Mi prisiri mi heri libi langa fu di mi du Gado wani

Soleki fa Bill Yaremchuk fruteri

Na ini maart 1947, mi klari a di fu aiti klas fu a Waktitoren Bijbelskoro Gilead, di ben e hori na a ten dati na ini South Lansing, na New York, Amerkankondre. Wan tu wiki nomo baka dati, mi ben de na pasi kaba fu go dini leki zendeling te na a farawe kondre Singapore.

DAVE FARMER, di ben de fu Kanada tu èn di ben klari a di fu seibi klas fu Gilead, ben o wroko makandra nanga mi. Wi ben go na tapu a sipi di nen Marine Adder èn di ben de wan srudati sipi fosi. Na so wi ben komoto fu a foto San Franciso, na Kalifornia.

A fosi presi pe a sipi fu wi stop, ben de Hong Kong, di de na a owstusei fu Asia. Wi skreki srefisrefi fu si fa a situwâsi ben de drape. Na ala sei yu ben kan si sortu takru bakapisi a di fu Tu Grontapufeti ben tyari kon. Yu ben kan si sma e didon na sei pasi, angri ben e kiri den, èn a ben gersi leki den ben de fu dede. Heri esi, wi drai go baka na a sipi èn a sipi fu wi lusu go na Manila, a mamafoto fu den Filippijnen.

Drape wi si sosrefi sortu takru situwâsi ben kon de na ini a kondre, leki bakapisi fu na orloku. Na a lanpe yu ben kan si pisipisi fu sipi di ben sungu, fu di den opolani fu tra kondre ben sutu bom na den tapu. Boiti dati, sma na ala sei ben pôti. Drape wi ben miti nanga wan tu Kotoigi fu Yehovah, di tyari wi go na a Kownukondre zaal fu den. Aladi den ben abi problema, toku den ben de koloku.

A tra presi pe a sipi fu wi ben go, ben de na Batavia (now a nen Jakarta), na ini Indonesia. Fu di wan borgufeti ben de drape èn sma ben e feti krosibei fu a lanpe, meki wi no kisi primisi fu komoto fu a sipi. Di a sipi komoto fu Batavia fu go na Singapore, mi bigin aksi misrefi san wi ben o si drape. Na disi ben tan abra fu den moi presi na a owstusei fu Asia, di wi ben si na tapu prenki?

Baka wan tu dei, mi no ben tweifri moro. Wan sani ben o pasa di ben o sori mi nanga Dave krin taki na Gado wani taki wi go na a kondre disi.

Fa a du kon taki wi kisi primisi fu tan

Wan mun baka di wi gowe libi San Francisco, a sipi fu wi doro na a èilanti St. John te fu kaba. Ala den sipi di ben kon na Singapore, ben musu go fosi na a èilanti disi pe den ben e wakti fu kisi primisi fu go na ini a kondre. Den skowtu di ben gi sma primisi fu kon na ini a kondre, ben kon tapu a sipi fu luku den papira fu ala sma. Den ben stampu a paspoort fu wi èn wi ben kisi primisi fu go na ini a kondre. A tra mamanten, a sipi doro na a lanpe. Baka di wan sma di abi frantwortu tapu a sipi, luku den papira fu wi, dan wi ben komoto fu a sipi.

Na a tra dei, wi drai go baka na a lanpe fu taki den tra zendeling odi di ben de makandra nanga wi na tapu a sipi. Den ben e go doro nanga a sipi  na India nanga Ceylon (now a nen Sri Lanka). Di a kapten fu a sipi si wi, dan a saka kon na a lanpe èn a waka kon miti wi. A ben e atibron èn a bari wi taki wi no ben mag komoto fu a sipi. Di wi ben de na se ete, dan Masra Haxworth, a basi fu den skowtu di ben taki suma mag kon na ini a kondre, ben taigi a kapten fu no gi wi primisi fu komoto fu a sipi te wi ben o doro na a lanpe. Wi no ben sabi fu a sani disi, èn a sma di gi wi primisi fu komoto fu a sipi no ben sabi dati tu.

