Fa na owruten kownukondre Lidia abi krakti tapu wi na ini a ten disi

KANDE noiti yu yere ete fu na owruten kownukondre Lidia. Dati meki a kan fruwondru yu fu kon sabi taki den sma drape ben kon nanga wan nyun sani di kenki a fasi fa sma na grontapu e du bisnis. Sma di e leisi Bijbel sa fruwondru sosrefi fu kon sabi taki den sma fu Lidia kon nanga wan nyun sani, èn a sani dati e tyari kon na krin san wan dangra Bijbel profeititori wani taki. Nanga sortu nyun sani den Lidiasma ben kon? Fosi wi piki na aksi disi, a ben o bun fu kon sabi fa sani ben de na ini a kownukondre disi di furu sma na ini a ten disi no sabi.

 Na ini a mamafoto Sardes, den kownu fu Lidia ben e tiri a kondre fu den. A foto disi ben de na a westsei fu Pikin Asia, di sma e kari Torkukondre now. Croesus, a lasti kownu fu Lidia, ben kon abi bun furu gudu, ma na a pisi ten fu 546 b.G.T., Sirus a Bigiwan fu Persia teki a kownukondre dati abra. Disi na a srefi Sirus di wini a Gran Kownukondre Babilon wan tu yari baka dati.

Sma e taki dati den koni bisnisman fu Lidia na den fosi sma di bigin gebroiki sensi. Langa ten kaba sma ben e gebroiki gowtu nanga solfru leki moni, ma fu di den pisi gowtu nanga den gowtu linga no ben bigi a srefi, meki sma ben musu wegi a moni ibri leisi te den ben e du bisnis. Fu eksempre, na ini Israel a profeiti fu Gado, Yeremia, ben bai wan gron èn a ben skrifi: „Mi ben bigin wegi a moni gi en, seibi sikkel nanga tin solfru moni.”—Yeremia 32:9.

Sma di ben e libi na ini Lidia na a ten fu Yeremia, ben kon nanga wan nyun sani fu du bisnis na wan moro makriki fasi. Den bigin gebroiki sensi di ben abi wan spesrutu waarde, èn na tapu ibri sensi wan stampu ben de di ben gi sma a dyaranti taki a no ben de falsi moni. Den fosi sensi di sma ben meki na ini Lidia, ben meki fu elektrum. Elektrum na gowtu moksi nanga solfru, èn sma ben feni a sani disi na ini a gron. Di Croesus tron kownu, dan na presi fu den sensi dati a kon nanga tra sensi di ben meki fu solfru nanga gowtu di pikinmoro no ben moksi nanga tra sani. Den Lidiasma ben kon nanga wan sortu sistema di ben o meki taki sma man du bisnis nanga den sensi. A sani dati ben de taki 12 solfru sensi ben abi a waarde fu wán gowtu sensi. Ma bakaten, falsi moni ben kon de, fu di sma ben meki sensi fu gowtu di den ben moksi nanga tra sani di no ben warti furu. Den bisnisman ben musu kon nanga wan sani di ben o meki en makriki gi den fu luku o soifri den gowtu sensi ben de.

Den Lidiasma kon si taki wan spesrutu sortu blaka ston fu a presi drape ben o yepi den nanga a problema disi. Sma ben kari a ston disi Lidia ston. Te sma ben griti wan sensi na tapu a blaka ston disi di ben grofu pikinso, dan a sensi ben libi wan marki na tapu a ston. Te den ben agersi a kloru fu a marki dati nanga a kloru fu den marki di den ben meki kaba nanga tra sani di ben abi wan spesrutu waarde fu gowtu na ini, dan na so den ben kon sabi omeni gowtu de na ini a sensi. Na a sani disi ben yepi sma fu kon sabi efu a moni ben de falsi moni. Te wi sabi fa sma ben e gebroiki a blaka ston disi, dan fa dati kan yepi wi fu frustan Bijbel?

San a sani disi e prenki na ini Bijbel?

Moro nanga moro bisnisman ben gebroiki a blaka ston disi fu luku omeni gowtu ben de na ini wan sensi. Na a fasi disi sma na ala sei ben luku omeni waarde wan sani ben abi. Na ini a Grikitongo, a tongo di gebroiki fu skrifi wan pisi fu Bijbel, a sani disi abi fu du sosrefi nanga a pina di sma e pina trawan.

