Den sani di Yesus leri wi

Fa wi musu handri nanga trawan

Fu san ede wi musu abi switifasi?

Yu abi switifasi gi trawan, srefi te den no abi switifasi gi yu? Efu wi wani teki na eksempre fu Yesus, dan wi musu abi switifasi srefi gi den sma di no lobi wi. Yesus ben taki: „Efu unu lobi den sma di lobi unu, dan sortu bun unu du dan? Bika srefi sondari lobi den sma di lobi den. . . . Ma tan lobi un feanti . . . , èn unu o de manpikin fu a Moro Heiwan, fu di Gado du bun gi den sma di no de nanga tangi èn gi den ogri sma.”—Lukas 6:32-36; 10:25-37.

Fu san ede wi musu gi trawan pardon?

Te wi e meki fowtu, dan wi wani taki Gado gi wi pardon. Yesus ben leri wi taki a fiti te wi e aksi Gado pardon na ini begi (Mateyus 6:12). Ma Yesus ben taki tu dati Gado sa gi wi pardon soso te wi de klariklari fu gi trawan pardon. A ben taki: „Efu unu e gi sma pardon fu den sondu fu den, dan un Tata na hemel sa gi unu pardon tu; ma efu unu no e gi sma pardon fu den sondu fu den, dan un Tata no sa gi unu pardon fu den sondu fu unu.”—Mateyus 6:14, 15.

 Fa osofamiri kan de koloku?

Aladi Yesus no ben trow noiti, toku wi kan leri furu sani fu en di sa yepi wi fu abi wan koloku osofamiri libi. A fasi fa a ben taki èn a fasi fa a ben handri, na wan eksempre di wi kan teki. Poti prakseri na den dri sani di e kon now:

1. Wan masra musu lobi en wefi leki en eigi skin. Yesus gi masra wan bun eksempre. A ben taigi den disipel fu en: „Mi e gi unu wan nyun komando, taki un musu lobi makandra.” O furu lobi den ben musu abi? Yesus taki dati ’neleki fa en lobi den, na so den musu lobi makandra tu’ (Yohanes 13:34). Bijbel e fiti a gronprakseri disi na masra, te a e taki: „Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente . . . Na a srefi fasi den masra musu lobi den wefi leki den eigi skin. A man di lobi en wefi, lobi ensrefi tu, bika nowan man abi bita-ati gi en eigi skin; ma a e sorgu a skin èn a e luku en bun, neleki fa Krestes e du nanga a gemeente.”—Efeisesma 5:25, 28, 29.

2. Trowpatna musu de getrow na makandra. Te sma di trow abi seks nanga sma di no de den trowpatna, dan dati na wan sondu teige Gado, èn dati e pori na osofamiri libi. Yesus ben taki: „Unu no leisi . . . ’Dati meki wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin’? Sobun, den no de tu skin moro, ma wán skin. Fu dati ede, nowan sma musu prati san Gado poti na ondro wán tyatyari. . . . Mi e taigi unu taki efu wan man broko trow nanga en wefi, ma a wefi no ben du hurudu, èn a man trow nanga wan tra uma, dan a du sutadu.”—Mateyus 19:4-9.

3. Pikin musu saka densrefi na den papa nanga mama ondro. Aladi Yesus ben de volmaakti èn en papa nanga mama no ben de volmaakti, toku a ben gi yesi na den di a ben yongu. Bijbel e taki fu Yesus di a ben de 12 yari: „A go nanga den [en papa nanga mama] na Nasaret, èn a tan saka ensrefi na den ondro.”—Lukas 2:51; Efeisesma 6:1-3.

Fu san ede wi musu fiti den gronprakseri disi na ini wi libi?

Te a abi fu du nanga den sani di Yesus leri den disipel fu en, a ben taki: „Efu unu sabi den sani disi, dan koloku fu unu te unu e du den” (Yohanes 13:17). Te wi wani de tru Kresten, dan wi musu fiti a rai di Yesus gi wi fu a fasi fa wi musu handri nanga trawan. A ben taki: „Na a fasi disi ala sma o sabi taki unu na mi disipel, te unu lobi makandra.”—Yohanes 13:35.

Efu yu wani sabi moro, luku kapitel 14 fu a buku San Bijbel e leri wi trutru? *

[Futuwortu]

[Prenki na tapu bladzijde 16, 17]

Na agersitori di Yesus ben gi fu a manpikin di ben frumorsu a gudu fu en, e leri wi o prenspari a de fu abi switifasi èn fu gi trawan pardon. —Lukas 15:11-32

[Prenki na tapu bladzijde 17]

Trowpatna musu de getrow na makandra