Fu san ede wi musu sori taki wi de nanga tangi?

„Lobi Raquel,

Mi e taki yu furu tangi gi a deki-ati di yu gi mi. Kande yu no sabi, ma a fasi fa yu de, gi mi deki-ati èn yu yepi mi trutru di yu taki nanga mi na wan switi fasi.”—Jennifer.

A PASA wan leisi kaba taki, sondro fu fruwakti dati, yu kisi wan brifi fu wan sma di gi yu tangi fu wan sani di yu du? Efu dati pasa kaba, dan a musu fu de so taki a sani dati ben meki yu firi bun. A no de fu taki dati wi alamala lobi en te trawan e si wi leki warti sma èn te den e warderi wi.—Mateyus 25:19-23.

Nofo tron te sma e sori taki den de nanga tangi, dan den e tron moro bun mati nanga a sma di du wan sani gi den. Boiti dati, wan sma di e sori warderi e teki na eksempre fu Yesus Krestes, di ala ten ben e si den bun wroko di trawan ben e du.—Markus 14:3-9; Lukas 21:1-4.

A de wan sari sani taki moro nanga moro sma no e taki noso du sani fu sori taki den de nanga tangi. Bijbel e gi a warskow taki sma „no sa de nanga tangi” na ini „den lasti dei” (2 Timoteyus 3:1, 2). Furu sma na ini a ten disi no de nanga tangi. Efu wi no e luku bun, dan a sani dati kan abi so wan krakti tapu wi, taki wi no o de nanga tangi moro.

San papa nanga mama kan du fu leri den pikin fa den kan sori taki den de nanga tangi? Suma wi kan gi tangi? Fu san ede wi musu de nanga tangi, srefi te tra sma no e du dati?

Sori taki yu de nanga tangi na ini na osofamiri

Papa nanga mama e wroko tranga fu sorgu gi den pikin. Ma son leisi papa nanga mama kan feni taki den pikin no abi warderi gi a muiti di den e meki. San kan yepi papa nanga mama na ini a situwâsi disi? Dri sani de fanowdu.

(1) Gi na eksempre. Neleki fa a de nanga furu fu den sani di papa nanga mama e leri den pikin, na so na eksempre fu den, na a moro bun fasi fa den kan leri den pikin fu de nanga tangi. Bijbel e taki disi fu wan mama fu owruten Israel, di ben e wroko tranga: „Den pikin fu en e taki bun fu en.” Pe den pikin disi leri fu sori taki den de nanga tangi? A tra pisi fu a tekst e sori wi dati. A e taki: „En masra e prèise en tu” (Odo 31:28, New Century Version). Papa nanga mama di e sori makandra taki den de nanga tangi, e sori den pikin taki te den e gi tangi na trawan, dan dati e meki trawan firi bun. Boiti dati, a sani disi e meki na osofamiri libi kon moro bun, èn a e sori taki den na lepisma.

Wan papa di nen Stephen, e taki: „Mi ben pruberi fu gi mi pikin na eksempre, fu di mi e taki mi wefi tangi gi a nyanyan.” San ben de a bakapisi? „Den tu umapikin fu mi ben si dati, èn disi yepi den fu frustan moro bun taki den musu sori taki den de nanga tangi”, na so Stephen e taki. Efu yu trow, dan yu gwenti fu taki yu trowpatna tangi gi den sani di a du? Yu e du dati tu te a e du pikinpikin wroko di a gwenti fu du ala dei? Yu e taki yu pikin tangi srefi gi den sani di den musu du?

(2) Gi den leri. A firi di wi abi fu de nanga tangi, de leki bromki. Yu musu sorgu bun gi den bromki so taki den e gro bun. Fa papa nanga  mama kan yepi den pikin fu de nanga tangi èn fu sori dati tu? A koni Kownu Salomo ben tyari wan prenspari sani kon na krin di a ben skrifi: „Na ati fu a regtfardikiwan e prakseri dipi fu sani, so taki a kan gi piki.”—Odo 15:28.

