Watra di e gi sma têgo libi

„Efu wan sma e dringi a watra di mi o gi en, dan watra no sa kiri en noiti moro, ma a watra di mi o gi en o tron wan peti na ini en, pe watra e komopo di e gi sma têgo libi.”—YOHANES 4:14.

 „WANTRONSO, wan brenki blaw-weti diriston e komoto na baka a lanki fu a mun. A brenki planeiti disi abi wan lekti blaw kloru èn a weti lanki fu en di gersi smoko e drai na en lontu safrisafri. A planeiti disi safrisafri e kren go moro hei, èn a gersi wan pikin peri na ini wan bigi blaka se di dangra srefisrefi.”—Edgar Mitchell, wan sabiman di e go na loktusei fu ondrosuku sani, e fruteri fa grontapu tan te yu e si en komoto fu loktusei.

A planeiti fu wi abi so wan moi kloru, taki na astronaut gebroiki den moi wortu disi fu taki san a si. Fa a du kon taki a planeiti fu wi abi a moi kloru dati? Dati e kon fu di watra e tapu moro leki afu fu grontapu. Fu taki en leti, boiti taki watra e meki taki a grontapu fu wi moi fu si, a e meki tu taki den libisani na grontapu man tan na libi. Te yu e luku en bun, dan 65 procent fu a libisma skin na watra. Dati meki wan buku e taki disi fu watra: „A prenspari trutru gi a libi, èn bon nanga meti abi en tranga fanowdu fu man tan na libi” (Encyclopædia Britannica).

Fu di grontapu meki na so wan fasi taki a watra na en tapu e kon krin baka doronomo, meki a watra disi noiti no e kaba. Wan buku e taki: „Pikinmoro ibri dropu watra di wi e gebroiki e lon go baka na se. Drape a son e meki taki a watra e tron dampu. Baka dati, a e fadon kon baka na grontapu leki alen. Den libisani na grontapu e gebroiki a srefi watra ibri tron baka. A watra noiti no e kaba” (The World Book Encyclopedia). Luku san Bijbel ben taki fu a tumusi moi sistema disi sowan 3000 yari pasa: „Ala den winter liba e lon go na se; èn toku a se srefi no e furu. Na a presi pe den winter liba e komoto, na drape den e drai go baka, so taki den kan komoto fu drape baka.” A sistema di e meki taki a watra e drai kon baka na grontapu, na trutru wan kefalek moi sani di Gado seti.—Preikiman 1:7.

Te wi e luku o prenspari watra de gi a libi, èn te wi e luku sosrefi a tumusi moi fasi fa wi e kisi a watra disi, dan a no musu fruwondru wi taki Bijbel e taki fu watra moro leki 700 tron. Nofo tron te Bijbel e taki fu den tumusi moi sani di watra man du, dan a e du dati fu prenki sani di abi fu du nanga na anbegi fu wi. Bijbel e taki spesrutu fu a krin di watra man krin sani èn fu a hori di a man hori sani na libi.—Yesaya 58:11; Yohanes 4:14.

A krakti di Bijbel abi fu meki wi kon krin

Fu di den Israelsma ben abi a gwenti fu wasi den skin èn sosrefi tra sani nanga watra, meki den ben de wan pipel di ben krin srefisrefi. Den ben abi a gwenti fu wasi den futu fosi den ben e go na ini wan oso fu go nyan (Lukas 7:44). Boiti taki den Israelsma ben e gebroiki watra fu krin den skin èn sosrefi den sani di den ben abi, den ben e gebroiki watra tu fu krin densrefi te den ben musu teki prati na a anbegi fu den. Den priester di ben e dini na a tabernakel ben musu wasi den skin èn den krosi fu den doronomo (Exodus 30:18-21). Bakaten, Salomo ben meki wan ’bigi kopro beki’ gi a tempel na ini Yerusalem, èn nofo tron a beki disi ben abi moro leki 44.000 liter watra na ini. A watra dati ben sari gi den priester fu krin densrefi soleki fa a Wet fu Gado ben taki (2 Kroniki 4:2, 6). San Kresten na ini a ten disi kan leri fu a fasi disi fa den priester ben e gebroiki watra?

