Leisiman e aksi

A de so taki a Frudu na ini a ten fu Noa ben sungu heri grontapu trutru?

A ben de sowan 4000 yari pasa, di a Frudu fu a ten fu Noa ben de na grontapu. Sobun, sma di si a Frudu dati no de na libi moro fu fruteri wi san ben pasa. Ma wan buku de di e taki fu a rampu dati, èn a buku dati e taki dati a watra fu a Frudu ben tapu den moro hei bergi fu a ten dati.

A buku e taki: „A bigi alen saka kon na grontapu fotenti dei langa, èn a watra ben e kon furu moro nanga moro, teleki a opo na ark puru na gron . . . Grontapu ben sungu so kefalek taki ala den hei bergi na grontapu ben kon tapu nanga watra. A watra ben kren pasa den bergi sowan seibi meter, èn a tapu den alamala.”—Genesis 7:17-20.

Kande son sma e aksi densrefi efu a tori di e taki dati heri grontapu ben sungu, na wan anansitori, noso efu na meki sma e meki a tori dati moro moi. Dati no de so kwetikweti! Te yu luku en bun, dan furu pisi fu grontapu sungu ete. A watra fu a se e tapu sowan 71 procent fu grontapu. Sobun, a watra fu a Frudu de na grontapu ete. Èn efu den ijsbergi èn den bun bigi ipi ijs di de te na a noordsei èn te na a zuidsei fu grontapu ben o smelter, dan a watra na ini den se ben o kren so hei taki a ben o sungu foto soleki New York nanga Tokyo.

Sabiman di e ondrosuku a gron na a noord-westsei fu Amerkankondre, e bribi taki na ini wan pisi ten fu hondrohondro yari, pikinmoro 100 frudu pasa na ini a kontren dati, èn den frudu disi tyari bigi rampu kon. Den sabiman e taki dati a watra fu wan fu den frudu dati di ben pasa wantronso na ini a kontren disi, ben hei sowan 600 meter, èn a ben lon pasa 105 kilometer wán yuru. A watra ben e wegi moro leki tu bilyard kilo. Fu di tra sabiman kon sabi fu moro fu den sortu frudu disi di ben pasa na grontapu, meki den e bribi taki a kan de so trutru taki wan bigi frudu ben sungu heri grontapu.

Ma den sma di e bribi taki Bijbel na a Wortu fu Gado, no e tweifri taki wan frudu ben sungu heri grontapu. Den sma disi e bribi taki a sani disi pasa trutru. Yesus ben taigi Gado: „Yu wortu na waarheid” (Yohanes 17:17). Na apostel Paulus ben skrifi taki Gado wani taki „ala sortu sma musu kisi frulusu èn taki den musu kon sabi a waarheid soifri” (1 Timoteyus 2:3, 4). Fa Paulus ben kan leri den bakaman fu Yesus tru tori di abi fu du nanga Gado èn nanga den sani di a o du, efu a de so taki den sani di skrifi na ini Gado Wortu na anansitori?

Yesus no ben e bribi nomo taki a Frudu ben pasa, ma a ben e bribi tu taki a frudu disi ben sungu heri grontapu. Na ini a prenspari profeititori fu en di abi fu du nanga a denoya fu en èn nanga a kaba fu a sistema disi, Yesus ben agersi den sani di ben o pasa na a ten dati, nanga a ten fu Noa (Mateyus 24:37-39). Na apostel Petrus ben skrifi tu fu a Frudu fu a ten fu Noa. A ben taki: „Nanga yepi fu den sani dati, a grontapu fu a ten dati ben kisi pori di watra sungu en.”—2 Petrus 3:6.

Efu Noa no ben e libi trutru èn efu a tori fu a Frudu di sungu heri grontapu ben de wan anansitori, dan den warskow di Petrus nanga Yesus ben gi den wan di ben o libi na ini den lasti dei, ben o de fu soso. Efu sma ben o bribi taki a Frudu na wan anansitori, dan den no ben o man frustan den warskow fu Bijbel. Boiti dati, den sma disi no ben o man pasa libilibi te wan banawtu di bigi moro a Frudu fu a ten fu Noa ben o kon.—2 Petrus 3:1-7.

Gado ben sori a pipel fu en taki a ben o tan abi sari-ati nanga den. A ben taigi den: „Soleki fa mi ben sweri taki a watra di ben kon na ini a ten fu Noa, no sa kon moro na grontapu, na so mi sweri taki mi no sa atibron na yu tapu èn mi no sa piri-ai gi unu.” Neleki fa wi kan de seiker taki wan Frudu ben sungu heri grontapu na a ten fu Noa, na so wi kan de seiker taki Gado sa sori lobi bun-ati gi den wan di e frutrow na en tapu.—Yesaya 54:9.