Wan Gado di de klariklari fu gi sma pardon
Kon krosibei na Gado
Wan Gado di de klariklari fu gi sma pardon
„YU, O Yehovah, na wan Sma di bun èn di de klariklari fu gi pardon” (Psalm 86:5). Nanga den wortu disi, Bijbel e gi wi a dyaranti taki Yehovah Gado lobi fu gi sma pardon. Wan sani di ben pasa na ini a libi fu na apostel Petrus e sori krin taki Yehovah ’de klariklari fu gi pardon’.—Yesaya 55:7.
Petrus ben de wan fu den moro bun mati fu Yesus. Ma na a lasti neti fu Yesus en libi na grontapu, Petrus brokokindi gi a frede di a ben abi gi sma èn a ben du wan seryusu sondu. Na ini wan fesidyari, di ben de krosibei fu a presi pe sma ben e krutu Yesus na wan fasi di no kruderi nanga a wet, Petrus taki na fesi ala sma dati a no sabi Yesus. A no ben du dati wán leisi nomo, ma dri leisi. Baka di Petrus taki krin na a di fu dri leisi taki a no sabi Yesus, dan Yesus „drai luku Petrus” (Lukas 22:55-61). Yu kan frustan fa Petrus ben firi di Yesus drai luku en? Di Petrus kon frustan o seryusu a sondu fu en ben de, „a bari krei” (Markus 14:72). Na apostel disi ben abi berow, ma fu di a taki dri leisi dati a no sabi Yesus, meki a ben kan denki taki a sondu fu en bigi so te taki Gado no o man gi en pardon.
Baka di Yesus kisi wan opobaka, a ben abi wan takimakandra nanga Petrus èn a no de fu taki dati a sani disi meki taki Petrus no ben abi fu tweifri moro taki a kisi pardon. Yesus no ben taki grofu nanga en, èn a no ben krutu en. Na presi fu dati, a aksi Petrus: „Yu lobi mi?” Petrus piki en: „Iya, mi Masra, yu sabi taki mi lobi yu.” Yesus taigi en: „Gi den pikin skapu fu mi nyanyan.” Ete wan tron Yesus aksi Petrus a srefi sani, èn Petrus gi en a srefi piki, kande a du dati nanga moro overtoigi. Yesus taigi en: „Luku den pikin skapu fu mi.” Baka dati, Yesus aksi Petrus a srefi sani disi fu a di fu dri leisi: „Yu lobi mi?” Now „Petrus firi sari” èn a taigi Yesus: „Mi Masra, yu sabi ala sani; yu sabi taki mi lobi yu.” Yesus taigi en: „Gi den pikin skapu fu mi nyanyan.”—Yohanes 21:15-17.
Fu san ede Yesus ben poti aksi aladi a ben sabi a piki kaba? Yesus ben sabi san de na ini na ati fu sma, sobun a ben sabi taki Petrus lobi en (Markus 2:8). Fu di Yesus ben poti den aksi disi, meki a gi Petrus na okasi fu taki dri leisi krin taki a lobi en. Yesus taigi Petrus: „Gi den pikin skapu fu mi nyanyan. . . . Luku den pikin skapu fu mi. . . . Gi den pikin skapu fu mi nyanyan.” Den wortu di Yesus taki, gi na apostel di ben abi berow, a dyaranti taki a e frutrow en ete. Iya, Yesus ben frutrow Petrus trutru, fu di te yu luku en bun Yesus gi Petrus a wroko fu yepi sorgu gi den tumusi warti gudu fu en, namku den bakaman fu Yesus di de leki skapu èn di a lobi trutru (Yohanes 10:14, 15). A ben musu fu de so taki Petrus ben firi bun baka, fu sabi taki Yesus ben e frutrow en ete.
A de krin fu si taki Yesus gi na apostel fu en di ben abi berow, pardon fu en sondu. Na wan volmaakti fasi Yesus sori taki a abi den srefi fasi leki en Tata èn a e handri na a srefi fasi tu. Fu dati ede, wi sabi taki Yehovah sosrefi ben gi Petrus pardon (Yohanes 5:19). Yehovah no e draidrai fu gi sma pardon, ma a de wan Gado di abi sari-ati, èn di de „klariklari fu gi pardon” na wan sma di abi berow fu en sondu. A sani disi e trowstu wi, a no so?