Na apostel Paulus ben tyari kon na krin taki Yesus ben ’wasi a Kresten gemeente nanga watra, nanga yepi fu Gado wortu’. Neleki fa watra e krin a skin fu wan sma, na so den tru tori na ini Gado Wortu man yepi wan sma fu tyari ensrefi na wan fasi di fiti, èn fu anbegi Gado na a yoisti fasi. Te den disipel fu Krestes e krin densrefi na a fasi disi, dan den sa de „santa èn sondro fowtu” (Efeisesma 5:25-27). Dati meki te sma wani taki Gado feni den bun, dan den musu meki muiti fu de ’sondro flaka, èn sondro fowtu’, iya, den musu tyari densrefi na wan fasi di fiti èn den musu dini Gado na wan yoisti fasi (2 Petrus 3:11, 14). Fa Gado Wortu e yepi den fu du disi?

Na wan agersi fasi, den wan di wani plisi Yehovah Gado e dringi a watra fu Gado, fu di den e studeri Bijbel doronomo. Te den sma disi e kon frustan den sani di den e leri, èn te den sani dati e naki den ati, dan den e kisi a tranga winsi fu du a sani disi di Bijbel e taki: „Kenki fu di unu e teki wan nyun fasi fu denki, so taki unu kan kon sabi san na Gado en wani di bun, di e plisi en èn di de volmaakti.”—Romesma 12:2.

Te den sma disi kon sabi soifri san na a wani fu Gado, dan dati o yepi den fu kon si sortu kenki den musu tyari kon na ini a fasi fa den e tyari densrefi èn na ini a fasi fa den e denki. Te den e  fiti Bijbel gronprakseri na ini den libi wan pisi ten kaba, dan Gado Wortu de leki watra, fu di a e yepi den fu tron sma di „wasi kon krin”, srefi fu seryusu sondu.—1 Korentesma 6:9-11.

Luku wan eksempre fu wan yonkuman na ini Spanyorokondre di ben tyari den kenki disi kon. Alfonso e taki: „Di mi ben abi 18 yari, mi no ben breiti nanga a fasi fa mi ben e libi.” Wan heri pisi ten, Alfonso ben e gebroiki drugs èn a ben du so furu ogri, taki a ben gersi leki a no ben o man kenki moro. „Den sani di mi ben e du nanga mi skin èn nanga tra sma ben e meki taki mi ben e firi doti.”

„Na skoro, mi si wan yongu uma di abi a srefi yari leki mi. Fu di na uma disi ben sorgu ensrefi bun èn fu di a ben e tyari ensrefi na wan fasi di fiti, meki a ben de heri tra fasi leki den tra studenti. Na eksempre fu na uma disi meki taki mi ben wani libi wan krin libi neleki en. Di a gi mi deki-ati fu go na den konmakandra fu Yehovah Kotoigi, dan mi go. Heri esi, mi bigin studeri Bijbel èn mi kon kisi wan matifasi nanga Gado. Na ini wán yari, mi tapu nanga ala den takru gwenti fu mi èn mi tron wan dopu Kotoigi. A bigi kenki disi di mi tyari kon, meki taki furu papa nanga mama na ini a birti fu mi kon aksi mi efu mi ben kan yepi den yongu pikin fu den di ben e gebroiki drugs.”

Watra di kan meki sma kisi têgo libi

Wan leisi, di Yesus ben e taki nanga wan Samaria uma di ben e teki watra na a peti fu Jakob, dan a fruteri na uma disi fu „watra di e gi libi”. A ben taki: „Efu wan sma e dringi a watra di mi o gi en, dan watra no sa kiri en noiti moro, ma a watra di mi o gi en o tron wan peti na ini en, pe watra e komopo di e gi sma têgo libi” (Yohanes 4:10, 14). Den sani di Yesus taki e sori taki den wortu „watra di e gi libi” e prenki den sani di Gado seti so taki wi kan kisi libi, èn en Wortu, Bijbel, e tyari kon na krin san na den seti dati. Den seti disi e gi libisma na okasi fu kisi têgo libi. Wan prenspari seti, na a frulusu-ofrandi fu Krestes Yesus. Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:16.

