Leisiman e aksi

Fu san ede Yehovah Kotoigi no e teki prati na orloku?

Langa ten a de so kaba taki awansi pe Yehovah Kotoigi de, den no e teki prati na orloku na mindri difrenti kondre, noso na mindri difrenti grupu sma fu a srefi kondre. „Yehovah Kotoigi no e teki sei kwetikweti na ini feti,” na so wan buku taki, di skrifi 50 yari pasa (Australian Encyclopædia).

Wan prenspari reide fu san ede Kotoigi no e teki prati na orloku, na taki dati ben o de teige a Kresten konsensi fu den. A konsensi fu den e wroko soleki fa den leri fu den komando nanga na eksempre fu Masra Yesus Krestes. Yesus ben gi den bakaman fu en a komando fu lobi tra sma. A gi den a komando disi tu: „Tan lobi un feanti, tan du bun gi den sma di no lobi unu kwetikweti” (Lukas 6:27; Mateyus 22:39). Di wan fu den disipel fu Yesus hari en feti-owru fu feti gi en, dan Yesus taigi en: „Poti yu feti-owru na en presi baka, bika a sma di e teki a feti-owru, na a feti-owru o kiri en” (Mateyus 26:52). Sobun, nanga den sani di a ben e taki èn nanga den sani di a ben e du, a sori krin taki den bakaman fu en no musu gebroiki fetisani.

Ete wan reide fu san ede Yehovah Kotoigi no e teki prati na orloku, na taki den de na ini wan organisâsi pe den abi Kresten brada nanga sisa na heri grontapu. Te den ben o teki prati na orloku, dan dati ben o meki taki brada feti nanga makandra. A sani dati ben o de teige a komando fu Yesus di e taki dati den musu „lobi makandra”.—Yohanes 13:35.

Yehovah Kotoigi no e taki nomo dati den lobi trawan, ma a fasi fa den e libi e sori taki den e du dati tu. Fu eksempre, luku fa den ben tyari densrefi na a ten fu a di fu Tu Grontapufeti, fu 1939-1945. Na ini Amerkankondre, moro leki 4300 Kotoigi fu Yehovah ben poti na strafu-oso fu di den ben weigri fu feti na ini na orloku. Na ini Ingrisikondre, moro leki 1500 sma ben musu go na strafu-oso, fu di den ben weigri fu du sani di e horibaka gi na orloku. Na ini a grupu dati yu ben abi moro leki 300 umasma. Na a ten fu a Nazi tirimakti, na ini Doisrikondre, lanti gi moro leki 270 Kotoigi dedestrafu, fu di den ben weigri fu go feti. Di den Nazi ben e tiri, dan moro leki 10.000 Kotoigi ben musu go na strafu-oso noso na strafuman kampu. Kotoigi na ini Yapan ben nyan pina srefisrefi tu. Iniwan sma di lasi lobiwan fu en na ini dede na a ten fu a di fu Tu Grontapufeti, noso wan tra orloku baka dati, kan de seiker taki nowan enkri Yehovah Kotoigi de frantwortu gi dati.

A fasi fa Yehovah Kotoigi e denki fu orloku, de krin fu si na den lasti wortu di Wolfgang Kusserow ben taki. Na ini 1942, den Nazi ben koti na ede puru fu a Doisri yonkuman disi, di ben abi 20 yari. Den ben du dati fu di a ben weigri fu go feti na ini na orloku (Yesaya 2:4). A ben taki na fesi a krutubangi fu a legre: „Mi ben kweki leki wan Kotoigi fu Yehovah, soleki fa Gado taki na ini den Santa Buku fu Bijbel. A moro bigi èn a moro santa wet di Gado gi libisma na: ’Yu musu lobi Yehovah yu Gado moro ala tra sani, èn yu musu lobi tra sma leki fa yu lobi yusrefi.’ Tra komando e taki: ’Yu no musu kiri sma.’ Yu denki taki wi Mekiman ben skrifi den sani disi gi den bon?”—Markus 12:29-31; Exodus 20:13.

Yehovah Kotoigi e bribi taki Yehovah wawan, na almakti Gado, sa tyari têgo vrede kon na grontapu. Den e wakti teleki a meki a pramisi fu en kon tru, taki a o „meki feti kon na wan kaba te na a moro farawe presi fu grontapu”.—Psalm 46:9.