Leisiman e aksi

Grontapu sa pori gowe?

Wan rampu no sa pori grontapu. Fu san ede wi kan de seiker taki grontapu no sa pori gowe? Fu di Gado e pramisi taki grontapu „no sa degedege”, ma a sa tan „fu ala ten, noso fu têgo” (Psalm 104:5). Aladi „libisma e gebore, èn libisma e dede”, toku „grontapu e tan fu têgo”, na so Bijbel e taki.—Preikiman 1:4.

Na ini a fosi Hebrew tekst fu Psalm 104:5, tu wortu skrifi di e sori krin taki grontapu sa tan fu têgo. Den tu wortu dati na ʽoh lamʹ di vertaal nanga „fu ala ten”, èn ʽadh di vertaal nanga „fu têgo”. ʽOh lamʹ kan vertaal tu nanga „furu yari”. Soleki fa a wortubuku fu Harkavy e taki, dan ʽadh wani taki tu „wan sani di e tan de, wan sani di no e pori, noso wan sani di de fu têgo” (Students’ Hebrew and Chaldee Dictionary). Den tu Hebrew wortu disi e gi wi wan moro bigi dyaranti taki grontapu noiti no o pori gowe. Meki wi go luku dri tra reide di Bijbel e gi wi fu bribi taki grontapu o tan fu têgo.

A fosi sani, na taki Gado ben meki grontapu so taki libisma man libi na tapu, èn grontapu ben o de wan moi paradijs pe sma ben o nyan bun fu a libi. Grontapu no ben o de wan presi di pori èn pe sma no man libi. Yesaya 45:18 e taki fu Yehovah dati en na „a Mekiman fu hemel, en na a tru Gado, a Sma di seti grontapu èn a Mekiman fu en, a Sma di poti en steifi, di no meki en fu soso, di ben seti en fu sma libi na tapu.”

A di fu tu sani, na taki langa ten kaba Gado pramisi taki sma di e gi yesi na en, ben o libi fu têgo na ini vrede na tapu a grontapu disi. Mika 4:4 e pramisi: „Ibriwan fu den sa sidon trutru na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi taki disi.” Fu dati ede, soleki fa Gado abi na prakseri, grontapu musu de a têgo tanpe fu libisma. Efu dati no ben o de so, dan den pramisi fu en ben o de fu soso.—Psalm 119:90; Yesaya 55:11; 1 Yohanes 2:17.

A di fu dri sani, na taki Gado gi libisma a frantwortu fu sorgu gi a grontapu disi. „Den hemel na fu Yehovah, ma grontapu a gi na den manpikin fu libisma”, na so Gado Wortu e taki (Psalm 115:16). Yu denki taki wan lobi-ati papa ben o gi en pikin wan moi kado èn baka dati a ben o pori a kado disi? Nôno, kwetikweti! Na a srefi fasi, Yehovah no sa pori grontapu nanga den sma di e libi na tapu, fu di „Gado na lobi”.—1 Yohanes 4:8.

Te a abi fu du nanga den sani di Yesus Krestes en Papa taki, dan Yesus e gi wi a dyaranti disi: „Yu wortu na waarheid” (Yohanes 17:17). Gado, di no man lei, e pramisi: „Na den sma di e du san reti, o abi grontapu. Fu têgo den sa tan drape.”—Psalm 37:29; Titus 1:2.

[Sma di abi a reti fu a prenki na tapu bladzijde 31]

Globe: Based on NASA photo