KROSIBEI fu Pittsburgh, Pennsylvania, na Amerkankondre, wan mijn ben kon sungu wantronso. Neigi wrokoman ben de 73 meter ondrogron, èn den ben fasi na ini wan pikin pisi fu a mijn pe a watra no ben kren so hei. Dri dei baka di a rampu disi pasa, den komoto na ini a mijn, èn noti no ben pasa nanga den. Fa den man dati komoto na ini a situwâsi dati?

Sma ben man feni den man disi nanga yepi fu karta fu a mijn èn nanga yepi fu tra wrokosani. Den boro wan olo di ben bradi 65 centimeter, èn den saka wan smara langa koi go na ini a pikin pisi fu a mijn pe den man disi ben de. Wán fru wán, sma hari den man disi komoto na ini a presi pe den ben kan lasi den libi. Den neigi man disi ben breiti srefisrefi taki sma puru den na ini a situwâsi dati.

Furu fu wi noiti no sa fasi na ondrogron neleki den neigi man di ben e wroko na ini a mijn, èn kande noiti wan rampu miti wi di ben kan meki taki wi lasi wi libi. Ma toku wi alamala musu kisi frulusu fu di wi no man wai pasi gi den takru bakapisi di siki nanga owrudei e tyari kon gi wi, èn wi no man wai pasi tu gi dede. A getrow famiri edeman Yob, ben taki: „Libisma, di wan uma meki, e libi syatu èn a abi furu problema. A e opo kon leki wan bromki èn den e koti en puru, èn a e hari gowe leki a skaduw èn a no e tan” (Yob 14:1, 2). Now, sowan 3500 yari baka di Yob taki den wortu disi, wi kan si taki a ben abi leti, bika suma fu wi kan wai pasi gi dede? Awinsi pe wi e libi, èn awinsi fa wi e pruberi fu libi gosontu, toku a de fanowdu taki wi e kisi frulusu fu pina, owrudei, nanga dede.

Sabiman nanga tra sma e meki furu muiti fu yepi sma fu libi moro langa. Wan organisâsi e taki dati a abi leki marki fu feni wan fasi fu „sorgu taki sma no e dede wantronso” èn a wani „yepi den memre fu en fu sorgu taki sma e tan na libi fu ala ten”. Ma aladi sabiman kon sabi wan lo nyun sani èn aladi sma e angri fu tyari kenki kon, toku furu libisma no e libi pasa 70 noso 80 yari, soleki fa Moses ben taki 3500 yari pasa.—Psalm 90:10.

Kande yu no e agri nanga a fasi fa Yob ben si libi nanga dede, ma a de krin taki o moro yu e kon owru, o moro yu sosrefi sa „hari gowe leki a skaduw”. Iya, na wan agersifasi yu sa hari gowe farawe fu yu mati, yu famiri, yu oso, èn fu ala den sani di yu ben man du, èn te fu kaba yu sa dede. A koni Kownu Salomo fu Israel fu owruten ben skrifi: „Den libiwan sabi taki den sa dede; ma den dedewan no sabi notinoti, èn den no e kisi pai moro tu, bika sma no e memre den moro.”—Preikiman 9:5.

Soleki fa Bijbel e sori, dan a de wan sari sani taki dede „tiri leki kownu”. Fu taki en leti, dede tiri libisma leki wan ogri-ati tiriman. Iya, dede na a lasti feanti fu libisma, èn a de fanowdu taki libisma e kisi frulusu fu a feanti disi (Romesma 5:14; 1 Korentesma 15:26). Awinsi o bun sma sabi fu puru trawan na nowtu èn awinsi sortu bun wrokosani den abi fu du dati, toku nowan sma na grontapu man yepi yu fu wai pasi gi dede fu ala ten. Ma a Mekiman fu libisma, Yehovah Gado, seti sani fu du dati.