Yu kan de koloku awinsi sani no e go soleki fa yu wani

SUMA fu unu noiti no firi brokosaka? Srefi wi Papa na hemel, namku Yehovah Gado, ben e sari fu di sani no go soleki fa a ben wani. Fu eksempre, a ben puru den Israelsma na ini katibo na Egepte èn a ben blesi den bogobogo. Ma Bijbel e taki: „Ibri tron baka, den ben e tesi Gado èn den ben e meki a Santawan fu Israel firi sari” (Psalm 78:41). Ma toku, ala ten Yehovah tan „a koloku Gado”.—1 Timoteyus 1:11.

A no de fu taki dati furu sani de di kan meki wi firi brokosaka. San wi kan du fu tan koloku, awinsi wi e kisi fu du nanga den sani disi? San wi kan leri fu a fasi fa Yehovah Gado handri di sani no waka soleki fa a ben wani?

Sani di kan meki wi lasi-ati

„Ten nanga sani di e pasa sondro fu sma fruwakti dati” e miti wi alamala, na so Gado Wortu e taki (Preikiman 9:11). Sondro taki wi e fruwakti dati, wan sma kan du ogri nanga wi, wan ongoloku kan pasa nanga wi, noso wi kan kon siki. Den sani disi kan meki wi sari srefisrefi, èn wi kan lasi-ati. Bijbel e taki tu: „Te a howpu di wan sma abi no man kon tru ete, dan en ati sa kon siki” (Odo 13:12). Te wi e howpu tapu wan bun sani, dan dati e gi wi furu prisiri, ma te a e teki tumusi langa fu a howpu dati kon tru, dan wi kan lasi-ati srefisrefi. Luku na eksempre fu Duncan. * A brada disi ala ten ben wani dini leki zendeling, èn a ben wani tan du a wroko dati. Ma baka di en nanga en wefi ben dini furu yari langa leki zendeling, dan den ben musu drai go baka na a kondre fu den. A e taki: „Noiti ete mi ben brokosaka so. Mi no ben sabi srefisrefi moro san mi ben musu du nanga mi libi. A ben gersi leki a libi no ben e gi noti moro.” Wan sma kan sari wan langa pisi ten te sani no go soleki fa a ben wani. Na so a ben de nanga Claire. Na uma disi e taki: „Mi ben de nanga seibi mun bere di mi lasi a bere. A sani disi miti mi wan tu yari pasa. Ma te now ete, te mi e si wan boi e hori wan lezing na tapu a podium, dan mi e denki na misrefi, ’na so bigi a boi fu mi ben o de efu a ben de na libi.’”

Yu kan lasi-ati tu te wan sma e du wan sani nanga yu di e meki yu firi sari. Nofo tron, na dati e pasa te tu sma di ben e hori nanga makandra e  prati, te trowpatna e brokotrow, te wan pikin e bigin opo ensrefi, te wan mati du wan hati sani nanga yu, noso te wan mati no de nanga tangi. Fu di wi e libi na mindri sondusma, èn fu di wi e libi na ini muilek ten, meki bun furu sani de di kan meki wi lasi-ati.

Te wi no abi bun bakapisi, dan dati kan meki wi lasi-ati tu. Fu eksempre, te wi no pasa gi wan eksamen, te wi no feni wan wroko, noso te wan sma di wi lobi no wani de wi mati, dan wi ben kan firi leki wi no warti noti. Wi kan firi brokosaka tu te wan lobiwan fu wi no e go na fesi moro na ini a tru anbegi. Mary e taki: „Soleki fa a ben sori, dan mi umapikin ben de wan fayafaya Kresten. Mi ben feni taki mi ben gi en wan bun eksempre. Ma di a tapu fu dini Yehovah Gado èn di a no ben wani gi yesi moro na wi leki en papa nanga mama, dan mi ben e firi leki mi no ben de wan bun mama kwetikweti. Aladi mi ben abi bun bakapisi na ini tra afersi fu a libi, toku nowan fu den sani dati ben kan meki mi firi bun baka. Mi ben lasi-ati srefisrefi.”

San wi kan du te den sortu sari sani disi e miti wi? Fu man kisi piki tapu na aksi disi, dan luku fa Yehovah handri di sani no ben waka soleki fa a ben wani.