Papa nanga mama, yu kan leri yu pikin fu frustan omeni muiti wan sma meki èn omeni warderi wan sma abi, te a gi den wan kado? Neleki fa bun doti e meki wan bromki gro moro bun, na so a denki di pikin e denki dipi fu den sani disi sa yepi den fu abi moro warderi. Maria, di kweki dri pikin, e taki: „A e teki ten fu sidon nanga yu pikin èn fu fruteri den san a wani taki te wan sma gi den wan kado. Mi e taigi den taki a sma dati ben denki den spesrutu èn taki a ben wani sori den o furu a lobi den. Ma awansi fa a no fa, mi feni taki a leri disi no de fu soso.” Den sortu takimakandra disi e yepi pikin fu sabi san den musu taki te den e sori warderi, èn a e yepi den tu fu sabi fu san ede den musu taki dati.

Papa nanga mama di koni, e yepi den pikin fu no kisi a denki taki ala den bun sani di den e kisi, na sani di den frudini fu kisi, noso taki den musu kisi den sani dati. * Odo 29:21 e gi wan warskow te a abi fu du nanga a fasi fa wan sma musu handri nanga den futuboi fu en. A rai disi e fiti tu na pikin. A tekst e taki: „Te wan sma e pori a futuboi fu en sensi en yongu yari, dan te a kon moro owru a sa tron wan sma di no abi tangi.”

Fa yu kan yepi yongu pikin srefi fu sori warderi? Linda, wan mama di abi dri pikin, e taki: „Mi nanga mi masra e aksi den pikin fu wi fu teken wan sani noso fu skrifi den nen na den karta di wi e seni gi sma fu taki den tangi.” A tru taki, a sani di den teken kande no de wan kefalek sani, noso a no makriki fu frustan san den skrifi. Ma na a fasi disi den pikin e leri o prenspari a de fu sori taki den de nanga tangi.

(3) Yu musu horidoro. Wi alamala gebore nanga a firi fu denki wisrefi nomo, èn a firi disi kan tapu wi fu sori taki wi de nanga tangi (Genesis 8:21; Mateyus 15:19). Ma toku Bijbel e gi futuboi fu Gado a rai disi: „A krakti di e pusu un frustan musu meki unu kon nyun, èn un musu tron wan nyun sma di de soleki fa Gado wani.”—Efeisesma 4:23, 24.

Ma papa nanga mama di abi ondrofeni, sabi taki a no makriki fu yepi den pikin fu „tron wan nyun sma”. Stephen, di wi ben taki fu en kaba, e taki: „A ben gersi leki a ben e teki bun langa, fosi den umapikin fu wi leri fu taki tra sma tangi, sondro taki wi taigi den fu du dati.” Ma Stephen nanga en wefi ben horidoro. Stephen e taki moro fara: „Fu di wi horidoro, meki den meisje fu wi leri a sani disi te fu kaba. Now wi e prisiri fu si taki den e gi trawan tangi gi den sani di den du gi den.”

Fa a de nanga mati èn birtisma?

Te wi no e taki trawan tangi, dan a no abi fu de so taki wi no de nanga tangi, ma a kan taki wi frigiti fu taki dati. Wi e feni en prenspari taki trawan abi warderi gi wi. Ma a de so taki a prenspari trutru fu sori trawan taki wi de nanga tangi? Fu man piki na aksi dati, meki wi go luku wan tori di abi fu du nanga Yesus èn wan tu gwasiman.

Di Yesus ben de na pasi fu go na Yerusalem, a miti tin man di ben abi gwasi. Bijbel e taki: „Den opo den sten, taki: ’Yesus, Leriman, abi sari-ati nanga wi!’ Di Yesus si den, a taigi den: ’Go meki den priester luku unu.’ Di den ben de na pasi ete, den kon krin. Di wan fu den si taki a kon betre, a drai kon baka èn a gi Gado glori nanga wan tranga sten. Dan a boigi na Yesus futusei, èn a taki Yesus tangi; a man disi ben de wan Samariasma.”—Lukas 17:11-16.

A de so taki Yesus no ben poti prakseri na a fasi fa den tra man ben handri? A tori e taki moro fara: „Dati meki Yesus taigi en: ’A no tin sma kon krin? Pe den tra neigi de dan? Nowan fu den drai kon baka fu gi Gado glori; fa a kan taki a man disi wawan di de fu wan tra kondre kon baka fu gi Gado glori?’”—Lukas 17:17, 18.