Di den tyari wi go na Masra Haxworth, dan en ati ben e bron srefisrefi. A bari wi taki wi no ben kisi primisi fu kon na ini Singapore. Fu di wi no ben sabi taki wi no ben mag kon na ini a kondre, meki wi sori en a paspoort fu wi pe a stampu ben de na ini di e sori taki wi kisi primisi fu kon na ini a kondre. Nanga atibron a grabu wi paspoort èn a hari wan strepi na a stampu fu wi. Ma a sipi ben gowe kaba! Masra Haxworth hori den paspoort fu wi wan heri yari langa, èn te fu kaba a gi wi den baka nanga a stampu di gi wi primisi fu kon na ini a kondre.

Wi ben abi bun bakapisi na ini a diniwroko fu wi na ini Singapore

Di wi doro na ini april 1947, dan wan man di nen Joshua ben de a wan-enkri Kotoigi na ini Singapore. A ben e dini leki wan furuten dinari, noso pionier teleki a dede syatu baka a yari 1970. A no langa baka dati, wan tu sma di ben kon sabi den tru tori fu Bijbel, bigin fruteri tra sma den sani di den leri. Yehovah arki den begi fu wi, fu di moro sma ben de fu du a preikiwroko.—Mateyus 9:37, 38.

Na ini 1949, di Masra Haxworth ben de na wan langa fakansi na ini Ingrisikondre, siksi zendeling di klari a di fu 11 klas fu a Gileadskoro, doro na ini Singapore. Na a ten dati, Dave, di ben wroko wan tu yari makandra nanga mi leki zendeling, ben feni en fanowdu fu gowe libi Singapore fu di a kon siki. A froisi go na Australia, pe a dini Gado getrow teleki a dede na ini 1973. Wan fu den siksi nyun zendeling di  ben doro drape, ben de Aileen Franks. Na ini 1956 mi trow nanga Aileen.

Na ini den yari baka dati, wi studeri Bijbel nanga furu sma di tron Kotoigi èn bakaten den pikin fu den tron Kotoigi tu. Srefi na ini a ten disi, wan tu fu den de na ini a furuten diniwroko na ini tra kondre. Wan moi ondrofenitori na di fu Lester nanga Joanie Haynes, wan trowpaar fu Amerkankondre di ben e libi na ini Singapore. Wi bigin studeri Bijbel nanga den na ini den yari baka 1950. A trowpaar disi go na fesi esi-esi, èn baka di den drai go baka na Amerkankondre, den teki dopu. Bakaten, Lester nanga Joanie ben abi bun bakapisi na ini a diniwroko fu den. Den yepi furu sma fu tron Kotoigi, èn den yepi sosrefi den dri pikin fu den.

Joanie ben skrifi: „Te mi e prakseri a yari dati di wi ben de na ini Singapore, dan den sani di wi leri na a ten dati trutru kenki a fasi fa wi ben e libi. Efu unu no ben leri wi den tru tori fu Bijbel, dan kande wi ben o go te now ete fu a wan presi na a trawan. Mi breiti taki na yu leri Lester den tru tori fu Bijbel, fu di sensi na a bigin a ben abi wan sma di leri en fu abi lobi gi Yehovah èn gi den Kresten brada nanga sisa fu wi. Noiti a lasi a lobi dati.”

Wi e dini leki wan osofamiri na ini Singapore

Na ini 1962, wan sani pasa di tyari wan bigi kenki kon na ini wi libi. A datra fu wi, taigi Aileen taki a ben de nanga bere. Wi ben wani tan du a zendelingwroko, ma fa wi ben o man du dati èn sorgu wan pikin na a srefi ten? Nathan H. Knorr, di ben abi a frantwortu na a ten dati fu luku a wroko fu Yehovah Kotoigi na heri grontapu, ben skrifi wi wan brifi. Na ini a brifi a ben gi mi a deki-ati fu suku wan wroko so taki wi ben kan tan na ini Singapore. A sani disi ben de wan bigi tyalensi.

