Yu ben sabi a sani disi?

San ben de a waarde fu den tu sensi fu na uma di lasi en masra na ini dede?

Na ini a fosi yarihondro G.T., den dyu ben musu pai „tu drakmo” leki tempel belasting. Tu drakmo ben de a moni di wan sma ben kisi te a ben wroko tu dei (Mateyus 17:24). Tra fasi leki dati, dan Yesus taki dati den ben e seri tu pikin fowru gi „wan sensi di no warti furu”. A sensi disi na a moni di wan sma e kisi te a ben wroko 45 miniti. Sobun, yu ben kan bai feifi pikin fowru gi tu sensi di no warti furu, èn dati ben de a srefi leki a moni di yu ben kisi te yu ben wroko 90 miniti.—Mateyus 10:29; Lukas 12:6.

A moni di a pôti uma di lasi en masra na ini dede ben poti na a tempel èn di Yesus ben si, no ben furu leki den tu sensi disi. Den tu sensi disi, noso tu lepta, ben de den moro pikin kopro sensi di den Israelsma ben e gebroiki na ini a ten dati. A ben de moro mendri tu leki a moni di yu ben kan wroko na ini 12 miniti.

Yesus Krestes ben taki dati a moni di na uma di lasi en masra na ini dede ben poti, ben furu moro leki a moni di den tra sma ben poti, fu di den ben poti „san ben tan abra fu a moni fu den”. Fu san ede Yesus ben taki disi? A tori e fruteri taki na uma ben abi „tu sensi”. Dati wani taki dati a ben kan poti wán èn hori a trawan gi ensrefi. Ma a no du dati. „A poti ala san a ben abi fu sorgu ensrefi”.—Markus 12:41-44; Lukas 21:2-4.

O ten sma ben kon sabi Saulus leki Paulus?

Na apostel Paulus ben de wan Hebrewsma, ma a ben de wan borgu fu Rome tu (Tori fu den Apostel 22:27, 28; Filipisma 3:5). Sobun, a kan taki fu sensi en pikin-nengre ten a ben abi a Hebrew nen Saulus, èn a nen Paulus di ben sori taki a ben de wan Romesma tu. Wan tu fu den famiriman fu Paulus ben abi Rome nen èn Griki nen (Romesma 16:7, 21). Sosrefi, a ben de wan gwenti taki son Dyu fu a ten dati ben abi tu nen, spesrutu den wan di ben e libi dorosei fu Israel.—Tori fu den Apostel 12:12; 13:1.

Moro leki tin yari baka di a ben tron wan Kresten, dan sma ben sabi na apostel disi moro furu na en Hebrew nen, Saulus (Tori fu den Apostel 13:1, 2). Ma na a fosi preikiwaka fu en na ini a pisi ten fu 47 noso 48 G.T. dan kande a ben e gebroiki a nen Paulus moro furu. A ben kisi a wroko fu preiki a bun nyunsu gi den sma di no ben de Dyu, èn kande a ben feni taki a nen Paulus ben o de moro bun (Tori fu den Apostel 9:15; 13:9; Galasiasma 2:7, 8). A kan tu taki a ben gebroiki a nen Paulus fu di a fasi fa den ben taki a Hebrew nen fu en, Saulus, ben de pikinmoro a srefi leki di fu wan Griki wortu di no bun fu gebroiki. Awansi sortu reide a ben abi fu ben kenki en nen, Paulus ben sori taki a ’ben tron ala sani gi ala sortu sma, so taki a ben kan du iniwan sani di de fanowdu fu frulusu awinsi wan tu sma nomo.’—1 Korentesma 9:22.

[Prenki na tapu bladzijde 12]

Wan lepta soleki fa a de trutru