leki fosi, ma a ben e lafu. Mi ben aksi en fu san ede a e lafu. A piki mi taki: „Mi ben e denki fu a ten di e kon te grontapu sa de wan paradijs. Èn mi e si misrefi drape kaba.”

[Prenki na tapu bladzijde 25]

Niurka nanga wan tu memre fu wi gemeente, fesisei fu a Kownukondre zaal

[Prenki na tapu bladzijde 25]

Niurka e fruteri trawan den sani di a leri