A tru taki ’sma no ben mag kari a nen’ disi?

A MORO hei monumenti na ini Amerkankondre, na a Gateway Arch di de 192 meter hei èn di de na sei wan liba na a foto St. Louis, na Missouri. Na a wan sei fu a monumenti disi, wan kerki de krosibei di no de so hei. Sma e kari a kerki disi na Owru Kathedraal.

Wan pikin buku di a kerki dati tyari kon na doro, e taki fu den moimoi sani di de na ini a gadri. A buku disi e taki: „Na fesisei fu a kerki, yu abi wan moi pisi pe a nen fu Gado, di sma no ben mag kari, skrifi nanga bigi gowtu Hebrew letter” (The Story of the Old Cathedral). Soleki fa a prenki e sori, a de krin fu si taki fo Hebrew letter יהוה (YHWH) skrifi drape. Sma ben gebroiki den letter disi gi a nen fu Gado.

Di a kerki ben bow na ini 1834, dan a kerki fesiman di ben abi a frantwortu fu den afersi fu a kerki na ini a foto St. Louis, ben feni taki den fo Hebrew letter disi ben musu de na wan prenspari presi. We, dan fu san ede ’sma no ben mag kari a nen’ fu Gado?

Wan buku e fruteri san ben pasa wan pisi ten baka di den Dyu ben komoto na ini katibo na Babilon, na ini a di fu siksi yarihondro bifo Krestes. A buku e taki: „Sma ben bigin si a nen Yahweh, [pe den poti den letter ’a’ nanga ’e’ na mindri] leki wan nen di sma ben musu sori bigi lespeki gi. Na presi fu gebroiki a nen dati, den ben kon kisi a gwenti fu gebroiki a wortu ADONAI [Masra] noso ELOHIM [Gado]. . . . Fu di moro nanga moro sma ben kon kisi a gwenti disi, meki taki te fu kaba den no ben sabi moro san na a yoisti fasi fu kari a nen Yahweh” (New Catholic Encyclopedia). Na so fasi sma no ben e gebroiki Gado nen moro. Te fu kaba, den no ben sabi soifri moro fa fu kari Gado nen na a fasi fa sma ben e kari en fositen. Disi meki taki den no ben man kari Gado nen moro.

Aladi wi no sabi seiker fa sma ben e kari Gado nen fositen, toku san de prenspari na taki te wi e gebroiki a nen fu en, wi o kon moro krosibei na en. Yu ben o wani taki den mati fu yu kari yu „masra” noso „misi”? Noso yu ben o wani taki den kari yu na yu nen? Awinsi den e taki wan tra tongo di e meki taki den no man kari a nen fu yu na a yoisti fasi, toku yu ben o wani taki den musu kari yu na yu nen, a no so? Na so a de tu nanga Gado. A wani taki wi kari en na en nen, Yehovah.

Na ini Sranantongo, furu sma e taki „Yehovah”. A ben o fiti taki ala sma di lobi Gado e kari en na en nen so taki den kon moro krosibei na en, a no so? Bijbel e taki: „Kon krosibei na Gado, èn a sa kon krosibei na unu.”—Yakobus 4:8.