Furu fu den trakondre sma di ben e libi na ini Singapore, ben abi hei posisi na den bedrijf fu tra kondre di ben de drape. Mi no ben sabi notinoti fu bisnis afersi, fu di mi ben go na ini a furuten diniwroko wantewante baka di mi kaba nanga skoro, èn dati ben de sowan 23 yari pasa. Fu dati ede, mi pai wan kantoro na ini Londen di e suku wroko gi sma, fu skrifi wan brifi di e sori taki mi ben e wroko gi wan kerki organisâsi na ini tra kondre. Den ben o suku wan wroko gi mi di ben o fiti na den sani di mi man du. A kantoro seni a brifi disi gi furu difrenti bedrijf fu tra kondre di de na ini Singapore.

Mi ben tan kisi brifi di ben taki: „Wi e sari fu taigi yu taki wi no abi wan wroko gi yu.” Den ben feni taki mi bun tumusi gi a wroko, fu di mi ben abi furu ondrofeni! Baka wan tu mun Judy, a beibi fu wi, gebore. Na a ten dati, Brada Knorr ben de na ini Singapore, èn a ben go luku Judy nanga en mama na ati-oso. A ben taigi wi: „Unu kan tan na ini a zendeling-oso teleki Bill feni wan wroko.”

Baka wan tu mun mi feni wan wroko pe mi ben e meki reklame gi wan bedrijf fu tra kondre di ben e frei opolani. Pikinmoro a moni di mi ben e wroko no ben nofo fu sorgu gi mi osofamiri. Tu yari baka dati, wan Amerkan bedrijf di e frei opolani ben gi mi wan wroko, èn den ben e pai mi tu tron so furu leki san mi ben e kisi. Te fu kaba, mi ben sabi fa fu du a wroko disi bun. Disi ben meki taki mi ben abi moro ten gi mi osofamiri nanga a Kresten diniwroko.

A diniwroko fu Yehovah ben de a moro prenspari sani na ini wi libi. Disi ben meki taki mi kisi furu grani na ini na organisâsi fu Gado. Aileen ben go baka na ini a furuten diniwroko. Na a srefi ten, a Kownukondre preikiwroko na ini Singapore ben go na fesi. Na a ten fu 1965, wi ben bai wan gebow di ben de tu sodro hei èn wi ben gebroiki en leki wan Kownukondre zaal. Fo gemeente ben e kon makandra drape.

Lanti tapu a wroko fu wi!

Baka wan pisi ten, wi bigin kisi hebi gens. Tapu 14 yanuari 1972, wi ben go na a konmakandra na a Kownukondre zaal, soleki fa wi ben gwenti fu du ibri wiki. Ma a portu fu a zaal ben sroto nanga wan keti. Wan papira ben de di ben sori taki a Gemeente Singapore fu Yehovah Kotoigi ben puru na lantibuku. A wroko fu wi ben tapu! *

 Den ben tapu a Kownukondre zaal fu wi, ma dati no tapu wi fu anbegi Yehovah. Mi ben aksi misrefi: ’San Gado wani taki mi osofamiri du?’ Mi ben denki taki efu lanti ben o puru wi na ini a kondre, dan noiti moro wi ben o man drai kon baka fu miti den mati fu wi na ini Singapore. Sobun, mi aksi mi basi efu mi ben mag go wroko na ini a foto Kuala Lumpur, na Malèisia. Na so fasi, mi osofamiri ben o man go-kon na Singapore sondro problema. Mi ben fruwondru di mi basi taki dati a ben o poti mi leki basi na a kantoro na ini Kuala Lumpur. Disi ben o meki taki mi kisi tu tron so furu moni èn mi ben o kisi tra bun sani fu a wrokope tu.