Den neigi tra gwasiman no ben de takru man. No so langa bifo dati, den ben sori krin taki den e bribi na ini Yesus èn taki den ben de klariklari fu gi yesi na en, di a taigi den fu go na Yerusalem so taki den priester ben kan luku den. A no de fu  taki dati den ben abi bigi warderi gi a bun sani di Yesus du gi den, ma toku den no ben sori dati. Krestes no ben fruwakti taki den ben o handri na so wan fasi. Fa a de nanga wi? Te wan sma e du wi wan bun, dan a de so taki wi de gaw fu taki a sma tangi? Èn te a fiti fu du dati, wi e skrifi wan brifi noso wi e du tra sani di e sori taki wi de nanga tangi?

Bijbel e taki dati „lobi no abi takru maniri èn a no e denki ensrefi nomo” (1 Korentesma 13:5, Today’s English Version). Fu dati ede, te wi e sori warderi trutru, dan dati no e sori nomo taki wi abi bun maniri, ma a e sori tu taki wi abi lobi. Soleki fa wi leri fu a tori fu den gwasiman, dan den sma di wani plisi Krestes musu sori lobi na a fasi dati èn den musu abi warderi gi ala sma, awansi fu sortu kondre den de, awansi fu sortu ras den de, noso awansi sortu bribi den abi.

Aksi yusrefi disi: ’O ten ben de a lasti leisi taki mi gi tangi na wan birtisma, wan sma na wrokope, noso wan sma na skoro? O ten mi gi tangi na wan sma di e wroko na ati-oso, wan sma di e wroko na ini wan wenkri, noso wan tra sma di yepi mi?’ Fu san ede yu no e luku omeni leisi yu taki wan sma tangi? Fu san ede yu no e luku omeni leisi yu skrifi wan brifi noso du wan tra sani fu sori taki yu de nanga tangi? Kande yu kan teki wán noso tu dei fu luku efu yu du dati, èn skrifi na tapu papira omeni leisi yu du dati. Te yu o du dati, dan na so fasi yu o si efu yu musu du moro fu sori taki yu abi warderi.

A no de fu taki dati a sma di wi musu gi moro bigi tangi, na Yehovah Gado. En na a Sma di e gi „ibri bun presenti nanga ibri volmaakti kado” (Yakobus 1:17). O ten ben de a lasti leisi di yu taki Gado tangi nanga yu heri ati gi spesrutu sani di a du gi yu?—1 Tesalonikasma 5:17, 18.

Fu san ede wi musu sori taki wi de nanga tangi aladi trawan no e du dati?

A kan de so taki trawan no e sori taki den de nanga tangi te wi e du wan sani gi den. We, dan fu san ede wi musu sori taki wi de nanga tangi srefi te trawan no e du dati? Luku wán reide fu san ede wi musu du dati.

Te wi e du bun gi sma di no e warderi dati, dan wi sa de leki wi Mekiman, Yehovah Gado di abi switifasi. Furu sma no abi warderi gi a lobi di Yehovah e sori, ma dati no e tapu en fu du bun gi den (Romesma 5:8; 1 Yohanes 4:9, 10). Yehovah e meki „a son fu en opo gi takru sma èn gi bun sma; a e meki alen fadon gi regtfardiki sma èn gi sma di no regtfardiki”. Te wi e du muiti fu de nanga tangi èn fu sori dati tu aladi wi e libi na ini wan grontapu pe sma no de nanga tangi, dan wi sa sori taki wi na „manpikin fu un Tata di de na hemel”.—Mateyus 5:45.

[Futuwortu]

[Prenspari pisi na tapu bladzijde 15]

Teki wán noso tu dei fu luku omeni leisi yu taki wan sma tangi, èn skrifi dati na tapu papira

[Prenki na tapu bladzijde 15]

Yongu pikin srefi kan leri fa den kan sori warderi

[Prenki na tapu bladzijde 15]

Gi den pikin fu yu na eksempre fa den kan sori warderi