Leisiman e aksi

Pe a feti fu Armagedon o feti?

A feti fu Armagedon no o feti na wan spesrutu presi. Na presi fu dati a o feti na heri grontapu. Fu san ede? Fu di den tu grupu di o de na ini a feti disi, bigi so te taki nowan presi no o man hori den.

Bijbel e kari Armagedon, noso Har–Magedon „a feti na tapu a bigi dei fu Gado na Almaktiwan”. Yehovah Gado o gebroiki en Manpikin, Krestes Yesus, fu tyari wan legre fu engel kon na wán fu feti teige den ogri tiriman fu grontapu, di moksi kon na wán fu feti teige Gado.—Openbaring 16:14; 19:11-16.

Den ogri yeye e feni fasi fu kori den pipel fu kon na ini a feti disi. Bijbel e taki dati „den ogri yeye e taki den sani disi”, èn den sani di den e taki e doro „den kownu [tiriman] na heri grontapu, fu tyari den kon na wán na a . . . presi di sma e kari Har–Magedon na ini Hebrewtongo”.—Openbaring 16:14-16.

Nowan tra Bijbel buku hari a prakseri fu so furu sma di e leisi Bijbel, leki a buku Openbaring. Furu sma di leisi a buku disi, e bribi taki den tori di skrifi na ini o pasa leti soleki fa den skrifi. Den sma disi fruklari finifini pe a feti disi o bigin, èn aladi den frede, toku den e tan poti prakseri na den sani di e pasa na ini a kontren dati. A denki di sma abi taki Armagedon na wan trutru presi, de fu feni na ini wan fu den moro owru Griki buku di Oecomenius ben skrifi na ini a di fu siksi yarihondro. A buku disi di de fu feni ete, e taki fu den sani di skrifi na ini a buku Openbaring.

A kerki fesiman John F. Walvoord, e taki wan sani di e kruderi nanga a denki fu den kerki fesiman di e weigri fu bribi nyun leri nanga denki. A man disi di ben de presidenti fosi fu a Theologische Seminarie na Dallas, e taki dati Armagedon na „a lasti ogri-ati feti na mindri bruya tiriman fu heri grontapu, èn a feti disi o feti na a Mindri Owstusei”. Walvoord ben taki dati a bigi feti disi o feti na „’Bergi fu Megido’, wan pikin bergi di de na a lanki fu wan bigi opo presi, na a noordsei fu Palestina.”

Ma a buku Openbaring a no wan karta di e sori wi pe wan trutru presi de di nen Armagedon. A fosi vers fu a buku disi e sori taki den sani di skrifi na ini a buku disi, na „marki” (Openbaring 1:1). Langa ten pasa, Yehovah Kotoigi ben taki disi na ini wan fu den buku fu den: „Wi no musu fruwakti taki sma trutru o kon na wán na a pikin bergi Megido.” (Studies in the Scriptures, Volume IV)

Te wi e luku den feti di ben e feti na Megido na ini owruten, dan wi e si taki den feanti fu Gado no ben man wai pasi gi a strafu di den ben o kisi. Sobun, na Armagedon, Gado sa sorgu taki wan kaba sa kon na ala kruktudu nanga ogridu, na iniwan presi na grontapu.—Openbaring 21:8.

Den wan di lobi Yehovah Gado nanga en Manpikin, Yesus Krestes, no abi fu frede Armagedon. A feti disi fu Gado sa de soso teige den sma di Gado e si leki ogrisma di e tan weigri fu kenki den fasi fu den. Gado no o pori ala sma na ini a feti fu en. Bijbel e taki: „Yehovah sabi fa fu frulusu sma di e dini en na wan getrow fasi” (2 Petrus 2:9). Psalm 37:34 e gi wi wan moi pramisi. Drape skrifi: „Howpu tapu Yehovah èn hori a pasi fu en, èn a sa hei yu so taki yu kan kisi grontapu. Te den ogrisma o koti puru, dan yu o si dati.”