EFU yu abi wan yonguwan na oso, dan kande yu e frustan fa den sma di kari na tapusei e firi. A kan taki fosi, a ben makriki gi yu fu taki nanga a pikin fu yu. Ma now a gersi leki den no wani taki nanga yu. Angela, wan mama na ini Italiakondre ben taki: „Di a boi fu mi ben pikin ete, dan a ben e poti aksi gi mi doronomo. Now na mi musu bigin taki nanga en. Efu mi fosi no e bigin taki nanga en, dan omeni dei langa wi no e taki nanga makandra fu prenspari sani.”

Kande yu ondrofeni a srefi sani leki Angela. Kande yu kon si taki a pikin fu yu di ben lobi taki, wantronso kenki kon tron wan yonguman noso wan yongu-uma di e atibron esi èn di no e taki furu. Ibri leisi te yu e pruberi fu taki nanga en, dan a e piki yu syatu èn na wan grofu fasi. Kande yu e aksi a boi fu yu: „Fa a dei waka gi yu?” èn a e piki na wan grofu fasi: „Bun.” Kande yu e aksi na umapikin fu yu: „Fa a ben de na skoro tide?” Kande a e opo en skowru en a e piki: „A ben bun.” Fu di yu wani taki pikinso tori nanga den, meki yu e aksi den: „Fu san ede yu no e taki moro?” Ma fu di den no wani taki nanga yu, meki den e tan pî.

A no de fu taki dati son yonguwan no abi problema fu taigi den papa nanga mama san den e denki. Ma san den e taki a no san a papa nanga mama fu den wani yere. Edna, wan mama na ini Nigeria, e taki: „Te mi e aksi na umapikin fu mi fu du wan sani gi mi, dan a gwenti fu piki: ’No fruferi mi.’” Ramón di e libi na ini Meksikow, e taki a srefi sani fu a boi fu en di abi 16 yari. A e taki: „Pikinmoro ibri dei, wi e haritaki nanga makandra. Ibri leisi te mi e aksi en fu du wan sani, a e bigin suku ala sortu reide fu no du a sani dati.”

Son leisi wan papa noso wan mama kan atibron te a pikin fu en no wani taki nanga en. Bijbel e taki dati „sani no sa waka bun te sma no e taki krin nanga makandra” (Odo 15:22). Anna, wan mama di no abi masra èn di e libi na ini Rosiakondre, e taki: „Te mi no sabi fa a boi fu mi e denki, dan mi e atibron so te, taki mi wani bari.” Fu san ede a de so taki yoisti te yonguwan musu taki nanga a papa nanga mama fu den, dan a gersi leki den no man taki nanga makandra?

Te sma e taki, dan nofo tron yu kan kon sabi fa den e firi. Yesus ben taki dati „san furu na ati, na dati mofo e taki” (Lukas 6:45). Sobun, te wi man taki bun nanga trawan, dan wi kan leri fu  den, èn wi e meki den kon sabi wi moro bun. Son leisi, yonguwan feni en muilek fu fruteri trawan fa den e firi èn san den e denki. Nofo tron, te pikin-nengre e kon moro bigi, dan den kan kenki wantronso. A kan taki di den ben pikin, den ben e taki fri fu sani. Ma di den kon moro bigi, den tron yonguwan di e syensyen. Sabiman e taki dati furu yonguwan feni taki ala ten sma e luku san den e du èn san den e taki, neleki den de na tapu wan podium. Yonguwan di e syensyen no lobi a sani disi, èn dati meki den no wani taki a papa nanga mama fu den kon sabi fa den e firi.

Wan tra reide fu san ede yonguwan no wani taki fa den e firi, na fu di den wani teki den eigi bosroiti. Awinsi san yu e du, a pikin fu yu e kon bigi, èn dati wani taki dati a sa kon abi en eigi denki. Ma disi no wani taki dati a lepi kaba fu go libi en wawan. Now di a kon moro bigi, dan a o abi yu tranga fanowdu. Ma wan heri pisi ten fosi a pikin e kon tron wan bigisma, a e bigin leri kaba fu denki gi ensrefi. Fu di yonguwan e gro kon tron lepi sma, meki den wani denki bun fu sani, fosi den e fruteri trawan fa den e firi.

A tru taki yonguwan e taki moro makriki nanga den speri fu den. Na dati Jessica, wan mama na ini Meksikow, kon si. A e taki: „Di na umapikin fu mi ben moro yongu, dan ala ten a ben e kon na mi nanga den problema fu en. Ma now a e go na den mati fu en.” Efu na so a de nanga a pikin fu yu, dan yu no musu denki taki a no abi yu fanowdu moro. Ma ondrosuku sori taki aladi yonguwan e taki tra fasi, toku den feni a rai fu a papa nanga mama fu den moro prenspari leki a di fu den mati fu den. Ma fa yu kan meki en makriki gi a pikin fu yu fu taki nanga yu?

