Sma di ondrofeni ogri wini wan krutu-afersi
Sma di ondrofeni ogri wini wan krutu-afersi
TAPU 3 mei 2007, a Hei Krutubangi fu Europa, na ini Straatsburg, na Fransikondre, teki wan bosroiti na ini wan krutu-afersi di ben abi fu du nanga Yehovah Kotoigi na ini a Republiek Georgia. Ala den krutuman fu a Krutubangi dati, di e feti gi den reti fu libisma, ben gi den Kotoigi reti èn na so den Kotoigi wini a krutu-afersi disi. A Krutubangi ben taki dati sma no handri bun nanga den Kotoigi, èn aladi sma abi a fri fu anbegi, toku den tapu den Kotoigi fu du dati. A Krutubangi ben krutu sosrefi a tirimakti di ben e tiri fosi na ini Georgia, fu di den no du noti nanga den sma di du ogri nanga den Kotoigi. San meki taki a Krutubangi teki a bosroiti disi?
Tapu 17 oktober 1999, sowan 120 brada nanga sisa fu a Gemeente Gldani fu Yehovah Kotoigi na ini a mamafoto Tbilisi, kon makandra na ini vrede fu anbegi Gado. Wantronso, wan bigi grupu ogrisma broko kon na ini a konmakandra presi. A fesiman fu a grupu ben de Vasili Mkalavishvili, wan man di sma ben puru leki priester fu na Orthodox Kerki. A grupu sma dati ben abi kodya nanga isri kroisi na den, èn na wan ogri-ati fasi den bigin naki den sma di ben de na a konmakandra presi. Den sma drape kisi mankeri, èn furu fu den kisi hebi mankeri srefi. Den ogrisma naki wan uma na so wan ogri-ati fasi, taki den broko wan fu en ai. Sowan 16 sma ben musu go na ati-oso fu kisi datrayepi. Di wan tu fu den Kotoigi go na skowtu-oso fu suku yepi, dan a skowtu-komandanti kon na den, èn a taigi den taki efu a ben de drape, a ben o du moro ogri-ati sani nanga den! Wan man na ini a grupu ben felem fa den sma ben e du ogri nanga den Kotoigi, èn bakaten den sori a felem disi na telefisi pe sma ben kan si krin suma na den sma di du ogri nanga den Kotoigi. *
Den Kotoigi di ondrofeni ogri, tyari den sma dati go na skowtu, ma skowtu no du noti nanga den. A skowtu di ben musu ondrosuku a tori disi ben taki dati a no ben man ondrosuku a tori sondro fu teki sei, fu di a de fu na Orthodox Kerki. Fu di skowtu nanga lanti no du noti ini a tori disi, meki den ogri-ati kerkiman disi kisi moro deki-ati fu du ogri nanga Kotoigi. Den du disi moro leki wán hondro leisi.
Sobun, tapu 29 yuni 2001, Yehovah Kotoigi tyari a tori disi go na a Hei Krutubangi fu Europa di e feti gi den reti fu libisma. * Tapu 3 mei 2007, a Krutubangi leisi a lasti krutu pe a sori fa a grupu sma handri na wan ogri-ati fasi nanga den Kotoigi, èn a krutu den lantiman fu Georgia di no du noti na ini na afersi disi. A Krutubangi ben taki: ’Den lantiman ben musu ondrosuku wantewante efu den sma ben du den ogri-ati sani dati trutru nanga den Kotoigi.’ A Krutubangi ben taki moro fara: „Fu di den lantiman no du noti, meki a kan pasa taki sma no abi so furu frutrow moro na ini lanti wet, èn den kan tweifri efu a tirimakti e hori ensrefi na den wet fu lanti.”
A Krutubangi taki te fu kaba: „Tapu 17 oktober 1999, a grupu sma du ogri fu a fosi leisi nanga den Yehovah Kotoigi. Fu di lanti no du noti fu ondrosuku a tori disi, meki den ogri-ati sma kisi deki-ati fu du moro ogri nanga Yehovah Kotoigi na ini heri Georgia.”
Fu dati ede, den sma di ondrofeni ogri wini a krutu-afersi. Boiti dati, a tirimakti fu Georgia musu pai ala den kostu di kon leki bakapisi fu na ogri di sma du nanga den memre fu a Gemeente Gldani, èn a tirimakti musu pai sosrefi den afkati nanga den tra kostu di abi fu du nanga a krutu-afersi. Aladi Yehovah Kotoigi na ini Georgia breiti taki den ogri-ati sani no e pasa so furu moro nanga den, toku den breiti moro taki a bosroiti fu a Krutubangi e sori krin taki den abi a reti fu kon makandra na ini vrede fu anbegi Gado. Den e taki den hemel Tata, Yehovah Gado, tangi taki sani waka so, fu di den ben man si taki A ben e tiri den èn a ben kibri den na a ten di den kisi den tesi disi.—Psalm 23:4.
[Futuwortu]
^ paragraaf 3 Fu sabi moro fu a tori disi, luku Ontwaakt! fu 22 yanuari 2002, bladzijde 18-24, di Yehovah Kotoigi tyari kon na doro.
^ paragraaf 5 A Hei Krutubangi fu Europa di e feti gi den reti fu libisma, na wan pisi fu a Raad van Europa (wan organisâsi fu difrenti kondre na ini Europa). Na organisâsi disi e luku taki sma e hori densrefi na den wet fu na Europese conventie tot bescherming van de rechten van de mens en de fundamentele vrijheden (wan tra organisâsi di e luku taki sma e hori densrefi na den reti fu libisma èn di e sorgu taki sma de fri). Tapu 20 mei 1999, a tirimakti fu Georgia agri fu hori ensrefi na den wet fu den organisâsi disi èn na so a ben musu du san den wet e taki.