Kon krosibei na Gado

Gado e si wi leki warti sma

Lukas 12:6, 7

„WI ATI kan krutu wi.” Nanga den wortu dati, Bijbel e sori taki son leisi wi ati kan meki taki wi e krutu wisrefi tumusi. Iya, wi ati kan meki wi abi na overtoigi taki wi no warti fu Gado lobi wi èn fu sorgu gi wi. Toku, Bijbel e gi wi a dyaranti disi: „Gado bigi moro wi ati èn a sabi ala sani” (1 Yohanes 3:19, 20). Gado sabi wi moro bun leki fa wi sabi wisrefi. A fasi fa a e si wi, kan de heri tra fasi leki fa wi e si wisrefi. A fasi fa Yehovah Gado e denki fu wi prenspari trutru. We, dan fa a e denki fu wi? Wi warti trutru gi en? Wi kan feni piki tapu den aksi disi na ini wan agersitori di e naki wi ati èn di Yesus gebroiki na tu difrenti okasi.

Na wán okasi, Yesus ben taki dati „sma e seri tu pikin fowru gi wan sensi di no warti furu” (Mateyus 10:29, 31). Soleki fa Lukas 12:6, 7 e sori, dan Yesus ben taki tu: „A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den. . . . No frede; un warti moro leki furu pikin fowru.” Na agersitori disi di no muilek fu frustan, e naki wi ati trutru fu di a e leri wi fa Yehovah e si ibriwan fu den anbegiman fu en.

Den pikin fowru disi ben de den moro bunkopu wan di sma ben e nyan. A no de fu taki dati Yesus ben si fa pôti umasma, kande en eigi mama srefi, ben e bai den pikin fowru disi na wowoyo fu bori gi den osofamiri. Gi wán assarion, wan sensi di no doro a waarde fu feifi sensi na ini a ten disi, wan sma ben kan bai tu fu den pikin fowru disi. Den fowru disi ben bunkopu so te, taki gi tu sensi, wan sma ben kan kisi feifi fowru na presi fu fo, fu di a ben kisi a di fu feifi fowru baksis.

Yesus ben fruklari taki „Gado no e frigiti” nowan fu den pikin fowru disi èn nowan fu den sa fadon „na gron sondro” fu a Tata sabi (Mateyus 10:29). Yehovah sabi ibri leisi te wan fu den pikin fowru disi fadon na gron, kande fu di a kisi mankeri noso fu di a e saka go na gron fu suku nyanyan. Den pikin fowru disi di gersi leki den no warti, no ben pikin tumusi gi Yehovah fu meki den èn fu memre den. Fu taki en leti, Yehovah no e frigiti den fu di den na warti libisani. Yu e si san Yesus ben wani leri wi nanga na agersitori fu en?

Nofo tron te Yesus ben e gi leri, dan a ben e teki tu difrenti sani gersi nanga makandra, fu di a ben taki fu wan pikin sani èn a ben sori fa wi kan fiti a pikin sani dati na wan moro prenspari sani. Fu eksempre Yesus ben taki tu: „Den [fowru] no e sai, den no e koti nyanyan, èn den no abi maksin noso wan presi fu kibri nyanyan, ma toku Gado e gi den nyanyan. Unu no warti moro leki den fowru?” (Lukas 12:24) Now wi man frustan na agersitori fu Yesus, di abi fu du nanga den pikin fowru. A leri wi disi: Efu Yehovah e sorgu gi den pikin fowru disi, dan o moro a sa sorgu gi den libisma di lobi en èn di e dini en!

Soleki fa den wortu fu Yesus e sori, wi no musu denki taki wi no warti srefisrefi taki Gado e poti prakseri na wi èn taki a e sorgu gi wi, fu di Gado „bigi moro wi ati”. A no e trowstu wi fu sabi taki wi Mekiman e si sani na ini wi, di wisrefi no man si?

[Sma di abi a reti fu a prenki na tapu bladzijde 9]

Sparrows: © ARCO/D. Usher/age fotostock