Alfonso, di wi ben taki fu en kaba, kon kisi furu warderi gi a „watra di e gi libi” èn di e kon fu Gado. Disi na san Alfonso ben taki fu den wan di ben e tan du ogri èn di ben e tan gebroiki drugs: „Mi bigi brada dede, èn sosrefi ibriwan fu den mati di mi ben abi fosi. A sabi fu Gado Wortu kibri mi so taki a srefi sani dati no miti mi. Tangi fu den sani di Yehovah seti fu yepi sma fu kon moro krosibei na en, meki mi de na libi ete.” San moro moi, na taki den sani di Alfonso leri na ini Gado Wortu, meki taki a kon abi a howpu fu libi fu têgo na ini a nyun grontapu di Gado pramisi.—2 Petrus 3:13.

Wan kari di ala sma e kisi

Na ini a lasti buku fu Bijbel, wi kan leisi fu ’wan liba di abi watra di e gi libi; a watra krin leki dyamanti, èn a liba e lon komoto fu a kownusturu fu Gado èn fu a Pikin Skapu’ (Openbaring 22:1). A liba e prenki den sani di Gado seti fu sorgu taki libisma e kon de volmaakti te fu kaba, soleki fa a ben de nanga Adam nanga Eva na a bigin.

Baka a tori fu a liba, dan a buku Openbaring e gi wi a kari disi: „Ibri sma di watra e kiri en, meki  a kon; meki ibri sma di wani, kon dringi fu a watra di e gi libi èn di de fu kisi fu soso” (Openbaring 22:17). Na ini a ten disi, sma na heri grontapu e kisi a kari disi. Ibri yari, Yehovah Kotoigi na ini moro leki 235 kondre e wroko moro leki wán milyard yuru fu yepi sma fu kon kisi a sabi fu Bijbel di kan meki den kisi libi.

Yu wani a watra di e gi sma libi? Te yu e dringi a watra di krin leki dyamanti, noso te yu e kon sabi fu den sani di wi Mekiman seti gi wi èn te yu e kisi wini fu den seti dati, dan yu kan kon tron wan fu den sma tu di „e poti wan bun fondamenti gi a tamara, neleki wan gudu di kibri bun, so taki den kan grabu a trutru libi hori bun steifi”.—1 Timoteyus 6:19.

[Prenspari pisi na tapu bladzijde 14]

Neleki fa watra e krin wi skin, na so den tru tori fu Bijbel man yepi wi fu tyari wisrefi na wan fasi di fiti èn fu dini Gado na wan yoisti fasi

[Faki/​Prenki na tapu bladzijde 15]

WATRAPETI NA INI BIJBEL TEN

Na ini Bijbel ten, sma ben e meki bun furu muiti fu feni presi pe nofo watra ben de. Abraham nanga Isak ben diki peti krosibei fu Berseba, fu sorgu taki den ben abi nofo watra gi na osofamiri fu den èn gi den meti fu den.—Genesis 21:30, 31; 26:18.

Nofo tron, den peti di no ben dipi ben e drei te a dreiten ben e hori langa. Fu man sorgu taki watra ben de ala ten, dan a peti ben musu dipi (Odo 20:5). Wan peti na ini Lakis dipi 44 meter. Wan tra peti na ini Gibeon, dipi moro leki 25 meter èn a bradi 11 meter. Den sma di diki a peti dati ben musu puru sowan 3.000.000 kilo ston. A Samaria uma di ben kon teki watra na a peti fu Yakob ben taigi Yesus: „A peti dipi.” A kan taki a watra na ini a peti disi ben de sowan 23 meter ondrogron.—Yohanes 4:11.

Wan tra sani di sma na a Mindri Owstusei ben e gebroiki fu kibri watra, na alenbaki. Na alenwatra di ben e fadon na a pisi ten fu oktober te go miti april, ben e lon go na ini den baki dati. Sma ben e diki gotro na a skin fu den bergi fu meki a watra lon go na ini den alenbaki. Den Israelsma ben e diki bigi alenbaki fu kibri watra.—2 Kroniki 26:10.

A ben de wan hebi wroko fu puru watra na ini peti èn na ini alenbaki, èn te now ete dati de so. Ibri dei, uma soleki Rebeka èn sosrefi den umapikin fu Yetrow ben e puru watra na ini den peti dati, gi den osofamiri èn gi den meti fu den, èn disi ben de wan prenspari wroko.—Genesis 24:15-20; Exodus 2:16.

[Prenki na tapu bladzijde 15]

Now Alfonso e preiki Gado Wortu