A fowtu fu gebroiki a nen fu Gado?

NA INI den Hebrew Buku fu Bijbel, di sma e kari nofo tron na „Owru Testamenti”, a nen fu Gado skrifi sowan 7000 tron, na a fasi disi יהוה (leisi en fu a reti-anusei go na a kruktu-anusei). Sobun, a nen fu Gado skrifi nanga den fo Hebrew letter Yohdh, He, Waw, nanga He, di vertaal nofo tron leki YHWH.

Langa ten pasa, den Dyu ben kon abi a kruktu denki taki a de wan fowtu sani fu gebroiki a nen fu Gado. Leki bakapisi fu dati, den weigri fu taki a nen disi, èn te den ben musu skrifi a nen fu Gado, dan den ben gebroiki tra wortu na presi fu dati. Ma na ini furu bijbelvertaling, sma gebroiki a nen „Yahweh” noso „Yehovah”. Wan fu den vertaling dati, na a Lomsu Jerusalem Bible. Luku san a Bijbel disi e taki na a pisi tori di e taki fu Moses. Na ini a pisi dati Moses e aksi Gado san a musu taigi den Israelsma te den aksi en suma seni en go na den. Soleki fa a Bijbel disi e sori, dan Gado taigi Moses: „Yu musu taigi den manpikin fu Israel: ’Yahweh, a Gado fu unu fositen tata, a Gado fu Abraham, a Gado fu Isak, nanga a Gado fu Yakob, seni mi kon na unu.’ Disi na mi nen fu ala ten, èn na a nen disi ala den bakapikin musu kari mi.”—Exodus 3:15.

Di Yesus ben begi, dan a ben taki fa ensrefi ben gebroiki a nen fu Gado. A ben taki: „Mi meki yu nen bekènti na den èn mi sa tan meki a nen dati bekènti.” Na ini a Wi Tata begi di furu sma sabi, Yesus ben taki: „Wi Tata na hemel, meki a de so taki yu nen de santa.”—Yohanes 17:26; Mateyus 6:9, JB.

Fu dati ede, a kan de so taki yu o fruwondru fu si san Pawsu Benedictus XVI ben taki fu a gebroiki di sma gebroiki a nen fu Gado. Na ini a buku fu en di tyari kon na doro no so langa pasa, a ben skrifi: „Den Israelsma . . . ben abi leti di den ben weigri fu taki a nen disi di Gado gi ensrefi, èn di sma e skrifi leki YHWH. Na so fasi den ben e sorgu taki den no lagi a nen fu Gado leki den nen fu den heiden gado. Fu dati ede, den sma di vertaal Bijbel na ini a ten disi ben fowtu di den gebroiki a nen disi na ini den vertaling. Den du dati, aladi a de so taki langa ten kaba den Israelsma e si a nen disi leki wan nen di sma no sabi èn di den no mag kari. Den gebroiki a nen disi neleki a de iniwan nen fu owruten” (Jesus of Nazareth).

Fa yu e denki fu a tori disi? A bun noso a fowtu fu gebroiki Gado en nen? Yehovah srefi taki: „Disi na mi nen fu ala ten, èn na a nen disi ala den bakapikin musu kari mi.” Wan sma de di abi a reti fu no agri nanga san Gado taki?

[Prenki na tapu bladzijde 30]

Yesus ben gebroiki a nen fu Gado na ini begi