Du sani fu lusu a problema

Aladi Yehovah Gado ben sorgu na wan lobi-ati fasi gi a fosi man nanga uma, toku den no ben de nanga tangi èn den opo densrefi teige En (Genesis, kapitel 2 nanga 3). Baka dati, Kain, a manpikin fu den, bigin kisi takru fasi. Fu di Kain ben weigri fu gi yesi na a warskow di Yehovah ben gi en, meki a kiri en eigi brada (Genesis 4:1-8). Yehovah ben musu fu firi sari di a sani disi pasa, a no so?

Aladi sani no go soleki fa Gado ben wani, toku dati no ben meki taki a no de koloku moro. Fu san ede? Fu di Yehovah ben wani taki grontapu ben musu kon lai nanga volmaakti libisma, èn a tan wroko fu meki a wani fu en kon tru (Yohanes 5:17). Fu dati ede, a gi en Manpikin leki wan frulusu-ofrandi èn a seti a Kownukondre fu en (Mateyus 6:9, 10; Romesma 5:18, 19). Yehovah Gado no ben e tan broko en ede nanga a problema, ma a du wan sani fu lusu a problema.

Gado Wortu e gi wi deki-ati fu poti prakseri na sani di kan gi wi deki-ati, na presi taki wi e tan broko wi ede nanga den fowtu di wi ben meki. Bijbel e taki: „Tan prakseri ala sani di tru, ala sani di seryusu, ala sani di regtfardiki, ala sani di krin, ala sani di bun fu lobi, ala sani di sma e taki bun fu den, ala sani di Gado feni bun èn ala sani di warti fu sma prèise den.”—Filipisma 4:8.

San wi kan du te sani no e waka soleki fa wi wani

Sani kan pasa di kan tyari bigi kenki kon na ini wi libi. Fu eksempre, wi kan lasi wi wroko wantronso, wi trowpatna kan lasi en libi, noso wi kan lasi den grani di wi abi na ini a gemeente. Kande wi e kon siki, kande wi e lasi wi oso, noso kande mati fu wi e dede. San wi kan du te den sani disi e miti wi?

Son sma kon si taki a bun fu poti den moro prenspari sani na a fosi presi. Duncan, di wi ben kari kaba, e taki: „Di mi nanga mi wefi kon si taki wi noiti no ben o man dini moro leki zendeling, dan wi ben brokosaka srefisrefi. Te fu kaba wi bosroiti fu du tu prenspari sani. Wi ben o sorgu gi wi mama, èn efu a kan, wi ben o tan na ini a furuten diniwroko. Te wi musu teki bosroiti, dan wi e luku fosi efu den no o meki en muilek gi wi fu hori wisrefi na de bosroiti di wi teki. Disi e meki en makriki gi wi fu teki den yoisti bosroiti.”

Furu fu wi abi a gwenti fu broko wi ede tumusi nanga den fowtu di wi meki te sani no go soleki fa wi wani. Fu eksempre, aladi wi e du muiti fu kweki wan pikin, fu feni wan wroko, noso fu preiki a bun nyunsu na ini wan kontren pe sma e taki wan tra tongo, toku a kan taki sani no e go soleki fa wi wani. Kande wi sa denki taki a fowtu de na wi. Ma neleki fa Gado no ben lasi-ati di sani no  waka bun na a bigin fu a libisma famiri, na so wi no abi fu lasi-ati tu te sani no e go wantewante soleki fa wi wani.—Deuteronomium 32:4, 5.

A makriki fu kisi bita-ati te wan sma du wan sani nanga wi di wi no feni bun. Ma Yehovah no e handri na a fasi dati. Yehovah no ben feni en bun taki Kownu David ben du sutadu èn taki a kiri a masra fu na uma dati. Ma Yehovah ben si taki David ben abi trutru berow, èn fu dati ede a tan gebroiki David leki en futuboi. Di a getrow Kownu Yosafat sroto wan frubontu nanga den feanti fu Gado, dan Gado no ben feni dati bun tu. A profeiti fu Yehovah ben taki: „Fu di yu du a sani disi, meki Yehovah atibron nanga yu. Toku mi si bun sani na ini yu” (2 Kroniki 19:2, 3). Yehovah ben si taki a fowtu dati di Yosafat ben meki no ben wani taki dati Yosafat no ben wani dini En srefisrefi moro. Na so a de tu taki te wi no e poti tumusi furu prakseri na den fowtu di mati fu wi e meki, dan a matifasi di wi abi nanga den no sa pori. Aladi mati fu wi e du sani di wi no feni bun, toku a kan de so ete taki den abi moi fasi.—Kolosesma 3:13.

