„YU DE srekasreka?” Oiti wan sma aksi yu a sani dati?— We, a sma ben wani sabi efu yu ben de srekasreka fu du wan sani. Fu eksempre, kande a sma ben e wani sabi efu yu ben abi yu buku kaba fu studeri, noso efu yu ben e leri yu les kaba. Soleki fa wi sa si, dan Timoteyus ben de srekasreka.

Timoteyus ben de klariklari fu dini tu. Yu sabi san dati wani taki?— Di Timoteyus ben kisi a kari fu dini Gado, dan a ben abi a srefi denki leki wan tra futuboi fu Gado di ben taki: „Dya mi de! Seni mi” (Yesaya 6:8). Fu di Timoteyus ben de srekasreka èn klariklari fu dini, meki a ben ondrofeni moi sani na ini en libi. Yu wani yere moro fu a tori disi?—

Timoteyus gebore na ini Listra, wan foto di de hondrohondro kilometer fu Yerusalem. En granmama Lowis nanga en mama Enise ben e studeri den Buku fu Bijbel bun. Srefi di Timoteyus ben de wan beibi, den ben bigin leri en a Wortu fu Gado.—2 Timoteyus 1:5; 3:15.

Di Timoteyus ben de wan tini ete kande, na apostel Paulus ben de makandra nanga Barnabas na a fosi langa preikiwaka fu den, èn den ben go na a foto Listra. A kan taki na a pisi ten dati Timoteyus en mama nanga en granmama ben tron Kresten. Yu wani sabi sortu problema Paulus nanga Barnabas ben kisi?— We, den sma di no ben lobi Kresten ben fringi ston na tapu Paulus, den ben fon en, èn baka dati den srepi en go na dorosei fu a foto. Den ben denki taki a dede.

Den sma di ben poti bribi na ini den sani di Paulus ben e leri, ben go yepi en èn na so Paulus opo tanapu. A dei baka dati, Paulus nanga Barnabas gowe, ma syatu baka dati den drai go baka na Listra. Di den ben de drape, dan Paulus hori wan lezing èn a taigi den disipel taki: „Wi musu ondrofeni furu banawtu fu man go na ini a kownukondre fu Gado” (Tori fu den Apostel 14:8-22). Yu sabi san Paulus ben wani taki nanga den wortu dati?— A ben wani taki dati trawan ben o gens den wan di e dini Gado. Bakaten, Paulus skrifi Timoteyus taki: ’Ala den wan di wani dini Gado na wan getrow fasi, sa kisi frufolgu.’—2 Timoteyus 3:12; Yohanes 15:20.

 Baka di Paulus nanga Barnabas gowe libi Listra, den drai go baka na oso. Wan tu mun baka dati, Paulus ben teki Silas fu go makandra nanga en na difrenti presi pe Paulus ben go kaba, so taki den ben kan gi den nyun disipel deki-ati. Di den doro na Listra, dan a musu de so taki Timoteyus ben breiti fu si Paulus baka! Timoteyus ben breiti srefisrefi di Paulus nanga Silas aksi en fu go makandra nanga den. Timoteyus ben teki a kari fu go nanga den. A ben de srekasreka èn klariklari fu go makandra nanga den.—Tori fu den Apostel 15:40–16:5.

Den dri man ben go makandra na difrenti presi, den ben waka furu kilometer, èn bakaten den ben go moro fara nanga boto. Baka di den doro na syoro, den waka go na a foto Tesalonika na ini Grikikondre. Furu sma drape ben tron Kresten. Ma trawan ben atibron nanga den èn den ben span anu makandra fu du den ogri. Fu di Paulus, Silas nanga Timoteyus ben kan lasi den libi, meki den komoto drape èn den go na a foto Berea.—Tori fu den Apostel 17:1-10.

Fu di Paulus ben e broko en ede nanga den nyun disipel na ini Tesalonika, meki a seni Timoteyus go baka drape. Yu sabi fu san ede a du dati?— Bakaten, Paulus ben taigi den Kresten na ini Tesalonika fu san ede a du dati. A ben taki: ’Fu tranga unu èn fu trowstu unu, so taki nowan fu unu lasi-ati.’ Yu sabi fu san ede Paulus ben gi a yonkuman Timoteyus so wan muilek wroko fu du?— We, a ben du dati fu di den gensman no ben sabi Timoteyus so bun èn Timoteyus ben de klariklari fu go. Timoteyus ben musu fu abi furu deki-ati fu man du dati! Fa sani ben waka drape? Di Timoteyus ben drai go baka na Paulus, dan a taigi en taki den Kresten na ini Tesalonika ben de getrow trutru. Sobun, Paulus ben skrifi den taki: „A getrowfasi fu unu ben trowstu wi.”—1 Tesalonikasma 3:2-7.

Na ini den tin yari baka dati, Timoteyus ben e dini makandra nanga Paulus. Baka dati sma poti Paulus na dungru-oso na ini Rome, èn Timoteyus, di ben komoto na dungru-oso no so langa ete, ben go na en. Na a ten dati di Paulus ben de na dungru-oso, dan a ben gebroiki Timoteyus kande leki sekretarsi fu skrifi wan brifi gi den Filipisma. Paulus ben taki: ’Mi e howpu fu seni Timoteyus kon na unu, bika mi no abi nowan tra sma di de so getrow èn di sa man yepi yu moro bun.’—Filipisma 2:19-22; Hebrewsma 13:23.

Den wortu dati ben musu fu meki Timoteyus breiti srefisrefi! Paulus ben kon lobi Timoteyus trutru, fu di a ben de srekasreka èn klariklari fu dini. Wi e howpu taki yu sosrefi o de srekasreka èn klariklari fu dini.