Sma ben gebroiki a Griki wortu dati sosrefi gi den waktiman fu strafu-oso, fu di den ben e pina den strafuman. Fu dati ede, na ini na agersitori fu Yesus di abi fu du nanga a srafu di no ben sori warderi, Bijbel e taki dati sma ben tyari a srafu go na „den waktiman fu dungru-oso”, noso soleki fa tra Bijbel e taki, den ben tyari en go gi „den sma di e pina trawan” (Mateyus 18:34; American Standard Version, Darby, King James Version). Wan buku e taki fu a bijbeltekst disi: „A kan taki a ben de wan pina kaba gi den strafuman fu de na strafu-oso (èn na so a ben de trutru). A kan de so tu taki den wortu di wani taki ’den sma di e pina trawan’, abi fu du nomo nanga den waktiman fu strafu-oso” (The International Standard Bible Encyclopaedia). A sani disi e yepi wi fu frustan wan prenspari bijbeltekst.

 Wan dangra tori kon na krin

Fu wan langa pisi ten, opregti Bijbel leisiman ben e aksi densrefi san o pasa nanga Satan. Bijbel e taki: „Gado . . . fringi [Didibri] go na ini a se di e bron nanga faya di e pori sani krinkrin, pe na ogri meti nanga a falsi profeiti ben de kaba; den o pina dei nanga neti fu têgo, iya, fu ala ten” (Openbaring 20:10). A no de fu taki dati te Yehovah ben o meki wan sma pina fu têgo, dan dati no ben o kruderi nanga a lobi èn nanga a retidu fu En (Yeremia 7:31). Boiti dati, Bijbel e sori taki têgo libi na wan presenti, èn a no de wan strafu (Romesma 6:23). Fu dati ede, a sani di skrifi na ini Openbaring 20:10, skrifi na wan agersi fasi. Na ogri meti nanga a se di e bron nanga faya, skrifi na wan agersifasi (Openbaring 13:2; 20:14). A de so tu taki a pina di Satan o kisi e agersi wan sani? San den wortu disi wani taki?

Soleki fa wi si kaba, a Griki wortu di vertaal nanga „pina”, komoto fu wan tra Griki wortu di sma ben e gebroiki fu taki fu a fasi fa den ben e luku efu moni ben de falsi moni. A wortu disi kan abi fu du tu nanga a pina di sma ben e ondrofeni na strafu-oso. Sobun, a têgo pina di Satan o ondrofeni kan abi fu du nanga a strafu di a o koti fu têgo na ini wan agersi strafu-oso pe a no man komoto kwetikweti. Na agersi strafu-oso dati na dede.

Neleki fa sma fu Lidia ben gebroiki a blaka ston fu luku efu moni na falsi moni, na so a têgo „pina” fu Satan, noso a dede fu en sa de leki wan têgo buweisi di e sori san o pasa efu oiti wan sma opo ensrefi teige Yehovah na ini a ten di e kon. Efu oiti wan sma ben o du dati fu di a feni taki Yehovah no abi a reti fu tiri, dan noiti moro Yehovah o meki wan langa pisi ten pasa fu sori taki a sma dati no abi leti.

Te wi e frustan fu san ede bisnisman na ala sei ben e gebroiki a Lidia ston fu luku efu moni na falsi moni, èn te wi e frustan san a sani disi wani taki na agersi fasi, dan wi o frustan san o pasa nanga Satan. A sani disi di o pasa nanga Satan, o de neleki a marki na tapu wan blaka ston di e sori sortu pori wan sma o kisi di opo ensrefi teige Gado èn a no o de fanowdu noiti moro taki Gado gi pasi taki so wan sani pasa baka.—Romesma 8:20.

[Prenspari pisi na tapu bladzijde 23]

Na agersi pina di Satan o ondrofeni wani taki dati a strafu di a o kisi sa de fu têgo trutru

[Karta na tapu bladzijde 21]

(Efu yu wani si pe den sani disi skrifi, luku a tijdschrift)

Blaka Se

LIDIA

SARDES

Mindrikondre Se

[Prenki na tapu bladzijde 21]

Den brokopresi fu na owruten Sardes

[Prenki na tapu bladzijde 22]

Na ini owruten, sma ben e gebroiki wegi fu wegi moni

[Sma di abi a reti fu a prenki]

E. Strouhal/Werner Forman/Art Resource, NY

[Prenki na tapu bladzijde 22, 23]

Te now ete sma e gebroiki a blaka ston fu luku omeni waarde wan sani abi

[Sma di abi a reti fu a prenki]

Coins: Courtesy Classical Numismatic Group, Inc.; touchstone: Science Museum/Science & Society Picture Library

[Sma di abi a reti fu a prenki na tapu bladzijde 21]

Electrum coin: Courtesy Classical Numismatic Group, Inc.