Te sani no e waka soleki fa wi wani, dan wi kan teki leri fu den sani dati, fu kan abi bun bakapisi bakaten. Wi kan firi brokosaka srefisrefi te wi du wan sondu. Ma wi kan kisi krakti baka te wi e meki tranga muiti fu no du a sani dati moro, èn  wi musu go doro nanga wi libi. Di Kownu David ben sari srefisrefi fu a sondu di a ben du, dan a taki: „Den bonyo fu mi ben pori gowe fu di mi ben e geme heri dei. . . . Te fu kaba mi taigi yu [Yehovah] sortu sondu mi du. . . , ne yusrefi gi mi pardon fu den sondu fu mi” (Psalm 32:3-5). Te wi si taki wi du wan sani di Gado no feni bun, dan wi musu aksi en pardon èn wi no musu du a sani dati moro. Boiti dati, wi musu abi a fasti bosroiti fu meki moro muiti fu du san a e aksi fu wi.—1 Yohanes 2:1, 2.

Sreka yusrefi now gi sani di kan meki yu lasi-ati

A no de fu taki dati, na ini a ten di e kon, wi alamala sa kisi fu du nanga problema di sa meki wi lasi-ati. Fa wi kan sreka wisrefi gi den sani dati? Meki wi go luku san Bruno, wan owru Kresten man ben taki. Wan sari sani ben miti a man disi, èn a sani dati kenki en libi. A ben taki: „A moro prenspari sani di yepi mi fu horidoro na ini a situwâsi dati, na taki mi tan du san mi ben e du kaba fu tranga a bribi fu mi. Mi ben leri fu san ede Gado no e tyari wan kaba kon ete na a ogri sistema disi. Mi ben du muiti furu yari langa fu kon moro krosibei na Yehovah. Mi ben breiti srefisrefi taki mi ben du a sani disi. A ben de wan bigi trowstu gi mi fu sabi taki A de nanga mi, èn a sani dati yepi mi fu horidoro na ini a muilek situwâsi di mi ondrofeni.”

Te wi e prakseri a ten di de na wi fesi, dan wi kan de seiker fu wán sani: Kande wi sa lasi-ati leki bakapisi fu den sani di wisrefi du, noso leki bakapisi fu den sani di trawan du, ma Gado noiti no sa meki wi lasi-ati. Fu taki en leti, Gado taki dati a nen fu en, namku Yehovah, wani taki „mi sa tron suma mi wani tron” (Exodus 3:14). Disi e gi wi a dyaranti taki Gado sa tron ala san de fanowdu fu man du san a pramisi. A pramisi wi taki nanga yepi fu en Kownukondre, a wani fu en sa pasa „na grontapu soleki fa a e pasa na hemel”. Fu dati ede, na apostel Paulus ben skrifi: „Mi de seiker taki noti no sa man puru wi fu a lobi fu Gado; dede no sa man du dati, èn libi no sa man du dati; nowan engel, nowan tirimakti . . . nowan enkri tra sani di Gado meki, sa man puru wi fu a lobi fu Gado, iya, a lobi di de na ini Krestes Yesus.”—Mateyus 6:10; Romesma 8:38, 39.

Wi kan abi na overtoigi taki a sani di Gado pramisi wi nanga yepi fu a profeiti Yesaya sa kon tru. A ben taki: „Mi e meki nyun hemel nanga wan nyun grontapu; èn sma no sa memre den sani fu fositen moro, èn den no sa kon na ini na ati tu” (Yesaya 65:17). Fu tru, a de wan moi sani fu sabi taki a ten e kon te wi no sa memre den sani moro di ben e meki wi lasi-ati!

[Futuwortu]

[Prenspari pisi na tapu bladzijde 13]

Te sani no e go wantewante soleki fa wi ben wani, dan dati no musu meki wi lasi-ati

[Prenspari pisi na tapu bladzijde 14]

Gado Wortu e gi wi a deki-ati fu poti prakseri na sani di kan gi wi deki-ati, na presi taki wi e tan broko wi ede nanga den fowtu di wi ben meki

[Prenki na tapu bladzijde 15]

Aladi libisma no du san Gado ben wani, toku Gado de koloku, fu di a sabi taki a wani fu en sa kon tru

[Prenki na tapu bladzijde 16]

Te wi e du sani fu kon moro krosibei na Gado, dan dati sa yepi wi fu horidoro te sani no e go soleki fa wi wani