Dan mi aksi misrefi efu Gado wani taki wi froisi gowe fu Singapore èn libi den brada fu wi na baka. Leki osofamiri, wi begi Yehovah fu yepi wi ini a tori disi. Wi ben prakseri taki Yehovah na a Sma di ben seni wi kon dyaso. Fu dati ede mi teki a bosroiti te fu kaba taki wi o tan. A basi fu mi no ben man bribi taki mi no ben wani teki a wroko disi di e pai bun.

A no ben makriki srefisrefi fu libi èn wroko na ini wan kondre pe lanti tapu a wroko fu Yehovah Kotoigi, fu di na iniwan momenti den ben kan grabu wi èn poti wi na strafu-oso. Na son okasi wi ben kisi moro deki-ati fu den wortu fu Psalm 34:7 di e taki: „Na engel fu Yehovah e seti ensrefi lontu den wan di e frede Gado, èn a e frulusu den.”

Wi e go dini na wan tra kondre

Te fu kaba, na ini 1993, baka di wi dini 46 yari na ini Singapore, wi kisi a kari fu froisi go na Nyun Zeeland fu dini drape. Drape wi ben kan dini sondro furu broko-ede nanga problema. A no de fu taki dati wi ben sari fu gowe libi den bun mati fu wi di wi lobi trutru, na ini Singapore. Ma a ben gi wi deki-ati fu sabi taki a bribi fu den tranga, fu di a bow na tapu wan fondamenti di faya no man bron. Disi meki taki den ben man tanapu kánkan èn horidoro di den ben tan kisi tesi.—1 Korentesma 3:12-14.

Now, wi e dini moro leki 14 yari na ini Nyun Zeeland, èn aladi mi nanga Aileen kon owru kaba, toku wi e nyan bun ete fu a diniwroko fu wi di wi e du leki spesrutu pionier. Tu brada fu mi, Mike, di abi 94 yari, nanga Peter, di abi 90 yari, de na libi ete èn den e dini Yehovah getrow na ini Kanada.

Na ini 1998, na umapikin fu wi, Judy, froisi go baka na a owstusei fu Asia èn a ben dini wan tu yari drape. Na ini wan fu den brifi di a skrifi gi wi, a taki: „Mi e taki Yehovah tangi ibri dei gi a tumusi moi grani di mi abi fu wroko dyaso. Mi de nanga tangi tu taki mi man du ala den sani disi fu di unu gi mi leri na wan lobi-ati fasi, èn taki unu e tan du ala san unu man fu meki taki mi man dini na so wan fasi.” Na ini 2003, Judy froisi kon baka na Nyun Zeeland fu yepi mi nanga Aileen. *

Wi e taki Yehovah tangi taki a situwâsi di wi ben de na ini, gi wi na okasi fu gi yesi na a kari di Masra e gi, fu di a e suku moro wrokoman fu du a kotiwroko. Wi kisi furu prisiri fu di wi du disi. Èn te ’grontapu pasa gowe’ soleki fa Bijbel e taki, dan wi sa si a moi pramisi fu Gado kon tru di e taki: „A sma di e du a wani fu Gado sa tan fu têgo.”—1 Yohanes 2:17.

[Futuwortu]

[Prenki na tapu bladzijde 29]

Joshua ben de a wan-enkri Kotoigi na ini Singapore di wi doro drape, na ini 1947

[Prenki na tapu bladzijde 29]

Mi nanga Dave Farmer na ini Hong Kong di wi ben de na pasi fu go na Singapore, na ini 1947

[Prenki na tapu bladzijde 29]

Mi nanga Aileen, na ini 1958

[Prenki na tapu bladzijde 31]

Mi, Aileen nanga wi umapikin, Judy

[Sma di abi a reti fu a prenki]

Kimroy Photography

[Sma di abi a reti fu a prenki na tapu bladzijde 28]

Kimroy Photography