Kon meki wi taki dati yu e rèi na tapu wan langa pasi di no abi boktu. Wan heri pisi fu a pasi, yu no abi fu drai a stuur tumusi. Ma wantronso, a pasi e meki wan srapu boktu. Fu man tan na tapu a pasi, yu o abi fu drai a stuur. Na so a de tu te yu pikin e kon bigi. Kande omeni yari langa yu ben man taki bun nanga a pikin fu yu. Ma now a libi fu a pikin fu yu e kenki wantronso, neleki fa wan pasi e meki wan srapu boktu. Dati meki yu musu tyari kenki kon tu na ini a fasi fa yu e taki nanga en. Aksi yusrefi den sani di e kon now.

’Te a pikin fu mi wani taki nanga mi, dan mi e gi en okasi fu du dati?’ Bijbel e taki: „Wortu di taki na a yoisti ten de leki gowtu apra di kerfu na ini wan solfru preti” (Odo 25:11). Soleki fa a tekst disi e sori, dan a de prenspari fu taki na a yoisti ten. Luku na agersitori disi: Wan gronman no man meki a kotiten kon moro esi noso moro lati. A wan-enkri sani di a kan du, na fu koti a nyanyan te a kotiten doro. Kande a yongu pikin fu yu abi wan spesrutu ten te a wani taki. Teki den okasi dati. Frances, wan mama di no abi wan masra, èn di e libi na ini Australia, e taki: „Na umapikin fu mi ben gwenti kon na ini mi kamra latilati a neti, èn son leisi a ben e tan wan heri yuru. Mi gwenti fu sribi fruku, èn dati meki a no ben makriki gi mi. Ma na den okasi dati wi ben e taki fu ala sortu sani.”

’Mi e frustan fa a e firi?’ Yob 12:11 e taki: „A yesi srefi no e tesi wortu, soleki fa a tapusei fu a mofo e tesi nyanyan?” Te a pikin fu yu kon moro bigi, dan dati na a yoisti ten fu „tesi “ san den e taki. Yonguwan lobi fu taki sani neleki den sani dati de so ala ten. Fu eksempre, kande a pikin fu yu e taki: „Ala ten yu e si mi leki wan pikin-nengre!” Noso a ben kan taki: „Noiti yu no e arki mi!” Na presi taki yu e krutu nanga a pikin taki a no abi leti, pruberi fu kon frustan fu san ede a pikin e taki dati. Kande a wani taigi yu wan tra sani. Fu eksempre, te a e taigi yu taki ala ten yu e si en leki wan pikin-nengre, dan  kande a wani taigi yu taki a feni taki yu no e frutrow en. Èn te a e taigi yu taki noiti yu no e arki en, dan kande a wani taigi yu fa a e firi trutru. Pruberi fu kon sabi san a pikin wani taigi yu trutru.

A de so taki sondro fu mi sabi, mi e meki en muilek gi a pikin fu mi fu taki nanga mi? Bijbel e taki: „Den siri fu a froktu fu regtfardikifasi e sai te vrede de, èn dati de fu a bun fu den sma di e meki vrede nanga trawan” (Yakobus 3:18). Meki den sani di yu e taki èn a fasi fa yu e du sorgu taki „vrede de”, so taki a pikin fu yu sa man taki moro makriki nanga yu. Hori na prakseri taki yu musu yepi a pikin fu yu. Sobun, te unu e taki fu wan tori, dan a pikin no musu kisi a firi taki yu e krutu en. Wan papa di nen Ahn, èn di e libi na ini Korea, e taki: „Wan koni papa noso mama no e taki sani soleki: ’O ten yu o kaba du leki wan pikin-nengre’? A no e taki tu: ’Omeni leisi mi taigi yu kaba?’ Baka di mi meki a fowtu disi wan tu leisi, dan mi kon si taki den boi fu mi no ben lobi a fasi fa mi ben e taki nanga den, èn den no ben lobi tu san mi taigi den.”

Soleki fa wi si, dan yu kan feni fasi fu taki bun nanga yu pikin. Kenki a fasi yu e taki nanga a pikin fu yu, te dati de fanowdu. Taki nanga tra papa nanga mama di ben abi bun bakapisi nanga a sani disi (Odo 11:14). Te yu e taki nanga a pikin fu yu, dan yu musu ’gaw fu yere, ma yu no musu gaw fu taki’ (Yakobus 1:19). San moro prenspari, na taki yu musu tan meki muiti fu kweki a pikin fu yu „nanga a leri fu Yehovah èn frumane den, so taki den kan kisi a denki fu en”.—Efeisesma 6:4.