„A feti di o tyari wan kaba kon na ala tra feti”

’Mi e pramisi unu taki disi o de a lasti feti. A feti disi o tyari wan kaba kon na ala tra feti.’—WOODROW WILSON, PRESIDENTI FU AMERKANKONDRE (1913-1921).

NA A howpu disi wan prenspari tiriman ben abi baka a Fosi Grontapufeti di pasa sowan 90 yari kaba. Den sma di wini a grontapufeti disi, ben e tapu den ai gi den furu ogri-ati sani di ben e pasa na a ten dati. Den ben feni taki sma no dede fu soso na ini a feti dati, fu di a feti ben o tyari wan moro bun ten kon. Ma nofo tron den feti fu libisma no e lusu problema. Sobun, wan feti noiti no kan tyari wan kaba kon na a feti di sma e feti na grontapu.

Soleki fa a sori, dan Presidenti Wilson no ben denki moro fara di a taki a sani di skrifi na a bigin fu na artikel disi, bika sowan 20 yari baka dati, a di fu Tu Grontapufeti bigin. Na ini a feti dati, den kiri moro sma èn den pori moro presi leki na ini a Fosi Grontapufeti. Na a ten fu a di fu Tu Grontapufeti, sowan 20 yari baka a Fosi Grontapufeti, sabidensi go na fesi so furu, taki sma ben abi ala sortu nyun fetisani fu kiri moro sma na ini wán leisi. Na a kaba fu a di fu Tu Grontapufeti, den tiriman fu grontapu bigin si moro nanga moro taki den no man wai pasi gi feti.

Na ini 1945, Legre-edeman Douglas MacArthur fu Amerkankondre taki: „Disi ben de a lasti okasi di wi ben abi fu sorgu taki nowan feti pasa moro. Efu wi no suku wan moro bun fasi fu tapu nanga a feti di wi e feti, dan Armagedon o kon.”

Legre-edeman MacArthur ben sabi san pasa di tu kefalek sortu bom fadon na tapu Nagasaki nanga Hiroshima, na a kaba fu a di fu Tu Grontapufeti. Den tu bom dati pori den tu foto disi na ini Yapan krinkrin. A sani disi meki taki MacArthur kon abi wan tra denki fu a wortu „Armagedon”. A ben feni taki Armagedon na wan feti di o tyari bigi pori kon, fu di sma o gebroiki ala sortu kefalek fetisani. A ben denki srefi taki a feti disi kan meki taki ala libisma na grontapu dede.

 Te now ete sma e frede taki so wan bigi feti o pasa. Na ini den yari baka 1960, den moro bigi tirimakti fu grontapu bigin sreka densrefi fu man pori iniwan kondre di ben o kon feti nanga den. A no abi trobi suma o bigin nanga a feti, ma a wan-enkri sani di de na den ede, na taki den musu abi nofo bom fu man pori 25 procent fu den sma èn 50 procent fu den bisnispresi na ini a kondre fu den feanti fu den. Na so den tiriman e pruberi fu frede makandra, so taki nowan fu den o prefuru fu kon feti nanga a trawan. Ma toku furu sma no feni taki disi na a fasi fa libisma kan sorgu taki feti no de moro na grontapu.

Te now ete, sma e meki moro nanga moro kefalek fetisani, èn bun furu sma e dede fu di difrenti grupu sma e feti nanga makandra na ini den eigi kondre. Te now ete, sma e frede taki wan bigi grontapufeti kan kon. Wi alamala wani taki wan kaba kon na a feti di sma e feti. Ma furu sma no e bribi taki wan bigi feti noso wan tra sani di libisma seti kan tyari wan kaba kon na feti.

Ma toku Bijbel e fruteri fu wan spesrutu feti di o tyari wan kaba kon na a feti di sma e feti. Bijbel e kari a feti disi „Armagedon”. Nofo tron te sma yere a wortu disi, den e prakseri wan bigi feti pe sma o gebroiki ala sortu kefalek bom fu pori heri grontapu. Ma fa a feti Armagedon kan meki taki wan kaba kon na feti trutru? Na ini a tra artikel yu o kisi piki tapu na aksi disi.

[Sma di abi a reti fu a prenki na tapu bladzijde 3]

DTRA Photo

[Sma di abi a reti fu a prenki na tapu bladzijde 4]

Nagasaki, Japan, 1945: USAF photo